Khuthaza Izifundo ZeBhayibheli Ukuba Zithuthuke
1 Izwe licabanga ngokuthuthuka ngokuyinhloko ngokombono wezobuchwepheshe noma wezinto ezibonakalayo. Kodwa abantu bakaJehova abanjalo. Kunalokho, siyazikhandla ukuze sithuthuke ngokomoya. Siyajabula ngokuthi siye semukela isikhuthazo esisiholele ekubeni abafundi bakaKristu abakhuthele nabakhiqizayo.—Joh. 15:8; 2 Pet. 1:5-8.
2 EmaVangelini igama elithi “umfundi” lisetshenziswa ngokuyinhloko kulabo abangakholelwa nje kuphela ezimfundisweni zikaKristu kodwa futhi abazilandela eduze. (Math. 28:19, 20) Ingabe izifundo zeBhayibheli ziyalazisa leloqiniso? Singazikhuthaza kanjani ukuba zithuthukele ekubeni abafundi?
QONDISA ISITHAKAZELO ENHLANGANWENI
3 Intuthuko yomfundi ngokuqinisekile ihlangene nokwazisa kwakhe ngenhlangano kaJehova. Ngakho-ke, ingxenye yomthwalo wethu wemfanelo njengabafundisi iwukuqondisa isithakazelo sesifundo enhlanganweni kaNkulunkulu. Sekuyiminyaka eminingi sikhuthazwa ukuba sinikele imizuzu emihlanu kuya kweyishumi isikhathi ngasinye esiqhuba ngaso isifundo seBhaybiheli ekuchazeni okuthile ngeNhlangano. Incwajana engangomagazini ethi OFakazi BakaJehova—Ngobunye Benza Intando KaNkulunkulu Emhlabeni Wonke inikeza isisekelo esihle kakhulu sokwenza lokhu. Ingabe isifundo sakho seBhayibheli sineyaso ikhophi? Uma kungenjalo, qikelela ukuba sithole eyaso ngokushesha. Sikhuthaze ukuba siyifunde, futhi usichazele ukuthi nizobe nicabangela ingxenye yayo emfushane isikhathi ngasinye enifunda ngaso.
4 Ukwaziswa okusemakhasini-14 no-15 encwajana ethi Benza Intando KaNkulunkulu kuklanyelwe ukwakha ukwazisa ngomhlangano ngamunye webandla. Kungani ungahlanganisi isigaba esisodwa noma ezimbili nje isonto ngalinye? Bonisa indlela umhlangano ngamunye onikeza ngayo ukuqeqesha nesiyalo ukuze ugcwalise isidingo esikhethekile. Siza isifundo ukuba sibone ukuthi ukukhula ngokomoya kuvezwa “ukuhlangana kwethu.” (Heb. 10:24, 25) Sikhuthaze ngokufudumele ukuba sihlanganyele nathi eHholo LoMbuso. Lapho siyozibonela ngokwaso ubunye nothando esikujabulelayo njengabantu bakaJehova abahlangene.—IHu. 133:1; Joh. 13:35.
SHUKUMISA UKUKHULA NGOKOMOYA
5 Abasha badinga ukuba abafundi beqiniso beZwi likaNkulunkulu, abathuthukayo olwazini, ekuqondeni, nasekusebenziseni izimiso zalo. Ngenxa yalesizathu sizoqhubeka nesifundo encwadini ethi Ungaphila Phakade nethi Ubunye Ekukhulekeleni noma Ukuthula Kweqiniso ngisho noma isifundo sibhapathizwa ngaphambi kokuba siqede lezincwadi. Lesosifundo singawathola amakhophi alezincwadi ngisho noma sizobe singakakulungeli ukuqalisa ukufunda incwadi yesibili izinyanga ezimbalwa. Lokhu kungase kulole isifiso saso esingokomoya, kusishukumisele ekufundeni okwengeziwe okuyosheshisa intuthuko yaso. Futhi, kumelwe siveze inzuzo yokuba nezikhokhelo zeNqabayokulinda nePhaphama! nokuthola ezinye izincwadi zeNhlangano ukuze sihambisane ‘nesabelo sokudla ngesikhathi sakho.’ (Luka 12:42) Labo abenza kanjalo bayogxila, bakheke, futhi baqine okholweni.—Kol. 2:7.
6 Njengabantu cishe abazoba oFakazi bakaJehova kanye nathi, izifundo zeBhayibheli ziyaludinga usizo lwethu ukuze zithuthukele ekuvuthweni. (Heb. 5:14) Kumelwe sinikeze ukutusa okufanele ukuze sikhuthaze ukuthuthuka. (Fil. 3:16) Ingabe sizihlanganyela nomkhaya nesijwayelene nabo izinto esizifundayo? Uma sifaneleka, ingabe sesiye sabhalisa eSikoleni SeNkonzo EsingokwaseZulwini? Ingabe sinesifiso sokuba ummemezeli wezindaba ezinhle?
7 Uma thina njengabafundisi senza ingxenye yethu, singabheka phambili esibusisweni sikaJehova esicebile. (2 Kor. 9:6) Akumelwe neze sikhohlwe amandla umkhuleko ongaba nawo ezifundweni zeBhayibheli. Cela uJehova ukuba aziqondise ukuze zisabele kulokho ezikufundayo. (1 Kor. 3:6, 7) Sengathi zingathatha isinyathelo esiwujuqu sokuzihlanganisa ngenkuthalo nebandla futhi ngaleyondlela zenezele inkazimulo nodumo egameni likaJehova