Isintu Siyawudinga Umkhaya!

KUTHIWA umphakathi wesintu uzizwa ngendlela imikhaya ezizwa ngayo. Umlando ubonisa ukuthi lapho ilungiselelo lomkhaya liba buthaka, imiphakathi nezizwe kuyantengantenga. Lapho ukuwohloka kokuziphatha konakalisa imikhaya eGrisi yasendulo, impucuko yakhona yawohloka, yayibeka engozini yokunqotshwa amaRoma. UMbuso WaseRoma waqhubeka uqinile lapho imikhaya yayisaqinile. Kodwa njengoba amakhulu eminyaka ayedlula, ukuphila komkhaya kwantengantenga, futhi amandla ombuso ancipha. UCharles W. Eliot, owayengumongameli we-Harvard University, wathi: “Ukulondeka nokusimama komkhaya kanye nokuphila kwawo yizici ezisemqoka zempucuko, nezinjongo ezivelele zayo yonke imisebenzi yenkuthalo.”

Yebo, isintu siyawudinga umkhaya. Unethonya eliqondile ekuzinzeni komphakathi nasenhlalakahleni yezingane neyezizukulwane ezizayo. Ngokungangabazeki, kunomama abaningi kakhulu abangashadile abasebenza kanzima ukuze bakhulise kahle izingane, futhi kufanele batuswe ngokuzikhandla kwabo. Nokho, ukuhlola kubonisa ukuthi ngokuvamile izingane ziba ngcono kakhulu lapho zihlala emkhayeni onabo bobabili abazali.

Ukuhlola kwase-Australia okwenziwa entsheni engaphezu kuka-2 100 kwaveza ukuthi “intsha evela emikhayeni ephazamisekile inezinkinga ezivamile ezengeziwe, kunamathuba engeziwe okuba ibonise izimpawu zezinkinga ezingokomzwelo, futhi kunamathuba engeziwe okuba ibe nobuhlobo bobulili kunezingane ezivela emikhayeni ephelele.” Ukuhlola okwenziwa i-U.S. National Institutes of Health Statistics kwembula ukuthi izingane ezivela emakhaya ahlukene “zinamathuba angamaphesenti angu-20 kuya ku-30 okuba zibhekane nengozi, amaphesenti angu-40-75 okuphinda ibanga elifanayo esikoleni namathuba angamaphesenti angu-70 okuxoshwa esikoleni.” Futhi umcwaningi wezimiso ubika ukuthi “izingane ezivela emakhaya anomzali oyedwa zinamathuba engeziwe okuhileleka ebugebengwini kunalezo ezikhulele emakhaya avamile.”

Ikhaya Liyindawo Yesiphephelo

Ilungiselelo lomkhaya linikeza ikhaya elijabulisayo nelakhayo kubo bonke. Isiphathimandla saseSweden sathi: “Umthombo obaluleke kakhulu wenjabulo nenhlalakahle akuwona umsebenzi, izinto, imisebenzi yokuzilibazisa noma abangane kodwa umkhaya.”

IBhayibheli libonisa ukuthi yonke imikhaya yasemhlabeni iqanjwe ngoMdali Omkhulu wemikhaya, uJehova uNkulunkulu, ngoba wasungula ilungiselelo lomkhaya. (Genesise 1:27, 28; 2:23, 24; Efesu 3:14, 15) Nokho, emiBhalweni ephefumulelwe, umphostoli uPawulu wabikezela ukuhlaselwa okunonya komkhaya, okuphumela ekuwohlokeni kokuziphatha nomphakathi wesintu ongaphandle kwebandla lobuKristu. Wathi ‘izinsuku zokugcina’ ziyophawuleka ngokungathembeki, ukuntuleka ‘kokusondelana ngokomzwelo okungokwemvelo,’ nokungalaleli abazali, ngisho naphakathi kwalabo ‘abanesimo sokuzinikela kokuhlonipha uNkulunkulu.’ Wanxusa amaKristu ukuba abafulathele abanjalo. UJesu wabikezela ukuthi ukuphikiswa kweqiniso likaNkulunkulu kwakuyohlukanisa imikhaya.—2 Thimothewu 3:1-5; Mathewu 10:32-37.

Nokho, uNkulunkulu akasishiyanga sintula usizo. EZwini lakhe kunezingxenye eziningi ezigxile ekufundiseni ngobuhlobo bomkhaya. Zisitshela indlela esingenza ngayo umkhaya uphumelele nekhaya libe indawo ejabulisayo lapho ilungu ngalinye lomkhaya linomthwalo wemfanelo okufanele liwufeze ngokuqondene nabanye.a—Efesu 5:33; 6:1-4.

