Mikhaya, Dumisani UNkulunkulu Njengengxenye Yebandla Lakhe
“Ngizakudumisa uJehova emihlanganweni.”—IHUBO 26:12.
1. Yini eyingxenye ebalulekile yokukhulekela kweqiniso ngalé kokutadisha nokuthandaza ekhaya?
UKUKHULEKELA uJehova akuhlanganisi nje kuphela ukuthandaza nokutadisha iBhayibheli ekhaya kodwa kuhlanganisa nokusebenza njengengxenye yebandla likaNkulunkulu. U-Israyeli wasendulo wayalwa ukuba ‘abuthe abantu, amadoda, nabesifazane, nabantwana,’ bafunde umthetho kaNkulunkulu ukuze bahambe endleleni yakhe. (Duteronomi 31:12; Joshuwa 8:35) Asebekhulile ‘nezinsizwa nezintombi’ bakhuthazwa ukuba bahlanganyele ekudumiseni igama likaJehova. (IHubo 148:12, 13) Kunamalungiselelo afanayo nasebandleni lobuKristu. EmaHholo OMbuso emhlabeni wonke, amadoda, abesifazane nezingane bahlanganyela ngokukhululekile ezingxenyeni ezihilela izilaleli, futhi abaningi bakujabulela kakhulu ukuba nengxenye.—Heberu 10:23-25.
2. (a) Kungani ukulungiselela kuyisici esiyisihluthulelo ekusizeni abancane bajabulele imihlangano? (b) Yisibonelo sikabani esibalulekile?
2 Kuyavunywa ukuthi ukusiza abancane ukuba babe nenqubo enhle yokuhlanganyela emisebenzini yebandla kungaba yinselele. Uma izingane ezithile ezihamba nabazali bazo zibonakala zingayijabuleli imihlangano, yini okungenzeka iyinkinga? Yiqiniso, izingane eziningi azikwazi ukugxilisa ingqondo isikhathi eside, futhi zicikeka kalula. Ukulungiselela kungasiza ekusingatheni le nkinga. Ngaphandle kokulungiselela, izingane azikwazi ukuhlanganyela emihlanganweni ngendlela enenjongo. (IzAga 15:23) Ngaphandle kokulungiselela, kuyoba nzima ukuba zithuthuke ngokomoya ngendlela eyanelisayo. (1 Thimothewu 4:12, 15) Yini engase yenziwe? Okokuqala, abazali kudingeka bazibuze ukuthi ingabe bona ngokwabo bayayilungiselela yini imihlangano. Isibonelo sabo siyithonya elinamandla. (Luka 6:40) Ukusihlela ngokucophelela isifundo somkhaya nakho kungaba yisici esibalulekile.
Ukwakha Inhliziyo
3. Phakathi nesifundo somkhaya, kungani kufanele kwenziwe umzamo okhethekile wokwakha izinhliziyo, futhi kudingani lokhu?
3 Isifundo somkhaya akufanele nje sibe yisikhathi sokugcwalisa ulwazi emakhanda kodwa kufanele futhi sakhe izinhliziyo. Lokhu kudinga ukuba kuqashelwe izinkinga amalungu omkhaya abhekene nazo kanye nokukhathalela ilungu ngalinye ngothando. UJehova “uhlola inhliziyo.”—1 IziKronike 29:17.
4. Kusho ukuthini ‘ukuswela inhliziyo’? (b) Yini ehilelekile ‘ekuzuzeni inhliziyo’?
4 Yini uJehova ayitholayo lapho ehlola izinhliziyo zezingane zethu? Iningi lazo lingase lithi liyamthanda uNkulunkulu, futhi kuyatuseka lokho. Nokho, umuntu osemncane noma osaqala ukufunda ngoJehova akanalwazi olutheni mayelana nezindlela zikaJehova. Ngenxa yokungabi nolwazi, kungenzeka ‘uswele inhliziyo,’ njengoba kusho iBhayibheli. Mhlawumbe akuzona zonke izisusa zakhe ezimbi, kodwa kuthatha isikhathi ukuba umuntu enze inhliziyo yakhe ibe sesimweni esiyomjabulisa ngempela uNkulunkulu. Lokhu kudinga ukuba enze imicabango yakhe, izifiso, izinto azithandayo, imizwelo nemigomo yakhe ekuphileni kuvumelane nalokho okuvunyelwa nguNkulunkulu, ngezinga abantu abangaphelele abangakwenza ngalo. Lapho umuntu emlolonga kanjalo umuntu wangaphakathi ngendlela enokwesaba uNkulunkulu, ‘uzuza inhliziyo.’—IzAga 9:4; 19:8; qhathanisa ne-NW.
