Indlela Yokuhlakulela Uthando Ngonkulunkulu Enhliziyweni Yengane Yakho

NAMUHLA kuyinselele yangempela ngomuntu ukuhlakulela ubuhlobo obuseduze noJehova uNkulunkulu. (IHubo 16:8) Njengoba kwakuprofethiwe, siphila ‘ezikhathini ezibucayi okunzima ukubhekana nazo.’ Iningi labantu ‘lingabathandi benjabulo kunokuba abathandi bakaNkulunkulu.’ (2 Thimothewu 3:1-5) Yebo, uthando lwangempela ngoNkulunkulu luyivelakancane ezweni namuhla.

Asinakuthembela ekutheni uthando ngoNkulunkulu luzozakhekela enhliziyweni yengane. Uthando ngoJehova uNkulunkulu kumelwe luhlakulelwe ezinhliziyweni zezingane zethu. Singakwenza kanjani lokhu?

Xoxani Ngokukhululekile

Singahlakulela uthando ngoNkulunkulu ezinhliziyweni zezingane zethu uma ezethu izinhliziyo zigcwele uthando ngaye. (Luka 6:40) IBhayibheli liyakubonisa lokhu lapho lithi: “Kumelwe uthande uJehova uNkulunkulu wakho ngayo yonke inhliziyo yakho nangawo wonke umphefumulo wakho nangawo onke amandla akho. La mazwi engikuyala ngawo namuhla kumelwe abe senhliziyweni yakho; kumelwe uwagxilise kubantwana bakho.”—Duteronomi 6:4-7.

Singaluhlakulela kanjani uthando ngoNkulunkulu enhliziyweni yengane yethu? Okokuqala, kumelwe sikwazi okusenhliziyweni yengane yethu. Okwesibili, kumelwe siveze lokho okukweyethu inhliziyo.

Lapho esendleleni eya e-Emawuse nabafundi bakhe ababili, uJesu Kristu waqale wabakhuthaza ukuba basho amathemba abo nokubakhathazayo. Kwathi lapho esebalalele isikhashana kwaba yima uJesu elungisa ukucabanga kwabo ngokubachazela imiBhalo. Kamuva baphawula: “Izinhliziyo zethu bezingavuthi yini njengoba ebekhuluma kithi?” Le ngxoxo iyisibonelo sokuxoxa ngokukhululekile. (Luka 24:15-32) Singayiqonda kanjani imizwa yengane yethu?

Muva nje, abanye abazali abanezingane esezindala noma ezisakhula eziyizibonelo zokholo, babuzwe ngale ndaba yokuxoxa ngokukhululekile. Ngokwesibonelo, uGlen waseMexico unezingane ezine esezikhulile.a Uthi: “Ukuxoxa ngokukhululekile phakathi kwabazali nezingane akuzenzakaleli. Mina nomkami sasibekela eceleni izinto ezingabalulekile kangako ukuze sibe nesikhathi nabantwana. Lapho sebevile eminyakeni eyishumi nambili, ngezinye izikhathi sasiye sichithe isikhathi sakusihlwa sihleli nabo, sixoxa nganoma yini efika ezingqondweni zabo. Ngokufanayo nalapho sidla, ngokulalela ababexoxa ngakho, sasiphawula izinkinga bese sikulungisa ngomusa ukuthambekela okungalungile, ngokuvamile benganakile nakunaka.”

Ukuxoxa ngokukhululekile kuhilela nokuveza lokho okusezinhliziyweni zethu. UJesu wathi: “Umuntu omuhle ukhipha okuhle engcebweni enhle yenhliziyo yakhe, . . . ngoba umlomo wakhe ukhuluma ngokuchichima kwenhliziyo.” (Luka 6:45) UToshiki, onezingane ezintathu eziyizikhonzi zesikhathi esigcwele eJapane, uthi: “Ngangibaxoxela kaningi ngokuthi kungani nginokholo kuJehova—ukuthi kwenzeka kanjani ukuba ngikholelwe ngenhliziyo yami yonke ukuthi ukhona, nokuthi okuhlangenwe nakho kwami ekuphileni kungiqinisekise kanjani ukuthi iBhayibheli liyisiqondiso esiyiqiniso nesingcono kakhulu ekuphileni.” EMexico, uCindy uthi: “Umyeni wami wayethandaza njalo nezingane zethu. Lapho zimuzwa ekhuluma ngokusuka enhliziyweni, zazibona ukuthi uJehova akayona inganekwane.”

