‘Yenza Umsebenzi Womvangeli’
“Hlala usangulukile kuzo zonke izinto, . . . wenze umsebenzi womvangeli.”—2 THIMOTHEWU 4:5.
1. Imuphi umsebenzi uJesu awunika abalandeli bakhe?
IGAMA nezinjongo zikaJehova kumenyezelwa emhlabeni wonke. Lokhu kungenxa yokuthi abantu bakaNkulunkulu abazinikezele baye bawuthatha ngokungathí sina umsebenzi uJesu Kristu awunika abalandeli bakhe lapho ethi: “Hambani niyokwenza abantu bazo zonke izizwe babe abafundi, nibabhapathize egameni likaYise neleNdodana nelomoya ongcwele, nibafundise ukugcina konke enginiyale ngakho.”—Mathewu 28:19, 20.
2. Umbonisi uThimothewu wathola muphi umyalo, futhi iyiphi enye yezindlela ababonisi abangamaKristu abangafeza ngayo inkonzo yabo?
2 Abafundi bakaJesu bekhulu lokuqala nabo bawuthatha ngokungathí sina lowo msebenzi. Ngokwesibonelo, umphostoli uPawulu wanxusa umbonisi ongumKristu ayekanye naye, uThimothewu: “[Yenza] umsebenzi womvangeli, uyifeze ngokugcwele inkonzo yakho.” (2 Thimothewu 4:5) Namuhla, enye indlela umbonisi afeza ngayo inkonzo yakhe iwukuba ummemezeli woMbuso oshisekayo, ohlanganyela njalo enkonzweni yasensimini. Ngokwesibonelo, umbonisi weSifundo Sencwadi Sebandla unelungelo elanelisayo lokuhola emsebenzini wokushumayela nokuqeqesha abanye. UPawulu wafeza umthwalo wakhe wemfanelo wokumemezela izindaba ezinhle, futhi wasiza ekuqeqesheleni abanye inkonzo.—IzEnzo 20:20; 1 Korinte 9:16, 17.
Abashumayeli Bevangeli Abashisekayo Bakudala
3, 4. Yini eyenzeka enkonzweni kaFiliphu yobuvangeli?
3 AmaKristu okuqala ayaziwa ngokuba abashumayeli bevangeli abashisekayo. Cabanga ngomvangeli uFiliphu. Wayengenye ‘yamadoda ayisikhombisa afakazelwa kahle agcwele umoya nokuhlakanipha’ akhethwa ukuba abe ukudla ngokungakhethi nsuku zonke, abele abafelokazi abangamaKristu abakhuluma isiGreki nabakhuluma isiHebheru eJerusalema. (IzEnzo 6:1-6) Ngemva kokuba leyo nkonzo ekhethekile iphelile futhi ushushiso luhlakaze bonke abafundi ngaphandle kwabaphostoli, uFiliphu waya eSamariya. Wafika lapho wamemezela izindaba ezinhle futhi umoya ongcwele wamnika amandla okukhipha amademoni nokuphulukisa abayizinyonga nabakhubazekile. AmaSamariya amaningi amukela isigijimi soMbuso, abhapathizwa. Bezwa ngalokhu, abaphostoli eJerusalema bathumela umphostoli uPetru noJohane eSamariya ukuze la makholwa asanda kubhapathizwa akwazi ukuthola umoya ongcwele.—IzEnzo 8:4-17.
4 Umoya kaNkulunkulu wabe usuholela uFiliphu ukuba ahlangane nomthenwa ongumTopiya endleleni eya eGaza. Ngemva kwencazelo ecacile kaFiliphu yesiprofetho sika-Isaya, le “ndoda esesikhundleni sokuphatha ngaphansi kukaKhandakhe indlovukazi yamaTopiya” yaba nokholo kuJesu Kristu, yabhapathizwa. (IzEnzo 8:26-38) Ngemva kwalokho, uFiliphu waya e-Ashidodi naseKhesariya, “ememezela izindaba ezinhle kuyo yonke imizi” lapho ayehamba khona. (IzEnzo 8:39, 40) Ngokuqinisekile wabeka isibonelo esihle ekwenzeni umsebenzi womvangeli!
