Nezelani Olwazini Lwenu Ukuzithiba
“Nezelani . . . olwazini lwenu ukuzithiba.”—2 PETRU 1:5-8.
1. Izinkinga eziningi zabantu ziwumphumela wokuhluleka ukwenzani?
EMKHANKASWENI omkhulu wokulwa nokudliwa kwezidakamizwa, intsha yase-United States yayalwa: “Mane uthi cha.” Yeka indlela ebeziyoba ngcono ngayo izinto ukube wonke umuntu ubengathi cha, angasho nje kuphela ekudleni izidakamizwa, kodwa nasekuphuzeni ngokweqile, ezindleleni zokuphila eziwubuwula noma ezinokuziphatha okubi, emikhubeni yokungathembeki kwezamabhizinisi, ‘nasezifisweni zenyama’! (Roma 13:14) Noma kunjalo, ubani ongasho kugcwale umlomo athi kuhlale kulula ukuthi cha?
2. (a) Iziphi izibonelo eziseBhayibhelini ezibonisa ukuthi ubunzima bokuthi cha abubusha? (b) Lezi zibonelo kufanele zisikhuthaze ukuba senzeni?
2 Njengoba kunzima ngabo bonke abantu abangaphelele ukuzithiba, kufanele sibe nesithakazelo sokufunda indlela yokunqoba noma ibuphi ubuthaka esinabo. IBhayibheli lisitshela ngabantu bangesikhathi esidlule ababezama ukukhonza uNkulunkulu kodwa ngezinye izikhathi kwaba umqansa nje ukuthi cha. Khumbula uDavide nesono sakhe sokuphinga noBhati-sheba. Saholela ekufeni komntwana wabo owatholwa ngokuphinga, nasekufeni komyeni kaBhati-sheba, bobabili bengenacala. (2 Samuweli 11:1-27; 12:15-18) Noma cabanga ngomphostoli uPawulu, owavuma obala: “Ngoba okuhle engikufisayo angikwenzi, kodwa okubi engingakufisi yikho engikwenza umkhuba.” (Roma 7:19) Kuyenzeka yini ngezinye izikhathi uzizwe ukhungatheké ngendlela efanayo? UPawulu waqhubeka: “Ngiyajabula ngempela ngomthetho kaNkulunkulu ngokomuntu enginguye ngaphakathi, kodwa ngibona emalungwini ami omunye umthetho olwa nomthetho wengqondo yami futhi ongithumbela emthethweni wesono osemalungwini ami. Yeka mina muntu wosizi! Ubani oyongophula kulo mzimba othola lokhu kufa?” (Roma 7:22-24) Kufanele izibonelo eziseBhayibhelini ziqinise ukuzimisela kwethu ukungalokothi siyeke ukulwa ukuze sifinyelele ukuzithiba ngezinga elithé xaxa.
Ukuzithiba Yisifundo Okufanele Sifundwe
3. Chaza ukuthi kungani singenakulindela ukuba kube lula ukubonisa ukuzithiba.
3 Ukuzithiba, okuhlanganisa ukukwazi ukuthi cha, kukhulunywa ngakho kweyesi-2 Petru 1:5-7 kanye nokholo, ubuhle, ulwazi, ukukhuthazela, ukuzinikela kokuhlonipha uNkulunkulu, uthando lobuzalwane nothando. Asizalwa sinalezi zimfanelo ezithandekayo. Kumelwe zihlakulelwe. Kudinga ukuzimisela nomzamo ukuzibonisa ngezinga eliphakeme. Pho-ke, ingabe kufanele silindele ukuzithiba ukuba kube into elula?
4. Kungani abantu abaningi benomuzwa wokuthi abanankinga yokuzithiba, kodwa lokhu kuyinkomba yani?
4 Yiqiniso, abantu abaningi bangase babe nomuzwa wokuthi abanankinga yokuzithiba. Benza abakuthandayo ekuphileni, lokho okufunwa inyama yabo engaphelele bazi noma bengazi, futhi bangacabangi kangako ngemiphumela engathinta bona noma abanye. (Jude 10) Ukungakwazi nokungafuni ukuthi cha kubonakala kakhulu manje kunanini ngaphambili. Kuyinkomba yokuthi ngempela siphila “ezinsukwini zokugcina” uPawulu akhuluma ngazo lapho ebikezela: “Kuyofika izikhathi ezibucayi okunzima ukubhekana nazo. Ngoba abantu bayokuba abazithandayo, abathanda imali, abazazisayo, abazidlayo, abahlambalazi, . . . abangenakho ukuzithiba.”—2 Thimothewu 3:1-3.
