Abamemezeli BoMbuso Bayabika
Inkululeko Engokomoya EColombia
KUSUKELA ngesikhathi sabaholi baseSpain abanqoba iMelika, ubuKatolika buye baba nethonya elikhulu eNingizimu Melika. EColombia bebulokhu buyinkolo yeZwe esemthethweni. Iminyaka engu-105 edlule, iVatican iye yaba nesivumelwano nohulumeni waseColombia owavikela isonto futhi walinikeza amalungelo akhethekile emikhakheni yemfundo nomshado.
NgoDecember 1990 abantu baseColombia bakhetha ikhomishani ukuze ilungiselele umthetho-sisekelo omusha owaqedwa phakathi no-1991. Lomthetho-sisekelo omusha ushintsha isimo esingokwenkolo eColombia. Zonke izinkolo manje sezinamalungelo alinganayo phambi komthetho, futhi imfundo engokwenkolo ngeke iphoqelelwe ezinganeni ezisezikoleni zomphakathi. Isivumelwano neVatican sizobukezwa kucatshangelwa lezinguquko zomthetho-sisekelo.
Lenkululeko engokwenkolo eyengeziwe izonciphisa ithonya leSonto lobuKatolika, yenze kube lula ngabanhliziyo ziqotho ukuba bazuze ulwazi lweBhayibheli futhi bathole inkululeko engokomoya.
Belindele lenkululeko engokomoya, oFakazi BakaJehova abangu-51 000 kulelizwe bebenza amalungiselelo okunakekela izimpabanga ezingokomoya. Isakhiwo sabo esisha segatsha esandisiwe, esinomshini wokunyathelisa onemibala emine onesivinini esikhulu, sesizophela. Amaphayona akhethekile esikhashana aye athunyelwa emadolobheni amancane efuna izimvu zikaJehova ezilahlekile futhi aye afeza umsebenzi omangalisayo wemfundo yeBhayibheli. Emadolobheni angu-63, ngalinye elinabantu abangu-10 000, kuye kwaqaliswa amabandla namaqembu amasha angu-47.
Njengoba umoya kaJehova uqhubeka ushukumisa abantu abanhliziyo ziqotho, nentsha eningi iyasabela. Incwadi ethi Intsha Iyabuza—Izimpendulo Ezisebenzayo iye yaba usizo olungenakulinganiswa kokubili entsheni enjalo nakubazali bayo. Ngesikhathi ehamba indlu ngendlu, uFakazi othile wahlangana nowesilisa owayefunde izingxenye zalencwadi, ayeyibolekwe umakhelwane wakhe. Wahlatshwa umxhwele ukuhlakanipha okuwusizo ekubonisayo lapho ikhuluma ngezinkinga zomkhaya. Isahluko 4, esithi “Kungani Umama Nobaba Behlukana?” samhlaba umxhwele ngokukhethekile, njengoba yena nomkakhe babesengcupheni yokuhlukana. Wathi lencwadi yamsindisa engozini enkulu. Manje yena nomkhaya wakhe batadisha iBhayibheli noFakazi BakaJehova futhi baya kuyo yonke imihlangano yebandla. Babonga kakhulu ngokuhlakanipha okuwusizo uJehova akunikezayo ngeBhayibheli nangenhlangano yakhe.
Lokhu okuhlangenwe nakho kubonisa inkululeko engokomoya eyenzekayo eColombia njengoba oFakazi BakaJehova besiza abalambile ngokomoya ukuba bafunde ngezinjongo zikaJehova ezimangalisayo nezwe lakhe elisha, manje eliseduze.—2 Petru 3:13.