Basha, Hambani Bgokufanele UJehova

ENYE intsha engamaKristu kuye kwadingeka ihlale kude nasekhaya, kude nasebandleni lasekhaya isikhathi esithile. Enye iye yenza kanjalo ukuze yandise inkonzo yayo. Enye kuye kwadingeka ihambe ekhaya ngenxa yokuma kwayo kokungathathi-hlangothi ezindabeni zaleli zwe. (Isaya 2:4; Johane 17:16) Kwamanye amazwe, “uKhesari” uye wafaka emajele intsha egcina ubuqotho noma wayala ukuba yenze umsebenzi womphakathi.a—Marku 12:17; Thithu 3:1, 2.

Lapho idonsa izigwebo zayo zasejele ngenxa yokungathathi kwayo uhlangothi, le ntsha ingase ivalelwe isikhathi eside nezigilamkhuba. Ukuba kude nasekhaya ngenxa yezinye izizathu nako kuye kwaphoqelela intsha ukuba isebenze ezimweni ezinokuziphatha okubi. La maKristu amasha nabanye abaphoqeleka ukusebenza ezimweni ezinjalo bangabhekana kanjani ngokuphumelelayo nokucindezela, njengoba bezama ‘ukuqhubeka behamba ngokufanele uNkulunkulu?’ (1 Thesalonika 2:12) Abazali bawo bangawasiza kanjani ukuba azilungiselele ukubhekana nanoma iziphi izimo ezingezinhle ezingaphakama?—IzAga 22:3.

Izinselele Ezivamile Kule Ntsha

UTákis oneminyaka engu-21 ubudala, owaphoqeleka ukuchitha izinyanga ezingu-37 engekho ekhaya uthi: “Kwakunzima futhi kuthusa ukuba kude nasekhaya lapho abazali bami babengivikela ngokunakekela khona nalapho nganginganyelwe khona ngothando abadala ababengazi kahle.”b Uyanezela: “Ngezinye izikhathi, ngangizizwa ngisengozini ngempela.” UPétros, oneminyaka engu-20 ubudala, kwadingeka ahambe ekhaya iminyaka engaphezu kwemibili. Uyavuma: “Ngokokuqala ngqá ekuphileni kwami, kwadingeka ngenze izinqumo mayelana nokuzijabulisa kanye nabangane ngingasizwa muntu, futhi izinqumo zami zazingahlakaniphile njalo.” Ube esethi: “Ngezinye izikhathi ngangikhathazeka lapho ngicabanga ngomthwalo wemfanelo othé xaxa olethwa inkululeko eyengeziwe.” UTássos, umdala ongumKristu obonana njalo nentsha engamaKristu esezimweni ezinje, waphawula: “Ulimi olungcolile, ukuvukela nokuziphatha kobudlova kontanga abangakholwa kungayithonya intsha engaqaphile nengavikelekile.”

Njengoba ihlala futhi isebenza nabantu abangazihloniphi izimiso zeBhayibheli, intsha enjalo engamaKristu kudingeka iziqaphe ingalingeki ukuba ilingise izindlela zontanga yabo ezinokuziphatha okubi nezingqubuzana nemiBhalo. (IHubo 1:1; 26:4; 119:9) Ukunamathela esimisweni esihle sesifundo somuntu siqu, ukuba khona emihlanganweni nenkonzo yasensimini kungase kubonakale kunzima. (Filipi 3:16) Ukubeka imigomo engokomoya nokusebenzela ukuyifinyelela nakho kungase kungabi lula.

Ngokuqinisekile, intsha ethembekile engamaKristu ifuna ukujabulisa uJehova ngokuziphatha nangenkulumo yayo. Ngobuqotho izama ukulalela isimemo esikhangayo sikaYise wasezulwini: “Hlakanipha, ndodana yami, wenze inhliziyo yami ijabule, ukuze ngimphendule ongiklolodelayo.” (IzAga 27:11) Iyaqaphela ukuthi ukuzilungisa nokuziphatha kwayo kuyayithinta indlela abanye ababheka ngayo uJehova nabantu bakhe.—1 Petru 2:12.

