Yini Ongayisho KumJuda?
1 Ekhulwini lokuqala, ‘amadodana ka-Israyeli’ amaningi asabela ngokwazisa ekushumayeleni kukaJesu nabaphostoli bakhe. (IzE. 10:36) Njengoba kwenzeka ngaleso sikhathi, amaJuda amaningi aqotho namuhla alamukela ngenhliziyo yonke iqiniso—hhayi nje kwa-Israel kuphela kodwa naseRussia, e-United States nakwamanye amazwe. Ungathanda yini ukuphumelela ngokwengeziwe ekufakazeni kubantu abangamaJuda? Ukusikisela okulandelayo kuzokusiza ukuba unikeze ubufakazi ngobuciko kokubili kumaJuda athanda inkolo nangayithandi.
2 Ukufakaza KumaJuda Athanda Inkolo: Kufanele ukhumbule ukuthi amaJuda athanda inkolo akhathalela kakhulu ukugcina amasiko orabi kunokuchaza izimfundiso ezithile. Empeleni, ngokuvamile abheka isiko njengelinegunya elilingana nelemiBhalo. Ngakho, awanandaba kangako nokuxoxa ngezihloko ezijulile zeBhayibheli. Athambekele ekubhekeni iBhayibheli njengencwadi yamaKristu. Ngenxa yaleso sizathu, ngokuvamile kungcono kakhulu ukuba lapho ukhuluma ngeBhayibheli usebenzise amagama anjengathi “imiBhalo YesiHeberu,” “iTorah,” noma “imiBhalo.” Kunencwajana engangomagazini enhle kakhulu elungiselelwe ngokukhethekile amaJuda ethi Will There Ever Be a World Without War?
3 Yiziphi izingxoxo ezingase zithakazelise amaJuda athanda inkolo? Akholelwa ukuthi kunoNkulunkulu oyedwa onesithakazelo esijulile kubantu. Akholelwa nawukuthi uNkulunkulu uyangenela ezindabeni zesintu. Ungase usebenzise la maphuzu ukuze uthole iphuzu enivumelana ngalo. Ngaphezu kwalokho, amaJuda amaningi ayakwazi ukuhlupheka abantu bakubo ababhekana nakho ngeMpi Yezwe II. Ayazibuza ukuthi kungani uNkulunkulu avumela ukungabi nabulungisa okunjena nokuthi ububi buyophela nini. Sikuhlomele kahle ukuphendula leyo mibuzo, ngokwesibonelo, ngokubhekisela kulokho abafowethu ababhekana nakho ngesikhathi sokuQothulwa Kwesizwe.
4 Yiqiniso, ukuze ugweme ukwenza umninikhaya axwaye, kungcono ungasheshi ukufaka engxoxweni indaba yokuthi uMesiya ungubani. Kunalokho, ungase uchaze indima eyafezwa uMose emlandweni ka-Israyeli bese ubuza umninikhaya ukuthi uyakholelwa yini ukuthi izimfundiso zikaMose zisewusizo nanamuhla. Uma kubonakala kufaneleka ukuxoxa ngokuthi ungubani uMesiya, ungase uqale ngokufunda uDuteronomi 18:15, othi: “UJehova uNkulunkulu wakho uyakukuvusela umprofethi phakathi kwakho kubafowenu onjengami; nimlalele yena.” Buza umninikhaya ukuthi uMose wayecabanga ngobani lapho ekhuluma ngomprofethi onjengaye. Yibe usuhlanganisa amaphuzu ambalwa asencwajaneni ethi World Without War, ekhasini 14, izigaba 17 no-18.
5 AmaJuda Angakholwa Abheka Izinto Ngendlela Ehlukile: Akubona bonke abazibiza ngokuthi bangamaJuda abamukela izimfundiso zenkolo yobuJuda. AmaJuda amaningi awakholwa. Anesithakazelo esikhulu ekuthuthukiseni ubuzwe bobuJuda, nemikhuba yabo, amasiko nemfundo, kunasekuqhubeni inkolo yobuJuda. Amanye amaJuda angakholwa, akholelwa ukuthi uNkulunkulu akaziwa—kanti ambalwa awo akholelwa ngisho nawukuthi akekho. Ekuqaleni, akukho okungafezwa ngokucaphuna kakhulu emiBhalweni YesiHeberu. Kungazuzisa kakhudlwana uma ungaqala ingxoxo ngendlela ongenza ngayo uma uxoxa nanoma imuphi umuntu ongayithandi inkolo. Ngokwesibonelo, ungase uchaze indlela iBhayibheli eliwusizo ngayo osukwini lwethu. Uma umninikhaya engakholelwa ukuthi iBhayibheli liphefumulelwe, amanye amaphuzu asencwajaneni engangomagazini ethi World Without War angase abe usizo, ikakhulukazi lawo atholakala engxenyeni esekhasini 3 enesihloko esithi “The Bible—Inspired by God?”
6 Lapho ufakaza kumuntu ongumJuda, ungase uthi:
◼ “Abaningi kithina bake babhekana nesehlakalo esibuhlungu sokushonelwa othandekayo. Ucabanga ukuthi yini eyenzekayo kithi lapho sifa?” Lindela impendulo. Yibe usubonisa umninikhaya ibhokisi elinesihloko esithi “Death and the Soul—What Are They? [Ukufa Nomphefumulo—Kuyini?]” ekhasini 22 lencwajana ethi World Without War. Leli bhokisi liqhathanisa lokho imiBhalo ekushoyo ngokuphila ngemva kokufa nalokho orabi abakufundisayo. Yibe usuvula ikhasi 23, isigaba 17, umbonise ukuthi ngokwemiBhalo, abafileyo bayovuselwa ekuphileni emhlabeni oyipharadesi. Hambisa incwajana. Lapho ulungiselela impindelo, ungase usho ukuthi inzalamizi uJobe yayinalo ithemba lovuko. Bhekisela emibhalweni ekhonjwe ekugcineni kwesigaba 17, bese usikisela ukuba ubuye nizoxoxa ngayo.
7 Izincwadi zikaMathewu, uMarku, uLuka, uJohane nezEnzo zinokuhlangenwe nakho kwamaJuda alalela futhi enza ngokuvumelana neqiniso. UJehova usayivulile indlela eholela ekuphileni okuphakade. AmaJuda amaningi aqotho asengafunda ngoJehova, uNkulunkulu weqiniso, ukuze nawo aphile phakade emhlabeni omusha kaNkulunkulu.—Mika 4:1-4.