Londoloza Umuzwa Wakho Wokuphuthuma

IYIPHI indlela eyodwa eqinisekile, neyamukelwa uNkulunkulu yokukhonza uJehova ngomphefumulo wonke njalo? Iwukuba nomuzwa oqotho wokuphuthuma ekujuleni kwezinhliziyo zethu. Ukukhonza uNkulunkulu ngomphefumulo wonke kusho ukumkhonza ngokuphila kwethu konke, futhi kudinga ukulalela ngokusuka enhliziyweni, nangokuphelele kukho konke acela ukuba sikwenze.

Umprofethi uMose wasigcizelela lesi sidingo lapho eyala isizwe sakwa-Israyeli: “Wothanda uJehova uNkulunkulu wakho ngayo yonke inhliziyo yakho, nangawo wonke umphefumulo wakho, nangawo onke amandla akho.” (Duteronomi 6:5) Emakhulwini athile eminyaka kamuva wona lowo myalo waphindwa uKristu Jesu: “Kumelwe uthande uJehova uNkulunkulu wakho ngenhliziyo yakho yonke nangomphefumulo wakho wonke nangengqondo yakho yonke.” (Mathewu 22:37) Umphostoli uPawulu wayebhekisele kulemfuneko efanayo lapho etshela abase-Efesu ukuba benze “intando kaNkulunkulu ngomphefumulo wonke,” nalapho enxusa abaseKolose: “Noma ngabe yini eniyenzayo, yisebenzeni ngomphefumulo wonke njengokungathi nenzela uJehova, hhayi abantu.”—Efesu 6:6; Kolose 3:23.

Nokho, kunzima ukugxilisa izinhliziyo nemiphefumulo yethu enkonzweni yethu kuNkulunkulu uma singenawo umuzwa wokuphuthuma ngaphakathi kithi noma uma umuzwa wokuphuthuma esake saba nawo usunciphile—mhlawumbe usuphele nyá. Namuhla, siphila esikhathini sokuphuthuma esingafani nanoma iyiphi enye inkathi emlandweni womuntu.

Izinkathi Ezithile Zokuphuthuma

Ezikhathini zangaphambi kobuKristu kwakunezinkathi eziningana zokuphuthuma. Ngokuqinisekile usuku lukaNowa nenkathi eyaholela ekubhujisweni kweSodoma neGomora kwakuyizikhathi zokuphuthuma kwangempela. (2 Petru 2:5, 6; Jude 7) Ngokungangabazeki iminyaka eyandulela iSikhukhula yayinomsebenzi ophuthumayo. Nakuba uNowa nomkhaya wakhe babengazi kahle ukuthi uZamcolo wawuyoqala nini, “ukwesaba kokuhlonipha uNkulunkulu” ababenakho kwakuyoqinisekisa ukuthi abalibali.—Heberu 11:7.

Ngokufanayo, ngaphambi kokubhujiswa kweSodoma neGomora, izingelosi “zamsheshisa uLoti” futhi zamtshela: “Baleka.” (Genesise 19:15, 17) Yebo, nakuleso sehlakalo, ukuphuthuma kwasindisa ukuphila kwabalungileyo. Emakhulwini athile eminyaka kamuva amaJuda ayethunjelwe eBabiloni anxuswa: “Mukani, mukani, niphume lapha, ningathinti okungcolileyo, niphume phakathi kwalo.” (Isaya 52:11) Ngo-537 B.C.E., abangaba ngu-200 000 ababedingisiwe baphuma beshesha eBabiloni belalela lowo myalo ophuthumayo ongokwesiprofetho.

Umuzwa wokuphuthuma kulezo zimo ngazinye waphumela enkonzweni yomphefumulo wonke kulabo ababenokholo lokuthi baphila ezikhathini eziphuthumayo.

