Amalungu Amabili Amasha ENdikimba Ebusayo
NGO-OKTHOBA 5, 2024, kwenziwa isimemezelo esikhethekile emhlanganweni waminyaka yonke esithi: UMfowethu uJody Jedele noJacob Rumph bamiswe njengamalungu eNdikimba Ebusayo yoFakazi BakaJehova. Bobabili la bafowethu sebekhonze uJehova ngokwethembeka iminyaka eminingi.
UJody Jedele nomkakhe uDamaris
Umfoweth’ uJedele wakhulela eMissouri, e-U.S.A. futhi wakhuliswa abazali abangoFakazi BakaJehova. Umndeni wakubo wawuhlala endaweni eyayinoFakazi BakaJehova abambalwa. Ngakho wahlangana nabafowethu nodadewethu abaningi abavela ezindaweni ezihlukahlukene, ababefika bezoshumayela izindaba ezinhle. Uthando ababenalo nobunye kwaba nomthelela omkhulu kuye. Wabhapathizwa esemncane ngo-Okthoba 15, 1983. Wayekuthanda ukushumayela futhi ngemva kokuba eseqede amabanga aphezulu waqala ukuba yiphayona elivamile ngoSepthemba 1989.
Ngesikhathi uMfoweth’ uJedele esemusha, abazali bakhe babehamba naye nodadewabo bayovakashela eBethel. Lokho kwabakhuthaza ukuba bazibekele umgomo wokukhonza eBethel—okuwumgomo yena nodadewabo abawufinyelela. UMfoweth’ uJedele wafika eBethel yaseWallkill ngoSepthemba 1990. Waqale wasebenza eMnyangweni Wezokuhlanza, kamuva wasebenza eMnyangweni Wezokwelapha.
Phakathi naleso sikhathi, amabandla ayekhuluma ulimi lweSpanishi ayelokhu anda futhi kwakudingeka abazalwane. Ngakho uMfoweth’ uJedele wahlanganyela kwelinye lalawo mabandla futhi waqala ukufunda iSpanishi. Ngokushesha nje ngemva kwalokho, wahlangana noDamaris, udade owayephayona esigodini uJedele ayekuso. Ekugcineni bashada base bekhonza ndawonye eBethel.
Ngo-2005, bahamba eBethel ukuze bayonakekela abazali babo abathembekile. Phakathi naleso sikhathi, bakhonza njengamaphayona avamile. UMfoweth’ uJedele wasiza ekufundiseni eSikoleni Senkonzo Samaphayona, wakhonza eKomitini Yokubonisana Nezibhedlela naseKomitini Yokwakha Yesifunda.
Ngo-2013, uMfowethu noDadeweth’ uJedele baphinde bamenywa ukuba beze eBethel bezosiza emsebenzini wokwakha eWarwick. Kusukela ngaleso sikhathi, bakhonze ePatterson naseWallkill. UMfoweth’ uJedele wasebenza eMnyangweni WeLocal Design/Construction naseMnyangweni Wokwaziswa Ngezezibhedlela. NgoMashi 2023, wamiswa njengomsizi eKomitini Yenkonzo. Lapho ecabanga ngezabelo asezenzile, uthi: “Lapho uthola izabelo ezintsha, ngezinye izikhathi ungase ukhungatheke. Kodwa kungaleso sikhathi lapho kumele ukhumbule khona ukuthembela kuJehova ngoba nguye osenza sikwazi ukwenza noma yini asicela ukuba siyenze.”
UJacob Rumph nomkakhe u-Inga
UMfoweth’ uRumph wazalelwa eCalifornia, e-U.S.A. Ngesikhathi eseyingane, umama wakhe wayepholile, kodwa wayeyenza imizamo yokumfundisa amaqiniso eBhayibheli. Wayevakashela nogogo wakhe onguFakazi othembekile njalo ngonyaka. Wasiza uMfoweth’ uRumph ukuba athande iqiniso futhi lapho eseneminyaka engu-13, wacela ukuba aqhutshelwe isifundo seBhayibheli. NgoSepthemba 27, 1992, lapho esengumfana, wabhapathizwa. Ngokujabulisayo, umama wakhe waqala ukushumayela nokuya emhlanganweni yebandla futhi wonke umndeni wakubo wathuthuka wabhapathizwa.
Ngesikhathi esemusha, uMfoweth’ uRumph wayibona indlela amaphayona ayejabule ngayo. Ngakho ngemva kokuqeda isikole samabanga aphezulu, waqala ukuphayona ngoSepthemba 1995. Ngo-2000, wathuthela e-Ecuador ukuze ayokhonza lapho kunesidingo khona. Kuleyo ndawo wahlangana no-Inga, udade oyiphayona waseCanada, ngemva kwalokho bashada. Ngemva kokuba sebeshadile bakhonza edolobheni lase-Ecuador elalineqembu elincane labamemezeli. Manje selinebandla elithuthukayo.
Ngokuhamba kwesikhathi, uMfowethu noDadeweth’ uRumph bamiswa njengamaphayona akhethekile futhi kamuva baqala umsebenzi wokujikeleza. Ngo-2011 bamenyelwa ekilasini laseGiliyadi lika-132. Ngemva kokuthweswa iziqu, bakhonza emazweni ahlukahlukene, bajabulela nezinhlobo ezihlukahlukene zenkonzo, njengenkonzo yaseBethel, eyezithunywa zevangeli nomsebenzi wokujikeleza. UMfoweth’ uRumph wajabulela nelungelo lokufundisa eSikoleni Sabashumayeli Bevangeli LoMbuso.
Ngenxa yobhubhane lwe-COVID-19, uMfowethu noDadeweth’ uRumph babuyela e-United States. Bamenywa ukuba bayokhonza eBethel yaseWallkill, lapho uMfoweth’ uRumph aqeqeshwa khona eMnyangweni Wenkonzo. Ekugcineni, bacelwa ukuba babuyele egatsheni lase-Ecuador, lapho uMfoweth’ uRumph akhonza khona eKomitini Yegatsha. Ngo-2023 bayiswa eWarwick. NgoJanuwari 2024, uMfoweth’ uRumph wamiswa ukuba abe umsizi eKomitini Yenkonzo. Uma ecabanga ngezindawo asekhonze kuzo, uthi, “Into eyenza isabelo sikhetheke akuyona indawo okhonza kuyo, kodwa abantu obakhonzayo.”
Siyawazisa umsebenzi onzima owenziwa yilaba bafowethu futhi ‘siyaqhubeka sibheka amadoda alolu hlobo njengathandekayo.’—Fil. 2:29.