Ingabe kungenzeka ukuba ube nobuhlobo obujabulisa kanjalo kulezi zinsuku lapho umkhaya usongelwa kanzima? Yebo, kungenzeka! Ungaphumelela ekwenzeni umkhaya wakho ube indawo yesiphephelo ejabulisayo neqabulayo kuleli lizwe elilukhuni nelifana nogwadule. Kodwa lokhu kudinga okuthile elungwini ngalinye lomkhaya. Lokhu okulandelayo kungokunye kokusikisela.

Ukusiza Umkhaya Wakho Ukuba Usinde

Enye yezindlela ezingcono kakhulu umkhaya ongahlala ngazo unobunye iwukuchitha isikhathi ndawonye. Wonke amalungu kufanele anikele ngokukhululekile ngesikhathi sawo esikhululekile. Lokho kungase kusho ukuzidela. Ngokwesibonelo, nina basha kungase kudingeke nidele ezinye zezinhlelo ze-TV enizithandayo, isenzakalo sezemidlalo noma ukuzikhipha nabangane. Nina bobaba, ngokuvamile eningabondli abayinhloko bemikhaya, isikhathi senu sokuzilibazisa ningasisebenziseli izinto zokuzilibazisa zenu siqu noma ezinye izinto enizithandayo. Hlelani izinto nomkhaya, mhlawumbe ukuthi ningazichitha kanjani izimpelasonto noma amaholide nindawonye. Hlelani into wonke umuntu azobheka phambili kuyo futhi ayijabulele.

Izingane zidinga okungaphezu kwalokho okuthiwa isikhathi esikhethekile, okuwukuthi, ukuchitha isikhathi esingaba ingxenye yehora nezingane ngezikhathi ezithile. Zidinga isikhathi esiningi. Umlobeli wephephandaba wabhala ephephandabeni laseSweden lansuku zonke: “Phakathi neminyaka engu-15 ngiyintatheli, ngiye ngahlangana nezingane eziningi kakhulu eziyizigelekeqe . . . Isici esivamile ukuthi zibonakala ziye zakhuliswa ngendlela yokunikwa isikhathi esikhethekile: ‘Abazali bami babengenasikhathi.’ ‘Babengakaze balalele.’ ‘Wayehamba njalo.’ . . . Njengomzali, ungazikhethela ukuthi uzoyinika isikhathi esingakanani ingane yakho. Lokho okukhethile kubonakala eminyakeni engu-15 kamuva enganeni engenamusa eneminyaka engu-15 ubudala.”

Umbono Ofanele Ngemali

Wonke amalungu kufanele futhi abe nombono ofanele ngemali. Kufanele akulungele ukunikela ngokusemandleni awo ukuze kuhlangatshezwane nezindleko zomkhaya. Abesifazane abaningi kudingeka bathole umsebenzi ukuze basize ngezindleko, kodwa nina makhosikazi kufanele niqaphele izingozi nezilingo eningase nibhekane nazo. Leli lizwe linikhuthaza ukuba “nizanelise” futhi “nizenzele enikuthandayo.” Lingase linenze nizibuse futhi ninganeliswa indima eniyinikwe uNkulunkulu njengomama nabanakekeli bamakhaya.—Thithu 2:4, 5.

Uma nina bomama ningaba sekhaya, niqondise futhi nibe abangane bezingane zenu, lokho ngokuqinisekile kuyonikela kakhulu ekwakheni izibopho eziqinile eziyosiza ekugcineni imikhaya yenu indawonye kumnyama kubomvu. Owesifazane angasiza kakhulu ekwenzeni ikhaya libe elijabulisayo, elilondekile nelisebenza kahle. Isazi sezombangazwe sangekhulu le-19 leminyaka sathi: “Kudingeka amadoda ayikhulu ukwenza indawo yokukanisa, kodwa owesifazane oyedwa angenza ikhaya.”

Uma wonke amalungu omkhaya ebambisana ukuze aphile ngokwemali anayo, lokho kuyokwenza umkhaya ugweme izinkinga eziningi. Imibhangqwana kufanele ivumelane ukugcina ukuphila kulula nokubeka izithakazelo ezingokomoya kuqala. Izingane kufanele zifunde ukwaneliswa, zingafuni izinto ezingenakufinyelelwa ngemali ekhona ekhaya. Qaphelani isifiso samehlo! Isilingo sokuthenga izinto ongenamali yazo, ungene ezikweletini, kuye kwaholela imikhaya eminingi ekubeni iphukelwe umkhumbi. Kungasiza ebunyeni bomkhaya uma wonke amalungu ehlanganisa imali yawo ukuze enze okuthile ndawonye—athathe uhambo oluqabulayo, athenge into ethile ewusizo nejabulisayo yasekhaya noma anikele ekusekeleni ibandla lobuKristu.