Ukuphuthuma Ezikhathini ZamaKristu

Iminkenenezo yokuphuthuma iyezwakala nasemiBhalweni YamaKristu YesiGreki. “Hlalani nibhekile,” “nihlale niphapheme,” “hlalani nilindile,” “zibonakaliseni nikulungele”—zonke lezi yizinkulumo ezasetshenziswa uKristu Jesu ukuze afake umuzwa wokuphuthuma kubalandeli bakhe. (Mathewu 24:42-44; Marku 13:32-37) Ngaphezu kwalokho, imifanekiso yakhe ngokuphathelene nezintombi eziyishumi, isigqila esibi, amatalenta, nokuhlukaniswa kwezimvu ezimbuzini yenza umuntu ahlale elindile futhi ibangela umuzwa wokuphuthuma.—Mathewu 25:1, 14, 15, 32, 33.

UJesu akakhulumanga nje kuphela ngokuphuthuma kodwa futhi wasekela ubuqiniso bamazwi akhe ngokuba asebenze ngokuphuthuma. Ngesinye isikhathi watshela izixuku lapho zizama ukumbamba: “Nakweminye imizi kumelwe ngishumayele izindaba ezinhle zombuso kaNkulunkulu, ngoba yilokhu engathunyelwa khona.” (Luka 4:42, 43) Ngaphezu kwalokho, wakhuthaza abafundi bakhe ukuba bacele iNkosi yokuvuna ukuba ithumele izisebenzi ezengeziwe ekuvuneni kwaYo ngoba “ukuvuna kukhulu, kodwa izisebenzi zimbalwa.” (Mathewu 9:37, 38) Isicelo esinjalo esiqotho kuNkulunkulu sibonakalisa umoya wokuphuthuma.

Ingabe Ukuphuthuma Okunjalo Kwakungafanele?

Abanye bangase babuze umbuzo onengqondo, Kungani umuzwa wokuphuthuma wawudingeka emuva ngaleso sikhathi uma ngabe “usizi olukhulu” olwalubikezelwe lwalusekude ngamakhulu eminyaka?—Mathewu 24:21.

Singaqiniseka ukuthi kwakungelona nje icebo elasetshenziswa uJesu ukuze agcine abalandeli bakhe bematasa emsebenzini wokushumayela nokufundisa. Cha, kwakuwuthando lukaKristu ngabafundi bakhe, nokuqonda kwakhe ngokuphelele umbono kaJehova ngesikhathi, okwakuyisisekelo seseluleko sakhe esiphathelene nokuphuthuma. Yebo, uKristu Jesu wayazi ukuthi kwakudingeka umoya wokuphuthuma ukuze kufezwe intando kaJehova ngokuvumelana nenjongo kaNkulunkulu. Ngaphezu kwalokho, wayazi ukuthi nabafundi bakhe babeyozuza ngokomoya uma belondoloza umuzwa wokuphuthuma aze abuye.

UJesu Kristu wayebonise ngokucacile ukuthi kwakunomsebenzi wokufakaza emhlabeni wonke okwakumelwe wenziwe ngesikhathi esilinganiselwe. (Mathewu 24:14; Marku 13:10) Izigaba ezishiyanayo zalesi sabelo ziye zembulwa njengoba umsebenzi uqhubeka. Kodwa ukuphuthuma kwakudingeka ukuze kudlulwe esigabeni ngasinye. UJesu wabonisa ukuqhubekela phambili kwalesi sabelo lapho ethi: “Nizoba ofakazi bami kokubili eJerusalema nakulo lonke iJudiya neSamariya nasezingxenyeni eziqhele kakhulu zomhlaba.” (IzEnzo 1:8) Futhi yileyo ndlela lesi sabelo esiye saqhubeka ngayo kuze kube manje. Kuye kwasho izinto ezintsha ezincekwini zikaNkulunkulu phakathi nesikhathi, okuye kwenza kwadingeka zilungise ukuqonda kwazo ngezinye izikhathi.

Umuzwa wamaKristu wokuphuthuma uye wayifeza injongo kaJehova. Uye wasiza abafundi bakaKristu ukuba benze isabelo sabo ngezigaba zaso ngokwesimiso sikaJehova esingenaphutha. Nanamuhla, uma sibheka emuva eminyakeni ecishe ibe ngaphezu kuka-2 000, sisiqonda ngokugcwele ngokwengeziwe leso simiso saphezulu.