5, 6. Abazali bangazisiza kanjani izingane zabo ukuba ‘zizuze inhliziyo’?
5 Ingabe abazali bangazisiza izingane zabo ukuba ‘zizuze inhliziyo’? Yiqiniso, akukho muntu ongafaka isimo esihle senhliziyo komunye umuntu. Ngamunye wethu wanikwa ikhono lokuzikhethela, futhi okuningi kuxhomeke ekutheni yini esizivumela ukuba sicabange ngayo. Nokho, ngokuqonda ngokuvamile abazali bangenza ingane yabo iveze imizwa yayo, bazi ukuthi yini esenhliziyweni yayo nokuthi yikuphi lapho idinga khona usizo. Sebenzisani imibuzo enjengokuthi ‘Uzizwa kanjani ngalokhu?’ nokuthi ‘Yini nje wena ngokwakho ongathanda ukuyenza?’ Yibani senilalela ngesineke. Ningasabeli ngendlela eyeqisayo. (IzAga 20:5) Isimo esinomusa, ukuqonda nothando sibalulekile uma nifuna ukufinyelela inhliziyo.
6 Ukuze niqinise ukuthambekela okuhle, xoxani njalo ngezithelo zomoya—nixoxe ngesici ngasinye sazo—futhi nibambisane njengomkhaya ukuze nizihlakulele. (Galathiya 5:22, 23) Yakhani uthando ngoJehova noJesu Kristu, hhayi ngokumane nisho ukuthi kufanele sibathande kodwa nangokuxoxa ngezizathu ezenza sibathande nokuthi singalubonisa kanjani lolo thando. (2 Korinte 5:14, 15) Qinisani isifiso sokwenza okulungile ngokubonisana ngezinzuzo eziyotholakala. Yakhani isifiso sokugwema imicabango, inkulumo nokuziphatha okungalungile ngokuxoxa ngemiphumela emibi yalezo zinto. (Amose 5:15; 3 Johane 11) Bonisani indlela imicabango, inkulumo nokuziphatha—okuhle noma okubi—okungabuthinta ngayo ubuhlobo bomuntu noJehova.
7. Yini engenziwa ukuze kusizwe izingane zibhekane nezinkinga futhi zenze izinqumo ngendlela eyozigcina ziseduze noJehova?
7 Lapho ingane inenkinga noma kudingeka yenze isinqumo esibalulekile, singase siyibuze: ‘Ucabanga ukuthi uJehova uyibheka kanjani le nto? Yini oyaziyo ngoJehova ekwenza usho kanjalo? Usuke wathandaza kuye ngayo?’ Qalani ngokushesha ngangokunokwenzeka ukusiza izingane zenu ukuba zakhe indlela yokuphila yokuba njalo zizame ngobuqotho ukuthola ukuthi iyini intando kaNkulunkulu bese ziyayenza. Njengoba ziya ziba nobuhlobo obuseduze bomuntu siqu noJehova, ziyokujabulela ukuhamba ezindleleni zakhe. (IHubo 119:34, 35) Lokhu kuyozenza zilazise ilungelo lokuhlanganyela nebandla likaNkulunkulu weqiniso.
Ukulungiselela Imihlangano Yebandla
8. (a) Yini engase isisize ukuba sihlanganise zonke izinto ezidinga ukunakekelwa esifundweni sethu somkhaya? (b) Sibaluleke kangakanani lesi sifundo?
8 Kunezinto eziningi okudingeka zinakekelwe ngesikhathi sesifundo somkhaya. Ningazifaka kanjani zonke? Akunakwenzeka ukuzenza zonke ngesikhathi esisodwa. Kodwa ningase nikuthole kusiza ukwenza uhla lwezinto okumelwe zenziwe. (IzAga 21:5) Ngezikhathi ezithile, lubukezeni bese nicabanga ukuthi yini edinga ukunakwa ngokukhethekile. Yibani nesithakazelo esiqotho entuthukweni yelungu ngalinye lomkhaya. Leli lungiselelo lesifundo somkhaya liyingxenye ebalulekile yemfundo yamaKristu, esihlomisela ukuphila manje futhi isilungiselele ukuphila okungunaphakade okuzayo.—1 Thimothewu 4:8.
