Ungazenza Yini Utholakale?
1 Kwenzeka isenzakalo esingavamile ngonyaka ka-778 B.C.E. Embonweni, umprofethi u-Isaya ubona “uJehova ehlezi esihlalweni sakhe sobukhosi esiphezulu nesiphakemeyo.” U-Isaya ube esezwa amaserafi edonsela ukunaka enkazimulweni kaJehova, ethi: “Ungcwele, ungcwele, ungcwele uJehova Sebawoti.” Yeka indlela okumelwe ukuba lokhu kwakwesabeka ngayo! Kusenjalo, uJehova ubuza umbuzo oyinselele: “Ngiyakuthuma bani, ngubani oyakusiyela na?” Akukho ncazelo enikezwayo ngokuphathelene nohlobo lwesabelo noma ukuthi lowo ozimisele ukusenza uyozuza yini kuso. Nokho, ngaphandle kokungabaza, u-Isaya uyasabela: “Nangu mina; ngithume mina.”—Isaya 6:1, 3, 8.
2 Lo moya wokuzimisela ukwenza noma yini uJehova ayicelayo wenza abantu bakhe bahluke. (IHu. 110:3) Futhi manje ubizo olukhethekile luya kulabo abangazenza batholakale. Ingabe ukulungele ukusabela ngomoya ovumayo, ofana noka-Isaya?
3 Kunesidingo esiqhubekayo sabazalwane abazokhonza eBethel. Lokhu kudinga ukuba babe nesifiso esinamandla sokubeka izithakazelo zoMbuso kuqala futhi bazimisele ukwenza noma yini engase idingeke ukuze basekele umsebenzi wokushumayela womhlaba wonke. (Math. 6:33) Empeleni, ukukhonza njengelungu lomkhaya waseBethel kunikeza umuntu ithuba elikhethekile lokukhonza uJehova ngomphefumulo wonke. Kanjani?
4 Umsebenzi Owenziwa EBethel: Cabanga ngakho konke okufezwa njalo eBethel yaseNingizimu Afrika. Abazalwane nodade abangu-580 abakha umkhaya waseBethel banelungelo lokuhileleka ngokuseduze ekusekeleni isigaba sesigqila esithembekile nesiqondayo kanye neNdikimba Ebusayo yaso ekulungiseleleni amaBhayibheli nezincwadi zeBhayibheli ukuze zisetshenziswe e-Afrika eseningizimu nasesifundweni somuntu siqu. (Math. 24:45) Ngokwesibonelo, ngonyaka wenkonzo odlule, kwanyatheliswa futhi kwathunyelwa izincwajana ezingu-5 029 280, omagazini abangu-22 745 923 namakhophi e-Nkonzo Yethu YoMbuso angu-5 194 484 ngenxa yomzamo ohlangene womkhaya waseBethel YaseNingizimu Afrika. Ukushintshela elungiselelweni lokusakaza izincwadi elenziwe lula kuye kwalandisa kakhulu inani lomagazini nezincwadi ezinyatheliswayo. Ngokwesibonelo, njengamanje kunyatheliswa omagazini abacishe babe yizigidi ezingu-3,5 inyanga ngayinye. I-Shipping Department manje ithumela izincwadi ezingaphezu kwezigidi ezintathu nyanga zonke emabandleni aseNingizimu Afrika naseMalawi, eMozambique, eZambia nawaseZimbabwe, esiwagcinela izincwadi. Zonke izinkomba zibonisa ukuthi umsebenzi uzoqhubeka wanda esikhathini esizayo. Futhi kunikezwa neziqondiso emabandleni angaphansi kwegatsha lethu angaphezu kuka-1 500. Kusizwa futhi namagatsha ase-Afrika ahileleke emsebenzini wokuhlela nokwakha amakhaya aseBethel engeziwe, amaHholo Omhlangano namaHholo OMbuso acela ku-8 000 adingekayo njengamanje emazweni ase-Afrika antula izimali. Kudingeka amakhulu ezisebenzi zokuzithandela ukuze anakekele ukunyatheliswa nokuthunyelwa kwezincwadi, ukuhlanza, ukunakekela izakhiwo, ukupheka, ukuthenga, ukunakekela impilo neminye imisebenzi eminingi eBethel.
