Ingabe Uyakhumbula?
Ingabe uye wakujabulela ukufunda omagazini bamuva be-Nqabayokulinda? Khona-ke, ake ubone ukuthi ungayiphendula yini le mibuzo elandelayo:
◻ Kungani amazwi kaPawulu athi “amanxusa abambele uKristu” efaneleka kumaKristu agcotshiwe? (2 Korinte 5:20)
Ezikhathini zasendulo, amanxusa, ngokuyinhloko, ayethunyelwa ngezikhathi zokulwa, ukuze kubonakale ukuthi impi ingagwenywa yini. (Luka 14:31, 32) Njengoba izwe lesintu esinesono lihlukanisiwe noNkulunkulu, uthumela amanxusa akhe agcotshiwe ukuba ayokwazisa abantu ngemibandela yakhe yokubuyisana, ebancenga ukuba bafune ukuthula naye.—12/15, ikhasi 18.
◻ Yiziphi izinto ezine ezaqinisa ukholo luka-Abrahama?
Okokuqala, wabonisa ukuba nokholo kuJehova ngokulalela lapho uNkulunkulu ekhuluma (Heberu 11:8); okwesibili, ukholo lwakhe lwaluhlobene eduze nethemba lakhe (Roma 4:18); okwesithathu, u-Abrahama wayevame ukukhuluma noJehova; okwesine, uJehova wayemsekela u-Abrahama lapho elandela iziqondiso zaphezulu. Izinto ezifanayo zingaluqinisa ukholo lwethu namuhla.—1/1, amakhasi 17, 18.
◻ Kushiwo ukuthini ngamazwi athi “Ungasifaki esilingweni”? (Mathewu 6:13)
Sicela uNkulunkulu ukuba angasivumeli ukuba sihluleke lapho silingelwa ukungamlaleli. UJehova angasiqondisa ukuze singazivumeli ukuba sinqotshwe futhi siphanjwe uSathane, “omubi.” (1 Korinte 10:13)—1/15, ikhasi 14.
◻ Yini okumelwe umuntu ayenze ukuze athole intethelelo kaNkulunkulu ngokona?
Ukuvuma izono kuNkulunkulu kumelwe kuhambisane nokudabuka ‘nezithelo ezifanela ukuphenduka.’ (Luka 3:8) Umoya wokuphenduka nesifiso sokulungisa okoniwe kuyosishukumisela nokuba sifune usizo olungokomoya lwabadala abangamaKristu. (Jakobe 5:13-15)—1/15, ikhasi 19.
◻ Kungani kufanele silwele ukuba abathobekile?
Umuntu othobekile unesineke futhi ubhekakade kanti akazicabangeli ngokweqile. Ukuthobeka kuheha abangane bangempela abakuthandayo. Ngaphezu kwalokho, kuletha isibusiso sikaJehova. (IzAga 22:4)—2/1, ikhasi 7.
◻ Yimuphi umehluko obalulekile okhona phakathi kokufa kukaJesu nokuka-Adamu?
Ukufa kuka-Adamu kwakumfanele, ngoba akamlalelanga ngamabomu uMdali wakhe. (Genesise 2:16, 17) Ngokuphambene, ukufa kukaJesu kwakungamfanele nakancane, ngoba “akenzanga sono.” (1 Petru 2:22) Ngakho lapho uJesu efa, wayenokuthile kwenani elikhulu, isoni esingu-Adamu esasingenako lapho sifa—ilungelo lokuphila komuntu ophelele. Ngakho, ukufa kukaJesu kwakunenani lomhlatshelo wokuhlenga isintu.—2/15, amakhasi 15, 16.
◻ Embonweni kaHezekeli ongokwesiprofetho, umuzi wawufanekiselani?
Njengoba lo muzi usezweni elingahlanzekile (elingengcwele), kumelwe ukuba ungokuthile kwasemhlabeni. Ngakho-ke, ubonakala ufanekisela ukuqondisa kwasemhlabeni okuzuzisa bonke abayokwakha umphakathi olungile wasemhlabeni.—3/1, ikhasi 18.
◻ Kungani uJesu ageza izinyawo zabafundi bakhe lapho egubha iPhasika ngo-33 C.E.?
UJesu wayengamisi inkambiso yokugeza izinyawo. Kunalokho, wayesiza abaphostoli bakhe ukuba babe nesimo sengqondo esisha—sokuthobeka nesokuzimisela ukwenzela abafowabo imisebenzi ephansi kunayo yonke.—3/1, ikhasi 30.
◻ Lapho sifundisa abanye, yini ebaluleke ngaphezu kwamakhono angokwemvelo?
Yizimfanelo esinazo nemikhuba engokomoya esiye sayihlakulela engalingiswa yilabo esibafundisayo. (Luka 6:40; 2 Petru 3:11)—3/15, amakhasi 11, 12.
◻ Izikhulumi zasobala zingakuthuthukisa kanjani ukufunda kwazo imiBhalo?
Ngokuprakthiza. Yebo, ngokufunda ngokuzwakalayo ziphindaphinda zize zikwazi ukukwenza ngokushelelayo. Uma amakhasethi eBhayibheli etholakala, kuwukuhlakanipha ukulalela indlela ofundayo agcizelela ngayo imiqondo nashintshashintsha ngayo izwi, uphawule nendlela abizwa ngayo amagama namazwi angajwayelekile.—3/15, ikhasi 20.
◻ ‘Umoya ubuyela kuNkulunkulu’ ngamuphi umqondo lapho umuntu efa? (UmShumayeli 12:7)
Njengoba umoya ungamandla okuphila, “ubuyela kuNkulunkulu” ngomqondo wokuthi noma iliphi ithemba lalowo muntu lokuphila kwangesikhathi esizayo libe selixhomeke ngokuphelele kuNkulunkulu. NguNkulunkulu kuphela ongabuyisela umoya, noma amandla okuphila, abangele lowo muntu ukuba aphinde aphile. (IHubo 104:30)—4/1, ikhasi 17.