‘Abathambekele Ngokufanele’ Bayasabela

“Bonke labo ababethambekele ngokufanele ekuphileni okuphakade baba ngamakholwa.”—IZE. 13:48.

1, 2. AmaKristu okuqala asabela kanjani esiprofethweni sikaJesu sokuthi izindaba ezinhle zaziyoshunyayelwa emhlabeni wonke owakhiwe?

INCWADI yeBhayibheli yezEnzo inokulandisa okuthakazelisayo kwendlela amaKristu okuqala asabela ngayo esiprofethweni sikaJesu sokuthi izindaba ezinhle zoMbuso zaziyoshunyayelwa emhlabeni wonke owakhiwe. (Math. 24:14) Abashumayeli abashisekayo babacabela indlela bonke labo ababeyobalandela. Ngenxa yokufakaza ngentshiseko kwabafundi bakaJesu eJerusalema, izinkulungwane zabantu, kuhlanganise ‘nesixuku esikhulu sabapristi,’ zathuthelekela ebandleni lekhulu lokuqala.—IzE. 2:41; 4:4; 6:7.

² Izithunywa zevangeli zokuqala zasiza abaningi ngokwengeziwe ukuba bamukele ubuKristu. Ngokwesibonelo, uFiliphu waya eSamariya lapho alalelwa khona izixuku. (IzE. 8:5-8) UPawulu waya ezindaweni eziningi ehambisana nabantu abahlukahlukene, eshumayela isigijimi sobuKristu eKhupro, ezingxenyeni ze-Asia Minor, eMakedoniya, eGrisi nase-Italiya. Emizini ashumayela kuyo kwaba noquqaba lwamaJuda namaGreki olwaba amakholwa. (IzE. 14:1; 16:5; 17:4) UThithu wakhonza eKrethe. (Thithu 1:5) UPetru wayeshumayela eBhabhiloni, futhi ngesikhathi ebhala incwadi yakhe yokuqala cishe ngo-62-64 C.E., umsebenzi wamaKristu wase waziwa kabanzi ePhontu, eGalathiya, eKhaphadosiya, e-Asiya naseBhithiniya. (1 Pet. 1:1; 5:13) Yeka ukuthi kwakuyizikhathi ezijabulisa kanjani lezo! Labo bashumayeli abangamaKristu bekhulu lokuqala babeshiseka kangangokuthi izitha zabo zathi ‘babeyaluzise umhlaba owakhiwe.’—IzE. 17:6; 28:22.

3. Imiphi imiphumela etholwa abamemezeli boMbuso namuhla emsebenzini wabo wokushumayela, futhi lokhu kukwenza uzizwe kanjani?

³ Nasezikhathini zanamuhla, ibandla lobuKristu liye labusiswa ngokwanda okumangalisayo. Awukhuthazeki yini lapho ufunda umbiko wonyaka woFakazi BakaJehova futhi ubona imiphumela etholakala emhlabeni wonke? Akukujabulisi yini ukwazi ukuthi abamemezeli boMbuso baqhuba izifundo zeBhayibheli ezingaphezu kwezigidi eziyisithupha phakathi nonyaka wenkonzo ka-2007? Ngaphezu kwalokho, inani lababa khona eSikhumbuzweni sokufa kukaJesu Kristu ngonyaka odlule libonisa ukuthi abantu abangaba izigidi eziyishumi abangebona oFakazi BakaJehova baba nesithakazelo ezindabeni ezinhle esabashukumisela ukuba babe khona kulo mkhosi obalulekile. Lokhu kubonisa ukuthi kusenomsebenzi omkhulu okumelwe wenziwe.

4. Obani abamukela isigijimi soMbuso?

⁴ Namuhla, njengasekhulwini lokuqala, ‘bonke labo abathambekele ngokufanele ekuphileni okuphakade’ bamukela isigijimi seqiniso. (IzE. 13:48) UJehova ubadonsela enhlanganweni yakhe abantu abanjalo. (Funda uHagayi 2:7.) Isiphi isimo sengqondo ngenkonzo yobuKristu okudingeka sihlale sinaso ukuze siwusekele ngokugcwele lo msebenzi wokubutha?

Shumayela Ngokungakhethi

5. Hlobo luni lwabantu abamukelekayo kuJehova?

⁵ AmaKristu ekhulu lokuqala ayeqonda ukuthi “uNkulunkulu akakhethi, kodwa ezizweni zonke umuntu omesabayo futhi enze ukulunga uyamukeleka kuye.” (IzE. 10:34, 35) Ukuthi umuntu unobuhlobo obuhle noJehova noma cha kuxhomeke ekuboniseni kwakhe ukholo emhlatshelweni kaJesu wesihlengo. (Joh. 3:16, 36) Kuyintando kaJehova ukuba “zonke izinhlobo zabantu zisindiswe futhi zifinyelele olwazini olunembile lweqiniso.”—1 Thim. 2:3, 4.

