Iseluleko Esihlakaniphile Ngokungashadi Nokushada

“Lokhu ngikusho . . . ukuba nginishukumisele kulokho okufanelekile nakulokho okusho ukukhonza iNkosi njalo ngaphandle kokuthikamezeka.”—1 KOR. 7:35.

1, 2. Kungani umuntu kufanele afune iseluleko seBhayibheli mayelana nokungashadi nokushada?

ZIMBALWA izinto ekuphileni eziletha intokozo, ukukhungatheka noma ukukhathazeka okukhulu ngaphezu kokusebenzelana nabobulili obuhlukile. Isidingo sokubhekana naleyo mizwelo ngokuphumelelayo sisenza sifune isiqondiso sikaNkulunkulu, kodwa kunezinye izisusa zokuba senze kanjalo. UmKristu owanelisekile ngokungashadi angase abe nomuzwa wokuthi umkhaya wakubo noma abangane bamcindezela ukuba ashade. Omunye angase afune ukushada kodwa akakamtholi umngane womshado ofanelekayo. Abanye badinga isiqondiso sendlela abangalungiselela ngayo imithwalo yemfanelo yokuba indoda noma umfazi. Ngaphezu kwalokho, wonke amaKristu, ashadile nangashadile abhekana novivinyo ngokuphathelene nokuziphatha ngokobulili.

² Ngaphandle kokuthi le ndaba ithinta injabulo yethu, ibuye ithinte nobuhlobo bethu noJehova uNkulunkulu. Esahlukweni 7 sencwadi yakhe yokuqala ayibhalela abaseKorinte, uPawulu wanikeza iziqondiso mayelana nokungashadi nokushada. Injongo yakhe yayiwukushukumisela abafundi bayo “kulokho okufanelekile nakulokho okusho ukukhonza iNkosi njalo ngaphandle kokuthikamezeka.” (1 Kor. 7:35) Njengoba ucabangela izeluleko zakhe kulezi zindaba ezibalulekile, zama ukubona isimo sakho—ushadile noma ungashadile—njengendlela yokukhonza uJehova ngokugcwele.

Isinqumo Somuntu Siqu Esinzima

3, 4. (a) Buba khona kanjani ubunzima ngezinye izikhathi lapho abantu bekhathazeka ngokweqile ngomngane noma ngesihlobo esingashadile? (b) Iseluleko sikaPawulu kufanele simsize kanjani umuntu ukuba abe nombono olinganiselayo ngomshado?

³ Njengomphakathi wamaJuda ekhulwini lokuqala, namuhla amasiko amaningi agcizelela umshado njengento efiseleka kakhulu. Uma insizwa noma intombi idlula iminyaka ethile ingashadile, abangane nezihlobo abakhathalelayo bangase bazizwe bebophekile ukuba bayinike izeluleko ezithile. Ezingxoxweni, bangase basikisele ukuba izikhandle kakhudlwana ekufuneni umuntu ezoshada naye. Bangase basikisele nomuntu othile wobulili obuhlukile ongase afaneleke. Bangaze basebenzise ngisho nezindlela zobuqili zokuba bahlanganise abantu ababili abangashadile. Ukwenza kanjalo ngezinye izikhathi kuholela ekuphoxekeni, ekupheleni kobungane nasekulimaleni ngokomzwelo.

⁴ UPawulu akakaze acindezele abanye ukuba bashade noma bahlale bengashadile. (1 Kor. 7:7) Wayenelisekile ngokukhonza uJehova engenankosikazi, kodwa wayelihlonipha ilungelo labanye lokushada. Nanamuhla umKristu ngamunye unelungelo lokunquma ukuthi uzoshada yini noma uzohlala engashadile. Abanye akufanele bamcindezele ukuba ashade noma angashadi.

Ukusebenzisa Ukungashadi Ngokunenzuzo

5, 6. Kungani uPawulu atusa ukungashadi?

