Indaba Yokuphila

Nganikwa ‘Izicelo Zenhliziyo Yami’

ILANDISWA UDOMINIQUE MORGOU

Kwakungo-December 1998 lapho ekugcineni ngifika e-Afrika! Manje kwakugcwaliseka isifiso enganginaso kusukela ebuntwaneni. Selokhu kwathi nhló bezilokhu zingihlaba umxhwele izindawo ezingodedangendlale zase-Afrika nobuhle bezilwane zasendle. Manje ngase ngikuleyo ndawo! Kwagcwaliseka nesinye isifiso sami. Ngangingumshumayeli wesikhathi esigcwele okhonza kwelinye izwe. Kwabaningi, lokhu kwakungase kubonakale kuyiphupho. Nginenkinga enkulu yamehlo, futhi ngihamba emigwaqweni enesihlabathi esemizaneni yase-Afrika ngosizo lwenja eqondisayo eqeqeshelwe ukuhamba ezitaladini zasemadolobheni aseYurophu. Ake nginitshele ukuthi kwenzeka kanjani ukuba ngiyokhonza e-Afrika nendlela uJehova anginikeza ngayo ‘izicelo zenhliziyo yami.’—IHubo 37:4.

NGAZALWA ngo-June 9, 1966, eningizimu yeFrance. Ngiwuthunjana kubantwana abayisikhombisa—abafana ababili namantombazane amahlanu—sonke sakhuliswa abazali abanothando. Nokho, ngesikhathi ngisemncane kwenzeka into ebuhlungu ekuphileni kwami. Njengogogo, umama kanye noyedwa kodadewethu, ngazalwa nginesifo esibangela ukuba ugcine ngokungaboni nhlobo.

Ngesikhathi ngisemusha, kwadingeka ngikhuthazelele ukucwaswa ngokobuzwe, ukubandlululwa nokuzenzisa, okwangenza ngavukela emphakathini. Kwakungalesi sikhathi esinzima lapho sithuthela esifundeni saseHérault. Ngesikhathi silapho, kwenzeka isimanga.

Ngolunye usuku kuyiSonto ekuseni, kwafika oFakazi BakaJehova ababili ekhaya. Umama wayebazi futhi wabangenisa. Omunye wabo wabuza umama ukuthi wayesakhumbula yini ukuthi wathembisa ukuthi ngelinye ilanga uzokwamukela isifundo seBhayibheli. Umama wathi uyakhumbula futhi wabuza, “Sizosiqala nini?” Bavumelana ngokuthi bazohlangana njalo ngeSonto ekuseni futhi waqala kanjalo-ke umama ukufunda ‘iqiniso lezindaba ezinhle.’—Galathiya 2:14.

Ukuthola Ukuqonda

Umama wayezikhandla ukuze aqonde futhi akhumbule lokho ayekufunda. Njengoba eyimpumputhe, kwakudingeka ayibambe ngekhanda yonke into ababeyifunda. OFakazi babembekezelela kakhulu. Njalo lapho oFakazi befika, ngangicasha ekamelweni lami futhi ngiphume uma sebehambile. Nokho, ngolunye usuku ntambama, ngahlangana no-Eugénie, ongomunye woFakazi futhi wakhuluma nami. Wangitshela ukuthi uMbuso kaNkulunkulu uzoqeda bonke ubuzenzisi, inzondo nobandlululo emhlabeni. Wathi: “UNkulunkulu kuphela ongaziqeda lezi zinto.” Wangibuza ukuthi ngangifuna yini ukwazi okwengeziwe. Ngosuku olulandelayo ngaqala ukufundelwa iBhayibheli.

Yonke into engangiyifunda yayiyintsha kimi. Ngaqonda ukuthi kunezizathu ezizwakalayo zokuba uNkulunkulu avumele ububi okwesikhashana emhlabeni. (Genesise 3:15; Johane 3:16; Roma 9:17) Ngafunda nokuthi uJehova akasishiyanga singenathemba. Uye wasithembisa into emangalisayo, ukuphila phakade epharadesi emhlabeni. (IHubo 37:29; 96:11, 12; Isaya 35:1, 2; 45:18) Kulelo Pharadesi, ngiyophinde ngibone, nakuba manje ngivaleka amehlo kancane kancane.—Isaya 35:5.

Ukungenela Inkonzo Yesikhathi Esigcwele

Ngo-December 12, 1985, ngabonakalisa ukuzinikezela kwami kuJehova ngokubhapathizwa emanzini, ngithatha isinyathelo udadewethu uMarie-Claire ayesesithathile kakade. Ngemva nje kwalokhu umfowethu uJean-Pierre wabhapathizwa kwabe sekulandela nomama wami othandekayo.