5. Amadodakazi amane kaFiliphu ayaziwa ngani ngokukhethekile?
5 UFiliphu wayesakhuthele enkonzweni eKhesariya eminyakeni engaba ngu-20 kamuva. Lapho uPawulu noLuka behlala kwakhe, “wayenamadodakazi amane ayizintombi, ayeprofetha.” (IzEnzo 21:8-10) Ngokusobala ayeqeqeshwe kahle ngokomoya, eshisekela inkonzo, enanelungelo lokuprofetha. Ukushisekela kwabazali inkonzo kungaba nomphumela omuhle emadodaneni nasemadodakazini namuhla, kuwashukumisele ukuba enze ukushumayela ivangeli ngentshiseko kube umsebenzi wokuphila kwawo konke.
Abashumayeli Bevangeli Abashisekayo Namuhla
6. Iyiphi impumelelo abashumayeli bevangeli bekhulu lokuqala ababa nayo?
6 Esiprofethweni sakhe esibalulekile esibhekisela osukwini lwethu nasesikhathini sokuphela, uJesu Kristu wathi: “Izindaba ezinhle kumelwe zishunyayelwe ezizweni zonke kuqala.” (Marku 13:10) Ukuphela kwakuyofika ngemva kokuba izindaba ezinhle zishunyayelwe “emhlabeni wonke owakhiwe.” (Mathewu 24:14) Njengoba uPawulu nabanye abashumayeli bevangeli bekhulu lokuqala babememezela izindaba ezinhle, abaningi baba amakholwa, kwamiswa amabandla ezindaweni ngezindawo kuwo wonke uMbuso WaseRoma. Abadala ababemiswa ukuba bakhonze kula mabandla babehlanganyela nabafowabo nodadewabo emsebenzini wokushumayela ivangeli futhi bawenabisela kude umsebenzi wokushumayela. Izwi likaJehova laqhubeka likhula futhi linqoba kulezo zinsuku, njengoba nje lenza namuhla ngenxa yokuthi izigidi zoFakazi BakaJehova zenza umsebenzi wabashumayeli bevangeli. (IzEnzo 19:20) Ingabe nawe ungomunye walabo badumisi bakaJehova abajabulayo?
7. Abamemezeli boMbuso benzani namuhla?
7 Abamemezeli boMbuso abaningi banamuhla bawasebenzisa kahle amathuba okwandisa ingxenye ababa nayo emsebenzini wobuvangeli. Izinkulungwane ziye zangenela umkhakha wezithunywa zevangeli, futhi amakhulu ezinkulungwane ashumayela ivangeli isikhathi esigcwele njengamaphayona avamile nasizayo. Yeka umsebenzi omuhle owenziwa amadoda, abesifazane, nezingane, bonke abangabamemezeli boMbuso abashisekayo! Ngempela, bonke abantu bakaJehova bajabulela isibusiso sakhe esicebile njengoba bemkhonza belinganisene ihlombe nehlombe njengabashumayeli bevangeli abangamaKristu.—Zefaniya 3:9.
8. Imuphi umsebenzi wokubeka uphawu owenziwayo manje, futhi wenziwa obani?
8 UNkulunkulu unike abalandeli bakaJesu abagcotshiwe umthwalo wemfanelo wokumemezela izindaba ezinhle emhlabeni wonke. Kulo msebenzi wobuvangeli basekelwa inani elandayo ‘lezinye izimvu’ zikaKristu. (Johane 10:16) Esiprofethweni, lo msebenzi osindisa ukuphila ufaniswa nokubeka uphawu emabunzini alabo ababubulayo futhi abaqumayo ngenxa yazo zonke izinto ezinengekayo ezenzekayo manje. Maduze, ababi bazobhujiswa. Okwamanje, yeka ilungelo okuyilo ukuyisa amaqiniso asindisa ukuphila ezakhamuzini zomhlaba!—Hezekeli 9:4-6, 11.
9. Abasanda kuhlanganyela bangasizwa kanjani enkonzweni?
9 Uma sesinesikhathi esithile senza umsebenzi wokushumayela ivangeli, cishe kukhona esingakwenza ukuze sisize abasanda kuhlanganyela ebandleni. Ngezinye izikhathi, singase sikwazi ukuhamba nabo enkonzweni. Labo abakhonza njengabadala bayofuna ukwenza konke abangakwenza ukuze bakhe amanye amakholwa ngokomoya. Imizamo emihle yababonisi abathobekile ingenza lukhulu ekusizeni abanye ukuba babe abashumayeli bevangeli abashisekayo nabakhiqizayo.—2 Petru 1:5-8.