⁵ Into ephawulekayo ngamazwi kaPawulu awabhalela abaseKorinte umbono omuhle ayenawo ngokungashadi. (Funda eyoku-1 Korinte 7:8.) Nakuba uPawulu ayengashadile, akazange azibone engcono kunalabo ababeshadile, njengoba kwenza abefundisi beLobukholwa abayizimpohlo. Kunalokho, lo mphostoli waqokomisa amathuba angcono izikhonzi zezindaba ezinhle eziningi ezingashadile ezinawo. Imaphi lawo mathuba?

⁶ Ngokuvamile umKristu ongashadile unenkululeko yokwamukela izabelo enkonzweni kaJehova umuntu oshadile angase angakwazi ukuzamukela. UPawulu wathola ilungelo elikhethekile lokuba “umphostoli ezizweni.” (Roma 11:13) Funda izEnzo isahluko 13 kuya ku-20, futhi umlandele nezinye izithunywa zevangeli ayekanye nazo njengoba bevula amasimu futhi bemisa amabandla ezindaweni ngezindawo. UPawulu wakhuthazelela ubunzima enkonzweni yakhe okungabambalwa namuhla abayobhekana nabo. (2 Kor. 11:23-27, 32, 33) Kodwa injabulo ayithola ngokusiza abaningi ukuba babe abafundi yenza lobo bunzima baba inzuzo. (1 Thes. 1:2-7, 9; 2:19) Ingabe wayeyokwazi ukukufeza konke lokhu ukube wayeshadile noma enomkhaya? Cishe wayengeke!

7. Nikeza isibonelo soFakazi abangashadile abaye basebenzisa izimo zabo ukuze bathuthukise izithakazelo zoMbuso.

⁷ AmaKristu amaningi angashadile asebenzisa leso simo ukuze afeze okuningi ngenxa yoMbuso. USara noLimbania, amaphayona angashadile aseBolivia, bathuthela edolobhaneni okwase kuphele iminyaka eminingi abantu bakhona bengashunyayezwa. Ingabe ukungabikho kukagesi kwakuyoba inkinga? Babika: “Akukho msakazo noma i-TV, ngakho ayikho into ephazamisa abantu endleleni eyinhloko abantu abazilibazisa ngayo kule ndawo, okuwukufunda.” Abanye abantu abahlala kuleyo ndawo babonisa la maphayona izincwadi zoFakazi BakaJehova ababesazifunda kodwa ezazingasanyatheliswa. Ngenxa yokuthi cishe kuyo yonke imizi ayethola umuntu onesithakazelo, akuthola kunzima ukuhambela yonke imizi kuleyo nsimu. Omunye owesifazane osekhulile wathi kuwo: “Kumelwe ukuba ukuphela kuseduze ngoba oFakazi BakaJehova bagcine sebefikile nakithi.” Kungakabiphi, abanye kulelo dolobhana baqala ukuba khona emihlanganweni yebandla.

8, 9. (a) UPawulu wayecabanga ngani lapho ekukhulumela kahle ukungashadi? (b) Imaphi amathuba angcono amaKristu angashadile anawo?

⁸ Yiqiniso, namaKristu ashadile ayayithola imiphumela emihle lapho eshumayela izindaba ezinhle emasimini alukhuni. Kodwa ezinye izabelo ezamukelwa amaphayona angashadile zingase zibe nzima kwashadile noma anabantwana. UPawulu wacabanga ngamathuba ayekhona okuqhubekisela phambili izindaba ezinhle ayewabona emabandleni endawo. Wayefuna ukuba bonke bajabule, njengaye. Ngenxa yalokho, wakukhulumela kahle ukukhonza uJehova njengomuntu ongashadile.

⁹ Udade ongashadile oyiphayona wase-United States wabhala: “Abanye abantu bacabanga ukuthi umuntu ongashadile akanakukwazi ukuthola injabulo. Kodwa ngiye ngabona ukuthi injabulo ehlala njalo ixhomeke ebuhlotsheni bomuntu noJehova. Nakuba ukungashadi kudinga ukuzidela, kuyisipho esihle kakhulu uma ukusebenzisa ngokunenzuzo.” Ngokuphathelene nokuthola injabulo, wabhala: “Ukungashadi kungaba indlela yokuthola injabulo, hhayi isithiyo. Ngiyazi ukuthi uJehova usithanda sonke, singashadile noma sishadile.” Manje ukhonza ngenjabulo ezweni elinendingeko enkulu yabamemezeli boMbuso. Uma ungashadile, ungayisebenzisa yini inkululeko yakho ukuze wandise ingxenye yakho ekufundiseni abanye iqiniso? Nawe, ungase uthole ukuthi ukungashadi kuyisipho esiyigugu esivela kuJehova.