Ebandleni engangihlanganyela kulo, kwakunamaphayona avamile amaningana, noma abashumayeli besikhathi esigcwele. Ngakhuthazwa injabulo nentshiseko yawo enkonzweni. Ngisho noMarie-Claire owayenenkinga yamehlo futhi esebenzisa isicathulo sabakhubazekile, wangenela inkonzo yesikhathi esigcwele. Nanamuhla usaqhubeka engikhuthaza ngokomoya. Ukuba phakathi kwamaphayona ebandleni nasekhaya kwangisiza ukuba ngibe nesifiso esiqotho sokungenela inkonzo yesikhathi esigcwele. Ngakho, ngo-November 1990 ngaqala ukukhonza njengephayona eBéziers.—IHubo 94:17-19.

Ukubhekana Ngokuphumelelayo Nokudangala

Enkonzweni yasensimini, nganginakekelwa amanye amaphayona. Ngisho noma kunjalo, ngezikhathi ezithile ngangidangala ngenxa yokungakwazi ukwenza izinto ezithile futhi ngangifisa ukwenza okwengeziwe. Nokho, uJehova wangiqinisa phakathi nalezo zikhathi. Ngangicwaninga kuyi-Watch Tower Publications Index, ngibheka izindaba zokuphila kwamaphayona anjengami ayengaboni kahle. Ngamangala uma ngithola ukuthi ayemaningi kangakanani! Lokhu kulandisa okuwusizo nokukhuthazayo kwangifundisa ukuba ngikwazise lokho engangikwazi ukukwenza futhi ngikwamukele ukulinganiselwa kwami.

Ukuze ngiziphilise, ngangihlanza izitolo eziyinxanxathela nabanye oFakazi. Ngelinye ilanga ngaqaphela ukuthi engangisebenza nabo babebuyela emuva ukuze bayohlanza izindawo engangisanda kuzihlanza. Kusobala ukuthi ngangingahlanzisisi. Ngahamba ngayoxoxa noValérie, iphayona elalengamele iqembu lethu elihlanzayo, futhi ngamcela ukuba angitshele iqiniso uma ngangibangela wonke umuntu ubunzima. Waba nomusa wakushiyela kimi ukuthi ngizonquma lapho senginomuzwa wokuthi angisakwazi ukusebenza. Ngo-March 1994, ngawuyeka lo msebenzi wokuhlanza.

Ngaphinde futhi ngaba nomuzwa wokuba into engelutho. Ngathandaza ngobuqotho kuJehova, futhi ngiyazi ukuthi wazizwa izicelo zami. Ngaphezu kwalokho, ukutadisha iBhayibheli nezincwadi zobuKristu kwangisiza kakhulu. Nakuba amehlo ami ayeqhubeka equndeka, isifiso sami sokukhonza uJehova sasiqhubeka sikhula. Ngangizokwenzenjani?

Ukuqale Ngilinde Bese Ngenza Isinqumo Ngokushesha

Ngafaka isicelo sokuqeqeshwa eSikhungweni Sezimpumputhe Nabantu Abangaboni Kahle esiseNîmes futhi ekugcineni ngamukelwa ukuze ngiqeqeshwe izinyanga ezintathu. Kwaba isikhathi esizuzisa kakhulu leso. Ngakuqonda kahle ukukhubazeka kwami futhi ngafunda ukuphila nakho. Ukuzihlanganisa nabantu abanezifo ezinhlobonhlobo kwangisiza ukuba ngibone ukuthi liyigugu kangakanani ithemba lami lobuKristu. Okungenani nganginomgomo ekuphileni futhi ngangenza okuthile okuzuzisayo. Ngaphezu kwalokho, ngafunda iBraille yesiFulentshi.

Lapho ngibuyela ekhaya, umkhaya wakithi waphawula ukuthi ukuqeqeshwa kungisize kakhulu. Nokho, into eyodwa engangingayifuni, induku emhlophe okwakufanele ngiyisebenzise. Kwakunzima ukuba ngikwamukele ukuthi sekufanele ngisebenzise leyo “nduku.” Kwakuyoba kuhle ngithole olunye usizo—mhlawumbe inja eqondisayo.

Ngagcwalisa isicelo senja kodwa ngatshelwa ukuthi kwakunohlu lwamagama abantu abaningi abalindile. Naleyo nhlangano kwakuzodingeka ukuba ihlolisise ukuthi ngangiyidinga ngempela yini. Inja eqondisayo ayimane nje inikezwe noma ngabe ubani. Ngolunye usuku owesifazane osiza enhlanganweni yezimpumputhe wangitshela ukuthi iqembu lethenisi lendawo lalizonikela ngenja eqondisayo ukuze kusizwe impumputhe noma umuntu ongaboni kahle ohlala endaweni yakithi. Wathi wayecabange ngami. Ngangizoyamukela? Ngasibona isandla sikaJehova kule ndaba futhi ngalwamukela lolu sizo. Noma kunjalo, kwadingeka ngiyilinde leyo nja.

