Isifundo Somkhaya Esiletha Injabulo

“Amakamelo agcwaliswa ngokwazi, ngayo yonke ingcebo enqabileyo nemnandi,” kusho iBhayibheli. (IzAga 24:4) Lengcebo enqabileyo ayiyona nje ingcebo yezinto ezibonakalayo kodwa ihlanganisa uthando lweqiniso, ukwesaba kokuhlonipha uNkulunkulu nokholo oluqinile. Izimfanelo ezinjalo ziyakwakha ngempela ukuphila komkhaya okucebile. (IzAga 15:16, 17; 1 Petru 1:7) Nokho, ukuze sizithole, sidinga ukungenisa ulwazi ngoNkulunkulu emikhayeni yethu.

INHLOKO yomkhaya inomthwalo wemfanelo wokugxilisa lolu lwazi emalungwini omkhaya. (Duteronomi 6:6, 7; Efesu 5:25, 26; 6:4) Enye yezindlela ezinhle kakhulu zokwenza lokhu ingesifundo somkhaya sasikhathi sonke. Yeka ukuthi isifundo singajabulisa kanjani kulabo abahlanganyela kuso uma siqhutshwa ngendlela efundisayo nejabulisayo! Khona-ke, ake sicabangele ezinye zezici ezibalulekile ekuqhubeni isifundo somkhaya esiphumelelayo.a

Isifundo somkhaya siphumelela kakhulu uma siqhutshwa njalo. Uma singahlelelwanga sikhathi esiqondile noma siqhutshwa uma kuvela ithuba, cishe ngeke siqhutshwe njalo. Ngakho kumelwe ‘nithengisise ithuba’ lesifundo. (Efesu 5:15-17) Ukukhetha isikhathi esifanelekayo kubo bonke kungaba inselele. “Sasinenkinga yokuba nesifundo sethu somkhaya njalo,” kuvuma enye inhloko yomkhaya. “Sazama izikhathi ezihlukahlukene kwaze kwaba yilapho ekugcineni sithola isikhathi sasebusuku esasifaneleka kithi. Manje isifundo sethu somkhaya siba naso njalo.”

Uma usunesikhathi esifanelekayo, qaphela ukuba ungavumeli iziphazamiso ziminyanise isifundo. “Uma kufika izivakashi phakathi nesifundo,” kukhumbula uMaria,b manje oneminyaka engu-33, “ubaba wayezicela ukuba zilinde kuze kuphele isifundo. Futhi lapho kungena izingcingo, wayemane atshele lowo muntu ukuthi uzobuye amshayele.”

Nokho, lokhu akusho ukuthi ngeke sibe abavumelana nezimo. Kungase kuvele isimo esiphuthumayo noma izenzakalo ezingalindelekile, futhi ngezinye izikhathi kungase kudingeke ukuba isifundo singaqhutshwa noma sihlehliswe. (UmShumayeli 9:11) Kodwa qaphela ukuba ungavumeli noma iyiphi yalezi zinto iphazamise isimiso senu.—Filipi 3:16.

Kufanele sithathe isikhathi eside kangakanani isifundo? URobert, oye wakhulisa indodakazi nendodana ngempumelelo, uthi: “Izifundo zethu zazivame ukuthatha ihora. Lapho izingane zisencane, sasizama ukugcina isithakazelo sazo phakathi nalelo hora ngokucabangela izinto ezihlukahlukene, njengezigaba ezimbalwa esihlokweni esifundwayo se-Nqabayokulinda, izindima ezithile eBhayibhelini nezingxenye zezinye izincwadi.” UMaria uyakhumbula: “Lapho mina nodadewethu ababili sisebancane kakhulu, isifundo sethu sasithatha imizuzu engaba ngu-20 kabili noma kathathu ngesonto. Njengoba sikhula, isifundo sethu somkhaya samasonto onke sathatha isikhathi esingaba ihora.”

Yini Okufanele Siyifunde?

