Ingabe Ngingakhonza EBethel?
1Uma ungumzalwane ongashadile, ingabe wake wakucabangela ukwenza inhlangano kaJehova izuze emakhonweni akho? Yebo, ungakhonza yini eBethel futhi usize ekugcwaliseni isidingo sezisebenzi ezengeziwe? Ngenxa yokwanda okukhulu okwenzekayo lapha eBethel, iMinyango Yokulungisa Izinto ehlukahlukene ithwele kanzima. Manje sesinemishini nezinto ezisetshenziswayo eziningi kunangaphambili. Ngaphandle kweshede elikhulu eselizoqedwa ukwakhiwa, sihlela ukwakha okungenani ezinye izakhiwo zokuhlala ezimbili, senezele izitezi ezimbili esakhiweni sethu samaHhovisi, sandise neFekthri yethu phakathi neminyaka emine ezayo. Ngakho-ke, sidinga izisebenzi ezengeziwe ukuze sinakekele izakhiwo zethu nemishini.
2 Ikakhulukazi kunesidingo sabantu abafundele ukusebenza ngogesi, ukusebenza ngamapayipi amanzi, ama-fitter and turner, omakhenika bezimoto ezihamba ngophethiloli nezika-diesel, ochwepheshe bamafuliji, ochwepheshe be-HVAC, abashayeli abano-Code 14, ababazi, abahlengikazi, abasizi bakadokotela wamazinyo, abaklami bezindlela zokulungiswa kwamagceke, nochwepheshe bokuhlobisa ngaphakathi. Kutuswa ukuba kube abazalwane abangashadile abaphakathi kweminyaka yobudala engu-19 no-35, kodwa uma umzalwane oshadile enekhono lomsebenzi othile, yena nomkakhe bangasifaka isicelo sabo. Abafaka izicelo kufanele kube abantu okungenani osekuphele unyaka owodwa bebhapathiziwe, babe nokuma okuhle nebandla, bese beba nempilo enhle. Uma uhlangabezana nalezimfuneko zenkonzo yaseBethel futhi ufuna ukuhlanganyela kulokhu kwanda okuvusa amadlingozi, khona-ke sikukhuthaza ukuba ufake isicelo manje.—Qhathanisa noMarku 1:41.
3 Uma ufisa ukufaka isicelo, thola ifomu lesicelo senkonzo yaseBethel ngokubhalela iNhlangano masinyane. Uma ususigcwalisile isicelo sakho, sidlulisele eKomitini Yenkonzo Yebandla ukuze isicabangele. Sithanda ukukhuthaza bonke abazalwane abangashadile ukuba bakucabangele ngomthandazo ukukhonza eBethel. Yebo, kwangathi uJehova angasibusisa ngokucebile isinqumo sakho uma uphendula ngoyebo embuzweni othi, Ingabe ngingakhonza eBethel?