Izingubo Ezilungiswe Kahle Zibonisa Ukuhlonipha UNkulunkulu
1. Singakubonisa kanjani ukwazisa ngomhlangano wethu wesigodi ozayo?
1 Ngokushesha nje sizoba nelungelo lokuba yizimenywa zikaJehova eMhlanganweni Wezizwe noma Wesigodi ‘Wokukhazimulisa UNkulunkulu’ Ka-2003. Yeka indlela esimbonga ngayo uJehova ngokusimemela edilini elingokomoya elicebe kangaka! Singabonisa ukumhlonipha kwethu nokwazisa kwethu ngamalungiselelo akhe angokomoya ngendlela esigqoka futhi sizilungise ngayo.—IHu. 116:12, 17.
2. Kungani kubalulekile ngathi ukuba sihlanzeke futhi sizilungise kahle?
2 Ukuhlanzeka Nokuhleleka: Indlela esibonakala ngayo kufanele ibonakalise izindinganiso zikaNkulunkulu wethu, ohlanzekile futhi ohlelekile. (1 Kor. 14:33; 2 Kor. 7:1) Imizimba yethu, izinwele, nezinzipho kufanele kuhlanzeke, futhi kufanele sizilungise kahle. Ukuzilungisa ngendlela yobudlabha kuvamile namuhla. Nokho, ukuthi isihlabani sebhayisikobho noma isihlabani sezemidlalo sibukeka siyidlabha, akusho ukuthi nomKristu kufanele enze kanjalo. Uma silandela izitayela, kungase kube nzima kubantu ukubona umehluko phakathi kwalabo abakhonza uNkulunkulu weqiniso nalabo abangamkhonzi.—Mal. 3:18.
3. Singaqiniseka kanjani ukuthi ukubonakala kwethu kuyavumelana neseluleko esitholakala kweyo-1 Thimothewu 2:9, 10?
3 Ukugqoka Okufanela Izikhonzi EzingamaKristu: Lapho umphostoli uPawulu ebhalela umbonisi ongumKristu uThimothewu, wakhuthaza “ukuba abesifazane bazihlobise ngezingubo ezilungiswe kahle, ngesizotha nangokuhluzeka kwengqondo, . . . ngendlela efanele abesifazane abathi bahlonipha uNkulunkulu, okungukuthi, ngemisebenzi emihle.” (1 Thim. 2:9, 10) Kudingeka sicabangisise kahle ukuze siqiniseke ukuthi izingubo esizigqokile zilungiswe kahle. Izingubo zethu kufanele zihlanzeke futhi zibe nesizotha—kungabi ezokubukisa okungamukeleki, noma ezivusa inkanuko.—1 Pet. 3:3.
4, 5. Yiziphi izinto abesilisa nabesifazane abangamaKristu okufanele baziqaphele?
4 UPawulu waxwayisa nangokweqisa ‘ezitayeleni zokweluka izinwele nangegolide noma amapharele noma ngemvunulo ebiza kakhulu.’ (1 Thim. 2:9) Ukulinganisela ekusebenziseni ubukhazikhazi bokuhloba, izimonyo, nezinye izinto zokuzihlobisa kuyinkambo yokuhlakanipha okufanele ilandelwe abesifazane abangamaKristu.—IzAga 11:2.
5 Iseluleko uPawulu asibhekisa kwabesifazane abangamaKristu siyasebenza nakwabesilisa abangamaKristu. Abazalwane kufanele bagweme izitayela ezibonisa ukucabanga kwezwe. (1 Joh. 2:16) Ngokwesibonelo, kwamanye amazwe kuthandwa izingubo ezimxegayo umuntu, ezinkulu kunaye, kodwa lesi sitayela asisimeleli kahle isikhonzi sikaNkulunkulu.
6. Kungani kufanele sibe nezindinganiso eziphakeme endleleni esigqoka futhi sizilungise ngayo uma sisaya noma sesibuya emhlanganweni, lapho sisemhlanganweni nangemva kwesimiso sosuku ngalunye?
6 Lapho Sizilibazisa: Lapho besesimisweni somhlangano, abazalwane nodade abaningi babeka isibonelo esihle kakhulu endabeni yokugqoka nokuzilungisa. Nokho, imibiko ibonisa ukuthi abanye abanaki uma besaya noma sebebuya emhlanganweni noma lapho bezilibazisa ngemva kwesimiso. Eqinisweni, ukugqoka nokuzilungisa kwethu—phakathi nesimiso somhlangano noma ngezinye izikhathi—kuyayithonya indlela abanye ababheka ngayo abantu bakaNkulunkulu. Njengoba sifaka amabheji ethu omhlangano, ngaso sonke isikhathi kufanele sigqoke ngendlela efanela izikhonzi ezingamaKristu. Lokhu kuvame ukushukumisela abanye ukuba basincome futhi kuvule indlela yokufakaza kubo.—1 Kor. 10:31-33.
7. Izingubo zethu ezilungiswe kahle kanye nokuzilungisa kungaba namuphi umphumela kwabanye?
7 Njengoba nje ukumamatheka komusa kuthuthukisa ukubukeka kobuso bethu, ngokufanayo, izingubo ezilungiswe kahle nokuzilungisa kwenza isigijimi esisiphethe nenhlangano esiyimelele, kuhlonipheke. Abanye abayosibona phakathi noMhlangano Wesigodi ‘Wokukhazimulisa UNkulunkulu’ kulo nyaka, bangase bashukumiseleke ukuba babuze ukuthi kungani sihlukile futhi bangaze bagcine bethé: “Sizohamba nani, ngoba sizwile [futhi sabona] ukuthi uNkulunkulu unani.” (Zak. 8:23) Sengathi ngamunye wethu angabonisa ukuhlonipha kwethu uJehova ngendlela esigqoka futhi sizilungise ngayo.
[Ibhokisi ekhasini 9]
Bonakala Ngendlela Ehloniphekile
▪ Lapho usaya noma usubuya
▪ Lapho usemhlanganweni
▪ Ngezikhathi zokuzilibazisa