Ukucabangela lombuzo lapho nonke senihlangene ukuze nifunde kungaphumela ekukhungathekeni nasekulahlekelweni isikhathi sesifundo esiyigugu. Uma kunjalo, izingane ngeke zibe nokuthile okuqondile ezingabheka phambili kukho futhi ziyophelelwa isithakazelo ngokushesha. Ngakho khetha kusengaphambili enye yezincwadi zeNhlangano ezofundwa.

“Isigqila esikholekile nesiqondayo” siye salungiselela intilibathwa yezincwadi esingakhetha kuzo. (Mathewu 24:45-47) Mhlawumbe ningasebenzisa incwadi umkhaya obungakayifundi. Futhi yeka ukuthi kujabulisa kanjani ukucabangela izingxenye ezithile kuyi-Insight on the Scriptures uma lemiqulu itholakala ngolimi lwenu! Ngokwesibonelo, ningase nibukeze isihloko esiphathelene neSidlo SeNkosi Sakusihlwa phakathi namasonto angaphambi kweSikhumbuzo. Imikhaya eminingi ijabulela ukulungiselela ndawonye iSifundo Se-Nqabayokulinda salelo sonto. Kodwa ezinye izihloko ezikuyi-Nqabayokulinda nazo zinokwaziswa okuhle kakhulu okungase kufundwe. Inhloko yomkhaya, ezaziyo izidingo ezingokomoya zomkhaya, isesimweni esingcono kakhulu sokunquma ukuthi iziphi izincwadi okufanele zifundwe.

“Njalo sasifunda incwadi ekhethwe kusengaphambili,” kukhumbula uMaria. “Kodwa lapho kuphakama umbuzo noma isimo esithile esikoleni, sasibe sesishintshela ekwazisweni okufanelekayo.” Ziba khona izinto ezikhathaza ngokukhethekile, njengezinkinga intsha ebhekana nazo esikoleni, ukuphola, imisebenzi yangemva kwesikole nezinto ezinjalo. Uma lokhu kwenzeka, shintshela ezihlokweni noma ezincwadini eziphathelene naleyo nkinga. Uma ubona ukwaziswa kuyi-Nqabayokulinda noma i-Phaphama! yamuva ongathanda ukuxoxa ngakho nomkhaya ngokushesha, unganqikazi ukukuhlela lokho. Yiqiniso, uyothanda ukwazisa amalungu omkhaya ngoshintsho kusengaphambili. Kodwa qiniseka ukuthi nibuyela encwadini ehleliwe lapho isidingo sesinakekelwe.

Gcina Isimo Sizolile

Kufundeka kangcono kakhulu ngaphansi kwezimo ezinokuthula. (Jakobe 3:18) Ngakho hlakulela isimo esikhululekile kodwa esihloniphekile. Enye inhloko yomkhaya e-United States ithi: “Kungakhathaliseki ukuthi sifundela egumbini lokuphumula noma kuvulandi, sizama ukuhlala sisondelane ngokwanele kunokuba sisabalale egumbini elikhulu. Kithi, lokhu kwakha umuzwa ofudumele.” Futhi uMaria ukhumbula ngokwazisa: “Mina nodadewethu sasivunyelwa ukuba sikhethe indawo endlini okwakuzoqhutshelwa kuyo isifundo ngalelo sonto. Lokhu kwakusenza sizizwe sikhululekile.” Khumbula ukuthi ukukhanya okwanele, indlela efanele yokuhlala nendawo ezungezile enhle necocekile konke kuyanikela ekuthuleni kwengqondo. Ukwenza ukudla okulula komkhaya ngemva kwesifundo nakho kungasiza ekwenzeni ubusuku bujabulise.

Eminye imikhaya ikhetha ngisho nokuhlanganisa eminye imikhaya esifundweni sayo ngezikhathi ezithile, ukuze yandise isithakazelo kanye nokukhulumela okuhlukahlukene. Lapho abasebasha eqinisweni bemenyelwa ukuba bahlanganyele kuleli lungiselelo, bangazuza ngokubona inhloko yomkhaya enokuhlangenwe nakho iqhuba isifundo somkhaya.