5 Ukufeza yonke le misebenzi kuwumsebenzi omkhulu kodwa owanelisayo ngokomoya. Ukwazi ukuthi wonke amandla ethu asetshenziselwa ukusekela umsebenzi wokushumayela nokufundisa kuphumela enjabulweni enkulu. Inkonzo yaseBethel isisiza ukuba siyazi kangcono kakhulu inhlangano kaJehova. Siyakhunjuzwa ukuthi umhubi wakhuthaza ama-Israyeli ukuba asazi kahle kakhulu isikhungo sokubusa okungokwasezulwini osukwini lwawo.—IHu. 48:12, 13.
6 Izibusiso Zenkonzo YaseBethel: Labo abakhonza eBethel bazizwa kanjani ngamalungelo abo enkonzo? Phawula amazwi alandelayo ashiwo ngabakhonza eBethel kokubili abasebasha nasebekhulile. Esinye isikhonzi saseBethel esesijabulele iminyaka emithathu yenkonzo yaseBethel sithi: “Ukuba seBethel kuye kwaqinisa ubuhlobo bami noJehova. Njengoba ngiqhubeka ngikhonza lapha futhi ngifunda okwengeziwe ngendlela iBethel esebenza ngayo, ngifunda okwengeziwe ngobuntu bukaJehova. Inkonzo yaseBethel iye yangivula amehlo futhi ukuze ngibone ukuthi uJehova usebenzisa abantu—zonke izinhlobo zabantu. Futhi akudingeki ube umuntu ophelele ukuze wamukeleke kuye.”
7 Omunye umzalwane osemusha uyakhumbula: “Ngikhumbula ngicabanga, ‘Yeka ukuthi kuyoba mnandi kanjani ukungena ezweni elisha futhi ngitshele amadoda athembekile asendulo ukuthi ngakhonza iminyaka eminingi eBethel, hhayi ngaphandle ngizama ukuceba.’”
8 Umzalwane osemusha uzindla ngokuqeqeshwa aye wakuthola: “Ukuzazi kangcono nokwazi lokho okumelwe ngisebenzele kukho bese ngithuthukisa lezo zimfanelo kuye kwaba isibusiso esikhulu. Nginomuzwa wokuthi manje sengikwazi kangcono ukukhonza uJehova. Ngithola ukuthi sengibekezela kakhudlwana, sengizithiba kangconywana futhi sengiyakwazi ukubonisa uthando ngezinga elikhudlwana.”
9 Udade othile ucabanga ngezibusiso aye wazithola kuze kube manje: “Izinhlelo ezingokomoya lapha ziye zangifundisa okwengeziwe ngoJehova nangendlela engingamlingisa ngayo kangcono ngokucabanga, imizwa nezenzo. Futhi ngenxa yokuthi ukuqeqeshwa kuyaqhubeka, kuyisibusiso esiqhubekayo.”
10 Umzalwane oye wanikela ingqikithi yeminyaka engu-59 enkonzweni yesikhathi esigcwele, engu-43 kuleyo minyaka eseBethel, wathi: “IBethel ayifani nendawo yezindela, njengoba abanye bengase bacabange. Sifeza okuningi ngenxa yendlela yethu yokuphila ehlelekile. . . . Alukho usuku lapho ngiya emsebenzini futhi ngingakujabuleli engikwenzile. Ngani? Ngoba lapho sizinikela ngomphefumulo wonke kuJehova, sithola ukwaneliseka kokwazi ukuthi ‘senze obekufanele sikwenze.’”—Luka 17:10.
11 Omunye umzalwane osekhonze eBethel iminyaka engu-62, wathi: “Ngikholelwa ngokuqinile ukuthi iBethel iyindawo engcono kakhulu emhlabeni ngapha kwePharadesi lasemhlabeni elizayo. Angikaze ngizisole nakancane ngokwenza inkonzo yesikhathi esigcwele ibe umsebenzi wokuphila kwami konke. Yeka injabulo okuye kwaba yiyo ukufakaza nokuhlanganyela ekwandeni okukhulu kwenhlangano kaJehova yasemhlabeni! Ngizimisele, ngosizo lukaJehova, ukuqhubeka ngenza iBethel ibe yikhaya lami futhi ngizimisele ngomphefumulo wonke ekuthuthukiseni izithakazelo zoMbuso.”