Ukuphuthuma kobuKristu kwasiza abafundi ukuba banikeze ubufakazi obugcwele eJerusalema, eJudiya, eSamariya, nakumaJuda ahlakazekile ngaphambi kuka-36 C.E. lapho kuvalwa umusa okhethekile owawuboniswa u-Israyeli. (Daniyeli 9:27; IzEnzo 2:46, 47) Ngokufanayo, ukuphuthuma kobuKristu kwasiza ibandla lokuqala ukuba linikeze wonke amaJuda isixwayiso esicacile sokuthi maduze nje isimiso sawo sasizophela. (Luka 19:43, 44; Kolose 1:5, 6, 23) Futhi ngemva kokuba siphele ngokungalindelekile ngo-70 C.E., ukuphuthuma kwasiza ofakazi bakaKristu bekhulu lokuqala ukuba bamemezele ithemba lasezulwini kwabaningi ngaphambi kokuba ukuhlubuka okwakubikezelwe kusakaze ifu lako lobumnyama. (2 Thesalonika 2:3; 2 Thimothewu 4:2) Khona-ke, phakathi namakhulu eminyaka eNkathi Yobumnyama, amaKristu ambalwa anjengokolweni enza ithemba loMbuso lahlala likhona, njengoba uKristu Jesu ayebikezele. (Mathewu 13:28-30) Ekugcineni, ngesikhathi sakhe esimisiwe, uJehova wamisa ibandla elishisekayo losuku lwanamuhla, elishukunyiswa yisigijimi sakhe esiphuthumayo sokwahlulelwa kwalabo abaphila kulesi sizukulwane sokugcina.—Mathewu 24:34.

NjengoDaniyeli wasendulo, oFakazi bakaNkulunkulu abakholekile bosuku lwanamuhla ngeke balokothe bakhononde ngoJehova, bambuze: “Wenzani na?” (Daniyeli 4:35) Bayaqiniseka ukuthi uJehova wazi kahle ukuthi yini edingekayo ukuze umsebenzi wakhe wenziwe ngokwesimiso. Ngakho esikhundleni sokungabaza indlela kaJehova yokuhlela izinto, bajatshuliswa ukuthi uNkulunkulu ubanikeze ithuba lokusebenza kanye naye kulezi zikhathi ezibalulekile.—1 Korinte 3:9.

Esinye Isikhuthazo Sokuphuthuma

Esinye isizathu sokuphuthuma siwukungakwazi kwethu ukunquma okuyilona suku nehora okuyoqala ngalo ngokungazelele usizi olukhulu. UKristu Jesu wayengakungabazi ukuthi akekho emhlabeni owazi usuku nehora elinqunywe kusengaphambili lokuqala kwaleso senzakalo esibalulekile. (Mathewu 24:36) Ngesinye isikhathi watshela abaphostoli bakhe ababemagange: “Akukhona okwenu ukuthola ulwazi ngezikhathi noma izinkathi uBaba azibeke egunyeni lakhe siqu.” (IzEnzo 1:7) Yebo, umphumela usobala, kodwa akukhona okwethu ukuba sazi yonke imininingwane.

Umphostoli uPawulu wayenesimo sengqondo esiqondile sokuphuthuma. Mhlawumbe wayecabanga ngamazwi kaJesu lapho ebhalela abaseThesalonika ngokuba khona kukaKristu: “Manje ngokuqondene nezikhathi nezinkathi, bafowethu, anidingi kulotshelwa lutho ngakho.” (1 Thesalonika 5:1) Wabhala lencwadi eminyakeni engaba ngu-17 ngemva kokuba uJesu ayethe: “Nizoba ofakazi bami . . . ezingxenyeni eziqhele kakhulu zomhlaba.” (IzEnzo 1:8) Ngaleso sikhathi akukho okunye okwakungase kubhalwe ngoba akukho okunye okwase kwembuliwe. Noma kunjalo babengaqiniseka ukuthi usuku lukaJehova lwaluyofika nakanjani ‘njengesela ebusuku’ lapho amaKristu eyobe eshumayela ngokuphuthumayo.—1 Thesalonika 5:2.