Yenza IBhayibheli Liphile

Yenza izikhathi zesifundo zithakazelise ezinganeni ukuze zibheke phambili kuzo ngokulangazela. Lokhu ungakwenza ngokukhuthaza izingane ezincane ukuba zidwebe imifanekiso yezenzakalo zeBhayibheli. Lapho kufaneleka, cela izingane ukuba zizenze ngokoqobo izenzakalo zeBhayibheli. Lapho unezingane ezincane, akudingekile ukuba unamathele endleleni ehlelekile yemibuzo nezimpendulo. Ukufunda noma ukuxoxa ngezindaba eziphathelene nabantu abathile eBhayibhelini kuyindlela ejabulisayo yokugxilisa izimiso zokuhlonipha uNkulunkulu. URobert, okukhulunywe ngaye ngaphambili, uyakhumbula: “Ngezinye izikhathi sasifunda izindima zeBhayibheli, sishintshana, sabelwe ukufunda izingxenye ‘zamaphimbo’ ahlukahlukene.” Izingane zingacelwa ukuba zikhethe abantu ezifuna ukubalingisa lapho kufundwa.

Ukusebenzisa amabalazwe namashadi kuyosiza izingane ezindadlana ukuba zibe nombono wezindawo nezici zezwe okwenzeka kuzo lezo zenzakalo okuxoxwa ngazo. Ngokusobala, ngokucabanga ngesenzakalo, isifundo somkhaya singenziwa sithakazelise futhi sihlukahluke. Futhi izingane ziyokwakha ukulangazela iZwi likaNkulunkulu.—1 Petru 2:2, 3.

Basize Bonke Babe Nengxenye

Ukuze izingane zisijabulele isifundo, kumelwe nazo zizizwe zinengxenye. Nokho, kungaba inselele ukwenza izingane zeminyaka ehlukahlukene zibe nengxenye. Kodwa isimiso seBhayibheli sithi: “Lowo owengamelayo, makakwenze ngenkuthalo yangempela.” (Roma 12:8) Kuyasiza ukuba nentshiseko, ngoba intshiseko iyathathelwana.

URonald wenza indodakazi yakhe eneminyaka emihlanu, uDina ibe nengxenye ngokuyifundisa izihlokwana zalokho okufundwayo futhi ayicele ukuba ichaze imifanekiso. Njengoba kwakusondela iSikhumbuzo sokufa kukaKristu ngonyaka odlule, wagxila emifanekisweni efanele esencwadini ethi Umuntu Omkhulu Kunabo Bonke Owake Waphila.c Uyaphawula: “Lokhu kwayisiza ukuba iqonde ukubaluleka kwalesi senzakalo.”

URonald unezela esinye isici endodakazini yakhe eneminyaka eyishumi, uMisha. “UMisha uye wathuthukela ezingeni lapho engagcini ngokuqonda imifanekiso nje kuphela kodwa nencazelo yayo,” kusho uRonald. “Ngakho lapho sicabangela incwadi ethi IsAmbulo—Umvuthwandaba Waso Omkhulu Useduze!,d sagxila encazelweni yemifanekiso, futhi lokhu kuye kwamsiza.”

Njengoba izingane zikhula, zeva eshumini nambili, zicele ukuba zibonise indlela lokho okufundwayo okusebenza ngayo. Lapho kuphakama imibuzo phakathi nesifundo, nikeza izabelo zezingxenye ezizocwaningwa. URobert wenza kanjalo lapho uPaul, oneminyaka engu-12, ebuza ngeqembu lesikole elalisanda kusungulwa lomdlalo okuthiwa iDungeons and Dragons. UPaul nabanye emkhayeni bafuna ukwaziswa besebenzisa i-Watchtower Publications Index, base bekubukeza esifundweni sabo somkhaya. “Ngenxa yalokho,” kusho uRobert, “uPaul washeshe waqonda ukuthi lowo mdlalo wawungawalungele amaKristu.”