9. Yimiphi imigomo ephathelene nokulungiselela imihlangano esingase sisebenzele kuyo kancane kancane esifundweni sethu somkhaya?
9 Ingabe isifundo senu somkhaya sihlanganisa ukulungiselela imihlangano yebandla? Miningana imisebenzi eningase niyenze ngokuqhubekayo njengoba nifunda ndawonye. Eminye yayo kungase kuthathe amasonto, izinyanga noma ngisho neminyaka ukuyifeza. Cabanga ngale migomo: (1) ukuba ngamunye emkhayeni akulungele ukuphendula emihlanganweni yebandla; (2) ngamunye asebenzele ukunikeza izimpendulo ngamazwi akhe; (3) ukuhlanganisa nemibhalo ezimpendulweni; (4) ukuhlaziya ukwaziswa ukuze umuntu akusebenzise kuye ngokwakhe. Konke lokhu kungasiza umuntu enze iqiniso libe ngelakhe.—IHubo 25:4, 5.
10. (a) Singase sigxile kanjani emhlanganweni webandla ngamunye? (b) Kungani lokhu kuwufanele umzamo?
10 Ngisho noma isifundo senu somkhaya ngokuvamile sisekelwe esifundweni se-Nqabayokulinda sangalelo sonto, ningakhohlwa ukuthi kubalulekile ukulungiselela ngabantu ngabanye noma njengomkhaya iSifundo Sencwadi Sebandla, iSikole Senkonzo Esingokwasezulwini noMhlangano Wenkonzo. Nalokhu kuyizingxenye ezibalulekile zesimiso sokusifundisa ukuhamba endleleni kaJehova. Ngezikhathi ezithile ningase nikwazi ukulungiselela imihlangano njengomkhaya. Ngani? Lapho nisebenza ndawonye, niyothuthukisa amakhono okutadisha. Ngenxa yalokho, niyozuza ngokwengeziwe emihlanganweni uqobo. Phakathi kwezinye izinto, xoxani ngezinzuzo zokuyilungiselela njalo le mihlangano nangokubaluleka kokuba nesikhathi esiqondile esibekelwe ukuyilungiselela.—Efesu 5:15-17.
11, 12. Kungasizuzisa kanjani ukulungiselela umculo webandla, futhi singakwenza kanjani lokhu?
11 EMihlanganweni ‘Yendlela KaNkulunkulu Yokuphila,’ sakhuthazwa ukuba silungiselele esinye isici semihlangano yethu—umculo. Ingabe niye nakwenza lokho? Ukukwenza kungasiza ekugxiliseni amaqiniso eBhayibheli ezingqondweni nasezinhliziyweni zethu futhi ngesikhathi esifanayo kusenze siyijabulele kakhudlwana imihlangano yebandla.
12 Ukulungiselela okuhlanganisa ukufunda nokuxoxa ngalokho okushiwo amazwi akwezinye izingoma ezisesimisweni kungasisiza sicule ngokusuka enhliziyweni. Kwa-Israyeli wasendulo, izinsimbi zomculo zazisetshenziswa kakhulu ekukhulekeleni. (1 IziKronike 25:1; IHubo 28:7) Ingabe ukhona emkhayeni odlala insimi ethile yomculo? Kungani ningayisebenzisi leyo nsimbi lapho niprakthiza enye yezingoma zoMbuso zangalelo sonto, bese nicula leyo ngoma njengomkhaya. Okunye eningakwenza ukusebenzisa izingoma eziqoshiwe. Kwamanye amazwe abafowethu bacula kamnandi ngaphandle kokwelekelelwa yizinsimbi zomculo. Lapho behamba emgwaqweni noma besebenza emasimini, bavame ukujabulela ukucula izingoma ezisesimisweni semihlangano yebandla yangalelo sonto.—Efesu 5:19.
Ukulungiselela Inkonzo Yasensimini Njengomkhaya
13, 14. Kungani zibalulekile izingxoxo zomkhaya ezilungiselela izinhliziyo zethu inkonzo yasensimini?
13 Ukufakaza kwabanye ngoJehova nenjongo yakhe kuyingxenye ebalulekile yokuphila kwethu. (Isaya 43:10-12; Mathewu 24:14) Kungakhathaliseki ukuthi sibancane noma sibadala, siwujabulela kakhudlwana lo msebenzi futhi sifeze okwengeziwe uma silungiselele. Singakwenza kanjani lokhu emkhayeni?