Kubonakala kungenakwenzeka ukuthi amaKristu ekhulu lokuqala, ayesawakhumbula lamazwi, acabanga ukuthi usuku lukaJehova lwalusekude ngamakhulu eminyaka. Yiqiniso, ayeyazi imifanekiso kaJesu ngenkosi eyaya ezweni elikude nomuntu owaya kude. Futhi, ayazi ukuthi lemifanekiso yayibonisa ukuthi inkosi yayiyobuya “ekugcineni” nokuthi umuntu owayehambile wayeyobuya “ngemva kwesikhathi eside.” Kodwa ngokungangabazeki yayiwadida imibuzo enjengokuthi, Kunini “ekugcineni”? Nokuthi kusho ukuthini ukuthi “ngemva kwesikhathi eside”? Iminyaka eyishumi? Engamashumi amabili? Engamashumi amahlanu? Noma isikhathi eside kunalokho? (Luka 19:12, 15; Mathewu 25:14, 19) Amazwi kaJesu ayeyoqhubeka enkeneneza ezindlebeni zawo: “Nani futhi, hlalani nikulungele, ngoba iNdodana yomuntu iza ngehora eningacabangi ukuthi kungaba yilo.”—Luka 12:40.

Imiphumela Eqondile Yokuphuthuma

Yebo, umuzwa wokuphuthuma obangelwa uNkulunkulu waba nomphumela okhuthaza ngendlela emangalisayo kumaKristu ekhulu lokuqala, wawasiza ukuba ahlale ematasa emsebenzini obaluleke kakhulu wokushumayela nokufundisa. Uyaqhubeka usikhuthaza namuhla ngezindlela eziningi. Usenza singabi nomuzwa wokwaneliseka komuntu siqu noma ukuba ‘singakhathali ekwenzeni okuhle.’ (Galathiya 6:9, IBhayibheli lesiZulu elivamile) Usivikela ekuhilelekeni ngokweqile ezintweni zezwe nokuthanda kwalo izinto ezibonakalayo okuyengayo. Ugxilisa izingqondo zethu ‘ekuphileni kwangempela.’ (1 Thimothewu 6:19) INkosi uJesu yathi abafundi bayo babeyoba “njengezimvu phakathi kwezimpisi,” futhi yayazi ukuthi kudingeka sihlale sinombono wokuzimisela, nongaguquki ukuze silwe nezwe. Yebo, siye salondwa, savikelwa umuzwa wethu wobuKristu wokuphuthuma.—Mathewu 10:16.

Ngenxa yokuhlakanipha kwakhe okungapheli ngaso sonke isikhathi uJehova uNkulunkulu uye wanikeza izinceku zakhe ukwaziswa okwanele ukuze zihlale zinomuzwa wokuphuthuma. Ngomusa uye wasiqinisekisa ukuthi ‘sisezinsukwini zokugcina’ zalesi simiso sezinto esonakele. (2 Thimothewu 3:1) Sikhunjuzwa ngokuqhubekayo ukuthi kumelwe sikhanye njengezinkanyiso kuze kube yilapho isizukulwane esiphila kuso sidlula osizini olukhulu, umvuthwandaba walo oyoba iHar-Magedoni.—Filipi 2:15; IsAmbulo 7:14; 16:14, 16.

Yebo, umuzwa wokuphuthuma wokuhlonipha uNkulunkulu uyingxenye ebalulekile yenkonzo yomphefumulo wonke eyenzelwa uJehova. Uxosha futhi usize ekuvimbeleni izilingo zikaDeveli zokubangela izinceku zikaNkulunkulu ukuba ‘zikhathale futhi ziphele amandla emiphefumulweni yazo.’ (Heberu 12:3) Kuze kube ngunaphakade, ukuzinikela ngomphefumulo wonke kuyobangela izinceku zikaJehova ukuba zimlalele, kodwa manje, kulezi zinsuku ezandulela i-Armagedoni, umuzwa ojulile, noqotho wokuphuthuma uyingxenye ebalulekile yokuzinikela ngomphefumulo wonke.

Kwangathi uJehova uNkulunkulu wethu angasisiza sonke ukuba silondoloze umuzwa wethu wokuphuthuma njengoba siqhubeka sinanela amazwi omphostoli uJohane: “Amen! Woza, Nkosi Jesu.”—IsAmbulo 22:20.