Ngisacabanga Nge-Afrika

Ngisalindile, ngacabanga ngenye into. Njengoba ngishilo ekuqaleni, kusukela ngisemncane nganginesifiso esijulile sokuya e-Afrika. Naphezu kokuthi amehlo ami ayeqhubeka eba buthaka, leso sifiso sasilokhu sikhula ngamandla, ikakhulu njengoba ngase ngizwile ukuthi kunabantu abaningi e-Afrika abalithandayo iBhayibheli futhi abafuna ukukhonza uJehova. Ekuqaleni, ngake ngamuthi fahlafahla uValérie ngesifiso sami sokuvakashela e-Afrika. Ngambuza ukuthi wayezokujabulela yini ukuhamba nami. Wavuma, futhi sabhalela amagatsha oFakazi BakaJehova amaningana esiFulentshi ase-Afrika.

Kwaphendula elaseTogo. Ngijabule, ngacela ukuba uValérie angifundele. Le ncwadi yayikhuthaza, ngakho uValérie wathi: “Uma kunjalo, yini esivimbayo?” Ngemva kokubhalelana nabazalwane abasegatsheni, ngatshelwa ukuba ngixhumane noSandra, ophayona enhloko-dolobha iLomé. Sahlela ukuba sihambe ngo-December 1, 1998.

Yeka ukuthi yayihluke kangakanani le ndawo, kodwa sasingeve sijabule! Ngemva kokufika eLomé saphuma endizeni futhi sazithela ekushiseni kwelanga lase-Afrika elinesivuvu. Sahlangatshezwa uSandra. Sasingakaze sibonane, kodwa kwaba sengathi sekuyisikhathi eside singabangane. Ngesikhathi sifika, uSandra nayephayona naye, uChristine, babesanda kutuswa njengamaphayona akhethekile eTabligbo, idolobhana elisenkabeni yezwe. Manje sase sinelungelo lokuhamba nabo siye esabelweni sabo esisha. Sahlala cishe izinyanga ezimbili, futhi lapho sesigoduka ngangazi ukuthi ngisazobuyela futhi.

Injabulo Yokubuyela

Ngifika nje eFrance, ngaqala ngokushesha ukulungiselela uhambo lwami lwesibili lokuya eTogo. Njengoba ngangisekelwa umkhaya wakithi, ngakwazi ukwenza amalungiselelo okuba ngihlale izinyanga eziyisithupha. Ngakho, ngo-September 1999 ngagibela indiza ngaphindela eTogo. Nokho, ngalesi sikhathi ngangingedwa. Ake ucabange ngemizwa yomkhaya wakithi njengoba wawungibona ngizihambela ngedwa naphezu kokukhubazeka enganginakho! Kodwa sasingekho isizathu sokukhathazeka. Ngabaqinisekisa abazali bami ukuthi ngangiyofica abangane bami, abase befana nomkhaya wami, bengilindile eLomé.

Yeka ukuthi kwakuyinjabulo engakanani ukuphinde ngibe sendaweni enabantu abaningi kangaka abanesithakazelo eBhayibhelini! Kuyinto evamile ukubona abantu befunda iBhayibheli emgwaqweni. ETabligbo abantu bayakubiza ukuze uzoxoxa nabo ngeBhayibheli. Yeka ukuthi kwaba ilungelo elingakanani ukuhlanganyela indawo yokulala esesimweni esiphansi nalab’ odade ababili abangamaphayona akhethekile! Ngafunda enye indlela yokuphila, ukubheka izinto ngelinye iso. Okokuqala nokuyinhloko, ngabona ukuthi abafowethu nodadewethu abangamaKristu base-Afrika babeka izinto zoMbuso kuqala ekuphileni kwabo. Ngokwesibonelo, ukuhamba amakhilomitha amaningi beya eHholo LoMbuso akubavimbeli ukuba bangayi emihlanganweni yebandla. Ngafunda nokuningi ngemfudumalo nangokungenisa kwabo izihambi.

Ngolunye usuku ngibuya enkonzweni yasensimini, ngahlebela uSandra ukuthi ngangesaba ukubuyela eFrance. Amehlo ami ayesewohloke kakhulu. Ngacabanga ngemigwaqo yaseBéziers eminyene futhi enomsindo, izitebhisi ezisezakhiweni zokuhlala nezinye izinto eziningi kakhulu ezenza ukuphila kube nzima kumuntu ongaboni kahle. Ngokuphambene, imigwaqo yaseTabligbo, nakuba ingalungisiwe, yayithule—zingekho nezixuku ezinkulu nezimoto eziningi. Ngangingahlala kanjani eFrance manje njengoba ngase ngijwayele eTabligbo?