6. Yini abashumayeli boMbuso okumelwe bayigweme, futhi ngani?

⁶ Kungaba okungafanele ngabamemezeli bezindaba ezinhle ukwahlulela abantu kusengaphambili ngohlanga, isimo sabo emphakathini, ukubukeka, isizinda esingokwenkolo, noma ngesinye isici. Cabanga ngalokhu: Awukwazisi yini ukuthi umuntu wokuqala owakhuluma nawe ngamaqiniso emiBhalo akazange akucwase? Ungamgodlelelani-ke umuntu obengase alalele isigijimi esingasindisa ukuphila kwakhe?—Funda uMathewu 7:12.

7. Kungani kumelwe sigweme ukwahlulela abantu esibashumayezayo?

⁷ UJehova umise uJesu njengoMahluleli; ngakho thina asinalo ilungelo lokwahlulela abantu. Lokhu kuyafaneleka, ngoba—ngokungafani noJesu—thina singahlulela kuphela ngokwalokho ‘okubonakala emehlweni ethu’ noma ‘ngokwento esiyizwe ngezindlebe,’ kanti uJesu ukwazi ukubona imicabango ejulile nokuzindla kwenhliziyo.—Isaya 11:1-5; 2 Thim. 4:1.

8, 9. (a) USawulu wayeluhlobo luni lomuntu ngaphambi kokuba abe umKristu? (b) Okwenzeka kumphostoli uPawulu kufanele kusifundiseni?

⁸ Cishe abantu bazo zonke izizinda baye baba izinceku zikaJehova. Isibonelo esivelele esikaSawulu waseTarsu, kamuva owaziwa ngokuthi umphostoli uPawulu. USawulu, owayengumFarisi, wawaphikisa ngonya amaKristu. Ukukholelwa kwakhe ngobuqotho ukuthi ayesephutheni kwamenza washushisa ibandla lobuKristu. (Gal. 1:13) Ngokombono womuntu, ayemancane kakhulu amathuba okuba abe umKristu. Noma kunjalo, uJesu wabona okuthile okuhle enhliziyweni kaSawulu futhi wamkhetha ukuba afeze umsebenzi okhethekile. Ngenxa yalokho, uSawulu waba elinye lamalungu akhuthele nashiseka kakhulu ebandla lobuKristu lekhulu lokuqala.

⁹ Okwenzeka kumphostoli uPawulu kusifundisani? Mhlawumbe ensimini yethu kunamaqembu abantu abonakala esizonda isigijimi sethu. Nakuba kungase kubonakale kungathembisi ukuthi bakhona kubo abayoke babe amaKristu eqiniso, akufanele siyeke ukuzama ukubonisana nabo. Ngezinye izikhathi ngisho nabantu abangathembisi neze bayalalela. Umsebenzi wethu ukuqhubeka sibashumayeza bonke “ngaphandle kokuyekethisa.”—Funda izEnzo 5:42.

Abashumayela “Ngaphandle Kokuyekethisa” Balindelwe Izibusiso

10. Kungani kungafanele sigweme ukushumayeza abantu abangase babonakale besabeka? Landisa okuhlangenwe nakho kwendawo.

¹⁰ Lokho esikubonayo kungase kungabi yilokho umuntu ayikho. Ngokwesibonelo, u-Ignacioa waqala ukutadisha iBhayibheli noFakazi BakaJehova esejele ezweni elithile eliseNingizimu Melika. Wayesatshwa ngoba wayenobudlova. Ngenxa yalokho, iziboshwa ezazenza izintwana ezithile bese zizithengisela ezinye iziboshwa zazithuma yena ukuba aqoqe izikweletu kulabo ababengakhokhi kahle. Nokho, njengoba ayethuthuka ngokomoya futhi esebenzisa lokho akufundayo, lo muntu owayenobudlova washintsha waba nomusa. Akasekho omthumayo ukuyoqoqa izikweletu, kodwa u-Ignacio wanelisekile ngokuthi amaqiniso eBhayibheli nomoya kaNkulunkulu kuye kwashintsha ubuntu bakhe. Uyakwazisa ukungakhethi kwabamemezeli boMbuso abenza umzamo wokutadisha naye iBhayibheli.

