Ukuqonda Isimiso Kubonisa Ukuvuthwa

UKUZIHLANGANISA nababi konakalisa imikhuba enosizo. Uvuna okuhlwanyelayo. (1 Korinte 15:33; Galathiya 6:7) Kungaba ngokwenyama noma ngokomoya, ngayinye yalezi zinkulumo iyisibonelo seqiniso eliyisisekelo—isimiso—futhi ngayinye inikeza isisekelo semithetho. Nokho, imithetho, ingase ibe ngeyesikhashana, futhi ivamé ukuba ibhekisele kokuthile ngokuqondile. Ngakolunye uhlangothi, izimiso zibanzi, futhi zingahlala phakade. Ngakho, iZwi likaNkulunkulu lisikhuthaza ukuba sicabange ngezimiso ezihilelekile noma nini uma kudingeka.

I-Webster’s Third New International Dictionary ichaza isimiso ‘njengeqiniso elivamile noma eliyisisekelo: umthetho oningiliziwe noyisisekelo, imfundiso, noma ukucabangela okusetshenziselwa ukusekela noma lapho kususelwé khona okunye.’ Ngokwesibonelo, umuntu angase anike umntwana umthetho othi, “Ungasithinti isitofu.” Kodwa kumuntu omdala inkulumo ethi, “Isitofu siyashisa” ibiyokwanela. Qaphela ukuthi lenkulumo yamuva ibanzi. Ngenxa yokuthi iqondisa umuntu kulokho angakwenza—mhlawumbe ukupheka, ukubhaka, noma ukucisha isitofu—ngokomqondo othile iba isimiso.

Ngokuqinisekile, izimiso zokuphila eziyisihluthulelo, zingokomoya; zithonya ukukhulekela kwethu uNkulunkulu nenjabulo yethu. Nokho, abanye abathandi ukwenza umzamo odingekayo ukucabanga ngokusebenzisa izimiso. Kulula kubona ukusebenzisa umthetho lapho bebhekene nesinqumo. Lokhu akuhlakaniphile futhi kuphambene nesibonelo esabekwa amadoda athembekile asendulo ezikhathini zeBhayibheli.—Roma 15:4.

Amadoda Ayeqondiswa Izimiso ZikaNkulunkulu

Phakathi kwabantu abangaphelele, u-Abela angase abizwe ngokuthi uyindoda yokuqala ngqá eyayiqondiswa izimiso zikaNkulunkulu. Kungenzeka wacabanga kabanzi ngesithembiso ‘senzalo’ futhi waqonda ukuthi ukuhlengwa esonweni kwakuyohilela umhlatshelo wegazi. (Genesise 3:15) Ngakho wanikela kuNkulunkulu “kuwo amazibulo ezimvu zakhe.” Amazwi athi “ezimvu zakhe ezinonileyo” abonisa ukuthi u-Abela wanikeza uJehova okungcono kakhulu kwayenako. Nokho, kwakuyodlula iminyaka engaphezu kwezinkulungwane ezimbili ngemva kokufa kuka-Abela ngaphambi kokuba uNkulunkulu azichaze ngokuningiliziwe izinto ezidingekayo ngokuqondene neminikelo. Ngokungafani no-Abela indoda eyayiqondiswa izimiso eyesaba uNkulunkulu, uKayini umfowabo wamenzela uNkulunkulu umnikelo. Kodwa isimo sakhe sengqondo sasingabazisa, kwakunokuthile ngokuqondene nokunikela kwakhe okwakubonisa ukuthi wayenenhliziyo entula izimiso.—Genesise 4:3-5.

UNowa naye wayeyindoda eyayiqondiswa izimiso zikaNkulunkulu. Nakuba ukulandisa kweBhayibheli kubonisa ukuthi uNkulunkulu wayemyale ngokukhethekile ukuba akhe umkhumbi, asiwutholi umyalo wokuba ashumayele kwabanye. Noma kunjalo, uNowa ubizwa ngokuthi “umshumayeli wokulunga.” (2 Petru 2:5) Nakuba kunokwenzeka ukuthi uNkulunkulu waqondisa uNowa ukuba ashumayele, akungabazeki ukuthi ukuthambekela kwakhe kokusebenzisa izimiso nokuthanda kwakhe umakhelwane nakho kwamshukumisela ukuba enze kanjalo. Njengoba siphila ezikhathini ezinjengezikaNowa, masilingise isimo sakhe sengqondo esihle nesibonelo sakhe.

