Luhlobo Luni Lwabantu Olwazisayo?
“KUFUNEKA UMAKOTI. Kufanele abe nesikhumba esikhanyayo nomzimba omncane, abe neziqu zemfundo ephakeme noma kutuswa osaphishekela imfundo eqhubekayo osenazo kakade iziqu zemfundo ephakeme. Kumelwe abe ovela emkhayeni omuhle futhi omi kahle. Owesigaba esifanayo uyatuseka.”
SIFUNDEKA kanjalo isimemezelo somshado esiyisibonelo ongase usibone ephephandabeni eNdiya. Cishe, ungabona okufanayo nakwezinye izingxenye eziningi zezwe. ENdiya isaziso ngokuvamile sikhishwa abazali balowo ozoba umkhwenyana. Izimpendulo zingase zihlanganise isithombe sentombazana egqoke isari ebomvu ngokukhanyayo futhi ihlobe ngamagugu egolide amaningi. Uma umkhaya wakubo komfana uvuma, kuyoqalwa izingxoxo ngenjongo yomshado.
Izindinganiso Ezivamile Ezaziswayo
ENdiya izicelo zokufuna umakoti okhanyayo zivame kakhulu. Lokhu kungenxa yenkolelo ejule kakhulu yokuthi lokho okuthiwa izigaba eziphansi zomphakathi wamaHindu zinesikhumba esinsundu. Muva nje, uhlelo oluthile kuthelevishini yaseNdiya lwalandisa ngendaba yamantombazana amabili, enye inesikhumba esikhanyayo kanti enye inesinsundu. Lentombazana ekhanyayo yayinonya futhi inemikhuba emibi; intombazana ensundu yayinomusa futhi imnene. Kwenzeka ushintsho oluwumlingo, futhi lentombazana ekhanyayo yajika yaba nsundu ngenxa yesijeziso, kuyilapho intombazana ensundu yenziwa yaba ekhanyayo. Isifundo salendaba ngokusobala sasiwukuthi nakuba imfanelo yobuhle ekugcineni inqoba, isikhumba esikhanyayo siwumvuzo ofiselekayo.
Imizwa enjalo yobuhlanga ngokuvamile iba ngegxile kakhulu kunokuba umuntu angaqaphela. Ngokwesibonelo, umuntu waseAsia angase avakashele izwe laseNtshonalanga futhi akhononde ngokuthi waphathwa kabi ngenxa yebala lesikhumba sakhe noma ukudonseka kwamehlo akhe. Izenzo ezinjalo ziyamphazamisa, futhi uzizwa ebandlululwa. Kodwa lapho ephindela ezweni lakubo lendabuko, angase aphathe abantu beqembu lobuzwe elehlukile ngayo kanye lendlela efanayo. Ngisho nanamuhla ibala lesikhumba nesizinda esingokobuzwe kufeza indima eyinhloko ekulinganiseni kwabantu abaningi ukubaluleka komunye umuntu.
“Imali iyimpendulo yakho konke,” kubhala iNkosi uSolomoni yezikhathi zasendulo. (UmShumayeli 10:19) Yeka indlela lokho okuyiqiniso ngayo! Ingcebo nayo iyayithinta indlela abantu ababhekwa ngayo. Umthombo waleyongcebo awuvamile ukungatshazwa. Ingabe umuntu uye waceba ngenxa yokusebenza ngokuzikhandla noma ukuphatha izinto ngokucophelela noma ukungathembeki? Lokho akunakwa nhlobo. Ingcebo, kungakhathaliseki ukuthi itholwe kabi noma cha, iholela abantu abaningi ekufuneni ukuzuza ukwaziswa yilowo onayo.
Imfundo ephakeme nayo iye yaziswa kakhulu kulelizwe elincintisanayo. Ngokushesha nje lapho umntwana ezelwe, abazali bakhuthazwa ukuba baqale ukuqongelela izimali ezinkulu zokulungiselela imfundo. Lapho eseneminyaka emibili noma emithathu ubudala, bakhathazeka ngokumfunela isikole esifanele sokunakekela abantwana abancane njengesinyathelo sokuqala sendlela ende eqonde ekutholeni iziqu zaseyunivesithi. Abanye abantu babonakala becabanga ukuthi idiploma ehlonishwayo ihambisana negunya lokuba abanye bakwazise futhi bakuhloniphe.