Kuyancomeka ukuthi iningi lentsha enjalo lenza okusemandleni ukuba lifane nabafowabo bangekhulu lokuqala umphostoli uPawulu athandaza ngabo: ‘Hambani ngokufanele uJehova ngenjongo yokumjabulisa ngokugcwele njengoba niqhubeka nithela izithelo kuyo yonke imisebenzi emihle ukuze nikhuthazele ngokugcwele futhi nibe ababekezela ngenjabulo.’ (Kolose 1:9-11) IBhayibheli linezibonelo eziningana zentsha eyesaba uNkulunkulu eyahamba ngokufanele uNkulunkulu ngokuphumelelayo endaweni engayijwayele, enobutha negcwele ukukhonza izithombe.—Filipi 2:15.

“UJehova WayenoJosefa”

Eseyibhobhodlana, uJosefa, indodana ethandekayo kaJakobe noRaheli wazithola ekude nesidleke esivikelekile sikayise owesaba uNkulunkulu. Wathengiselwa ebugqilini eGibhithe. UJosefa wayeyisibonelo esihle njengensizwa ekhuthele, enokwethenjelwa neziphethe kahle. Naphezu kokusebenzela uPotifari njengesigqila—umuntu owayengamkhulekeli uJehova—uJosefa wayezinikele futhi ekhuthele, kangangokuthi inkosi yakhe yagcina isishiyele kuye zonke izinto zendlu yayo. (Genesise 39:2-6) UJosefa wagcina ubuqotho bakhe kuJehova, futhi lapho lokhu kuphumela ekuboshweni kwakhe, akazange aphethe ngokuthi: “Kusizani ukuba qotho?” Ngisho nalapho esetilongweni, wabonisa izimfanelo ezinhle, futhi kungakabiphi wayesenakekela izinto eziningi zokusebenza kwejele. (Genesise 39:17-22) UNkulunkulu wambusisa, futhi njengoba kushiwo kuGenesise 39:23, “uJehova wayenoJosefa.”

Njengoba ayehlukaniswe nomkhaya wakubo owesaba uNkulunkulu, yeka indlela okwakungaba lula ngayo ngoJosefa ukuvumelanisa ukuziphatha kwakhe nokwalawo maqaba ayemzungezile, alingise indlela yokuphila yaseGibhithe yokuziphatha okubi! Kunalokho, wanamathela ezimisweni zokwesaba uNkulunkulu futhi wagcina ukuma kwakhe okuhlanzekile naphezu kwezilingo ezinzima kakhulu. Lapho umkaPotifari emncenga ngokuphindaphindiwe ukuba alale naye, impendulo yakhe ewujuqu yayithi: “Ngingabenza kanjani lobu bubi obukhulu kangaka ngone kuNkulunkulu?”—Genesise 39:7-9.

Namuhla, intsha engoFakazi kudingeka ilalele izixwayiso ezisekelwe eBhayibhelini ngokuqondene nabangane ababi, ukuzijabulisa okunokuziphatha okubi, izithombe zobulili ezingcolile nomculo owonakalisayo. Iyaqaphela ukuthi “amehlo kaJehova akuyo yonke indawo, aqapha ababi nabahle.”—IzAga 15:3.

UMose Wayenqaba ‘Injabulo Yesono’

UMose wakhulela endaweni eyayikhonze ukukhonza izithombe neyayiphishekela izinjabulo egcekeni likaFaro. Lithi iBhayibheli ngaye: “Ngokholo uMose . . . wenqaba ukubizwa ngokuthi indodana yendodakazi kaFaro, ekhetha ukuphathwa kabi nabantu bakaNkulunkulu kunokujabula isikhashana esonweni.”—Hebheru 11:24, 25.

Ubungane nezwe bungaholela ezinzuzweni ezithile, kodwa buhlala isikhashana. Uma buhlale isikhathi eside, bungadonsa kuphela isikhathi esilinganiselwe esisalele leli zwe. (1 Johane 2:15-17) Bekungeke yini kube ngcono ukulandela isibonelo sikaMose? IBhayibheli lithi “waqhubeka egxilile sengathi uyambona Lowo ongabonakali.” (Hebheru 11:27) Wagcina ingqondo yakhe igxile efeni elingokomoya lokhokho bakhe abesaba uNkulunkulu. Wenza injongo kaJehova yaba injongo yakhe ekuphileni, wakwenza umgomo wakhe ukwenza intando kaNkulunkulu.—Eksodusi 2:11; IzEnzo 7:23, 25.