Ngokungafani nabefundisi bosuku lwakhe, uJesu wafundisa abantu ukuba bacabange ngezimiso. INtshumayelo yakhe yaseNtabeni iyisibonelo salokhu. Wonke umqondo wayo ukhuthaza ukusebenzisa izimiso. (Mathewu, izahluko 5-7) UJesu wafundisa ngalendlela ngoba njengo-Abela noNowa abaphila ngaphambi kwakhe wayemazi kahle uNkulunkulu. Ngisho esengumfana, wabonisa inhlonipho ngaleli qiniso eliyisisekelo: “Umuntu akaphili ngesinkwa sodwa; kepha ngakho konke okuphuma emlonyeni kaJehova.” (Duteronomi 8:3; Luka 2:41-47) Yebo, ukwazi uJehova, lokho akuthandayo, nangakuthandi, nezinjongo zakhe, kuyisihluthulelo sokuba umuntu oqondiswa izimiso zikaNkulunkulu. Empeleni, lapho lezi zimiso eziyisisekelo ngoNkulunkulu zikuqondisa ukuphila kwethu, ziba izimiso eziphilayo.—Jeremiya 22:16; Heberu 4:12.

Izimiso Nenhliziyo

Ungakwazi ukulalela umthetho ngisho ungathandi, mhlawumbe ngenxa yokwesaba isijeziso sokungalaleli. Nokho, ukulalela isimiso, kuyasiqeda isimo sengqondo esinjalo, ngoba kuyinto engokwemvelo nje ukuthi uma umuntu eqondiswa izimiso alalele ngokusuka enhliziyweni. Cabanga ngoJosefa lowo, njengo-Abela noNowa, owayephila ngaphambi kokumiswa kwesivumelwano soMthetho kaMose. Lapho umkaPotifari ezama ukumyenga, uJosefa wasabela: “Ngingenza kanjani lobobubi obungaka, ngone kuNkulunkulu, na?” Yebo, uJosefa wayesazi isimiso sokuthi indoda nomkayo ‘banyamanye.’—Genesise 2:24; 39:9.

Namuhla izwe alinazo izimiso zokulunga. Lizondla ngobudlova nokuziphatha okubi njengesiminzi. Ingozi iwukuthi umKristu angase alingelwe ukuba alume kancane, mhlawumbe ngasese, ekudleni okufanayo okungenamsoco—amabhayisikobho, ama-video, noma izincwadi. Khona-ke, yeka ukuthi kutuseka kanjani lapho, njengoJosefa, senqaba okubi ngenxa yesimiso, sikhumbula ukuthi ‘osizini olukhulu’ oluzayo uNkulunkulu uyolondoloza abathembekileyo kuphela. (Mathewu 24:21) Yebo, okwambula ukuthi sinjani ngempela ngaphakathi, yilokho ikakhulukazi esiyikho lapho sisodwa, hhayi lapho sinabanye.—IHubo 11:4; IzAga 15:3.

Ngakho-ke, uma siqondiswa isimiso seBhayibheli, ngeke sizame ukufuna izintuba emithethweni kaNkulunkulu; noma sizame ukubona ukuthi singahamba ibanga elingakanani ngaphambi kokuba sephule umthetho othile. Ukucabanga okunjalo kuwukuzigwaza ngowakho; ekugcineni kulimaza thina.

Bheka Ngalé Komthetho

Yebo, imithetho idlala indima ebalulekile ekuphileni komKristu. Injengonogada abasiza ngokusivikela, futhi isekelwe ezimisweni eziningi ezibalulekile. Ukuhluleka ukuqonda lezi zimiso kungase kuqede uthando lwethu ngemithetho ehlobene nazo. Isizwe sasendulo sakwa-Israyeli sakubonisa lokhu.

UNkulunkulu wanika ama-Israyeli iMithetho Eyishumi, owokuqala wawenqabela ukukhulekela noma imuphi unkulunkulu ngaphandle kukaJehova. Ukuthi uJehova wadala zonke izinto kuyiqiniso eliyisisekelo lalomthetho. (Eksodusi 20:3-5) Kodwa ingabe isizwe saphila ngalesi simiso? UJehova ngokwakhe uyaphendula: “‘Ungubaba wethu’ [kusho ama-Israyeli] esigodweni futhi [akhala ethi] ‘Mama’ etsheni. Kodwa [mina Jehova] bangifulathele futhi abangibheki ngobuso babo.” (Jeremiya 2:27, The New English Bible) Yeka ubuwula obungenaluzwela nobungenazimiso! Yeka ukuthi kwayilimaza kanjani inhliziyo kaJehova!—IHubo 78:40, 41; Isaya 63:9, 10.