Ukushumayela Endlini Ngendlu
10. UKristu nabalandeli bakhe bokuqala babeka siphi isibonelo enkonzweni?
10 UJesu Kristu wabekela abalandeli bakhe isibonelo esihle kakhulu njengomvangeli. Likhuluma ngenkonzo kaKristu nabaphostoli bakhe, iZwi likaNkulunkulu lithi: “Wahamba umuzi ngomuzi nomzana ngomzana, eshumayela futhi ememezela izindaba ezinhle zombuso kaNkulunkulu. Abayishumi nambili babenaye.” (Luka 8:1) Kuthiwani ngabaphostoli ngokwabo? Ngemva kokuthululwa komoya ongcwele ngePhentekoste lika-33 C.E., “nsuku zonke ethempelini nasendlini ngendlu baqhubeka ngaphandle kokuyekethisa, befundisa futhi bememezela izindaba ezinhle ngoKristu, uJesu.”—IzEnzo 5:42.
11. NgokwezEnzo 20:20, 21, umphostoli uPawulu wayenzani enkonzweni yakhe?
11 Ngenxa yokushumayela kwakhe ivangeli ngentshiseko, umphostoli uPawulu wayengatshela abadala abangamaKristu e-Efesu: “[Angigodlanga] ukunitshela noma yini ezintweni eziyinzuzo nokunifundisa obala nasendlini ngendlu.” Lapho uPawulu ‘efundisa endlini ngendlu,’ ingabe wayehambela amakhaya abakhulekeli bakaJehova ayekanye nabo, enza ukuhambela kokwalusa amakholwa? Akunjalo, ngoba uyaqhubeka achaze: “KumaJuda nakumaGreki nganikeza ubufakazi obuphelele ngokuphathelene nokuphendukela kuNkulunkulu nokholo eNkosini yethu uJesu.” (IzEnzo 20:20, 21) Ngokuvamile, labo abase bezinikezele kakade kuJehova kwakungeke kudingeke bafundiswe ngokuphathelene “nokuphendukela kuNkulunkulu nokholo eNkosini yethu uJesu.” UPawulu wayeqeqesha abadala abangamaKristu e-Efesu enkonzweni yendlu ngendlu ebe efundisa abangakholwa mayelana nokuphenduka nokholo. Ngokwenza lokhu, uPawulu wayelingisa indlela eyayiqalwe uJesu.
12, 13. Ngokuvumelana neyabaseFiliphu 1:7, yini abantu bakaJehova abaye bayenza ngelungelo labo lokushumayela?
12 Inkonzo yendlu ngendlu ingaba inselele. Ngokwesibonelo, abanye bayacasuka lapho sifika emizini yabo nesigijimi seBhayibheli. Akusona isifiso sethu ukucasula abantu. Nokho, inkonzo yendlu ngendlu isekelwe emiBhalweni, futhi uthando ngoNkulunkulu nomakhelwane lusishukumisela ukuba sishumayele ngale ndlela. (Marku 12:28-31) Ukuze ‘sivikele futhi simise ngokomthetho’ ilungelo lethu lokushumayela endlini ngendlu, siye sethula amacala ezinkantolo, kuhlanganise neNkantolo Ephakeme Yase-United States. (Filipi 1:7) Cishe njalo, leyo nkantolo iye yahambisana nathi. Kuvamile ukuba kwenziwe isinqumo esinjengalesi:
13 “Ukusakaza amapheshana enkolo kuyindlela endala yokushumayela yezithunywa zevangeli—endala njengomlando wokunyathelisa. Kuye kwaba insika ezinhlanganweni ezihlukahlukene zenkolo eminyakeni edlule. Nanamuhla, le ndlela yokushumayela ivangeli isetshenziswa ngezinga elikhulu amahlelo ahlukahlukene enkolo, anabathengisi bezincwadi abayisa iVangeli ezinkulungwaneni zemizi, futhi abafuna ukuthola abantu abazobambelela okholweni lwabo ngokubahambela mathupha. . . . ESichibiyelweni Sokuqala [soMthetho-sisekelo Wase-United States] lolu hlobo lomsebenzi wenkolo lusezingeni elifanayo ngokubaluleka nokukhulekela emasontweni nokushumayela emapulpiti.”—Murdock v. Pennsylvania, 1943.
Kungani Kufanele Siqhubeke Sishumayela?
14. Ungaba yini umphumela wokuphindelela enkonzweni yethu?
14 Ziningi izizathu zokushumayela endlini ngendlu. Njalo lapho sithola othile ekhaya, sizama ukutshala imbewu yeqiniso lemiBhalo. Ngokwenza izimpindelo, sizama ukuyinisela. Futhi ukuphindelela kungaba nomphumela omuhle, ngoba uPawulu wabhala: “Mina ngatshala, u-Apholo wanisela, kodwa uNkulunkulu waqhubeka ekhulisa.” (1 Korinte 3:6) Ngakho masiqhubeke ‘sitshala futhi sinisela,’ siqiniseka ukuthi uJehova ‘uyokhulisa.’