5. Kungani oFakazi BakaJehova benesithakazelo endabeni yokuzithiba, futhi isiphi iseluleko esisasebenza namanje?
5 OFakazi BakaJehova bayazi kahle inselele ekhona mayelana nesidingo sokuzithiba. NjengoPawulu, bayakuqaphela ukulwisana okukhona phakathi kwesifiso sokujabulisa uNkulunkulu ngokuphila ngokuvumelana nezindinganiso zakhe, kanye nenkambo inyama yabo engaphelele engase ibashoshozelele ukuyithatha. Ngenxa yalokhu, sekuyisikhathi eside benesithakazelo endleleni yokunqoba lokhu kuqophisana. Emuva ngo-1916, umagazini wakudala ofana nalo owufundayo manje wakhuluma “ngenkambo efanelekile okufanele siyithathe ukuze sizilawule, silawule imicabango, amazwi nokuziphatha kwethu.” Wasikisela ukukhumbula eyabaseFilipi 4:8. Iseluleko esivela kuNkulunkulu kulowo mBhalo sisasebenza namanje, nakuba sanikezwa okokuqala eminyakeni engaba ngu-2 000 edlule, futhi cishe kunzima kakhulu ukusilandela manje kunangesikhathi sibhalwa noma ngo-1916. Noma kunjalo, amaKristu azama kanzima ukuthi cha ezifisweni zezwe, azi ukuthi ngokwenza kanjalo, athi yebo kuMdali wawo.
6. Kungani singekho isizathu sokulahla ithemba lapho sisahlakulela ukuzithiba?
6 KweyabaseGalathiya 5:22, 23, kukhulunywa ngokuzithiba njengesinye ‘sezithelo zomoya ongcwele.’ Uma siyibonisa le mfanelo ihambisane ‘nothando, injabulo, ukuthula, ukubekezela, umusa, ubuhle, ukholo nobumnene,’ siyozuza kakhulu. Njengoba uPetru achaza, ukwenza kanjalo kuyosivimbela ekubeni “abangasebenzi noma abangatheli” enkonzweni yethu esiyenzela uNkulunkulu. (2 Petru 1:8) Kodwa akufanele silahle ithemba noma sizisole kakhulu uma sehluleka ukubonisa lezi zimfanelo ngokushesha nangokugcwele ngendlela esingathanda ngayo. Cishe uke waphawula ukuthi esikoleni omunye umfundi ubamba masinyane kunomunye. Noma emsebenzini kuba nomuntu osheshayo ukufunda imisebenzi emisha kunabanye asebenza nabo. Ngokufanayo, abanye bafunda masinyane kunabanye ukubonisa izimfanelo zobuKristu. Okubalulekile ukuqhubeka sihlakulela izimfanelo zokuhlonipha uNkulunkulu ngendlela engcono kakhulu esingenza ngayo. Lokhu singakwenza ngokulusebenzisa ngokugcwele usizo uJehova alunikeza ngeZwi lakhe nangebandla. Ukuthi sishesha kangakanani ukufinyelela lo mgomo akubalulekile kangako, kodwa okubalulekile imizamo yokuzimisela ukuqhubeka sithuthuka.
7. Yini ebonisa ukuthi ukuzithiba kubalulekile?
7 Ukuthi kubalwe kwaba okokugcina ezimfanelweni ezivezwa umoya, akusho ukuthi ukuzithiba akubalulekile njengalezi ezinye izimfanelo. Akunjalo neze. Kufanele sikhumbule ukuthi yonke “imisebenzi yenyama” ibingagwenywa ukube besikwazi kahle ukuzithiba. Kodwa, abantu abangaphelele bathambekele ekuvumeleni ukunqotshwa uhlobo oluthile ‘lwemisebenzi yenyama, ubufebe, ukungcola, ukuziphatha okubi, ukukhonza izithombe, umkhuba wokusebenzisa imimoya, ubutha, ukuxabana, umhawu, isifuthefuthe sentukuthelo, imibango, ukuhlukana, namahlelo.’ (Galathiya 5:19, 20) Ngakho-ke, kumelwe silwe njalo, sizimisele ukusiphula ukuthambekela okubi enhliziyweni nasengqondweni.