12 Lama lungu omkhaya waseBethel aphawule izibusiso ezimbalwa nje kweziningi ongazijabulela uma uzenza utholakalele inkonzo yaseBethel. Kodwa njengoba kunjalo ngokuthola noma iliphi ilungelo lenkonzo, kufanele uqale uhlangabezane nezimfanelo. Iziphi ezinye zezimfuneko zokukhonza njengelungu lomkhaya waseBethel?
13 Izimfuneko Zenkonzo YaseBethel: Izimfuneko eziyisisekelo zalabo abenza izicelo zenkonzo yaseBethel zivezwe ebhokisini elikulesi sihloko. Ngaphezu kwalokho, kubalulekile ukuba bazimisele ukusebenza ngenkuthalo bangabi “abathandi bezinjabulo.” (2 Thim. 3:4; 1 Kor. 13:11) Amalungu omkhaya waseBethel kufanele abe amadoda nabesifazane abangokomoya abanemikhuba emihle yokutadisha futhi abaye baqeqesha amandla abo okuqonda ukuze bakwazi “ukuhlukanisa kokubili okulungile nokungalungile.” (Heb. 5:14) Ukuvuthwa kwabo kobuKristu kumelwe kube sekubonakele kakade kuzo zonke izici zokuphila, ezihlanganisa ukugqoka kwabo, ukuzilungisa, umculo abawukhethayo nokuzijabulisa. Amalungu omkhaya waseBethel anenhliziyo evumayo akhonza nomaphi lapho engase adingeke khona. Ngokuvamile amalungu asemasha anikezwa izabelo ezihilela umsebenzi wezikhwepha, ohlanganisa ukunyathelisa, ukulungisa nokuthumela izincwadi, ukunakekela izakhiwo, ukulungisa amagumbi okuhlala, ukuhlanza, ukuwasha izingubo nokupheka. (IzAga 20:29) Nokho, ngokungafani nomsebenzi wokuziphilisa, isabelo ngasinye siletha ukwaneliseka okukhulu ngoba siyinkonzo engcwele ekhazimulisa uJehova.—Kol. 3:23.
14 Labo ababizelwa inkonzo yaseBethel bangahlala isikhathi esingengaphansi konyaka. Lokhu kwenza baqeqeshelwe ukuba izisebenzi ezikhiqizayo. Sethemba ukuthi bayokwazi ukwenza iBethel ibe yikhaya kubo. Ukuthanda uJehova kushukumisa amalungu omkhaya waseBethel ukuba abeke umsebenzi woMbuso ngaphambi kwezithakazelo zawo siqu, okuyinto emjabulisayo uJehova.—Math. 16:24.
15 Izidingo Zamanje: Ngenxa yohlobo lomsebenzi owenziwa eBethel, okwamanje sidinga ngokuyinhloko abazalwane abangashadile. Nakuba kungeyona imfuneko, kucatshangelwa kuqala labo abangamaphayona avamile, ngoba kakade basenkonzweni yesikhathi esigcwele. Ngezinye izikhathi kungase kube nezikhala zodade abangashadile nemibhangqwana eshadile, abaneminyaka ephakathi kuka-19 kuya ku-35, okungenzeka ukuthi banamakhono athile adingekayo eBethel. Ngaphezu kwalokho, abazalwane nodade abathile okungenzeka bangaphezudlwana kweminyaka engu-35 ubudala futhi abanamakhono nokuqeqeshwa okukhethekile okungase kusetshenziswe eBethel bayakhuthazwa ukuba bafake isicelo. Ngokwesibonelo, laba bahlanganisa odokotela bamazinyo, abanezincwadi zokuhlola amabhuku ezimali (certified public accountants), abadwebi bamapulani, onjiniyela, abahlengikazi ababhalisiwe, abalungisa izimoto ezihamba ngophethiloli nezihamba ngo-diesel, noma ochwepheshe bama-electronics, uma sibala izibonelo ezimbalwa nje. Nokho, asibakhuthazi abantu ukuba bathole imfundo ekhethekile nokuqeqeshwa benombono wokuthi lokhu kuyokwandisa amathuba okuba bazokhonza eBethel. Labo asebeye bakuthola kakade ukuqeqeshwa okuthile okukhethekile, mhlawumbe ngaphambi kokuba bathole iqiniso, bangase bafise ukubhala incazelo eningiliziwe futhi bayithumele nesicelo saseBethel.