Olunye uhlobo “lokunikela” emoyeni womkhaya ojabulisayo okufanele wonke amalungu omkhaya abe nengxenye kulo ukuhlanganyela emsebenzini wokuhlanza nokulungisa—ukunakekela ikhaya, ingadi, imoto nokunye. Ilungu ngalinye lomkhaya, ngisho nezingane, lingabelwa ingxenye ethile yomsebenzi. Nina zingane, zamani ukungasisaphazi isikhathi senu. Kunalokho, yibani nomoya wokuba usizo nokubambisana; lokhu kuyophumela ebunganeni bangempela, obakha ubunye bomkhaya.

Ukubaluleka Kwemfundo YeBhayibheli

Emkhayeni wamaKristu onobunye, kugcizelelwa nokubaluleka kokufunda iBhayibheli njalo. Ingxoxo yamatekisi eBhayibheli ansuku zonke nesifundo samasonto onke semiBhalo Engcwele kunikeza isisekelo somkhaya onobunye. Amaqiniso nezimiso zeBhayibheli okuyisisekelo kufanele kuxoxwe ngakho ndawonye ngendlela eshukumisa izinhliziyo zabo bonke emkhayeni.

Izikhathi ezinjalo zomkhaya kufanele zibe ezifundisayo kodwa ngesikhathi esifanayo zibe ezijabulisayo nezikhuthazayo. Umkhaya othile wasenyakatho yeSweden wawuvame ukwabela izingane ukuba zibhale imibuzo ephakamayo phakathi nesonto. Le mibuzo kwakube sekuxoxwa ngayo esifundweni seBhayibheli samasonto onke. Ngokuvamile le mibuzo yayiba ejulile neshukumisa ingqondo futhi yabonakala isiza ekubonakaliseni amakhono okucabanga ezingane kanye nokwazisa ngezimfundiso zeBhayibheli. Eminye yale mibuzo yayithi: “Ingabe uJehova ubangela ukuba zonke izinto zikhule ngaso sonke isikhathi, noma wamane wakwenza kanye?” “Kungani iBhayibheli lithi uNkulunkulu wadala umuntu ‘ngomfanekiso wakhe’ njengoba uNkulunkulu engeyena umuntu?” “U-Adamu no-Eva abazange yini baqhothiswe amakhaza ebusika ePharadesi njengoba babehamba ngezinyawo futhi bengenazingubo zokugqoka?” “Kungani sidinga unyezi ebusuku lapho kufanele kube mnyama?” Lezo zingane manje sezikhulile futhi zikhonza uNkulunkulu njengezikhonzi zesikhathi esigcwele.

Lapho nisingatha izinkinga zomkhaya, nina bazali nenza kahle ngokulwela ukuba nombono omuhle nokuba abajabule. Yibani abacabangelayo nabavumelana nezimo, nokho ningaguquguquki, lapho kuziwa ekulaleleni izimiso ezibalulekile. Yenzani izingane zibone ukuthi uthando ngoNkulunkulu nangezindinganiso zakhe ezifanele kubusa izinqumo zenu ngaso sonke isikhathi. Isimo sasesikoleni ngokuvamile siyacindezela kakhulu, futhi izingane zisidinga kakhulu isikhuthazo ekhaya ukuze zilwe nalelo thonya.

Bazali, ningazishayi abaphelele. Vumani amaphutha enu futhi nixolise ezinganeni zenu lapho kudingekile. Basha, lapho umama nobaba bevuma iphutha, bathandeni ngokwengeziwe.—UmShumayeli 7:16.

Yebo, umkhaya onobunye uba ikhaya elinokuthula, ukulondeka nenjabulo. Imbongi engumJalimane uGoethe yake yathi: “Othola injabulo ekhaya, uyinkosi noma umuntukazana ojabule kunabo bonke.” Kubazali nasezinganeni ezinokwazisa, kufanele kungabi nandawo efana nekhaya.

Yiqiniso, umkhaya namuhla usongelwa kakhulu izingcindezi zaleli lizwe esiphila kulo. Kodwa njengoba umkhaya uvela kuNkulunkulu, uyosinda. Umkhaya wakho uyosinda, nawe futhi, uma ulandela iziqondiso zokulunga zikaNkulunkulu zokuba nokuphila komkhaya okujabulisayo.

[Umbhalo waphansi]