Kwabanye Kunzima Ngokukhethekile
8. Iziphi izici ezenza ukuzithiba kube nzima ngokukhethekile kwabanye?
8 Kuba nzima kakhulu ngamanye amaKristu ukubonisa ukuzithiba kunamanye. Ngani? Indlela akhuliswa ngayo noma lokho okwawehlela ngesikhathi esidlule kungase kube nomthelela kule nkinga. Kufanele sijabule uma kungabonakali kuyinkinga kithi ukuhlakulela nokubonisa ukuzithiba. Kodwa kufanele nakanjani sibe nesihawu futhi sibonise ukuqonda lapho sisebenzelana nalabo okunzima kakhulu ngabo ukuzithiba, ngisho noma ukungazithibi kwabo kusihlukumeza. Njengoba nathi ngokwethu singaphelele, ubani phakathi kwethu ongaba nesizathu sokuzishaya olungile?—Roma 3:23; Efesu 4:2.
9. Ibuphi ubuthaka abanye abanabo, futhi lobu buthaka buyonqotshwa nini ngokuphelele?
9 Ngokwesibonelo: Singase sazi ukuthi amaKristu athile esikhonza nawo angasabhemi noma angasazidli izidakamizwa “zokuzijabulisa” kusenzeka ngezinye izikhathi aziqalekele. Kanti abanye bakuthola kuyinselele ukulinganisela ekudleni noma eziphuzweni ezidakayo. Abanye bayehluleka ukuqapha ulimi lwabo, ngakho bakhuba abanye njalo ngokukhuluma. Ukulwisana nokushiyeka okunjalo kudinga umzamo wenkuthalo wokuhlakulela ukuzithiba. Ngani? EkaJakobe 3:2 ivuma ngobuqotho: “Sonke siyakhubeka izikhathi eziningi. Uma umuntu engakhubeki ngezwi, lowo uyindoda epheleleyo, ekwazi ukulawula nomzimba wayo wonke ngokungathi ngetomu.” Abanye futhi basenesifiso esinamandla sokugembula. Noma bangase bakuthole kunzima ukubamba intukuthelo yabo. Kungase kuthathe isikhathi ukufunda ukubhekana ngokuphumelelayo nalobu buthaka noma obunye obufanayo. Nakuba manje singenza intuthuko ebonakalayo, izifiso ezimbi ziyosishulwa kuphela lapho sesiphelele, kungasali ngisho. Okwamanje, ukuzama ukuzithiba kuyosisiza sigweme ukuphindela endleleni yokuphila yokona. Njengoba umshikashika uqhubeka, masisizaneni singalilahli ithemba.—IzEnzo 14:21, 22.
10. (a) Kungani kuyinselele ngokukhethekile kwabanye ukuzithiba ezindabeni zobulili? (b) Umzalwane othile wenza luphi ushintsho olukhulu? (Bheka ibhokisi ekhasini 16.)
10 Ubulili bungesinye isici okunzima ngabanye ukuzithiba kuso. Ubulili ngokwabo buyingxenye yendlela uJehova uNkulunkulu asidala ngayo. Kodwa abanye banenkinga ngokukhethekile yokugcina ubulili busendaweni yabo efanele, ngokuvumelana nezindinganiso zikaNkulunkulu. Inkinga yabo ingaba nzima nakakhulu ngoba basuke benesifiso esinamandla ngokungajwayelekile sobulili. Siphila ezweni elihlanyiswa ubulili elithanda ukuvuthela amalangabi ale nkanuko ngezindlela eziningi. Lokhu kungadala inkinga enkulu kumaKristu afuna ukuhlala engashadile—okungenani isikhathi esithile—ukuze akhonze uNkulunkulu engaphazanyiswa umshado. (1 Korinte 7:32, 33, 37, 38) Kodwa ngokuvumelana nomyalo ongokomBhalo othi “kungcono ukushada kunokushiswa inkanuko,” angase anqume ukushada, nakho okutusekayo ngempela. Ngesikhathi esifanayo, azimisele ukushada “kuphela eNkosini,” njengoba imiBhalo yeluleka. (1 Korinte 7:9, 39) Singaqiniseka ukuthi uJehova uyajabula ngokufuna kwawo ukusekela izimiso zakhe ezilungile. AmaKristu akholwa nawo ayakujabulela ukuhlanganyela nabakhulekeli beqiniso abaqotho nabanezindinganiso eziphakeme kanjalo zokuziphatha.