16 Ungadumali uma ufaka isicelo kodwa ungabizwa ukuba uzokhonza eBethel. Ungase ucabangele ukuvuselela isicelo sakho kanye unyaka ngamunye. Abanye abazalwane abanamakhono nokuqeqeshwa okukhethekile okungase kudingeke eBethel baye bazenza batholakalela inkonzo yezisebenzi zokuzithandela zesikhashana. Bangase bafake isicelo sokukhonza isikhashana eBethel isonto elilodwa, amabili, amathathu, noma amane noma kuze kube izinyanga ezintathu. Uma unesithakazelo kuleli lungiselelo, siza ubhalele ihhovisi legatsha.
17 Ukukhonza uJehova ngokusebenzelana eduze nabafowabo bakaKristu kuyilungelo eliyingqayizivele kulabo abasebenza eBethel. INdikimba Ebusayo iyawazisa umoya wokuzidela wabo bonke labo abazenza batholakalele ukukhonza izidingo zobuzalwane bethu bomhlaba wonke.—Fil. 2:20-22; 2 Thim. 4:11.
18 Bantwana—Zilungiseleleni Inkonzo YaseBethel Manje: Ukuzilungiselela inkonzo yaseBethel kuqala kusekude ngaphambi kokuba ufinyelele imfuneko yeminyaka engu-19 yobudala. Yini abantwana abangayenza ukuze bazilungiselele inkonzo yaseBethel? UJesu wathi: “Ubani kini ofuna ukwakha umbhoshongo ongahlali phansi kuqala futhi abale izindleko?” (Luka 14:28) Njengoba ukulungiselela nokuhlela kubalulekile ekuphumeleleni kwanoma yimuphi umsebenzi wokwakha, yeka ukuthi kubaluleke kanjani ukuba intsha ibhekisise indlela elakhela ngayo ikusasa layo enkonzweni kaJehova! Kufanele kubekwe isisekelo esiqinile besebancane ukuze bafinyelele imigomo engokomoya. Njengomuntu omusha, usibeka kahle kangakanani isisekelo sakho? Uma ungathanda ukukhonza eBethel, uyozuza ngokucabangela ngokucophelela lokhu okulandelayo.
19 ‘Litholele Indawo’ Leli Lungiselelo Elikhethekile Lenkonzo: Njengoba kulotshwe kuMathewu 19:12, uJesu wakhuthaza abafundi bakhe ukuba ‘bayitholele indawo’ inkambo yokungashadi. Ngani? Hhayi ngenxa yezizathu zomuntu siqu, kodwa “ngenxa yombuso wamazulu.” Ngokufanayo uPawulu naye wakhuthaza inkambo enjalo ‘yokukhonza iNkosi njalo ngaphandle kokuthikamezeka.’ (1 Kor. 7:32-35) Ngeshwa, abaningana liyabalahlekela ilungelo lokukhonza eBethel njengamadoda angashadile ngenxa yokuphishekela ukushada besebancane. Sifuna ukukhuthaza abazalwane bethu abasebasha ukuba basebenzise amandla abo ekuphishekeleni inkonzo yesikhathi esigcwele bengakabi nemithwalo yemfanelo yomkhaya. Uma ngemva kwesikhathi esithile benquma ukushada, bayokuba abayeni abangcono kakhulu ngoba beye bazuza okuhlangenwe nakho ekuphileni nasenkonzweni yobuKristu. Ngemva kokukhonza iminyaka eminingi eBethel, abanye baye bashada futhi bakwazi ukuqhubeka bekhonza khona njengombhangqwana. Uma kamuva bethola amanye amalungelo, njengomsebenzi wokujikeleza noma inkonzo yezithunywa zevangeli, abazisoli neze ngesikhathi abaye basibekela eceleni ukuze bayitholele indawo inkonzo yaseBethel.
