Yiba Nekhono Lokusebenzisa IBhayibheli
1. Kungani iBhayibheli liwusizo kangaka?
1 Ukusebenzisa iZwi likaNkulunkulu eliphefumulelwe ngekhono kusenza sikwazi ukumemezela nokufundisa iqiniso ngokucacile futhi siveze izimfundiso namasiko abantu angamanga.—2 Thim. 2:15; 1 Pet. 3:15.
2. Yini eyosisiza ukuba sibe nekhono ngokwengeziwe lokuthola imiBhalo?
2 Thuthukisa Ulwazi Lwakho Ngalo: Ikhono lokusebenzisa ithuluzi elithile, litholakala ngokulisebenzisa njalo. Ukulifunda lonke iBhayibheli kukunika umqondo womongo walo. Lokhu kukusiza nokuba ukhumbule imiBhalo futhi uyithole kalula. Njengoba ukujwayela kwakho imiBhalo kuthuthuka, uyokhuluma ngentshiseko eyengeziwe nangokuqiniseka lapho ufakaza kwabanye ngokwethukela nasenkonzweni yasensimini.—1 Thes. 1:5.
3, 4. (a) Yiziphi izindlela esingathuthukisa ngazo ukujwayelana kwethu neBhayibheli? (b) Ingabe usuke wazisebenzisa ezinye izindlela zokuyazi kangcono imiBhalo?
3 Kwenze umkhuba ukuvula iBhayibheli lakho futhi uhambisane nesikhulumi emihlanganweni yebandla. Lapho wenza isifundo somuntu siqu nalapho ulungiselela imihlangano yebandla, hlola imiBhalo ekhonjiwe futhi uzindle ngendlela esebenza ngayo. Abaningi bathola ukuthi ukufunda imibhalo eBhayibhelini kunakuyi-computer noma ephepheni elinyathelisiwe kwenza kube lula ukuyithola kamuva lapho idingeka enkonzweni.—Joh. 14:26.
4 Eminye imikhaya iye yahlela izikhathi zokuzikhumbuza imibhalo yeBhayibheli. Lokhu kungase kwenziwe ngokusebenzisa amakhadi amancane abhalwe isikhombo somBhalo kolunye uhlangothi bese kuba yilowo mbhalo kolunye uhlangothi. Bayashintshana ngokusebenzisa la makhadi ukuze babone ukuthi bangawuthola yini lowo mbhalo noma bakhumbule ukuthi ukuphi. Ukuprakthiza izethulo zasensimini, nokuphendula abaphikisayo noma imibuzo usebenzisa iBhayibheli kungalithuthukisa ikhono lakho.
5. Kungani sifuna ukuthuthukisa ikhono lethu lokusebenzisa iBhayibheli?
5 Ayikho enye incwadi efana neBhayibheli. Liqukethe imibhalo okuyiyona kuphela ekwazi ukwenza abantu ‘bahlakaniphele insindiso.’ (2 Thim. 3:15) Njengoba abantu abaningi ensimini yethu bengawujwayele umcebo oyigugu otholakala eBhayibhelini, sinesizathu esihle sokuthuthukisa ikhono lethu lokubabonisa ukuthi liquketheni ngempela iBhayibheli.—IzAga 2:1-5.