‘Lungelani Yonke Imisebenzi Emihle’
1 Lapho uJesu eqala umkhankaso omusha wokushumayela, wazinika isikhathi sokulungiselela abafundi bakhe. (Math. 10:5-14) Nakuba sonke simatasa, ukuzinika imizuzu nje embalwa ukuze silungiselele ngaphambi kokuba siye enkonzweni yendlu ngendlu kuyosisiza ukuba sithole imiphumela emihle.—2 Kor. 9:6.
2 Indlela Yokulungiselela: Ukulungiselela okuhle kuqala ngokwazi izincwadi esihlela ukuzihambisa. Kufanele sicabange nangabantu ensimini yethu. Yiziphi izinto ezibakhathazayo? Yiziphi izinkolelo esingase sithole ukuthi banazo? Singase sifunde izintshumayelo eziyisibonelo ezikuyi-Nkonzo Yethu YoMbuso nasencwadini Ukubonisana NgemiBhalo ukuze sithole amasu.
3 Ukulalelisisa imiboniso eMhla-nganweni Wenkonzo nakho kuyosisiza. Njengoba sizuza ulwazi ekusebenziseni izintshumayelo zethu siyodinga isikhathi esincane ukuze silungiselele. Kodwa siyophumelela ngokwengeziwe uma isikhathi ngasinye ngaphambi kokuba siye enkonzweni, sicabanga ngalokho esizokusho futhi siqhubeka silungisa intshumayelo yethu. Kufanele sizinike nesikhathi sokuhlola ukuthi isikhwama sethu sensimu sinakho esiyokudinga.
4 Yini eyosisiza ukuba sikhumbule intshumayelo yethu? Ukuprakthiza ngokuzwakalayo kungenye indlela yokukugxilisa engqondweni lokho esifuna ukukusho. Abanye bajabulela ukuprakthiza lapho benesifundo sabo somkhaya. Abanye bakuthola kulusizo ukubhala phansi intshumayelo efingqiwe ekhadini nokulithi nhla ngaphambi kokuba bafike emnyango.
5 Okwenza Kuzuzise: Ukulungiselela kahle kwandisa amathuba okuphumelela nokujabulela inkonzo. Kusisiza ukuba sikhululeke futhi singesabi lapho sikhuluma nabantu. Siyakwazi ukunaka umninikhaya kunokuba sikhathazeke ngalokho esizokusho. Ngaphezu kwalokho, ukwazi izincwadi esiziphethe kuyosisiza ukuba sibe nentshiseko kakhudlwana lapho sizihambisa.
6 ImiBhalo isikhuthaza ukuba ‘silungele yonke imisebenzi emihle.’ (Thithu 3:1) Yimuphi omunye umsebenzi ongcono kunokushumayela izindaba ezinhle? Ngokulungiselela kahle, sibonisa ukuthi siyamhlonipha umninikhaya ovumayo ukusilalela kanye noJehova, uNkulunkulu esimmelelayo.—Isaya 43:10.