Abangashadile Abafisa Ukushada

10, 11. UJehova ubasekela kanjani labo abafisa ukushada kodwa abangakamtholi umngane womshado ofanelekayo?

¹⁰ Ngemva kokukhonza iminyaka ethile zingashadile, eziningi zezinceku zikaJehova ezithembekile zinquma ukushada. Ziqaphela ukuthi zidinga isiqondiso ekutholeni umngane womshado, zicela uJehova ukuba azisize zithole ofanelekayo.—Funda eyoku-1 Korinte 7:36.

¹¹ Uma ufisa ukushada nomuntu onesifiso esifana nesakho sokukhonza uJehova ngomphefumulo wonke, thandaza kuJehova ngale ndaba. (Fil. 4:6, 7) Kungakhathaliseki ukuthi kungase kudingeke ulinde isikhathi eside kangakanani, ungalilahli ithemba. Thembela kuNkulunkulu wethu onothando njengoMsizi wakho, futhi uyokusekela ngokomzwelo ngokuvumelana nesidingo sakho.—Heb. 13:6.

12. Kungani umKristu kufanele acabangisise kahle lapho othile emeshela?

¹² UmKristu ongashadile ofisa ukushada angase eshelwe othile ongabazisayo ngokomoya noma ngisho nawumuntu ongakholwa. Uma lokho kwenzeka kuwe, khumbula ukuthi ubuhlungu benhliziyo obuwumphumela wokwenza isinqumo esibi lapho ukhetha umngane womshado bungabangela ubuhlungu obukhulu kakhulu kunesizungu umuntu ongashadile asizwayo. Lapho usushadile, usuboshelwe kumngane wakho womshado ukuphila kwakho konke, ebuhleni nasebubini. (1 Kor. 7:27) Ungenzi isinqumo sokushada ngokuphelelwa ithemba bese kamuva uzisola.—Funda eyoku-1 Korinte 7:39.

Kulungiselele Ukubhekana Namaqiniso Okuphila Kwasemshadweni

13-15. Iziphi izinto ezingabangela usizi emshadweni okufanele umbhangqwana uxoxe ngazo ngesikhathi usaqomisana?

¹³ Nakuba uPawulu akutusa ukukhonza uJehova njengomuntu ongashadile, akazange ababukele phansi labo abanquma ukushada. Kunalokho, iseluleko sakhe esiphefumulelwe sisiza imibhangqwana ukuba ibhekane namaqiniso okuphila kwasemshadweni futhi yenze imishado yayo ihlale njalo.

¹⁴ Eminye imibhangqwana kudingeka ilungise amathemba enawo ngesikhathi esizayo. Phakathi nokuqomisana kwabo, abantu ababili bangase babheke uthando lwabo njengoluyingqayizivele, oluyisimangaliso, isiqinisekiso sokuthi bazoba nomshado ojabulisayo. Bangenela umshado besemaphusheni futhi bekholelwa ukuthi ayikho into engaqeda injabulo yabo bobabili. Lowo mcabango uyiphupho. Izikhathi zokubonisana uthando njengendoda nomfazi ziyajabulisa, kodwa zizodwa azimhlomiseli umakoti nomkhwenyana usizi oluba khona kuyo yonke imishado.—Funda eyoku-1 Korinte 7:28.a

¹⁵ Abaningi abasanda kushada bayamangala, baze ngisho badumazeke, lapho abantu abashade nabo benombono ohlukile ezindabeni ezibalulekile. Laba ababili bangase bazithole bengavumelani ngendlela okufanele basebenzise ngayo imali nesikhathi sokuzijabulisa, ukuthi bazohlalaphi nokuthi bazovakasha kangaki ekhweni noma emzini. Ngamunye wabo unanobuthakathaka obungamcasula omunye. Ngesikhathi besaqomisana, kulula ukushalazelela ukubaluleka kwalezi zici, kodwa kamuva zingawucindezela kakhulu umshado. Umbhangqwana wenza kahle ngokuxoxa ngalezi zinto ezivame ukuba inkinga ngaphambi kokuba ushade.

