Imibuzo Evela Kubafundi

Ingabe eqinisweni umlobi wezAga 30:19 wayenomuzwa wokuthi indlela indoda eyenga ngayo intombi ngobuqili ‘yayimangalisa’?

Kungenzeka yilokho okushiwo yizAga 30:19, okuyivesi okungelula ukuliqonda.

Lapho sifuna ukuthola umqondo walelivesi, akufanele singawunaki umongo. Ngaphambi nje kwalendima, umlobi ophefumlelwe wabala izinto ezine ngandlela-thile ezinganeliseki. (IzAga 30:15, 16) Wabe esenikeza loluhlu: “Kukhona izinto ezintathu ezingahlula ngokumangalisa, yebo ezine engingazaziyo: indlela yokhozi emoyeni, nendlela yenyoka edwaleni, nendlela yomkhumbi phakathi kolwandle, nendlela yendoda entombini.”—IzAga 30:18, 19.

Yini okungenzeka ‘yayimangalisa’ kulezinto ezine?

Mhlawumbe ngenxa yokuba nomuzwa wokuthi ‘okumangalisayo’ kumelwe kusho okuqondile noma okuhle, ezinye izazi zachaza ukuthi ngayinye yalezizinto ezine ibonisa ukuhlakanipha kwendalo kaNkulunkulu: indlela emangalisayo inyoni endiza ngayo, indlela inyoka engenamilenze ehamba ngayo edwaleni, indlela umkhumbi osindayo ongaqhubeka ngayo untanta olwandle oluyaluzayo, nendlela insizwa enobungqabavu engathanda ngayo intombi enhle ngokungaguquki, iyishade, bese bezala umntwana omuhle. Uprofesa othile wathola okunye lezizinto ezifana ngakho, ukuthi ngayinye ihamba ngendlela entsha njalo—indlela ukhozi, inyoka, kanye nomkhumbi okuhamba ngayo lapho kungekho mkhondo olandelwayo kanye nokuba kusha kothando olukhulayo lwabantu ababili.

Nokho, lezizinto akudingekile ukuba zibe ‘ezimangalisayo’ ngomqondo wokuba kwazo ezinhle, njengokungathi lokho ezifana ngakho kungokuthile okuqondile. IzAga 6:16-19 zibala ‘izinto uJehova azizondayo.’ Njengoba kuphawuliwe, ngaphambi nje kwalelivesi okukhulunywa ngalo, izAga 30:15, 16 zibala izinto (indawo yabafileyo [iSheoli], isizalo esiyinyumba, nomhlaba ongasuthi amanzi, kanye nomlilo) ezingasho ukuthi, “kwanele!” Ngokuqinisekile akuzona izinto ezinhle ngokumangalisayo.

Igama lesiHeberu elihunyushwe ngokuthi ‘okumangalisayo’ kuzAga 30:18 lisho “ukuhlukanisa; ukwenza kuhluke, kube okungavamile, okumangalisayo.” Into ethile ingaba ehlukile, engavamile, noma emangalisayo ngaphandle kokuba ibenhle. UDaniyeli 8:23, 24 wabikezela ngenkosi elukhuni eyayiyochitha “ngokumangalisayo” futhi ‘ichithe nabanamandla’ kuhlanganise nabangcwele.—Qhathanisa noDuteronomi 17:8; 28:59; Zakariya 8:6.

Ivesi elilandela izAga 30:18, 19 lingase lisinikeze umqondo wokuthi yini umlobi ayithola kunzima ukuyiqonda. Ivesi 20 likhuluma ngowesifazane ophingayo ‘oye wadla wabe esesula umlomo wathi: Angenzanga sono.’ Mhlawumbe lapho engabonwa muntu nangobuqili uye wona, kodwa ngenxa yokuthi lokhu kona kwakhe kwakungenakulandelelwa, wayengase athi noma ashaye sengathi akanacala.

Kukhona ukufana kulezizinto ezikuloluhlu olwandulelayo. Ukhozi lundiza esibhakabhakeni, inyoni ihamba edwaleni, umkhumbi utshuza emagagasini—ayikho eshiya umkhondo, futhi kunzima ukulandelela umkhondo wanoma iyiphi yalezinto ezintathu. Uma lokhu kungokuthile lezizinto ezintathu ezifana ngakho, kuthiwani ngeyesine, “indlela yendoda entombini”?

Nayo umkhondo wayo ungase ungalandeleleki. Insizwa ingase isebenzise ubuqili, ukuthopha, kanye nezindlela zobuhlakani ukuze izuze uthando lwentombi emsulwa. Njengoba ingenakho okuhlangenwe nakho, ingase ingaziboni lezindlela zalensizwa zobuqili. Ngisho nangemva kokukhohliswa, ingase ingakwazi ukuchaza ukuthi yamnqoba kanjani; nababukele bangase bakuthole kunzima ukukuchaza. Izintombi eziningi zisalahlekelwa ubumsulwa bazo ngenxa yabakhohlisi abanobuqili. Kunzima ukuthola umkhondo wamadoda anjalo anobuqili, nokho anomgomo, njengoba kunjalo ngokhozi lapho lundiza, inyoka ehuhuluzayo, noma umkhumbi olwandle. Ngabakhohlisi, umgomo wabo uwukuxhaphaza othile ngokobulili.

Ngokwalokhu kuqonda iphuzu lezAga 30:18, 19 alibona ubuchule besayensi nobokwakheka kwezinto ezidaliwe. Kunalokho, lelivesi linikeza isixwayiso sokuziphatha, njengoba nje izAga 7:1-27 zixwayisa ngokugwema izindlela eziyingozi zesifebe esihehayo. Enye indlela odade abangamaKristu abangasilalela ngayo ngokungathi sína lesixwayiso esisencwadini yezAga 30:18, 19 ingokuqaphela abesilisa abenza sengathi banesithakazelo sokufunda iBhayibheli. Uma owesilisa othile onobungane, ngisho nosebenza naye, ebonisa isithakazelo esinjalo, udade kufanele amqondise kumzalwane othile ebandleni. Lomzalwane angahlangabezana nezimfuneko zanoma isiphi isithakazelo esiqotho ngaphandle kwezingozi “zendoda entombini.”