Lapho intsha eyesaba uNkulunkulu izithola isesimweni esingenakho ukwesaba uNkulunkulu nesingathandeki, ingaqinisa ubuhlobo bayo noJehova ngesifundo somuntu siqu, imazi kangcono “Lowo ongabonakali.” Isimiso esigcwele semisebenzi yobuKristu, esihlanganisa ukuba khona njalo emihlanganweni nasensimini, siyoyisiza le ntsha igcine izingqondo zayo zigxile ezintweni ezingokomoya. (IHubo 63:6; 77:12) Kufanele izame ukuhlakulela ukholo nethemba okuqine njengokukaMose. Iyobe yenza kahle ngokugxilisa ukucabanga nezenzo zayo kuJehova, ijabulele ukuba abangane bakhe.

Wasebenzisa Ulimi Lwakhe Ukuze Adumise UNkulunkulu

Omunye osemusha owaba yisibonelo lapho engekho ekhaya kwakuyintombazanyana engumIsrayeli eyayithunjwe abaseSiriya ezinsukwini zomprofethi kaNkulunkulu u-Elisha. Yaba incekukazi kamkaNahamani, induna yebutho lempi laseSiriya eyayinochoko. Le ntombazanyana yatshela umkankosi yayo: “Ukube nje inkosi yami ibiphambi komprofethi oseSamariya! Khona-ke ubeyoyiphilisa ochokweni lwayo.” Ngenxa yokufakaza kwayo, uNahamani waya ku-Elisha kwa-Israyeli futhi wahlanzwa ochokweni. Ngaphezu kwalokho, uNahamani waba umkhulekeli kaJehova.—2 AmaKhosi 5:1-3, 13-19.

Isibonelo sale ntombazanyana sigcizelela isidingo sokuba intsha isebenzise ulimi lwayo ngendlela edumisa uNkulunkulu, ngisho noma ikude nabazali bayo. Ukube leyo ntombazanyana yayizijwayeze “inkulumo yobuwula” noma “ukuntela okuyichilo,” yayiyozizwa ikhululekile yini ukusebenzisa ulimi lwayo ngendlela ephumelelayo njengoba yenza lapho kuvela ithuba? (Efesu 5:4; IzAga 15:2) UNíkos, insizwa esanda kuhlanganisa iminyaka engu-20 ubudala eyaboshelwa ukungathathi hlangothi, uyakhumbula: “Ngesikhathi nginabanye abafowethu abasebasha ejele lezolimo, sikude negunya labazali nebandla, ngaphawula ukuthi izinga lenkulumo yethu liyawohloka. Impela yayingamdumisi uJehova.” Ngokujabulisayo, uNíkos nabanye baye basizwa ukuba balalele iseluleko sikaPawulu ngale ndaba: “Ubufebe nokungcola kwazo zonke izinhlobo noma ukuhaha makungaphathwa nakuphathwa phakathi kwenu, njengoba nje kufanele abantu abangcwele.”—Efesu 5:3.

UJehova Wayengokoqobo Kubo

Okuhlangenwe nakho kwabangane bakaDaniyeli abathathu abangamaHebheru eBhabhiloni lasendulo kufakazela iqiniso lesimiso esashiwo uJesu sokuthi ukuthembeka ezintweni ezincane kuholela ekuthembekeni nakwezinkulu. (Luka 16:10) Lapho bebhekene nenkinga yokudla ukudla okwenqatshelwa uMthetho KaMose, babengase babeke izizathu zokuthi babethunjelwe kwelinye izwe, ngaleyo ndlela ayikho into ababengayenza. Kodwa yeka isibusiso abasithola ngokuzithatha ngokungathí sina izinto ezazibonakala zingasho lutho! Baba nempilo kakhulu futhi bahlakanipha ukudlula zonke izithunjwa ezazilokhu zizitika ngezibiliboco zenkosi. Akungatshazwa ukuthi ukuthembeka kulezi zinto ezincane kwabaqinisa, kwaze kwathi lapho bebhekene novivinyo olukhudlwana lokukhulekela isithombe, abangavuma ukuyekethisa.—Daniyeli 1:3-21; 3:1-30.

UJehova wayengokoqobo ngempela kulezi zinsizwa ezintathu. Nakuba zazingekho emakubo, zikude nesikhungo sokukhulekela uNkulunkulu, zazizimisele ukuzigcina zingenabala elivela ezweni. (2 Petru 3:14) Ubuhlobo babo noJehova babuyigugu kakhulu kangangokuthi babezimisele ukudela ukuphila kwabo ngenxa yabo.

