Lapho IMpumalanga Ihlangana NeNtshonalanga
“OH, IMPUMALANGA yiMpumalanga, neNtshonalanga yiNtshonalanga, futhi lokhu kokubili akusoze kwahlangana.” Lamazwi embongi yaseBrithani uRudyard Kipling asikhumbuza ngokwehlukana okujulile kwamasiko okuhlukanisa isintu, okunengxenye enzondweni yamaqembu, izinhlanga, nezizwe eqhuma endaweni yonke esizungezile namuhla. Abaningi bayabuza, Ingabe akukho uNkulunkulu angakwenza ngalesisimo? Yebo, kukhona! Futhi wenza okuthile ngisho kwamanje! Umugqa olandelayo wenkondlo kaKipling wabhekisela kulokhu. Kuyothatha isikhathi eside kangakanani iMpumalanga neNtshonalanga kuhlukene? Lembongi yathi: “Kuze kube yilapho uMhlaba neSibhakabhaka kuma ngokushesha phambi kweSihlalo Sokwahlulela esikhulu sikaNkulunkulu.”
UNkulunkulu wabele iNdodana yakhe, uJesu Kristu lomthwalo wemfanelo wokwahlulela. (Johane 5:22-24, 30) Kodwa siqala nini lesosikhathi sokwahlulela? Obani abahlulelwayo, futhi uba yini umphumela? KwakunguJesu owachaza esiprofethweni izimpi zezwe nokucindezeleka okuhambisana nazo okwaqala ukukhathaza isintu ngonyaka ka-1914. Wathi lokhu kwakuphawula “isibonakaliso sokuba-khona [kwakhe okungabonakali] nesokuphela kwesimiso sezinto.”—Mathewu 24:3-8, NW.
Emvuthwandaba walesisiprofetho esikhulu, uJesu uchaza isikhathi sethu samanje njengesokwahlulela, ethi ngaye uqobo: “Kepha nxa iNdodana yomuntu iza ngenkazimulo yayo nezingelosi zonke ezingcwele kanye nayo, khona izakuhlala esihlalweni sayo senkazimulo; kuzakubuthelwa phambi kwayo izizwe zonke, ibahlukanise abanye kwabanye, njengomalusi ahlukanisa izimvu nezimbuzi, imise izimvu ngakwesokunene sayo kepha izimbuzi ngakwesokhohlo.” Ngokomfanekiso, bonke abantu bomhlaba manje baqoqelwa phambi kukaMahluleli futhi bayalandisa ngendlela abasabela ngayo esigijimini sakhe sensindiso. Lapho isahlulelo sikhishwa ngokushesha osizini olukhulu, abantu abangalaleli abanjengezimbuzi “bayakumuka, baye ekujezisweni okuphakade, kodwa abalungileyo [abalalelayo abanjengezimvu] baye ekuphileni okuphakade.”—Mathewu 25:31-33, 46; IsAmbulo 16:14-16.
‘Kusukela Empumalanga Nasentshonalanga’
Eqinisweni ukwahlulelwa kwalelizwe kwaqala phakathi neminyaka yeziyaluyalu yeMpi Yezwe I. Ngalesosikhathi, abefundisi beLobukholwa bawasekela ngenhliziyo yonke amaqembu alwayo. Lokhu kwababonakalisa beyingxenye yezwe elonakele elifanelwe “intukuthelo kaNkulunkulu.” (Johane 3:36) Nokho, kuthiwani ngamaKristu athanda ukuthula abonakalisa ukholo kuNkulunkulu? Kusukela ngonyaka ka-1919, lamaKristu aqala ukuqoqelwa ngasohlangothini lweNkosi, uKristu Jesu.
Aye avela kuzo zonke izingxenye zembulunga, okokuqala insali yabagcotshiwe abangu-144 000, abaye bakhethwa phakathi namakhulu amaningi eminyaka yenkathi yamaKristu. Lawa azokuba “izindlalifa kanye noKristu,” eMbusweni wakhe wasezulwini. (Roma 8:17) Kulawa umprofethi kaNkulunkulu uthi: “Ungesabi, ngokuba nginawe; ngiyakuyiletha inzalo yakho iphume empumalanga, ngikubuthe nasentshonalanga. Ngiyakusho kuyo inyakatho, ngithi: Balethe, nakuyo iningizimu: Ungabagodli; lethani amadodana ami akude, namadodakazi ami ukuba aphume emikhawulweni yomhlaba, onke abizwé ngegama lami, nengiwadalele inkazimulo yami, engiwabumbile nengiwenzile.”—Isaya 43:5-7.
Kodwa akupheleli lapho! Ikakhulukazi kusukela ngawo-1930, isixuku esikhulu, manje esibalelwa ezigidini, saqala ukuqoqwa. Lesixuku ‘siyizimvu’ uJesu abhekisela kuzo kuMathewu 25:31-46. Njengensali egcotshiwe engaphambi kwaso, lesixuku esikhulu ‘sinokholo’ kuLowo omemezelayo: ‘Ningofakazi bami, mina nginguNkulunkulu.’ (Isaya 43:10-12) Ukuqoqwa kwalesisixuku esikhulu nakho kuqhubeka ‘kusukela empumalanga nasentshonalanga, enyakatho naseningizimu, kuze kube semikhawulweni yomhlaba.’
Lezizimvu ezithanda ukuthula kakade zihlanganiselwa ebuzalwaneni obubodwa bomhlaba wonke. Zikhuluma izilimi eziningi ezihlukahlukene zamazwe angu-231 ezihlala kuwo. Nokho, zinobunye ngokomoya ekufundeni ‘ulimi oluhlanzekile,’ lwesigijimi soMbuso seBhayibheli, ‘ukuze zonke zibize igama likaJehova, zimkhonze nganhliziyonye.’ (Zefaniya 3:9) Ubunye bazo enkolelweni, injongo, nezenzo bunikeza ubufakazi obumangalisayo bokuthi ngempela iMpumalanga ihlangene neNtshonalanga, nabantu abavela kuzo zonke izingxenye zomhlaba, ukuze bakhonze futhi badumise iNkosi ePhakeme uJehova.
Kwamanye amazwe lokhu kuqoqwa kwenzeka ngaphansi kwezimo eziphawuleka kakhulu, njengoba imibiko elandelayo izobonisa.