Obani UNkulunkulu Abazisayo?
SONKE sifuna ukuthandwa ngabangane bethu. Isifiso esiqine nangaphezulu kumKristu esokuthola ukwaziswa uNkulunkulu. KumaHubo 84:11 kuthiwa ngoJehova uNkulunkulu: “Uyakupha umusa nodumo; akayikubenqabela okuhle abahamba ngobuqotho.” Ekuzalweni kukaJesu, ukumemeza kwenjabulo kwezingelosi zasezulwini kwathembisa “ukuthula emhlabeni kubantu abazisayo!”—Luka 2:14, Moffatt.
Kodwa obani uNkulunkulu abazisayo? Ingabe izindinganiso zikaNkulunkulu ziyefana nezomuntu? Ngokuqondakalayo, azifani, njengoba kuboniswe yilokho okuxoxwe ngakho esihlokweni esandulelayo. Empeleni, njengoba amaKristu eyalwa ukuba ‘abe ngalingisa uNkulunkulu,’ ngamunye wethu angenza kahle ukuba azibuze, Ingabe ngiyabazisa abantu uNkulunkulu abazisayo, noma ingabe ngithambekele ekulandeleni izindinganiso zezwe ekwahluleleni kwami abantu? (Efesu 5:1) Ukuze sizuze ukwaziswa nokuvunyelwa uJehova, kumelwe siqikelele ukuthi sibheka izinto ngombono wakhe.
Izindinganiso Eziphakeme ZikaNkulunkulu
“UNkulunkulu akabheki ubuso bamuntu,” kusho umphostoli uPetru, “kodwa ezizweni zonke omesabayo nowenza ukulunga uyamukeleka kuye.” Ngaphezu kwalokho, umphostoli uPawulu wakufakazela ukuthi uNkulunkulu “wazenza izizwe zonke ngagazi linye.” (IzEnzo 10:34, 35; 17:26) Ngakho-ke, kumane nje kunengqondo ukuphetha ngokuthi bonke abantu bayalingana emehlweni kaNkulunkulu kungakhathaliseki ukuthi ziyini izici zabo ezingokomzimba. Njengoba kunjalo, ngeke kube okufanelekile ngomKristu ukuba azise othile ngokweqile ngenxa nje yokuthi lowomuntu uvela endaweni ethile noma unebala elithile lesikhumba noma ungowolunye uhlanga. Kunalokho, uyokwenza kahle ukulandela iSibonelo sakhe, uJesu Kristu, ngisho nezitha ezavuma ukuthi akabonisanga ukukhetha.—Mathewu 22:16.
Inkulumo yesiNgisi ethi “skin-deep” (okuthile okungaphandle) ngezinye izikhathi isetshenziselwa ukuchaza into engashonile phansi noma engabalulekile. Ibala lesikhumba liyilokho kanye; limane nje lingokuthile okungaphandle. Ibala lesikhumba somuntu alibubonisi neze ubuntu bakhe noma izimfanelo zangaphakathi. Uma kuziwa ekukhetheni abantu esingase sakhe ubudlelwane nabo, sidle nabo, noma sixhawulane nabo, ngokuqinisekile akufanele sibheke ibala lesikhumba ngokukhethekile. Khumbula, intombi eyabangela ukuba kubhalwe ezinye zezinkondlo ezinhle kakhulu nezigcwele amazwi othando kwezake zabhalwa yathi ngayo: “Ngimnyama, kepha ngimuhle, . . . ngimnyamana, ngokuba ilanga lingifusile.” (IsiHlabelelo seziHlabelelo 1:5, 6) Uhlanga nebala akwakhi sisekelo esifanele sokubonisa ukwazisa. Okubaluleke nakakhulu ukuthi umuntu uyamesaba yini uNkulunkulu futhi wenza ukulunga.
UNkulunkulu uzizwa kanjani ngokuba nengcebo yezinto ezibonakalayo? Kubo bonke abantu uNkulunkulu abathandayo nabazisayo, iNdodana yakhe, uJesu Kristu, iyona ehamba phambili. Nokho, lapho esemhlabeni, uJesu ‘wayengenandawo lapho ayengacamelisa khona ikhanda.’ (Mathewu 8:20) Wayengenandawo engeyakhe, izindlu, amasimu, imithi yezithelo, noma imfuyo. Noma kunjalo, uJehova wamazisa futhi wamphakamisela esikhundleni esingaphezu kwesanoma ubani endaweni yonke ngaphandle kukaNkulunkulu ngokwakhe.—Filipi 2:9.
