Londoloza Umuzwa Wokuphuthuma!
1 UJesu wayazi ukuthi isikhathi ayenaso emhlabeni sokufeza umsebenzi kaYise sasilinganiselwe. (Joh. 9:4) Ngakho, wenza inkonzo yakhe enomuzwa wokuphuthuma, futhi waqeqesha abafundi bakhe ukuba benze okufanayo. (Luka 4:42-44; 8:1; 10:2-4) Ukunethezeka okulethwa izinto ezibonakalayo kwakungabalulekile kuye. (Math. 8:20) Ngakho, wakwazi ukuqeda umsebenzi uJehova ayemnike wona.—Joh. 17:4.
2 Isikhathi Esilinganiselwe: Isikhathi sokushumayela izindaba ezinhle “emhlabeni wonke owakhiwe” naso silinganiselwe. (Math. 24:14) Iziprofetho zeBhayibheli zembula ukuthi singene shì esikhathini sokuphela. Maduze ‘labo abangamazi uNkulunkulu nalabo abangazilaleli izindaba ezinhle mayelana neNkosi yethu uJesu bazothola isijeziso sokwahlulelwa esiwukubhujiswa okuphakade.’ (2 Thes. 1:6-9) Leso sahlulelo sizofika ngokukhulu ukuzuma. (Luka 21:34, 35; 1 Thes. 5:2, 3) Kudingeka abantu baphaphame babone isimo sabo esibucayi. Kungumthwalo wethu wemfanelo ukubasiza ukuba bafune ukuvunyelwa uJehova isikhathi sisekhona.—Zef. 2:2, 3.
3 Ukwenza Konke Esingakwenza: Njengoba izinceku zikaNkulunkulu ziqaphela ukuthi “isikhathi esesisele sinciphile,” zibeka umsebenzi wokushumayela kuqala. (1 Kor. 7:29-31; Math. 6:33) Abanye baye badela amathuba okwenza imali noma ezinye izinto abebengazenzela zona ukuze bathuthukise izinga abahlanganyela ngalo enkonzweni. (Marku 10:29, 30) Abanye bayaqhubeka ‘benokuningi kokukwenza emsebenzini weNkosi’ naphezu kwezinhlupheko ezingapheli. (1 Kor. 15:58) Sekuyiminyaka abaningi bememezela izindaba ezinhle obala ngaphandle kokuntengantenga. (Heb. 10:23) UJehova ukwazisa kakhulu konke ukuzidela okunjalo okwenzelwa ukusekela izithakazelo zoMbuso.—Heb. 6:10.
4 Ukugxilisa ukuphila kwethu ekukhulekeleni uJehova, okuhlanganisa umsebenzi wokushumayela, kusisiza ukuba sigcine usuku lukaJehova luseduze engqondweni. Kusivikela ekuphazanyisweni izwe likaSathane futhi kuqinise ukuzimisela kwethu ukulondoloza ukuziphatha okungcwele. (2 Pet. 3:11-14) Ngempela, ukwenza inkonzo yethu sinomuzwa wokuphuthuma kungasindisa ukuphila, kokubili okwethu nokwalabo abasilalelayo.—1 Thim. 4:16.