Ithonya Elinamandla Lesibonelo Sethu

Indlela yethu yokuphila inethonya kakhulu ukwedlula esikushoyo, ngoba ibonisa izingane zethu ukuthi simthanda kangakanani uNkulunkulu. Ngokubheka indlela uJesu Kristu ayemlalela ngayo uJehova, abantu babengakuqonda ukujula kothando lwakhe ngoNkulunkulu. UJesu wathi: “Ukuze izwe lazi ukuthi ngiyamthanda uBaba, njengoba nje uBaba enginike umyalo, ngenza kanjalo.”—Johane 14:31.

UGareth, omunye woFakazi BakaJehova eWales, uyaphawula: “Abantwana bethu kumelwe babone ukuthi siyamthanda uJehova nokuthi sizama ukwenza izinto ngendlela yakhe. Ngokwesibonelo, izingane zami ziyabona ukuthi ngenxa yokuthi ngilalela lokho uNkulunkulu asitshela kona, ngiyawavuma amaphutha ami. Nazo manje zizama ukwenza okufanayo.”

UGreg, wase-Australia, uthi: “Sasifuna izingane zethu zibone ukuthi ukuphila kwethu kugxile eqinisweni. Lapho senza izinqumo eziphathelene nomsebenzi noma ezokuzijabulisa, siqale sicabangele ukuthi imithwalo yethu yemfanelo yobuKristu izothinteka kanjani. Kuyasijabulisa ukubona ukuthi indodakazi yethu eneminyaka engu-19 yenza okufanayo enkonzweni yayo njengephayona elisizayo.”

Ukusiza Izingane Zethu Ziqonde UNkulunkulu

Asinakukwazi ukuthanda noma ukwethemba umuntu esingamqondi. Lapho umphostoli uPawulu efuna amaKristu aseFilipi ukuba akhule othandweni lwawo ngoJehova, wabhala: “Yilokhu engiqhubeka ngikuthandazela, ukuthi sengathi uthando lwenu lungavama kakhulu ulwazi olunembile nokuqonda okuphelele.” (Filipi 1:9) UFalconerio, okhulisa abantwana abane ePeru, uthi: “Ukufunda nokutadisha iBhayibheli nabo njalo kuyalwakha ukholo lwabo. Ngake ngakudebeselela ukutadisha nabo, futhi ngabona uthando lwabo ngoNkulunkulu luncipha.” UGary wase-Australia, uthi: “Ngivame ukubonisa izingane zami ubufakazi bokuthi iziprofetho zeBhayibheli ziyagcwaliseka. Ngizibonisa nezinzuzo zokusebenzisa izimiso zeBhayibheli. Ukusiqhuba njalo isifundo somkhaya seBhayibheli kuye kwaba isihluthulelo ekwakheni ukholo lwazo.”

Kuyoba lula ukuba ulwazi lufinyelele inhliziyo yomntwana uma kufundelwa ngaphansi kwesimo esikhululekile kodwa esinesizotha. (Jakobe 3:18) UShawn noPauline baseBrithani abanezingane ezine, bathi: “Lapho siqhuba isifundo somkhaya seBhayibheli, sasizama ukungabathethisi abantwana bethu, nalapho sebeqala ukuyaluza kancane. Sasiyishintshashintsha indlela esisiqhuba ngayo isifundo. Ngezinye izikhathi sasicela zona izingane zikhethe okuzofundwa. Sasisebenzisa ama-video alungiselelwe inhlangano kaJehova. Ngezinye izikhathi sasiphinda izingxenye ezithile zayo noma siyimise ukuze sixoxe ngayo.” Khona futhi eBrithani, umama okuthiwa uKim uthi: “Isifundo somkhaya ngisilungiselela kahle ukuze ngikwazi ukubuza izingane zami imibuzo ezozenza zicabange. Siyakujabulela ukufunda. Sihlale sihleka.”