11. Singaba kanjani usizo kumzalwane noma udade ofisa ukushada kodwa ezingakamvumeli izimo ukuba enze njalo?
11 Kungenziwa njani lapho engatholakali umngane ofanelekayo? Cabanga nje ngokukhungatheka umuntu ofisa ukushada okungenzeka unakho kodwa ingekho into angayenza! Angase abone abangane bakhe beshada futhi bejabula ngezinga elithile, kuyilapho yena esathungathana nomngane ofanelekayo. Kwabanye abakuleso simo, umkhuba ongahlanzekile wokushaya indlwabu ungase ube inkinga eqhubekayo. Kunoma ikuphi, akekho umKristu ofuna ukuzithola ethena amandla omunye umKristu ozama ukuzigcina emsulwa. Singase sidumaze umuntu singahlosile uma sikhuluma singacabangi, mhlawumbe sithi, “Manj’ uzoshada nini?” Lokho singakusho singahlose kulimaza, kodwa yeka indlela okuhle ngayo ngathi ukubonisa ukuzithiba ngomqondo wokuqapha ulimi lwethu! (IHubo 39:1) Kufanele sibatuse ngokufudumele labo abaphakathi kwethu abaqhubeka bemsulwa njengoba bengakashadi. Kunokusho izinto ezingase zephule umoya, singalwela ukukhuthaza. Ngokwesibonelo, singase senze umzamo wokumema labo abangashadile lapho iqembu elincane labantu abavuthiwe libuthanela isidlo noma ubudlelwane obuhle bobuKristu.
Ukuzithiba Emshadweni
12. Kungani isilinganiso esithile sokuzithiba sidingeka ngisho nakulabo abashadile?
12 Ukushada ngokwako akusho ukuthi asikho isidingo sokuzithiba ezindabeni eziphathelene nobulili. Ngokwesibonelo, izidingo zobulili zendoda nomfazi zingahluka kakhulu. Noma ngezinye izikhathi isimo somzimba somunye kwabashadile singase senze ukuhlanganyela ubulili kube nzima noma kungenzeki nhlobo. Mhlawumbe ngenxa yezinto ake abhekana nazo, omunye angase akuthole kunzima ukulalela lo myalo: “Indoda mayinikeze umkayo okumfanele; kodwa nomfazi makenze ngokufanayo kumyeni wakhe.” Esimweni esinjalo, lona omunye kungadingeka azithibe kakhudlwana. Kodwa bobabili bangakhumbula iseluleko sikaPawulu sothando esiya kumaKristu ashadile: “Ningagodlelani kona, ngaphandle kokuba kungokuvumelana isikhathi esithile esimisiwe, ukuze ninikele isikhathi emthandazweni futhi niphinde nibe ndawonye, ukuze uSathane angahlali enilinga ngenxa yokuntula kwenu ukuzithiba.”—1 Korinte 7:3, 5.
13. Yini esingayenzela labo abashikashikana nokubonisa ukuzithiba?
13 Bayojabula kakhulu abashadile uma bobabili befunde ukuzithiba ngokufanele kulesi sici somshado esijulile. Ngesikhathi esifanayo, bayobe benza kahle ngokubonisa ukubaqonda abakhulekeli abakanye nabo abasashikashikana nokubonisa ukuzithiba kuleso sici. Akufanele nanini sikhohlwe ukuthandaza kuJehova simcele aphe abafowethu abangokomoya ukuqonda, isibindi nokuzimisela ukuqhubeka belwela ukubonisa ukuzithiba nokuthatha izinyathelo zokunqoba izifiso ezingalungile.—Filipi 4:6, 7.
Qhubekani Nisizana
14. Kungani kufanele siwaphathe ngesihawu nangokuqonda amaKristu esikanye nawo?
14 Ngezinye izikhathi, singase sikuthole kunzima ukuqonda amaKristu esikanye nawo asashikashikana nokubonisa ukuzithiba esicini thina esingenankinga neze kuso. Kodwa abantu abefani. Abanye balawulwa kalula imizwelo; abanye abanjalo. Abanye bakuthola kulula kakhudlwana ukuzilawula, bese ukuzithiba kuvele kungabi nencane inkinga. Kwabanye kunzinyana. Noma kunjalo, khumbula, umuntu oshikashikana nobuthaka obuthile akamubi. Kudingeka siwaqonde futhi siwabonise isihawu amaKristu esikanye nawo. Kuhileleke nenjabulo yethu njengoba siqhubeka sibabonisa isihe labo abasazama ukuthuthukisa ukuzithiba. Lokho singakubona emazwini kaJesu akuMathewu 5:7.