20 Ungaphazanyiswa Ukuphishekela Izinto Ezibonakalayo: Umuntu omusha ngamunye uyobe wenza kahle uma ezibuza: ‘Ingabe umgomo wami ngemva kokuphothula esikoleni esiphakeme uwukuphishekela umsebenzi wokuziphilisa wesikhathi esigcwele noma ukukhonza uJehova isikhathi esigcwele?’ Kuyavunywa, ukuthatha inkonzo yesikhathi esigcwele kuyodinga ukuzidela. Kodwa kunjalo nangokuphishekela umsebenzi wokuziphilisa! Ekugcineni, iyiphi inkambo eyoba nomphumela ohlala njalo nozuzisayo? UJesu wanikeza impendulo ecacile. NgokukaMathewu 6:19-21, wathi: “Yekani ukuzibekelela imicebo emhlabeni, lapho inundu nokugqwala kudla khona, nalapho amasela egqekeza khona ebe. Kunalokho, zibekeleleni imicebo ezulwini, lapho kungoni nundu nakugqwala khona, nalapho amasela engagqekezi ebe khona. Ngokuba lapho kukhona ingcebo yakho‚ nenhliziyo yakho iyakuba khona lapho.” Kwangathi izinhliziyo zethu zingelinge zisiholele ekuphishekeleni umsebenzi wezwe noma izinto ezibonakalayo kunenkonzo yomphefumulo wonke kuJehova. Sonke kufanele siqaphele ukuthi ukuphela kwengcebo efanelwe ukuphishekelwa iwubuhlobo obuhle noJehova ukuze senze inhliziyo yakhe ijabule. (IzAga 27:11) Ngokwenza uJehova eze kuqala ekuphileni kwethu sisebancane, sibonisa ukuthi yiziphi izinto ezibalulekile kithi nokuthi ubaluleke kangakanani uMbuso kithi. Khumbula, “isibusiso sikaJehova siyacebisa; akenezeli usizi kuso.” (IzAga 10:22) Abasha banethuba elihle lokubonisa ukuthi zikuphi izinhliziyo zabo ngokubuyisela okuthile okuhle kuJehova ngenxa yakho konke abaphe kona. Inkonzo yaseBethel iyilelo thuba elimangalisayo kulabo abahlangabezana nezimfuneko.
21 Labo Abakhonza EBethel Kufanele Bahlanzeke Ekuziphatheni: Umhubi wabuza: “Insizwa iyakuyihlanza kanjani indlela yayo na?” Waphendula: “Ngokuqaphela okwezwi [likaJehova].” (IHu. 119:9) Lokho kuyohlanganisa ukugwema noma yini ephathelene nokonakala kokuziphatha kwesimiso sezinto sikaSathane. Imifanekiso engcolile ye-Internet, ukuziphatha okungafanele nabobulili obuhlukile, umculo owonakalisayo, ezokuzijabulisa ezonakele, nokuphuza ngokweqile kumane nje kungezinye zezingibe uSathane azisebenzisayo ekuvimbeleni intsha yethu ukuba ifinyelele imigomo engokomoya. Kudingeka ukuzimisela okunamandla ukuze simelane nala maqhinga. Njengomuntu osemusha, uma uzithola uhileleka kunoma iyiphi kulezi zinto, khuluma nabadala ebandleni lakini ulungise lezi zinkinga ngaphambi kokuba ufake isicelo senkonzo yaseBethel. Ukuba nonembeza ohlanzekile kubalulekile ukuze ukhonze uJehova ngokugcwele.—1 Thim. 1:5.