URobert wayenikeza izabelo zokucwaninga nangezinye izikhathi. Umkakhe uNancy, uyakhumbula: “Lapho sicwaninga ngabaphostoli bakaJesu, ngamunye wethu wayabelwa umphostoli oyedwa njalo ngesonto. Yeka ukuthi kwakuthakazelisa kanjani ukubona izingane zinikeza umbiko wazo ngentshiseko esifundweni somkhaya!” Ukuzenzela ngokwazo ukucwaninga nokuhlanganyela ukwazisa nomkhaya kusiza izingane ukuba ‘zikhule noJehova.’—1 Samuweli 2:20, 21, qhathanisa ne-NW.

Ukubuza imibuzo—efuna umbono neholayo—nakho kuyindlela enhle yokwenza izingane zihileleke. UMfundisi Omkhulu, uJesu, wabuza imibuzo efuna umbono, enjengokuthi, “Ucabangani?” (Mathewu 17:25) “Lapho noma yimuphi kithi enombuzo, abazali bethu babengalokothi basiphendule ngokuqondile,” kukhumbula uMaria. “Njalo babebuza imibuzo eholayo, esisiza ukuba sicabangisise ngendaba.”

Xoxa—Ungacasuli!

Injabulo yesifundo somkhaya iyathuthukiswa uma bonke abakhona bengaveza imibono nemizwa yabo ngaphandle kokwesaba ukujivazwa. Kodwa “ukukhulumisana okuhle phakathi nesifundo somkhaya kungaba khona kuphela uma imizila yokukhulumisana ivulekile nangezinye izikhathi,” kusho omunye ubaba. “Awunakwenza sengathi kukhona ukukhulumisana ngesikhathi sesifundo nje kuphela.” Ngazo zonke izindlela, gwema amazwi okungacabangeli ahlabayo, njengokuthi, ‘Ubufuna ukusho lokho nje? Bengicabanga ukuthi uzokusho okuthile okubalulekile’; ‘Ayinangqondo leyonto’; ‘Yini nje esingayilindela kuwe? Kakade useyingane nje.’ (IzAga 12:18) Yiba nesihawu nomusa ezinganeni zakho. (IHubo 103:13; Malaki 3:17) Thola injabulo kuzo futhi uzisekele njengoba zizama ukusebenzisa lokho ezikufundayo.

Isimo sesifundo somkhaya kufanele sibe ngendlela yokuthi ingqondo yengane ibe sesimweni sokwamukela lokho ekufundiswayo. “Lapho uqala ukukhuza izingane,” kuchaza omunye umzali ophumelelayo wezingane ezine, “ngandlela-thile uba nezilaleli ezingenabungane.” Esimweni esinjalo, cishe ukwaziswa ngeke kugxile. Ngakho gwema ukwenza izikhathi zezifundo zibe ezokuyala nokusola. Uma lokhu kudingeka, kwenze kamuva nomuntu ngamunye.

Kuwufanele Umzamo

Ukwakha umkhaya ocebile ngokomoya kudinga isikhathi nomzamo. Kodwa umhubi uthi: “Bheka, abantwana bayifa elivela kuJehova, isithelo sesisu singumvuzo.” (IHubo 127:3) Futhi abazali baphathiswe umthwalo ‘wokukhulisa izingane ngesiyalo nangokuqondisa umqondo kukaJehova.’ (Efesu 6:4) Ngakho thuthukisa amakhono okuqhuba isifundo somkhaya esiphumelelayo nesijabulisayo. Yenza konke okusemandleni akho ukuze unikeze “ubisi olungonakalisiwe olungolwezwi,” ukuze izingane zakho ‘zikhulele ensindisweni.’—1 Petru 2:2; Johane 17:3.

[Imibhalo yaphansi]