IBhokisi Lemibuzo

◼ Ingabe bobabili abazali bangasibika isikhathi esisetshenziselwa isifundo somkhaya sasikhathi sonke?

Nakuba obaba benomthwalo wemfanelo oyinhloko wokukhulisa izingane zabo “ngesiyalo nangokuqondisa umqondo kukaJehova,” bobabili abazali banengxenye ekuqeqesheni izingane zabo. (Efe. 6:4) IBhayibheli likhuthaza izingane: “Ndodana yami, lalela isiyalo sikayihlo, ungawushiyi umthetho kanyoko.” (IzAga 1:8) Enye ingxenye ebaluleke kakhulu yokuqeqesha kwabazali yisifundo seBhayibheli somkhaya.

Esikhathini esidlule, kwakungumzali oqhuba isifundo somkhaya nezingane ezingabhapathiziwe kuphela owayebika isikhathi, nakuba bobabili abazali babehileleka engxoxweni. Kodwa lokhu sekuyalungiswa. Uma phakathi nesifundo bobabili abazali behlanganyela ekufundiseni izingane, bobabili bangasibika isikhathi esingeqi ehoreni elilodwa ngesonto njengenkonzo yasensimini. Kuyiqiniso, ngokuvamile abazali bachitha isikhathi esingaphezu kwehora elilodwa ngesonto befundisa izingane zabo. Ukuqeqesha izingane kuhilela umzamo wasikhathi sonke kubo bobabili abazali. (Dut. 6:6-9) Nokho, umbiko wenkonzo yasensimini wanyanga zonke kufanele ubonise ngokuyinhloko lokho okufezwayo ensimini. Ngakho-ke, akufanele kubalwe isikhathi esingaphezu kwehora elilodwa ngesonto, ngisho noma isifundo sidonsa isikhathi esingaphezu kwehora, siqhutshwa izikhathi ezingaphezu kwesisodwa ngesonto, noma kuqhutshwa isifundo esihlukile nengane ngayinye. Umzali oyedwa kuphela ozobika isifundo seBhayibheli somkhaya kanye nempindelo eyodwa vó isonto ngalinye uma kuqhutshwa isifundo.