Ukukhetha Abangane

Uthando ngoJehova nokwazisa ukukhulekela kweqiniso kungakhula kahle kakhulu ezinganeni zethu uma zizungezwe abantu abangabangane noNkulunkulu. Ukuhlela ukuba izingane zethu zihlangane nabantu abangaxoxa nazo ngezinto ezakhayo futhi badlale nazo kungadinga umzamo. Kodwa kuwufanele umzamo! Ngaphezu kwalokho, kuyazuzisa ukwenza amathuba okuba abantwana bethu bahlangane noFakazi BakaJehova abaye benza inkonzo yesikhathi esigcwele yaba umsebenzi wabo wokuphila. Abaningi abaye bangenela le nkonzo bénza kanjalo ngenxa yokuzihlanganisa nezikhonzi zikaNkulunkulu ezishisekayo. Udade owaba isithunywa sevangeli uthi: “Abazali bami babewamema kaningi amaphayona ukuba azodla nathi. Indlela ayejabule ngayo enkonzweni yangenza ngafuna ukukhonza uNkulunkulu ngendlela efanayo.”

Yiqiniso, izimo zengqondo zezingane zethu zingathonyelwa kokuhle noma kokubi. Ngakho izingozi zokuzihlanganisa nababi zivivinya amakhono ethu njengabazali. (1 Korinte 15:33) Kuyikhono ukufundisa abantwana indlela yokugwema ukuzihlanganisa nalabo abangamthandi uJehova nabangamazi. (IzAga 13:20) UShawn, esimcaphune ngaphambili, uthi: “Safundisa izingane zethu ukuba zizwane nezingane esikoleni, kodwa lokho kuzwana kugcine lapho—esikoleni. Zaziqonda ukuthi kungani kungafanele zihlanganyele emisebenzini yangemva kwesikole noma emidlalweni yesikole.”

Izinzuzo Zokuqeqesha

Ngokuqeqesha abantwana bethu ukuba bakwazi ukuchaza ukholo lwabo, sibasiza ukuba bakujabulele ukukhuluma ngothando lwabo ngoNkulunkulu. UMark ohlala e-United States uthi: “Sasifuna abafana bethu bazi ukuthi bangakujabulela ukuhlanganyela ukholo lwabo nabanye noma nini, hhayi nje kuphela lapho begqokele ukuya enkonzweni yasobala. Ngakho lapho siya ndawana-thile siyongcebeleka, njengasepaki, ebhishi, noma ehlathini, siphatha amaBhayibheli nezincwadi ezisekelwe eBhayibhelini, futhi sixoxe nabantu ngezinto esizikholelwayo. Abafana bayakujabulela ngempela ukushumayela ngokwethukela kanjalo kanye nathi. Bayahlanganyela ezingxoxweni futhi bakhulume ngokholo lwabo.”

Umphostoli uJohane osekhulile wasiza abantu abaningi ukuba bakhule othandweni lwabo ngoNkulunkulu. Maqondana nabo wabhala: “Anginaso isizathu esikhulu sokubonga kunalezi zinto, ukuba ngizwe ukuthi abantwana bami [abangokomoya] bayaqhubeka behamba eqinisweni.” (3 Johane 4) Uma sihlakulela uthando ngoNkulunkulu ezinhliziyweni zezingane zethu, ngokuqinisekile nathi siyojabula ngendlela efanayo.

[Umbhalo waphansi]

[Izithombe ekhasini 9]

Ukuxoxa ngokukhululekile ngezindaba zokholo akuzenzakaleli

[Isithombe ekhasini 10]

Qeqesha abantabakho ukuba bakhulume ngothando lwabo ngoNkulunkulu

[Umthombo]

Courtesy of Green Chimneys Farm