15, 16. Kungani sifika siphindelela emizini yabantu?
15 Senza umsebenzi wabashumayeli bevangeli ngoba ukuphila kusengozini. Ngokushumayela singazisindisa thina nalabo abasilalelayo. (1 Thimothewu 4:16) Uma sazi ukuthi ukuphila komuntu kusengozini, ingabe besiyokwenza umzamo owodwa kuphela wokugcina icala ukuze simsize? Lutho neze! Njengoba kuhileleke insindiso, siyaphindelela emizini yabantu. Izimo zishintsha njalo. Umuntu ongenakulalela ngoba ematasa kakhulu namuhla angase athande ukusilalela isigijimi seBhayibheli ngesinye isikhathi. Singase sithole elinye ilungu lomkhaya ngesikhathi esilandelayo, futhi lokho kuholele engxoxweni engokomBhalo.
16 Akuzona kuphela izimo zabaninikhaya ezingashintsha kodwa nesimo sengqondo sabo. Ngokwesibonelo, ukushonelwa okubuhlungu ngumuntu othandekayo kungase kushukumisele umuntu ukuba alalele isigijimi soMbuso. Sithemba ukuthi siyomduduza lowo muntu, simenze aqaphele isidingo sakhe esingokomoya, futhi sibonise ukuthi singaneliseka.—Mathewu 5:3, 4.
17. Siyini isizathu esiyinhloko sokushumayela kwethu?
17 Isizathu esiyinhloko sokushumayela kwethu endlini ngendlu noma sokwenza ezinye izinhlobo zenkonzo yobuKristu yisifiso sokuhlanganyela ekwenzeni igama likaJehova laziwe. (Eksodusi 9:16; IHubo 83:18) Yeka indlela okwanelisa ngayo lapho umsebenzi wethu wobuvangeli usiza abathandi beqiniso nokulunga ukuba babe abadumisi bakaJehova! Umhubi wahlabelela: “Nina zinsizwa nani futhi zintombi, nina maxhegu kanye nabafana. Mabadumise igama likaJehova, ngoba igama lakhe lodwa liphakeme ngokungenakufinyelelwa. Isithunzi sakhe singaphezu komhlaba nezulu.”—IHubo 148:12, 13.
Ukushumayela Ivangeli Kuyasizuzisa Nathi Ngokwethu
18. Kusizuzisa kanjani ukwenza umsebenzi wokushumayela ivangeli?
18 Ukwenza umsebenzi wokushumayela ivangeli kusizuzisa ngezindlela ezihlukahlukene thina ngokwethu. Ukuhambisa izindaba ezinhle endlini ngendlu kusisiza sihlakulele ukuthobeka, ikakhulu lapho singamukelwa ngomusa. Ukuze sibe abashumayeli bevangeli abaphumelelayo, kudingeka sibe njengoPawulu, ‘owaba yizinto zonke kubantu bazo zonke izinhlobo ukuze asindise abathile.’ (1 Korinte 9:19-23) Ukuba nokuhlangenwe nakho ensimini kusisiza sibe nekhono lokungacasuli. Ngokuthembela kuJehova nokukhetha amazwi ethu kahle, singasebenzisa iseluleko sikaPawulu: “Amazwi enu ngaso sonke isikhathi mawabe nomusa, ayoliswe ngosawoti, ukuze nazi ukuthi kufanele nimphendule kanjani umuntu ngamunye.”—Kolose 4:6.
19. Umoya ongcwele ubasiza kanjani abashumayeli bevangeli?
19 Umsebenzi wokushumayela ivangeli usishukumisela nokuba sithembele emoyeni ongcwele kaNkulunkulu. (Zakariya 4:6) Kube sekubonakala izithelo zawo enkonzweni yethu—“uthando, injabulo, ukuthula, ukubekezela, umusa, ubuhle, ukholo, ubumnene, ukuzithiba.” (Galathiya 5:22, 23) Uthonya indlela esisebenzelana ngayo nabantu, ngoba ukuvumela ukuqondiswa umoya kusisiza sibonise uthando, sibe abajabulayo nabanokuthula, ababhekakade nabanomusa, sibonise ubuhle nokholo, futhi sibonise ubumnene nokuzithiba lapho simemezela izindaba ezinhle.
20, 21. Iziphi ezinye zezibusiso nezinzuzo zokuhlala simatasa njengabashumayeli bevangeli?