16. Kungani umbhangqwana kufanele uvumelane ngendlela yokubhekana nezinselele zasemshadweni?

¹⁶ Ukuze umshado uphumelele futhi ujabulise, umbhangqwana kumelwe ubhekane nezinselele ndawonye. Kufanele uvumelane ngendlela ozoyala ngayo izingane zawo nozonakekela ngayo abazali abagugile. Ingcindezi ebangelwa izinkinga zomkhaya akufanele ibenze laba ababili baqhelelane. Uma besebenzisa iseluleko seBhayibheli, bayoxazulula izinkinga eziningi, bakhuthazelele lezo ezingaxazululeki futhi bahlale ndawonye ngenjabulo.—1 Kor. 7:10, 11.

17. Ikuphi ukukhathazeka “ngezinto zezwe” umbhangqwana okufanele ukulindele?

¹⁷ UPawulu ukhuluma ngelinye iqiniso lokuphila kwasemshadweni kweyoku-1 Korinte 7:32-34. (Funda.) Kulindelekile ukuba abantu abashadile ‘bakhathazeke ngezinto zezwe,’ ezinjengokudla, okokugqoka, indawo yokuhlala nezinye izinto ezingezona ezingokomoya. Kungani kunjalo? Ngesikhathi engakashadi, kungenzeka umzalwane wayezinikela kakhulu enkonzweni. Kodwa njengoba eseshadile, uthola ukuthi kumelwe asebenzise esinye sesikhathi namandla akhe ukuze anakekele umkakhe, ngaleyo ndlela amukelwe nguye. Lokhu kunjalo nangenkosikazi ngomyeni wayo. Ngokuhlakanipha kwakhe, uJehova uyasiqaphela lesi sidingo. Uyazi ukuthi umshado ophumelelayo uvame ukudinga esinye sesikhathi namandla endodeni nasenkosikazini ababekusebenzisa enkonzweni yaKhe lapho bengakashadi.

18. Iziphi izinguquko mayelana nemisebenzi yokuzilibazisa okungase kudingeke zenziwe ngemva komshado?

¹⁸ Kodwa lesi sifundo asigcini lapha. Uma umbhangqwana kumelwe uthathe esinye isikhathi namandla owawusisebenzisa enkonzweni kaNkulunkulu ukuze unakekelane, akufanele yini wenze okufanayo ngesikhathi namandla owawukusebenzisela ukuzijabulisa nabanye lapho ungakashadi? Kuyoyithinta kanjani inkosikazi uma indoda iqhubeka igxile kwezemidlalo nabangane bayo? Noma indoda ingazizwa kanjani uma umkayo eqhubeka echitha isikhathi esiningi emisebenzini yokuzilibazisa ayenza nabangane bakhe? Umngane womshado onganakiwe angase ngokushesha azizwe enesizungu, engajabule futhi engathandwa. Lokhu kungagwenywa uma labo abashadile benza konke abangakwenza ukuze baqinise isibopho sabo njengendoda nomfazi.—Efe. 5:31.

UJehova Ufuna Sihlanzeke Ngokokuziphatha

19, 20. (a) Kungani abantu abashadile bengagonyiwe esilingweni sokuziphatha okubi? (b) Iyiphi ingozi imibhangqwana eshadile ezifaka kuyo uma ivuma ukungabi ndawonye isikhathi eside?

