Ingabe Amacebo Okulondeka Kwezizwe Zonke Ayophumelela?

“IMPI Yokubhekana Ngeziqu Zamehlo, eye yaxhakathisa umhlaba iminyaka engaphezu kwengu-40, ngomusa kaNkulunkulu kubonakala sengathi iye yaphela,” kusho iOne World, umagazini weWCC (World Council of Churches [uMkhandu Wamasonto Wezwe Lonke]). “Izenzakalo ezinkulu ezenzeka eYurophu Ephakathi neseMpumalanga . . . kubonakala sengathi zibikezela okuhle ngokuthula nokulondeka eYurophu nakulo lonke izwe,” kwenezela umlobi waseSheshi uJohn Pobee, woHlelo Lwemfundo Yezenkolo lweWCC.

Abameleli beWCC ababodwa ekuhlobaniseni uNkulunkulu namacebo omuntu okulondeka kwezizwe zonke. NgoApril 1991, ngokushesha ngemva kwempi yasePersian Gulf, uPapa John Paul wathumela umyalezo kowayengunobhala-jikelele weUN uJavier Pérez de Cuéllar athi kuwo: “Ababhishobhi bamaSonto AmaKatolika eMpumalanga naseNtshonalanga Ephakathi bathembele emsebenzini weZizwe Ezihlangene . . . Bethemba ukuthi, ngeZizwe Ezihlangene kanye nezinhlangano zazo ezizisebenzisayo, labo abaye baba sesimweni sesidingo esikhulu ngenxa yempi esanda kuba khona ngeke bahluleke ukuthola ukuqashelwa kanye nobunye bezizwe zonke.”

Ngaphezu kwalokho, iVatican yayingelinye lamaZwe angu-35 asungula futhi asayina iSivumelwano SaseHelsinki ngo-1975 neSivumelwano SaseStockholm ngo-1986. Lapho iZizwe Ezihlangene zimemezela u-1986 ukuba abe “uNyaka Wokuthula Wezizwe Zonke,” upapa wasabela ngokumema abameleli bezinkolo ezinkulu emhlabeni ukuba bahlanganyele ekugubheni “uSuku Lomhlaba Wonke Lokuthandazela Ukuthula.” Ngo-October 1986, abameleli bezinkolo zobuBuddha, ubuHindu, ubuIslam, ubuShinto, iSheshi, iLuthela, ubuOrthodox bamaGreki, ubuJuda, kanye nezinye izinkolo bahlala ndawonye eAssisi, eItaly, futhi badedelana bethandazela ukuthula kwezwe.

Eminyakeni ethile kamuva, entshumayelweni ayinikeza eRoma, umBhishobhi Omkhulu waseSheshi waseCanterbury wakhumbula lesenzakalo esingenhla. Wathi: “EAssisi sabona ukuthi umBhishobhi waseRoma [upapa] uyakwazi ukuhlanganisa amaSonto obuKristu ndawonye. Sakwazi ukuthandaza ndawonye, sakhuluma sindawonye futhi senza izinto ndawonye ukuze isintu sibe nokuthula nenhlala kahle . . . Ekuqaleni kwalowomthandazo wokucela ukuthula kwezwe ngezwa sengathi ngilapho kukhona khona uNkulunkulu owathi ‘Bheka ngenza into entsha.’”

Ezinye izinkolo, nakuba zazingamelelwe eAssisi, nazo zinethemba ngamacebo omuntu okulondeka kwezizwe zonke. Isihloko esithile kuyiKerkbode, umagazini osemthethweni weSonto LaseDashi LaseNingizimu Afrika, sathi: “Sishintshela ohlelweni lwezwe elisha. Okwakubonakala kungakholeki eminyakeni embalwa edlule sikubona kwenzeka phambi kwethu. Ukubuyisana okwenzeka ezingxenyeni ezinkulu zezwe phakathi kweSoviet Union neNtshonalanga kubaluleke kakhulu ezindaweni ezithile. Engxenyeni yethu yezwe, amaqembu avame ukuphikisana kanye nezitha ezaziwayo manje bonke sebeyakhulumisana, futhi isifiso esikhulu sokuba kube nokuthula sibonakala kuyo yonke indawo . . . Ngokombono wobuKristu, yonke imizamo yokuletha ukuthula phakathi kwabantu kufanele yamukelwe. Singakuthandazela ukuthula esikhathini sethu.”

