Indlela Ongenza Ngayo Ukufunda IBhayibheli Kuzuzise Futhi Kujabulise

UJoshuwa ufunda uMthetho; izindonga zaseJeriko ziyadilika kodwa indlu kaRahabi iqhubeka imili; Indoda ihlanganisa izandla ithandaze

UJOSHUWA ubhekene nenkiyankiya yenkinga. Kumelwe ahole isizwe sakwa-Israyeli asingenise eZweni Lesithembiso futhi anqobe izingqinamba ezinkulu. Nokho, uJehova umqinisekisa ngokuthi uzophumelela bese emkhuthaza ethi: ‘Yiba nesibindi uqine. Gcina uMthetho wami. Wufunde imini nobusuku, ukuze wenze ngokuvumelana nawo. Uma wenza lokho uyophumelela futhi uyokwenza ngokuhlakanipha.’—Josh. 1:7, 8.

Kulezi zikhathi “ezibucayi okunzima ukubhekana nazo,” nathi sibhekana nezinselele ezinzima. (2 Thim. 3:1) Nathi singaphumelela uma silandela iseluleko uJehova asinika uJoshuwa. Singafunda iBhayibheli nsuku zonke, bese sisebenzisa ngokucophelela izimiso zalo lapho sibhekana novivinyo.

Nokho, abantu abaningi bangavuma ukuthi ukufunda akuyona into abayikhuthalele futhi akulula. Noma kunjalo, njengoba ukufunda iBhayibheli kubalulekile, hlola ibhokisi elinesihloko esithi “Zama La Macebiso” ukuze uthole amacebiso amahle angenza ukufunda iBhayibheli kuzuzise futhi kujabulise.

Umhubi wahlabelela: “Ngibangele ukuba ngihambe endleleni yemiyalo yakho, Ngoba ngiyajabula ngayo.” (IHu. 119:35) Ungajabula kakhulu lapho uhlola iZwi likaNkulunkulu. Uzothola amagugu amahle njengoba umba ufuna ingcebo engokomoya.

Ngisho noma kungadingeki uhole isizwe njengoJoshuwa, unazo izinselele okumelwe ubhekane nazo. Ngakho, njengoJoshuwa, funda futhi usebenzise okulotshwe eBhayibheli ukuze uzuze. Lapho wenza lokho, uyophumelela futhi wenze ngokuhlakanipha.

ZAMA LA MACEBISO

Thandaza ngaphambi kokuba utadishe. IBhayibheli liqukethe imicabango kaNkulunkulu umninimandla onke abangela ukuba ilotshwe ukuze ikuzuzise. Ngakho lapho ufunda iBhayibheli, funa usizo lwakhe ukuze uliqonde bese ulisebenzisa ekuphileni kwakho.—Ezra 7:10.
Zibuze imibuzo njengoba ufunda iBhayibheli noma izincwadi ezisekelwe eBhayibhelini: ‘La mavesi angitshelani ngoJehova? Ahlobana kanjani nalo lonke iBhayibheli? Ngingayisebenzisa kanjani le micabango ukuze ngisize abanye?’
Cabangisisa ngalokho okufundayo. Yima ngemva kokufunda, bese uyacabanga: ‘La mavesi angenza ngizizwe kanjani? Kungani engenza ngizizwe ngaleyo ndlela? Ahlobana kanjani nezinto ezenzeke kimi esikhathini esidlule, ezenzeka manje noma mhlawumbe ezizokwenzeka esikhathini esizayo? Ngingazisebenzisa kanjani lezi zimiso zeBhayibheli nalesi seluleko ekuphileni kwami?’ (Jobe 23:5; IHu. 49:3) Hlola ukuthi ungakwazi yini ukuchaza ukuthi kungani uJehova enxusa abantu bakhe ukuba bagweme imikhuba ethile noma ukuthi imiphumela yezenzo ezihlukile ibingaba yini.—Dut. 32:28, 29.
Kubone ngeso lengqondo lokho okufundayo. Ngokwesibonelo, uyakwazi yini ukubona ngeso lengqondo abafowabo bakaJosefa bemthengisa kwabakwa-Ishmayeli? (Gen. 37:18-28) Yini oyibonayo, oyizwayo noyihogelayo? Zifake ezicathulweni zomlingiswa. Ucabangani noma uzizwa kanjani? Ukucabanga okunjalo kwenza ukutadisha kwakho kuphile futhi kube nenjongo.
Sebenzisa amathuluzi okutadisha esiwanikiwe ukuze ucwaninge. Jwayelana namathuluzi atholakala ngolimi lwakho, kokubili kuyi-inthanethi nasezincwadini. Unganqikazi ukucela usizo kwabanye ukuze bakubonise ukuthi asebenza kanjani. Ngokwesibonelo, i-Watch Tower Publications Index noma INcwadi Yokucwaninga YoFakazi BakaJehova iyokusiza uthole izihloko ezihlukahlukene, uthole nezincazelo zamavesi amaningi eBhayibheli. Sebenzisa izithasiselo ezikuyi-Nguqulo Yezwe Elisha YemiBhalo Engcwele uma itholakala ngolimi olwaziyo. Zikunika imininingwane ewusizo ngebalazwe, uhlu lozalo, isisindo, izikali nokunye okuningi.
Bukeza amaphuzu ayinhloko alokho okufundayo ukuze ukukhumbule. Xoxela abanye. Kukhona yini ongakusebenzisa ensimini? Ngalezi zindlela, awugxilisi nje amaphuzu ayinhloko engqondweni yakho kodwa usebenzisa lokho okufundile ukuze uzuzise abanye.