Ngemva kwezinsuku ezimbili umama wangishayela ucingo engazisa ngokuthi babengilindele esikoleni sezinja eziqondisayo. Inja eqeqeshiwe esencane yohlobo lweLabrador okuthiwa u-Océane yayisikulungele ukuba “amehlo” ami. Izidingo zami zaphinde zanakekeleka futhi izinkathazo zami zaphela. Ngemva kwezinyanga eziyisithupha zenkonzo yenjabulo eTabligbo, ngabuyela eFrance ukuze ngihlangane no-Océane.

Ngemva kwezinyanga eziningana ngiqeqeshwa, nganikwa u-Océane. Ekuqaleni, kwakungelula. Kwakudingeka sazane. Nokho, kancane kancane ngaqala ukubona ukuthi ngangimdinga kangakanani u-Océane. Empeleni, manje u-Océane uyingxenye yokuphila kwami. Babenzenjani abantu baseBéziers lapho bengibona ngiza nenja emizini yabo? Babengihlonipha kakhulu futhi bengibonisa umusa. U-Océane waba “iqhawe” lasendaweni. Njengoba abantu abaningi bengakhululeki uma kunomuntu okhubazekile, ukuba nenja kwangisiza ukuba ngikhulume ngokukhululeka ngokukhubazeka kwami. Abantu bakhululeka futhi bangilalela. Ngempela, u-Océane wayengisiza ukuba ngikwazi ukuqala ingxoxo.

Ukuya E-Afrika No-Océane

Ngangingakayikhohlwa i-Afrika, ngakho ngaqala ukuhlela uhambo lwami lwesithathu. Manje ngase ngizohamba no-Océane. Ngangizohamba futhi nomunye umbhangqwana osemusha, u-Anthony no-Aurore, nomngane wami uCaroline—bonke abangamaphayona njengami. Safika eLomé ngo-September 10, 2000.

Ekuqaleni, abaningi babemesaba u-Océane. Bambalwa abantu eLomé ababeke babona inja enkulu kangaka, ngoba izinja eziningi zaseTogo zincane. Lapho bebona amahanisi akhe, abanye babecabanga ukuthi uyinja enolaka okwakudingeka iboshwe. U-Océane waqale waba nesimo sokungivikela, ekulungela ukungivikela kunoma yini ayeyibona ingisongela. Noma kunjalo, u-Océane washeshe wazizwa esekhaya kule ndawo entsha. Uma efakwe amahanisi, wayazi ukuthi usemsebenzini—wayethobela umthetho, enze umsebenzi wakhe futhi ahlale eseduze kwami. Uma ekhunyuliwe, uyadlala, ngezinye izikhathi uyaganga. Siba nezikhathi ezijabulisayo uma sindawonye.

Sonke samenyelwa ukuba sihlale noSandra noChristine eTabligbo. Ukuze sisize abazalwane nodadewethu ebandleni ukuba bamjwayele u-Océane, sasibamema futhi sibachazele umsebenzi wenja eqondisayo, isizathu sokuba ngiyidinge nokuthi kufanele benzenjani uma ikhona. Abadala ebandleni bavuma ukuba ngize no-Océane eHholo LoMbuso. Njengoba leli lungiselelo lalingajwayelekile eTogo, kwenziwa isaziso ebandleni esasiyichaza kahle le ndaba. Enkonzweni yasensimini ngangihamba no-Océane kuphela uma ngiya ezimpindelweni noma ngiqhuba izifundo zeBhayibheli—izimo lapho ukuba khona kwakhe kwakuqondakala khona kalula.

Ukushumayela kule ndawo kusangijabulisa. Njalo kwakungithinta inhliziyo ukucabangela kwabantu abamnene, bekubonisa ngezenzo zomusa, njengokunginika isihlalo. Ngo-October 2001, umama wahamba nami ngesikhathi sengibuyela okwesine eTogo. Ngemva kwamasonto amathathu wabuyela eFrance, ejabule futhi eqiniseka ukuthi ngiphila kahle.

Ngimbonga ngokusuka enhliziyweni uJehova ngokuthi ngikwazile ukukhonza eTogo. Ngiyaqiniseka ukuthi njengoba ngisebenzisa konke enginakho enkonzweni yakhe, uJehova uzoqhubeka enginika ‘izicelo zenhliziyo yami.’a

[Umbhalo waphansi]

[Izithombe ekhasini 10]

Selokhu kwathi nhló bezilokhu zingihlaba umxhwele izindawo ezingodedangendlale zase-Afrika nobuhle bezilwane zasendle

[Isithombe ekhasini 10]

Ngangiya ezimpindelweni no-Océane

[Isithombe ekhasini 11]

Abadala bangivumela ukuba ngize no-Océane emihlanganweni yebandla