11. Kungani sibuyela njalo kubantu?

¹¹ Esinye sezizathu ezenza sibuyele njalo kubantu esike sakhuluma nabo ngezindaba ezinhle siwukuthi izimo zokuphila nezimo zabo zengqondo zingashintsha futhi ziyashintsha. Kusukela sagcina ukuxoxa nabo, kungenzeka ukuthi abanye baye bagula kakhulu noma bagulelwa, baphelelwa umsebenzi, noma kwashona umuntu abamthandayo. (Funda umShumayeli 9:11.) Izenzakalo zezwe zingase zenze abantu bacabangisise ngekusasa labo. Zingenza umuntu owayengasinaki—noma owayesiphikisa nokusiphikisa—asamukele isigijimi. Ngakho, akufanele sigweme ukusebenzisa wonke amathuba afanelekayo okuxoxa nabanye ngezindaba ezinhle.

12. Kufanele sibabheke kanjani abantu esibashumayezayo, futhi ngani?

¹² Ukuthambekela kwabantu kubonakala kuwukwahlukanisa abanye ngezigaba nokubahlulela. Kodwa uJehova ubheka abantu ngabanye. Ubona lokho umuntu ngamunye angakufinyelela. (Funda eyoku-1 Samuweli 16:7.) Kufanele silwele ukwenza okufanayo enkonzweni yethu. Okuhlangenwe nakho okuningi kubonisa ubuhle obuba umphumela wokubabheka ngendlela efanele bonke abantu esibashumayezayo.

13, 14. (a) Kungani iphayona elithile laba nombono ophambene ngowesifazane elahlangana naye enkonzweni? (b) Singafundani kule ndaba?

¹³ USandra, udade oyiphayona, wayesenkonzweni yendlu ngendlu esiqhingini saseCaribbean lapho ehlangana noRuth, owayeyithanda kakhulu imikhosi yomdanso egqokelwayo yakuleso siqhingi. URuth wayesethweswe umqhele kabili kulo mkhosi kazwelonke. Wabonisa isithakazelo esingavamile kulokho okwakushiwo uSandra, ngakho kwahlelwa isifundo seBhayibheli. USandra uyakhumbula: “Njengoba ngangingena egumbini lokuphumula lakwakhe, ngabona isithombe esikhulu sikaRuth evunule ngezomkhosi womdanso, ngabona nezindebe ayezizuzile. Ngenza iphutha ngacabanga ukuthi umuntu owayedume kakhulu futhi ehileleke kangako emikhosini yomdanso wayengeke abe nesithakazelo eqinisweni. Ngakho ngayeka ukumhambela.”

¹⁴ Ngemva kwesikhathi esithile, uRuth wafika eHholo LoMbuso, futhi ngemva komhlangano wabuza uSandra, “Kungani ungasezi ukuzongifundela?” USandra waxolisa futhi wahlela ukuphinde aqhubeke nesifundo. URuth wathuthuka ngokushesha, wasusa izithombe zakhe zomkhosi, waqala ukuhlanganyela kuyo yonke imisebenzi yebandla futhi wanikezela ukuphila kwakhe kuJehova. Yebo, uSandra waqaphela ukuthi ayekucabanga ekuqaleni kwakuyiphutha.

15, 16. (a) Waba yini umphumela lapho ummemezeli othile eshumayeza isihlobo sakhe? (b) Kungani isizinda sesihlobo kungafanele sisithene amandla okufakaza kuso?

¹⁵ Abaningi abaye bashumayeza amalungu omkhaya angakholwa baye bathola imiphumela emihle, ngisho nalapho ayebonakala emancane amathuba okuthi ayosabela kahle. Ngokwesibonelo, cabanga ngoJoyce, udade wase-United States. Kusukela eyibhobhodleyana, umlamu wakhe wayephuma engena ejele. UJoyce uyalandisa: “Abantu babethi wayengelusizo lwalutho, ngoba wayeshushumbisa izidakamizwa, entshontsha, enza nezinye izinto eziningi ezimbi. Kusinda kunjalo, ngaqhubeka ngixoxa naye ngamaqiniso eBhayibheli iminyaka engu-37.” Ukuzama kwakhe ngesineke ukusiza lesi sihlobo sakhe kwavuzwa ngokucebile lapho ekugcineni siqala ukutadisha iBhayibheli noFakazi BakaJehova futhi senza izinguquko ezinkulu ekuphileni kwaso. Umlamu kaJoyce usanda kubhapathizwa emhlanganweni wesigodi eCalifornia, e-U.S.A., eneminyaka engu-50. UJoyce uthi: “Ngakhala izinyembezi zenjabulo. Angive ngijabula ngokuthi angizange ngimdele!”

¹⁶ Ungase unqikaze ukukhuluma nezihlobo ezithile ngamaqiniso eBhayibheli ngenxa yesizinda sazo. Noma kunjalo, uJoyce akazange anqikaze ukukhuluma nomlamu wakhe. Kakade nje, umuntu angakwazi kanjani okusenhliziyweni yomunye umuntu? Kungenzeka ukuthi lowo muntu ulifuna ngobuqotho iqiniso leBhayibheli. Ngakho, ungamgodleli lelo thuba lokulithola.—Funda izAga 3:27.