15. Kungani eduduza amazwi eHubo 130:3 endabeni yokuzithiba?
15 Asifuni neze ukumahlulela ngokungeyikho umKristu esikanye naye ongase ngezinye izikhathi ahluleke ukubonisa ubuntu bobuKristu. Akuve kukhuthaza ukwazi ukuthi ngaphezu kwesikhathi esisodwa okungenzeka sahluleka ngaso ukuzithiba, uJehova uyazibona izikhathi eziningi lapho saphumelela khona ukukubonisa, ngisho noma amaKristu esikanye nawo engazibonanga. Kududuza kakhulu ukukhumbula amazwi eHubo 130:3: “O Jah, ukube ububheka iziphambeko, Jehova ubani obengama?”
16, 17. (a) Singayisebenzisa kanjani eyabaseGalathiya 6:2, 5 endabeni yokuzithiba? (b) Yini esizoyifunda ngokulandelayo mayelana nokuzithiba?
16 Ukuze sijabulise uJehova, ngamunye wethu kumelwe ahlakulele ukuzithiba, kodwa singaqiniseka ukuthi abafowethu abangamaKristu bayosisiza. Nakuba ngamunye wethu kumelwe azithwalele owakhe umthwalo, sinxuswa ukuba sisizane ukuze sibhekane ngokuphumelelayo nobuthaka. (Galathiya 6:2, 5) Siyamazisa umzali, umlingane womshado, noma umngane osenqabela ukuya ezindaweni okungafanele siye kuzo, osenqabela ukubona izinto okungafanele sizibone, noma osenqabela ukwenza izinto okungafanele sizenze. Usuke esisiza sibonise ukuzithiba, ukukwazi ukuthi cha futhi sikusho singadlali!
17 Kungenzeka ukuthi amaKristu amaningi enza ngokuvumelana nalokhu esesikufundile kuze kube manje mayelana nendaba yokuzithiba, kodwa angase abe nomuzwa wokuthi asengathuthukisa. Angathanda ukubonisa ukuzithiba kakhudlwana, ngezinga acabanga ukuthi lilindelekile ngabantu abangaphelele. Ingabe nawe uzizwa kanjalo? Ungenze njani-ke ukuze uhlakulele lesi sithelo somoya kaNkulunkulu? Futhi ukwenza kwakho kanjalo kungakusiza kanjani ukuba ufinyelele imigomo yakho yesikhathi eside njengomKristu? Ake sikubone lokhu esihlokweni esilandelayo.
Uyakhumbula?
Kungani Ukuzithiba . . .
• kubalulekile ngamaKristu ukukuhlakulela?
• kuyinselele ngokukhethekile kwabanye?
• kudingeka emshadweni?
• kuyimfanelo esingasizana ukuyihlakulela?
[Ibhokisi/Isithombe ekhasini 16]
Wafunda Ukuthi Cha
Omunye uFakazi kaJehova ohlala eJalimane wayesebenza njengochwepheshe wezokuxhumana. Umsebenzi wakhe wawuhlanganisa nokuqapha izinhlelo ezihlukahlukene ezingaba ngu-30 zethelevishini nezomsakazo. Lapho kuba nokuphazamiseka ohlelweni, kwakufanele abhekisise lolo hlelo ukuze athole umnyombo wenkinga. Uthi: “Cishe lokhu kuphazamiseka kwakwenzeka njalo ngesikhathi esibi, uma nje kuboniswa isigcawu esinobudlova noma esibonisa ubulili. Lezi zigcawu ezimbi zazihlala izinsuku eziningi engqondweni yami, kwezinye izikhathi zihlale amasonto, njengokungathi ziqoshiwe ebuchosheni bami.” Uyakuvuma ukuthi lokhu kwaba nomphumela omubi engokomoyeni lakhe: “Ngingumuntu oyisififane, ngakho-ke izigcawu ezinobudlova zazenza kube nzima ngami ukuzithiba. Izigcawu ezinobulili zakha udonga phakathi kwami nomkami. Ngangisempini mihla le. Ukuze nginqobe le mpi, nganquma ukuyofuna umsebenzi omusha, ngisho noma ngangizothola iholo elincane. Ngisanda kuphumelela ukuthola umsebenzi omusha. Isifiso sami sifezekile.”
[Izithombe ekhasini 15]
Ulwazi olutholakala ngokutadisha iBhayibheli lusisiza ukuba sibonise ukuzithiba