NamaKristu anemithetho evela kuNkulunkulu. Ngokwesibonelo, kumelwe agweme ukukhulekela izithombe, ukuziphatha okubi kobulili, nokusebenzisa kabi igazi. (IzEnzo 15:28, 29) Lapho ucabanga ngakho, singazibona izimiso eziyisisekelo, ezinjengokuthi: UNkulunkulu ufanelwe ukuzinikela kwethu okukhethekile; kufanele sithembeke kwesishade naye; futhi uJehova unguMniki-kuphila wethu. (Genesise 2:24; Eksodusi 20:5; IHubo 36:9) Uma siziqonda futhi sizazisa ngokujulile izimiso eziyisisekelo, siyabona ukuthi zizuzisa thina. (Isaya 48:17) Kithina, ‘imiyalo kaNkulunkulu ayiwona umthwalo osindayo.’—1 Johane 5:3.

Nakuba ngesinye isikhathi ama-Israyeli engayinakanga imithetho kaNkulunkulu, ngesikhathi sikaJesu “odokotela bomthetho,” ababhali, babeqisa kakhulu. Base benze inqwaba yemithetho namasiko ayefiphaza ukukhulekela okuhlanzekile futhi ethukusa izimiso zokuhlonipha uNkulunkulu. (Mathewu 23:2, NEB) Abantu bazizwa beyizehluleki, bengenathemba, noma bengabazenzisi. (Mathewu 15:3-9) Futhi imithetho eminingi eyayenziwe abantu yayingenaluzwela. Lapho esezokwelapha indoda eyayinesandla esishwabene, uJesu wabuza abaFarisi ababekhona: “Ingabe kungokomthetho ukwenza isenzo esihle ngesabatha?” Ukuthula kwabo kwakubonisa ukuphika, kwenza uJesu wazizwa “elusizi ngokuphelele ngenxa yokungazweli kwezinhliziyo zabo.” (Marku 3:1-6) AbaFarisi babengase basisize isilwane sasekhaya esidukile noma esilimele (esimelela imali) ngeSabatha kodwa babengeke bamsize owesifazane noma owesilisa—ngaphandle kokuba kuyindaba yokufa nokuphila. Ngempela, babeluthwe imithetho yabantu nemicikilisho yayo kangangokuthi njengezintuthwane ezigijima phezu kwesithombe, bahluleka ukubona umqondo ophelele—izimiso zaphezulu.—Mathewu 23:23, 24.

Nokho, ngisho nabancane, lapho izinhliziyo zabo ziqotho, bangaletha udumo kuJehova ngokwazisa kwabo izimiso zeBhayibheli. Uthisha kaRebecca oneminyaka engu-13 wabuza ikilasi ukuthi ubani owayengagembula. Abaningi bathi ngeke bakwenze. Nokho, lapho kuvezwa izimo ezihlukahlukene, bonke ngaphandle kukaRebecca bavuma ukuthi babeyogembula ngezindlela ezihlukahlukene. Uthisha wabuza uRebecca ukuthi wayengalithenga yini ithikithi likamaziqokele elibiza amasenti angu-90 elidayiselwa injongo enhle. URebecca wathi cha futhi wanikeza izizathu ezingokomBhalo zokuthi kungani ukwenza kanjalo kuwuhlobo lokugembula. Khona-ke uthisha wakhe ebhekisé kulo lonke ikilasi wathi: ‘Ngokombono wami, uRebecca kuphela lapha onalokho engikubiza ngokuthi “izimiso” ngokomqondo ongokoqobo waleli gama.’ Yebo, uRebecca wayengase aphendule kalula athi, “Kumelene nenkolo yami,” kodwa wacabanga ngokujulé ngaphezu kwalokho; wakwazi ukuphendula ukuthi kungani ukugembula kungalungile nokuthi kungani enqaba ukuhlanganyela kukho.

Izibonelo ezinjengo-Abela, uNowa, uJosefa, noJesu zisibonisa ukuthi siyazuza ngokusebenzisa ‘amakhono ethu okucabanga’ kanye ‘namandla ethu okucabanga’ ekukhulekeleni uNkulunkulu. (IzAga 2:11; Roma 12:1) Abadala abangamaKristu bayobe benza kahle ngokulingisa uJesu njengoba “belusa umhlambi kaNkulunkulu ongaphansi kokunakekela [kwabo].” (1 Petru 5:2) Njengoba uJesu asibekela isibonelo, labo abathanda izimiso zokuhlonipha uNkulunkulu yibo abachumayo ngaphansi kobukhosi bukaJehova bendawo yonke.—Isaya 65:14.