22 Funda Ukusebenzelana Nabanye: Ukufunda ukusebenzelana nabanye kuyimfuneko ebalulekile yokuphumelela enkonzweni yaseBethel. Umkhaya waseBethel eNingizimu Afrika wakhiwa ngabazalwane nodade abangu-580 abaphuma kuzo zonke izizinda zokuphila. Nakuba lokhu kuhlukahluka kobuntu kunezela ebuhleni beBethel, ngezinye izikhathi kungase kulethe izinselele. Uma ucabangela inkonzo yaseBethel, uyobe wenza kahle uma uzibuza: ‘Ingabe ngiyashesha ukucasuka uma abanye benombono ohlukile kowami? Ingabe abanye bakuthola kulula ukusebenzelana nami?’ Uma udinga ukuthuthukisa ezicini ezinjalo, qala manje. Ukwenza kwakho kanjalo kuyokusiza ukuba usheshe ujwayele ukuhlala futhi usebenze namalungu omkhaya waseBethel.
23 Kusebenzele kanzima ukuba umuntu ongokomoya ngokuhlakulela ubuhlobo obuseduze noJehova. Yiba nesimiso esihle sesifundo somuntu siqu, esiyohlanganisa ukufunda iBhayibheli nsuku zonke. Kukhuthalele ukuhlanganyela izindaba ezinhle nabanye. Ngokwenza lezi zinto, uyokwenza ukuthuthuka kwakho okungokomoya kubonakale. (1 Thim. 4:15) Yeka amathuba amangalisayo alindele labo abazilungiselela manje ukuba benze umsebenzi wesikhathi esigcwele!
24 Bazali, Qeqeshani Izingane Zenu: Yini abazali abangayenza ukuze bakhuthaze abantwana ukuba baphishekele inkonzo yesikhathi esigcwele? UJesu wathi: “Wonke umuntu ofundiswe ngokuphelele uyoba njengomfundisi wakhe.” (Luka 6:40) Ngokuzenzekelayo umuntu oqeqeshwe kahle uyobonisa izimfanelo ezinhle zomfundisi wakhe ozinikezele. Abazali abangamaKristu kufanele basicabangele ngokujulile lesi simiso njengoba besebenza kanzima beqeqesha izingane zabo ‘benokuzinikela kokuhlonipha uNkulunkulu njengomgomo wabo.’ (1 Thim. 4:7) Njengoba izingane zithambekele ekuboniseni isimo sengqondo sabazali bazo ngokwezinto ezingokomoya, abazali benza kahle ngokuzibuza: ‘Ingabe thina siyawazisa umsebenzi owenziwa eBethel wokuthuthukisa izithakazelo zokukhulekelwa kweqiniso kukaJehova? Ingabe siyasiqaphela isibusiso sikaJehova elungiselelweni laseBethel? Ingabe siyakholelwa ukuthi ukuphila enkonzweni kaJehova kuwukukhetha okungcono kakhulu izingane zethu ezingakwenza?’ Ukwazisa kwethu okusuka enhliziyweni ngenkonzo yaseBethel nomsebenzi owenziwa khona kuyosisiza sigxilise ukwazisa okufanayo ezinganeni zethu.
25 U-Elkana noHana babenokwazisa okujulile ngokukhulekela kweqiniso. Babekela abazali abangamaKristu namuhla isibonelo esiphawulekayo. Kwa-Israyeli wasendulo, amadoda angama-Israyeli kuphela okwakudingeka ‘ayobonakala phambi kweNkosi uJehova’ kathathu ngonyaka etabernakele. Noma kunjalo, u-Elkana wahamba amakhilomitha angaba ngu-30, cishe ngezinyawo, nawo wonke umkhaya wakhe “iminyaka ngeminyaka” beyokwenza umhlatshelo esikhungweni sokukhulekelwa kukaJehova. (Eks. 23:17; 1 Sam. 1:3, 4, 9, 19; 2:19) Kusobala ukuthi le nhloko yomkhaya yayifuna ukuba umkhaya wayo wonke ube nomuzwa ofana nowayo ngezinto ezingokomoya.