14 Njengakuzo zonke izinto ezihilela ukukhulekela kwethu, kubalulekile ukuba silungise izinhliziyo zethu. Kudingeka singagcini ngokuxoxa ngalokho esizokwenza kodwa futhi nangokuthi kungani sizokwenza. Ngezinsuku zeNkosi uJehoshafati, abantu bafundiswa ngomthetho waphezulu, kodwa iBhayibheli lisitshela ukuthi ‘babengazange balungiselele inhliziyo yabo.’ Lokhu kwabenza bachayeka ekuhungweni okwakungabasusa ekukhulekeleni kweqiniso. (2 IziKronike 20:33, qhathanisa ne-NW; 21:11.) Umgomo wethu awukona nje ukuba sikwazi ukubika amahora esiwasebenze enkonzweni yasensimini, futhi awukona nokuhambisa nje izincwadi. Inkonzo yethu kufanele ibe ukubonakaliswa kothando lwethu ngoJehova nothando lwethu ngabantu abadinga ithuba lokukhetha ukuphila. (Heberu 13:15) Iwumsebenzi ‘esiyizisebenzi ezikanye noNkulunkulu’ kuwo. (1 Korinte 3:9) Yeka ilungelo! Lapho sisenkonzweni, sisuke sibambisene nezingelosi ezingcwele. (IsAmbulo 14:6, 7) Yisiphi esinye isikhathi esingcono sokwakha ukwazisa ngalokhu kunasezingxoxweni zomkhaya, kungaba sesifundweni sethu samasonto onke noma lapho sixoxa ngombhalo ofanelekayo okwethi Ukuhlola ImiBhalo Nsuku Zonke!
15. Singase siyilungiselele nini inkonzo yasensimini njengomkhaya?
15 Ingabe ngezinye izikhathi niyasisebenzisa isikhathi esithile sesifundo senu somkhaya ukuze nisize amalungu omkhaya wenu ukuba alungiselele inkonzo yasensimini yamasonto onke? Ukwenza kanjalo kungazuzisa kakhulu. (2 Thimothewu 2:15) Kungasiza ekwenzeni inkonzo yawo yasensimini ibe nenjongo futhi ikhiqize. Ngezinye izikhathi, ningase nibekele eceleni sonke isikhathi sesifundo ukuze nenze lokho kulungiselela. Ningase nivame kakhudlwana ukusingatha izici zenkonzo yasensimini ngokuba nezingxoxo ezimfushane ekupheleni kwesifundo somkhaya noma ngesinye isikhathi phakathi nesonto.
16. Bonisa ukubaluleka kwesinyathelo ngasinye kulezo ezisesigabeni.
16 Isifundo somkhaya singase sigxile ezinyathelweni ezilandelanayo, njengalezi: (1) Lungiselelani intshumayelo eprakthizwe kahle enombhalo ozofundwa eBhayibhelini uma ithuba livuma. (2) Qinisekani ukuthi uma kungenzeka ngamunye unesikhwama sakhe sasensimini, iBhayibheli, incwajana yokubhala, ipeni noma ipensela, amapheshana nezinye izincwadi, konke okusesimweni esihle. Isikhwama sasensimini akudingeki kube esibizayo, kodwa kufanele sicoceke. (3) Xoxani ngokuthi ningafakaza kuphi ngokwethukela futhi kanjani. Ngemva kwesigaba ngasinye sokufundisa kulezi, yibani nezikhathi zokusebenza ndawonye enkonzweni yasensimini. Nikezani ukusikisela okuwusizo, kodwa ninganikezi izeluleko ezicini eziningi kakhulu.
17, 18. (a) Yikuphi ukulungiselela njengomkhaya okungasiza ekwenzeni inkonzo yethu yasensimini ithele ngokwengeziwe? (b) Yisiphi isici salokhu kulungiselela esingenziwa masonto onke?
17 Ingxenye eyinhloko yomsebenzi uJesu Kristu awabela abalandeli bakhe iwukwenza abafundi. (Mathewu 28:19, 20) Ukwenza abafundi kuhilela okungaphezu kokushumayela. Kudinga ukufundisa. Isifundo senu somkhaya singanisiza kanjani ukuba niphumelele ekwenzeni lokhu?