Yebo, ibala lesikhumba, imfundo, imali, isizinda esingokobuzwe—lezinto ziye zaba izindinganiso abantu abaningi abahlulela ngazo omunye umuntu, noma kunalokho, abamahlulela ngazo kusengaphambili. Lezinto ziyizici ezinquma ukuthi ubani abambonisa ukwazisa futhi ubani abamgodlela khona. Kuthiwani ngawe? Ubani omazisayo? Ingabe ubheka umuntu onemali, isikhumba esikhanyayo, noma imfundo ephakeme njengokufanelekela kakhulu ukwaziswa nokuhlonishwa? Uma kunjalo, udinga ukucabangela ngokungathi sína isisekelo semizwa yakho.
Ingabe Lezi Yizindinganiso Ezinhle?
Incwadi ethi Hindu World iyaphawula: “Noma ubani wezigaba eziphansi obulala ibrāhmin [umHindu wesigaba esiphezulu] wayengahlushwa aze afe futhi aphucwe nempahla yakhe, futhi umphefumulo wakhe wawulahlwa phakade. Ibrāhmin eyayibulala noma ubani yayingase ihlawuliswe nje kuphela futhi ingajeziswa ngokufa.” Nakuba lencwadi ikhuluma ngezikhathi zasendulo, kuthiwani namuhla? Ubandlululo lohlanga nokucindezeleka komphakathi kuye kwabangela ukuba kugobhoze imifula yegazi ngisho nasekhulwini lama-20 leminyaka. Futhi lokhu akuzange kugcine eNdiya kuphela. Inzondo nobudlova okuqhutshelwa phambili ubandlululo eNingizimu Afrika, ubandlululo lohlanga eUnited States, ubandlululo lobuzwe ezindaweni eziseBaltic—uhlu luqhubeka njalo—konke kubangelwa imizwa yokuzizwa umkhulu kusukela ekuzalweni. Ngokuqinisekile, ukwazisa okunjalo omunye umuntu ukwedlula omunye ngenxa yohlanga noma ubuzwe akuzange kuveze izithelo ezinhle, ezinokuthula.
Kuthiwani ngengcebo? Ngokungangabazeki, abaningi baceba ngokusebenza ngokwethembeka, nangokuzikhandla. Nokho, ingcebo enkulu iye yaqongelelwa kusetshenziswa izigebengu ezisebenza ngokuhleliwe, abathengisi abathengisa ngokungemthetho, abashushumbisi bezidakamizwa, abathengisi bezikhali ezingemthetho, nabanye. Yiqiniso, abanye balaba bayanikela ezinhlanganweni zokusiza abampofu noma basekele izinhlelo zokusiza abampofu. Nakuba kunjalo, izenzo zabo zobugebengu ziye zaletha ukuhlupheka okungenakulinganiswa nosizi ezisulwini zabo. Ngisho nalabo abakwenza isikhathi esifushane uma kuqhathaniswa, njengalabo abafuna ukufunjathiswa noma abahlanganyela emikhubeni yezebhizinisi engemihle, baye babangela ukukhungatheka, ukulimala, nokufa lapho imikhiqizo yabo noma izinkonzo kungaphumeleli futhi kungahambi kahle. Ngempela, ukuba nengcebo khona ngokwakho akusona isisekelo sokuthola isahlulelo esihle.
Khona-ke, kuthiwani ngemfundo? Ingabe uhlu olude lweziqu zemfundo nezamabizo ezilandela igama lomuntu luqinisekisa ukuthi uthembekile futhi uqotho? Ingabe kusho ukuthi kufanele abhekwe ngendlela enokwazisa? Kuyavunywa, imfundo ingalandisa izinga lokuqonda komuntu, futhi abaningi abaye basebenzisa imfundo yabo ukuze bazuzise abanye bafanelwe ukwaziswa nokuhlonishwa. Kodwa umlando ugcwele izibonelo zokuxhashazwa nokucindezelwa koquqaba yisigaba sezifundiswa. Futhi cabangela lokho okwenzekayo emakolishi noma emayunivesithi namuhla. Izindawo zemfundo ephakeme zihlushwa yizinkinga zokusetshenziswa kabi kwezidakamizwa nezifo ezithathelwana ngobulili, futhi abafundi abaningi bangenela imfundo ukuze nje baphishekele imali, amandla, nodumo kuphela. Imfundo yomuntu iyodwa ayilona neze uphawu olunokwethenjelwa olubonisa isimo sakhe sangempela.
Cha, ibala lesikhumba, imfundo, imali, isizinda esingokobuzwe, noma ezinye izici ezinjalo azisona isisekelo esihle ongahlulela ngaso ukubaluleka komunye umuntu. AmaKristu akufanele azigcine ematasa ngalezinto ngomzamo wokuzuza ukwaziswa abanye. Khona-ke, yini umuntu okufanele akhathazeke ngayo? Yiziphi izindinganiso umuntu okufanele azisebenzise?