Insiza-kutadisha IBhayibheli Esebenzayo

17, 18. (a) Imibiko evela emhlabeni wonke ibonisani ngenzuzo yencwadi ethi Lifundisani Ngempela IBhayibheli? (b) Ikuphi okuhlangenwe nako okuhle oye wakuthola lapho usebenzisa le ncwadi?

¹⁷ Imibiko evela emhlabeni wonke ibonisa ukuthi abantu abaningi abanhliziyo ziqotho bayayithanda insiza-kutadisha ethi Lifundisani Ngempela IBhayibheli? UPenni, udade oyiphayona wase-United States, waqala izifundo eziningana ngale ncwadi. Ababili kulabo ayebafundela kwakungabantu asebekhulile ababengamalungu azinikele emasontweni abo. UPenni wayengaqiniseki ukuthi babeyowamukela kanjani amaqiniso emiBhalo akule ncwadi. Nokho, uyabhala, “Ngenxa yokuthi le ncwadi icacile, iveza amaphuzu ngendlela ezwakalayo futhi ayijikelezi, ngokushesha bakwamukela njengokuyiqiniso lokho ababekufunda, ngaphandle kokuphikisa noma ukuzibuza.”

¹⁸ UPat, ummemezeli waseBrithani, waqala ukutadisha iBhayibheli nowesifazane wase-Asia owayengumbaleki. Lona wesifazane waphoqeleka ukuba abaleke ezweni lakubo ngemva kokuba umyeni namadodana akhe bethathwe amavukela-mbuso, wangaphinde wababona. Wasongelwa ngokuthi uzobulawa, kwashiswa indlu yakhe futhi wadlwengulwa iqembu. Konke lokhu kwamenza wabona sengathi ayikho into ayiphilelayo, futhi wacabanga ukuzibulala izikhathi eziningana. Kodwa isifundo seBhayibheli samnikeza ithemba. UPat uyabhala: “Ukuba lula kwezincazelo nemifanekiso esencwadini ethi Okufundiswa IBhayibheli kwaba nethonya elikhulu kuye.” Lo mfundi wathuthuka ngokushesha, wafanelekela ukuba ummemezeli ongabhapathiziwe futhi wazwakalisa isifiso sokubhapathizwa emhlanganweni olandelayo. Yeka ukuthi kujabulisa kanjani ukusiza abantu abaqotho ukuba baqonde futhi bazise ithemba elisemiBhalweni!

“Masingayeki Ukwenza Okuhle”

19. Kungani umsebenzi wokushumayela uphuthuma kangaka?

¹⁹ Usuku ngalunye oludlulayo, umsebenzi wethu wokushumayela nokwenza abafundi uphuthuma ngokwengeziwe. Unyaka nonyaka, izinkulungwane zabantu abathambekele ngokufanele ziyasabela emsebenzini wethu wokushumayela. “Usuku olukhulu lukaJehova luseduze,” okusho ukuthi labo abasesebumnyameni obungokomoya “bayendayendela ekuhlatshweni.”—Zef. 1:14; IzAga 24:11.

20. Yini okufanele ngamunye wethu azimisele ukuyenza?

²⁰ Sisengabasiza abantu abanjalo. Kodwa ukuze senze kanjalo, kubalulekile ukuba silingise amaKristu ekhulu lokuqala ‘aqhubeka ngaphandle kokuyekethisa, efundisa futhi ememezela izindaba ezinhle ngoKristu, uJesu.’ (IzE. 5:42) Lingisa isibonelo sabo ngokuphikelela naphezu kobunzima, ngokunaka ‘ikhono lakho lokufundisa’ nangokushumayeza bonke ngokungakhethi! “Masingayeki ukwenza okuhle,” ngoba uma siphikelela, siyothola izibusiso eziyinala zokwamukelwa uNkulunkulu.—2 Thim. 4:2; funda eyabaseGalathiya 6:9.

[Umbhalo waphansi]

Ungaphendula Kanjani?

• Obani abasabelayo ezindabeni ezinhle?

• Kungani kufanele sikugweme ukubahlulela kusengaphambili abantu esibashumayezayo?

• Imiphi imiphumela etholakalayo ngokusebenzisa incwadi ethi Lifundisani Ngempela IBhayibheli?

[Izithombe ekhasini 13]

Izinkulungwane zabantu abanhliziyo ziqotho ziyasabela

[Izithombe ekhasini 15]

Yini esingayifunda ezinguqukweni ezenziwa umphostoli uPawulu?

[Isithombe ekhasini 16]

Abamemezeli bezindaba ezinhle ababahluleli abantu kusengaphambili