26 UHana wayenesithakazelo esifana nesomyeni wakhe ekukhulekeleni kweqiniso. Wayezizwa ebophekile ukuba ahlanganyele ekusekeleni ukukhulekela etabernakele. UHana wafunga wathi uma uJehova emuphe indodana, uyoyenza itholakalele inkonzo yasetabernakele. (1 Sam. 1:11) UMthetho KaMose wawuvumela umyeni ukuba asesule isifungo somkakhe esingafanele. (Num. 30:6-8) Nokho, kusobala ukuthi u-Elkana wasamukela isifungo sikaHana, ebonisa ukuthi naye wayekusekela ukubonakaliswa kokukhulekela kweqiniso!—1 Sam. 1:22, 23.
27 Ingabe uSamuweli indodana yabo kwamthinta ngendlela enhle ukwazisa nesimo sengqondo esihle esaboniswa abazali bakhe? Impela kunjalo. Njengomfana omncane, uSamuweli wayinakekela ngokuzimisela nangokwethembeka imisebenzi ayeyabelwe futhi waqeqeshelwa amanye amalungelo ayigugu enkonzweni kaNkulunkulu. Isithakazelo esaboniswa u-Elkana noHana enkonzweni kaSamuweli etabernakele asizange siphele ngemva kokuba eseqale imisebenzi yakhe khona. Baqhubeka bemvakashela njalo ukuze bamkhuthaze futhi bamsekele njengoba ephishekela inkonzo yesikhathi esigcwele.—1 Sam. 2:18, 19.
28 Yeka isibonelo esiphawulekayo u-Elkana noHana abasibekela abazali abangamaKristu namuhla! Lapho izingane zethu zizwa amazwi okwazisa asuka enhliziyweni ngelungelo lenkonzo yaseBethel futhi zibona umoya wokuzidela esiwubonisayo ekuthuthukiseni izithakazelo zoMbuso, nazo ziyoba nenhliziyo ethambekele ekukhonzeni abanye. Abazali abaningi bakugxilisa ngokuphumelelayo lokhu kuthambekela okunempilo ezinganeni zabo. Enye ingane eneminyaka eyisikhombisa ubudala yabhala: “Uma sengimdala, ngifuna ukuba seBethel futhi kunezinto ezimbalwa engifuna ukuzenza lapho. (1) Ukuthayipha omagazini INqabayokulinda ne-Phaphama!, (2) ukusebenza emnyangweni wenu wokudweba imifanekiso, (3) ukugoqa izingubo eziwashiwe. Noma yimuphi okhona. Akunandaba.” Yeka ukuthi kujabulisa kanjani ukubona kukhula umoya onjalo ezinhliziyweni zezingane zethu!
29 Bantwana, khumbulani ukuthi “izwe liyadlula kanjalo nesifiso salo, kodwa lowo owenza intando kaNkulunkulu uhlala kuze kube phakade.” (1 Joh. 2:17) Qhubekani niphishekela imigomo engokomoya, kuhlanganise nelungelo elikhethekile lenkonzo yaseBethel. Bazali, lingisani isibonelo sabathembekile besikhathi esidlule abakhuthaza izingane zabo ukuba zihlakulele ukuzinikela kokuhlonipha uNkulunkulu. (2 Pet. 3:11) Futhi kwangathi sonke singenza ingxenye yethu ekusizeni abafowethu nodadewethu abasebasha ukuba bakhonze uMdali wethu Omkhulu Kakhulu ngezinga elikhulu ngangokunokwenzeka, njengoba lokhu “kunesithembiso sokuphila kwamanje nalokho okuzayo.”—1 Thim. 4:8; UmSh. 12:1, qhathathisa ne-NW.
[Ibhokisi ekhasini 4]
Izimfuneko Eziyisisekelo Zenkonzo YaseBethel
● Kufanele ube usubhapathiziwe, okungenani unyaka owodwa
● Ube umuntu ongokomoya onothando olujulile ngoJehova nenhlangano yakhe
● Ube nempilo enhle engokomoya, engokwengqondo, engokomzwelo nengokomzimba
● Ube isakhamuzi noma ube isakhamuzi esinemvume yokuhlala unomphela eNingizimu Afrika
● Ukwazi ukufunda, ukubhala nokukhuluma isiNgisi kahle
● Ube neminyaka engu-19-35