¹⁹ Izinceku zikaJehova zizimisele ukuhlale zihlanzekile ngokokuziphatha. Abanye banquma ukushada ukuze bagweme izinkinga kulesi sici. Nokho, umshado awusinikezi isivikelo ngokuzenzakalelayo ekungcoleni okungokobulili. Ngezikhathi zeBhayibheli, umuzi owawunezivikelo eziqinile wawuvikela abantu kuphela uma behlale bengaphakathi kwezindonga zawo. Uma umuntu ayephumela ngaphandle kwesango lapho izigcwelegcwele nabaphangi bezulazula khona, wayengase aphangwe noma abulawe. Ngokufanayo, abantu abashadile bavikeleka ekuziphatheni okubi ngokobulili kuphela uma bejabulela ubulili ngaphakathi kwemingcele abayimiselwe uMsunguli womshado.

²⁰ UPawulu wachaza leyo mingcele kweyoku-1 Korinte 7:2-5. Kuyilungelo lenkosikazi ukulindela ukuba umyeni wayo ahlanganyele ubulili nayo kuphela; nendoda inelungelo lokulindela ukuba umkayo enze okufanayo. Ngamunye wabo kulindeleke ukuba anikeze omunye “okumfanele,” noma ubuhlobo bobulili umuntu oshadile anelungelo lokubuthola. Nokho amanye amadoda namakhosikazi bachitha isikhathi eside bengekho ndawonye—baye emaholidini ngokwahlukana noma bangabi ndawonye ngenxa yomsebenzi, ngaleyo ndlela bagodlelane lokho ‘okubafanele.’ Cabanga ngobuhlungu obungaba khona uma ngenxa ‘yokuntula ukuzithiba’ umuntu enqotshwa ukucindezela kukaSathane bese ephinga. UJehova uyazibusisa izinhloko zemikhaya ezondla imikhaya yazo ngaphandle kokufaka imishado yazo engozini.—IHu. 37:25.

Izinzuzo Zokulalela Iseluleko SeBhayibheli

21. (a) Kungani kunzima ukwenza isinqumo sokuthi ushade noma ungashadi? (b) Kungani iseluleko esikweyoku-1 Korinte isahluko 7 siwusizo?

²¹ Isinqumo esihilela ukushada nokungashadi siyisinqumo esinzima kunazo zonke umuntu ayoke azenze. Ukungapheleli, okuwumthombo weziningi zezinkinga eziba khona ebuhlotsheni babantu, kuyisici esihlupha bonke abantu. Ngakho, ngisho nalabo uJehova abathandayo nababusisayo abanakukwazi ukukubalekela ngokuphelele ukudumazeka, kungakhathaliseki ukuthi bashadile noma abashadile. Uma usebenzisa iseluleko esihlakaniphile esikweyoku-1 Korinte isahluko 7, ungagcina izinkinga ezinjalo zisesilinganisweni esiphansi ngangokunokwenzeka. “Uyokwenza kahle” emehlweni kaJehova, kungakhathaliseki ukuthi ushadile noma awushadile. (Funda eyoku-1 Korinte 7:37, 38.) Ukwamukelwa uNkulunkulu kuwumgomo omkhulu kunayo yonke ongayifinyelela. Ngomusa wakhe, uyoqhubeka uphokophele ekuphileni ezweni lakhe elisha. Kulo, ubuhlobo phakathi kwamadoda nabesifazane ngeke bube nezingcindezi ezivame kangaka namuhla.

[Umbhalo waphansi]

Ungaphendula?

• Kungani kungafanele kube nomuntu ocindezela omunye ukuba ashade?

• Ungasisebenzisa kanjani ngendlela engcono kakhulu isikhathi sakho njengenceku kaJehova engashadile?

• Umbhangqwana oqomisanayo ungazilungiselela kanjani izinselele zasemshadweni?

• Kungani umshado unganikezi isivikelo ngokuzenzakalelayo ekuziphatheni okubi ngokobulili?

[Izithombe ekhasini 14]

AmaKristu angashadile ajabulayo yilawo asebenzisa isikhathi sawo ukuze andise inkonzo yawo

[Isithombe ekhasini 16]

Iziphi izinguquko abanye okungase kudingeke bazenze ngemva kokushada?