UJehova Ngeke Anishiye

Kuyaqondakala ukuthi lapho intsha ikude nabantu ebathandayo nebathembayo ingase izizwe ingalondekile, ingaqiniseki futhi inovalo. Nokho, ingabhekana novivinyo nezilingo zayo iqiniseka ngokuphelele ukuthi ‘uJehova ngeke ayishiye.’ (IHubo 94:14) Uma intsha enjalo ‘ihlupheka ngenxa yokulunga,’ uJehova ukhona ukuba ayisize iqhubeke ihamba “endleleni yokulunga.”—1 Petru 3:14; IzAga 8:20.

Ngokungaphezi, uJehova wabaqinisa futhi wabavuza ngokucebile oJosefa, uMose, intombazanyana engumIsrayeli eyayithunjiwe, nabasha abathathu abathembekile abangamaHebheru. Namuhla, usebenzisa umoya wakhe ongcwele, iZwi lakhe, nenhlangano yakhe ukuze asekele labo ‘abalwa ukulwa okuhle kokholo,’ ebabekela umvuzo ‘wokuphila okuphakade.’ (1 Thimothewu 6:11, 12) Yebo, ukuhamba ngokufanele uJehova kungenzeka, futhi kuyinto ewukuhlakanipha ukuyenza.—IzAga 23:15, 19.

[Imibhalo yaphansi]

[Ibhokisi ekhasini 25]

BAZALI—LUNGISELELANI IZINGANE ZENU!

“Njengemicibisholo esandleni sendoda enamandla, banjalo abantwana bobusha.” (IHubo 127:4) Akunakuzenzakalela ukuba umcibisholo uyohlaba lapho uqondiswe khona. Kumelwe ucibishelwe ngobunyoninco. Ngokufanayo, ngaphandle kwesiqondiso esifanele sabazali, izingane azinakukwazi ukubhekana nokuphila okungokoqobo lapho zikude nasekhaya.—IzAga 22:6.

Intsha ithambekele ekwenzeni izinto ingacabangisisanga ngazo noma yehlulwe “izifiso zobusha.” (2 Thimothewu 2:22) IBhayibheli liyaxwayisa: “Yinduku nokusola okunika ukuhlakanipha; kodwa umntwana oyekwayo uyobangela unina amahloni.” (IzAga 29:15) Ukuhluleka kwabazali ukubeka imingcele ekuziphatheni kosemusha, kwenza ingane izithole ingakulungele ukubhekana nezingcindezi zokuphila kude nasekhaya.

Ngendlela ecacile nenengqondo, abazali abangamaKristu kufanele bachazele izingane zabo ngobunzima, izingcindezi namaqiniso okuphila kulesi simiso sezinto. Ngomoya wokwakha, bangachazela osemusha ngezimo ezingemnandi angase ahlangabezane nazo uma kwenzeka kudingeke ahlale kude nasekhaya. Lokhu kuqeqesha, kuhambisana nokuhlakanipha okuvela kuNkulunkulu, ‘kuyonika ongenalo ulwazi ukukhalipha, nensizwa ulwazi nekhono lokucabanga.’—IzAga 1:4.

Abazali abafaka izindinganiso zokwesaba uNkulunkulu nezimiso zokuziphatha okuhle ezinhliziyweni zezingane zabo bazisiza ukuba ziphumelele ukubhekana nezinselele zokuphila. Ukuthi izingane zabo ziyaphumelela noma ziyahluleka kungaxhomeka esifundweni somkhaya seBhayibheli esiqhutshwa njalo, izingxoxo ezikhululekile kanye nesithakazelo esiqotho kuzo izingane. Abazali kufanele banikeze izingane zabo ukuqeqesha okusekelwe ekwesabeni uNkulunkulu ngendlela elinganiselayo kodwa eyakhayo nefanele, bezilungiselela ukuba zikwazi ukuzimela lapho sezikhulile. Ngokuba yisibonelo bona ngokwabo, abazali bangafundisa izingane zabo ukuthi kungenzeka ukuba sezweni kodwa ungabi ingxenye yalo.—Johane 17:15, 16.

[Isithombe ekhasini 23]

Enye intsha engamaKristu kuye kwadingeka ihambe ekhaya

[Izithombe ekhasini 24]

Ngokumelana nesilingo, intsha ingalingisa uJosefa futhi ukuziphatha kwayo kuhlale kuhlanzekile

[Izithombe ekhasini 26]

Lingisa intombazanyana engumIsrayeli eyayithunjiwe, eyasebenzisa ulimi lwayo ukuze idumise uJehova