18 Xoxani njengomkhaya ngokuthi obani okungakuhle ukwenza izimpindelo kubo. Abanye babo kungenzeka baye bathatha izincwadi; abanye kungenzeka bamane nje balalela. Kungenzeka ukuthi batholakalé emsebenzini wendlu ngendlu noma ekufakazeni ngokwethukela emakethe noma esikoleni. Vumelani iZwi likaNkulunkulu liniqondise. (IHubo 25:9; Hezekeli 9:4) Nqumani ukuthi ngamunye wenu ufuna ukuhambela bani ngalelo sonto. Niyoxoxa ngani? Ukuxoxa njengomkhaya kungasiza ilungu ngalinye ukuba lilungiselele. Bhalani imibhalo ethile ukuze nixoxe ngayo nabantu abanesithakazelo kanye namaphuzu afanelekayo asencwajaneni ethi Yini UNkulunkulu Ayifunayo Kithi? noma incwadi ethi Ulwazi Oluholela Ekuphileni Okumi Phakade. Ningazami ukuhlanganisa ukwaziswa okuningi kakhulu ekuhambeleni okukodwa. Shiyani umninikhaya enombuzo oyophendulwa lapho nibuya. Kungani ningakwenzi ingxenye yenqubo yomkhaya ukuhlela ukuthi yiziphi izimpindelo ngamunye azozenza, uzozenza nini futhi yini ahlela ukuyifeza. Ukwenza lokhu kuyosiza ekwenzeni inkonzo yasensimini yomkhaya wonke ithele ngokwengeziwe.
Qhubekani Nizifundisa Indlela KaJehova
19. Ukuze amalungu omkhaya aqhubeke ehamba endleleni kaJehova, yini okumelwe ayibone yenzeka, futhi yini eyoba nengxenye ekutheni lokhu kwenzeke?
19 Ukuba yinhloko yomkhaya kuleli zwe elibi kuyinselele. USathane namademoni akhe bazama ukonakalisa ingokomoya lezinceku zikaJehova. (1 Petru 5:8) Ngaphezu kwalokho, namuhla nina bazali ninezingcindezi ezinkulu, ikakhulu nina bazali abangabodwa. Kunzima ukuthola isikhathi sokwenza zonke izinto eningathanda ukuzenza. Kodwa kuwufanele umzamo, ngisho noma ningase nisebenzise ukusikisela okukodwa ngesikhathi, bese niya nisithuthukisa isimiso sesifundo senu somkhaya. Kuwumvuzo ojabulisayo ukubona abantu osondelene kakhulu nabo behamba ngobuqotho endleleni kaJehova. Ukuze amalungu omkhaya ahambe ngokuphumelelayo endleleni kaJehova, kudingeka akujabulele ukuba semihlanganweni yebandla nokuhlanganyela enkonzweni yasensimini. Ukuze lokho kwenzeke, kudingeka ukulungiselela—ukulungiselela okwakha inhliziyo futhi kuhlomisele ngamunye ukuba abe nengxenye enenjongo.
20. Yini engasiza abazali abengeziwe ukuba bathole injabulo efana nevezwe kweyesi-3 Johane 4?
20 Ngokuphathelene nalabo ayebasizile ngokomoya, umphostoli uJohane wabhala: “Anginaso isizathu esikhulu sokubonga kunalezizinto, ukuba ngizwe ukuthi abantwana bami baqhubeka behamba eqinisweni.” (3 Johane 4) Izifundo zemikhaya eziqhutshwa kucatshangwa ngemigomo ecacile, kanye nezinhloko zemikhaya ezisingatha izidingo zelungu ngalinye lomkhaya ngomusa nangomoya wokusiza kungenza lukhulu ekwenzeni umkhaya ube naleyo njabulo. Ngokuhlakulela ukwazisa indlela kaNkulunkulu yokuphila, abazali basiza umkhaya wabo ukuba ujabulele indlela engcono kunazo zonke yokuphila.—IHubo 19:7-11.
Ungachaza?
◻ Kungani ukulungiselela imihlangano kubaluleke kangaka ezinganeni zethu?
◻ Abazali bangazisiza kanjani izingane zabo ukuba ‘zizuze inhliziyo’?
◻ Isifundo sethu somkhaya singasiza kanjani ukuze kulungiselelwe yonke imihlangano?
◻ Ukulungiselela inkonzo yasensimini njengomkhaya kungasisiza kanjani ukuba siphumelele kakhudlwana?
[Isithombe ekhasini 20]
Isifundo senu singase sihlanganise nokulungiselela imihlangano yebandla
[Isithombe ekhasini 21]
Ukuprakthiza ukucula emihlanganweni kuyazuzisa