UJesu Kristu waziswa nguNkulunkulu ngoba wayengacebile ngokwezinto ezibonakalayo kodwa wayecebe emisebenzini emihle. (Qhathanisa neyoku-1 Thimothewu 6:17, 18.) Wayala abalandeli bakhe: “Ningazibekeleli ingcebo emhlabeni, lapho kona inundu nokugqwala, nalapho amasela efohla khona, ebe. Kepha zibekeleleni ingcebo ezulwini, lapho kungoni inundu nokugqwala, nalapho amasela engafohli khona, ebe.” (Mathewu 6:19, 20) Ngakho, kunokwazisa labo kuphela abacebe ngokwezinto zalelizwe, amaKristu ngeke enze mahluko ngesisekelo sezinto zezwe umuntu anazo. Ayofuna labo abacebile kuNkulunkulu kungakhathaliseki ukuthi bacebile noma bampofu ngokwezinto ezibonakalayo. Ungakhohlwa ukuthi ‘uNkulunkulu ukhethe abampofu ezweni babe-ngabacebileyo ekukholweni nezindlalifa zombuso.’ (Jakobe 2:5) Uma ulondoloza umbono kaNkulunkulu, ngeke ube isisulu somkhuba ovamile wokwazisa abacebile ngokwezinto ezibonakalakayo.
Ngokuqondene nemfundo, iBhayibheli lisho ngokucacile ukuthi uNkulunkulu usikhuthaza ukuba sifune ulwazi nokuhlakanipha nokuthi uJesu Kristu wayengumfundisi omkhulu kunabo bonke owake wahamba emhlabeni. (IzAga 4:7; Mathewu 7:29; Johane 7:46) Kodwa akukhona ukuhlakanipha kwezwe noma imfundo okubangela ukuba waziswe uNkulunkulu. Ngokuphambene, uPawulu usitshela ukuthi ‘ababaningi abahlakaniphileyo ngokwenyama ababiziweyo, kodwa izinto zobuwula zezwe uNkulunkulu uzikhethile ukuba ajabhise abahlakaniphileyo.’—1 Korinte 1:26, 27.
UNkulunkulu wazisa labo abafundiswe kahle, hhayi ezifundweni zezwe ezifundiswa ezikhungweni zemfundo ephakeme, kodwa abafundiswe “ulimi oluhlanzekile” lweqiniso njengoba lutholakala eZwini lakhe, iBhayibheli. (Zefaniya 3:9, qhathanisa neNW.) Empeleni, uJehova ngokwakhe ufundisa abantu bakhe namuhla ngohlelo lwemfundo olufinyelela emagumbini akude omhlaba. Futhi njengoba kwabikezelwa umprofethi uIsaya, abantu bazo zonke izizwe basabela ngokuthi: “Wozani sikhuphukele entabeni kaJehova endlini kaNkulunkulu kaJakobe; uyakusifundisa izindlela zakhe, sihambe emikhondweni yakhe.” Ngakho-ke, esikhundleni sokudumisa imfundo yezwe, amaKristu ayofuna labo ababonisa ngamazwi abo nezenzo ukuthi ngempela ‘bangabantu abafundiswa uJehova.’ Ngokwenza kanjalo, ayojabulela ‘ukuthula okukhulu’ okunikezwa nguNkulunkulu.—Isaya 2:3; 54:13.
Singakuzuza Ukwaziswa UNkulunkulu
Yebo, izindinganiso zikaNkulunkulu zokwazisa kwakhe abanye zehluke kakhulu kwezomuntu. Nakuba kunjalo, kumelwe sizame ukuqondiswa yizindlela zakhe uma sifuna ukuthola umusa emehlweni akhe. Lokho kusho ukuthi kumelwe sifunde ukubheka abanye ngokombono kaNkulunkulu futhi hhayi ngezindinganiso zabantu, okungenzeka zithonywe ubugovu nobandlululo. Singakwenza kanjani lokho?
UJehova uNkulunkulu uhlola inhliziyo yomuntu futhi wazisa labo ababonisa izimfanelo ezinjengothando, ubuhle, umusa, nokubhekakade. Nathi kufanele senze kanjalo. (1 Samuweli 16:7; Galathiya 5:22, 23) Kudingeka sibheke umuntu wangaphakathi, ngezinga thina njengabantu esingenza ngalo, hhayi ebaleni lakhe lesikhumba noma esizindeni esingokobuzwe. Kunokufuna labo abacebile ezintweni ezibonakalayo, senza kahle ngokukhumbula umbono kaNkulunkulu ngengcebo futhi silwele ‘ukuceba emisebenzini emihle, siphane, sabelane.’ (1 Thimothewu 6:18) Ukuze sizuze ukwaziswa uNkulunkulu, kumelwe siqhubeke sifune ulwazi oluqondile ngoNkulunkulu nangeNdodana yakhe, uJesu Kristu, sibe ngabafundiswe kahle olimini oluhlanzekile lweqiniso. (Johane 17:3, 17) Uma senza kanjalo, nathi siyoba phakathi kwalabo uNkulunkulu abazisayo.