Ukugqoka Nokuzilungisa Ngesizotha
1 “Wonke amadoda, ngisho nabafanyana, bafaka othayi. Bonke abesifazane namantombazane, amatshitshi nabancane, bagqoka ingubo noma isiketi. Abekho abagqoke obhogadi noma abangabafakanga othayi. Bonke baqhakazile.” Washo kanjalo umbiko wezindaba. Hlobo luni lwesixuku olwaluchazwa yilo mbiko? Ingabe kwakuwumbuthano wezombangazwe? Izibukeli zezemidlalo? Ikhonsathi yomculo we-rock? Lutho neze! Wawuchaza iqembu labafowethu nodadewethu emhlanganweni wesigodi omkhulu.
2 Kwelinye idolobha lomhlangano, intatheli yephephandaba elithile yasichaza ngale ndlela isixuku soFakazi: “Wonke amadoda ahlanzekile futhi agqoke amasudi nothayi. Abesifazane bagqoka ngesizotha kodwa ngendlela ebukekayo.” Enye ingqapheli ewunogada, yathi: “Ningabantu abaziphatha kahle, abahloniphayo, abahlanzekile nabacocekile. Kuyangijabulisa lokhu engikubonayo. Kuleli zwe elingcolile, nikwazile ukuhlala ningangcolile!” Yeka ukunconywa kwethu okuhle! Ingabe asijabuli ngokuthi kukhulunywa kahle kangaka ngabazalwane bethu? Kuyiqiniso ukuthi bonke abakulesi sixuku baba nengxenye kule mibiko emihle ngokubukeka kwabo okuyisibonelo.
3 Saziwa emhlabeni wonke ngokubukeka kwethu okuhluke ngendlela evelele. (Mal. 3:18) Ngani? Ngenxa yokuthi silandela isiyalo esingokomBhalo sokuba “[sizihlobise] ngezingubo ezilungiswe kahle, ngesizotha nangokuhluzeka kwengqondo, . . . ngendlela efanele [labo] abathi bahlonipha uNkulunkulu.”—1 Thim. 2:9, 10.
4 Ukugqoka Nokuzilungisa Kwakho Kubonisani? Izingubo esizigqokayo nendlela esizigqoka ngayo ziveza okuthile ngathi—izinkolelo zethu, isimo sethu sengqondo nezinhloso zethu. Izitayela esizikhethayo zibonisa ukuthi singobani nalokho esikumelelayo. Akumelwe neze sikhuthaze ukucabanga okuwohlokile nokuziphatha okuthandwa yizwe. Esikukhathalelayo akukhona ukuthi isitayela esithile sisemfashinini noma cha kodwa ukuthi siyamfanela yini umuntu othi uyisikhonzi sikaNkulunkulu. (Roma 12:2) Esikhundleni sokukhetha ukubukeka okuqhakambisa umoya wokuzibusa noma okuthambekele endleleni yokuphila ngokuziphatha okubi, sifuna ukubonisa ukuthi ngempela ‘sikhazimulisa uNkulunkulu.’—1 Pet. 2:12.
5 Ngezinye izikhathi, umuntu osemusha eqinisweni, ongenalwazi, noma obuthaka ngokomoya angase amukele noma yini izwe eliyikhuthazayo ekugqokeni nokuzilungisa ngaphandle kokucabangela kuqala indlela okumthinta ngayo uJehova nenhlangano yakhe. Sonke singase sizihlole ukuze sibone ukuthi asithonyiwe yini indlela yezwe yokucabanga. Singase siye kumfowethu noma udadewethu ohloniphekile novuthiwe ngokomoya futhi sicele umbono wakhe oqotho ngendlela yethu yokugqoka nokuzilungisa bese sikucabangela ngokungathí sina ukusikisela akunikezayo.
6 Abanye bayavuma ukuthi kufanele bacophelele ukuthi bagqoka kanjani lapho besemhlanganweni. Kodwa-ke behlisa izinga lapho bengcebeleka ngemva kwesimiso somhlangano. Londoloza indinganiso ephakeme efanele izikhonzi ezingamaKristu. (2 Kor. 6:3, 4) Nomaphi lapho sisemphakathini, amabheji ethu omhlangano kanye nokugqoka nokuzilungisa kwethu okufanele kusibonakalisa njengoFakazi BakaJehova. Ngakho, izingubo zethu kufanele ngaso sonke isikhathi zibe ezilungiswe kahle nezinesizotha, zibonise ukuthi ‘asiyona ingxenye yezwe.’—Joh. 15:19.
7 EMhlanganweni Wesigodi ‘Wabamemezeli BoMbuso Abashisekayo’ kulo nyaka, masenzeni konke okusemandleni ethu ukubonisa ukuthi ‘siyisizwe esingcwele kuJehova uNkulunkulu wethu.’ Idumela elihle eliwumphumela walokhu liyonezela ‘ekubongweni, egameni nasodumweni’ lukaJehova.—Dut. 26:19.
[Ibhokisi ekhasini 6]
Indlela Yokukhazimulisa UJehova:
■ Gqoka ngendlela efanele isikhonzi sikaNkulunkulu.
■ Gwema izitayela ezibonisa umoya wezwe.
■ Yiba nesizotha, esibonisa ukuhluzeka kwengqondo.