20 Esinye isibusiso esisithola njengabashumayeli bevangeli ukuthi siba nozwela ngokwengeziwe. Lapho abantu besitshela izinkinga zabo—ukugula, ukuswela umsebenzi, izinkinga zasekhaya—asenzi sengathi singabeluleki, kunalokho sihlanganyela nabo imiBhalo ekhuthazayo neduduzayo. Siyabakhathalela abantu abaphuphuthekisiwe ngokomoya kodwa ababonakala bekuthanda ukulunga. (2 Korinte 4:4) Futhi yeka isibusiso okuyiso ukunikeza usizo olungokomoya kulabo ‘ababethambekele ngokufanele ekuphileni okuphakade’!—IzEnzo 13:48.
21 Ukuhlanganyela njalo emsebenzini wokushumayela ivangeli kusisiza ukuba sigcine izingqondo zethu zigxile ezintweni ezingokomoya. (Luka 11:34) Kuyazuzisa impela lokho, ngoba ukube bekungengenxa yako besingase sivumele ukunqotshwa izilingo zokuthanda izinto ezibonakalayo, ezivame kakhulu kuleli zwe. Umphostoli uJohane wanxusa amaKristu: “Ningalithandi izwe noma izinto ezisezweni. Uma umuntu ethanda izwe, uthando lukaBaba alukho kuye; ngoba konke okusezweni—isifiso senyama nesifiso samehlo nokugabisa ngalokho umuntu aziphilisa ngakho—akuveli kuBaba, kodwa kuvela ezweni. Ngaphezu kwalokho, izwe liyadlula, kanjalo nesifiso salo, kodwa lowo owenza intando kaNkulunkulu uhlala kuze kube phakade.” (1 Johane 2:15-17) Ukuhlala simatasa njengabashumayeli bevangeli, sinokuningi kokukwenza emsebenzini weNkosi, kusisiza ukuba singathandi izwe.—1 Korinte 15:58.
Zibekelele Ingcebo Yasezulwini
22, 23. (a) Iyiphi ingcebo abashumayeli bevangeli abangamaKristu abayibekelelayo? (b) Isihloko esilandelayo sizosisiza kanjani?
22 Umsebenzi wokushumayela ngoMbuso ngentshiseko uletha izinzuzo ezihlala njalo. UJesu wakubonisa lokhu lapho ethi: “Yekani ukuzibekelela ingcebo emhlabeni, lapho inundu nokugqwala kudla khona, nalapho amasela egqekeza khona ebe. Kunalokho, zibekeleleni ingcebo ezulwini, lapho kungoni nundu nakugqwala khona, nalapho amasela engagqekezi khona ebe. Ngoba lapho umcebo wakho ukhona, yilapho nenhliziyo yakho iyoba khona futhi.”—Mathewu 6:19-21.
23 Kwangathi singaqhubeka sizibekelela ingcebo ezulwini, siqaphela ukuthi alikho ilungelo esingaba nalo elidlula elokumelela uJehova iNkosi enguMbusi njengoFakazi bakhe. (Isaya 43:10-12) Njengoba sifeza umsebenzi esiwunikiwe njengezikhonzi zikaNkulunkulu, cishe siyozizwa njengowesifazane ongumKristu oseneminyaka engaphezu kwengu-90 ubudala, owasho lokhu ngokuphila kwakhe okude ekhonza uNkulunkulu: “Kukho konke ngibonga uJehova ngokungibekezelela yonke le minyaka, futhi ngithandaza ngobuqotho ukuba abe uBaba wami onothando phakade.” Uma sibazisa ngendlela efanayo ubuhlobo bethu noNkulunkulu, nakanjani siyofuna ukwenza umsebenzi womvangeli ngokugcwele. Isihloko esilandelayo sizosisiza sibone indlela esingayifeza ngayo ngokugcwele inkonzo yethu.
Ungaphendula Kanjani?
• Kungani kufanele senze umsebenzi womvangeli?
• Yini ongayisho ngomsebenzi wabashumayeli bevangeli bakudala nabanamuhla?
• Kungani sishumayela endlini ngendlu?
• Uzuza kanjani wena ngokwenza umsebenzi womvangeli?
[Izithombe ekhasini 10]
Njengoba kudala kwakunabashumayeli bevangeli abanjengoFiliphu namadodakazi akhe, nanamuhla bakhona abashumayeli bevangeli abajabulayo
[Isithombe ekhasini 14]
Uzuza kanjani wena njengoba uxoxa nabanye ngezindaba ezinhle?