Ingabe uNkulunkulu uyawabusisa amacebo omuntu okulondeka kwezizwe zonke?

Yini Eshiwo YiBhayibheli?

Ngokuqondene nokuthembela emizamweni yabantu iBhayibheli linikeza lesixwayiso esingagunci: “Ningethembi ezikhulwini nasendodaneni yomuntu okungekho kuyo ukusiza. Umoya wakhe uyaphuma, yena abuyele emhlabathini wakhe; ngalona lolosuku amacebo akhe ayaphela.” (IHubo 146:3, 4) Intuthuko yosuku lwanamuhla ngokuqondene nokuthula ingase ibonakale ikhuthaza. Kodwa kumelwe sibhekane namaqiniso. Amandla abantu alinganiselwe. Ngokuvamile, izenzakalo ezenzekayo zingaphezu kwabo. Abavamile ukubona imisinga efihlakele, amandla angabonakali, abhuntshisa amacebo abo ahlelwe kahle.

Eminyakeni engamakhulu ayisikhombisa ngaphambi kwesikhathi sikaJesu, ezinsukwini zomprofethi uIsaya, abaholi bamaJuda babenza amacebo okulondeka ngezivumelwano zezizwe zonke namazwe angomakhelwane ngendlela efana nalokho okwenzekayo namuhla. Nangalezo zinsuku, abaholi benkolo bakusekela lokho okwakwenziwa abezombangazwe. Kodwa uIsaya waxwayisa: “Lulekanani nokululekana, kepha kuyakuchithwa; khulumani izwi, kodwa aliyikuma.” (Isaya 8:10) Icebo labo laba ukwehluleka okuyinhlekelele. Ingabe into efanayo ingenzeka nanamuhla?

Yebo, ingenzeka, ngoba ngaye lowomprofethi, uNkulunkulu wamemezela ukuthi unendlela yaKhe siqu ayokuletha ngayo ukulondeka emhlabeni. Ngeke ibe nganoma iziphi izinhlangano zabantu, kodwa iyoba ngomzukulu wenkosi yakwaIsrayeli uDavide. (Isaya 9:6, 7) Lendlalifa yeNkosi uDavide inguJesu Kristu, okwathi lapho ibuzwa uPontiyu Pilatu, yavuma ukuthi iyiNkosi kodwa yathi: “Umbuso wami awusiwo owalelizwe.” (Johane 18:36; Luka 1:32) Eqinisweni, uMbuso kaJesu wawuzoba owasezulwini. Futhi yiwona—hhayi iZizwe Ezihlangene noma nanoma isiphi isizwe sezombangazwe sasemhlabeni—owawuzoletha ukulondeka okuhlala njalo nokunokwethenjelwa kulomhlaba.—Daniyeli 2:44.

UJesu Kristu wabikezela ukuthi uMbuso wakhe wawuyoqala ukubusa emazulwini ngesikhathi okwakuyoba khona ngaso “izimpi namahemuhemu ezimpi,” futhi ‘isizwe sivukele isizwe nombuso uvukele umbuso.’ Ukugcwaliseka kwalesiprofetho kuphawula u-1914 njengesikhathi okwenzeka ngaso lokho futhi kubonisa ukuthi iminyaka eyalandela kusukela ngalesosikhathi ‘iyisiphelo sesimiso sezinto.’—Mathewu 24:3, 6-8, qhathanisa neNW.

Kusho ukuthini lokhu? Kusho ukuthi sincane isikhathi esisele saloluhlelo lwezwe olukhona, futhi sizophela ngokushesha. Ingabe lokho kuyisizathu sokukhathazeka noma sokudabuka? Ngeke kube njalo uma sikhumbula unya, ukungabikho kobulungisa, ukucindezelwa, impi, nakho konke ukuhlupheka okuye kwaba khona kulesimiso sezinto. Ngokuqinisekile kuyoba impumuzo ukuba ngaphansi kombusi iZwi likaNkulunkulu, iBhayibheli, elithi ngaye: “UMoya kaJehova uyakuhlala phezu kwakhe, umoya wokuhlakanipha nowokuqonda, umoya wamasu nowamandla, umoya wokwazi nowokumesaba uJehova.”—Isaya 11:2.

Ukulondeka Kwangempela Emhlabeni

Eqinisweni, ngeke kube khona ukulondeka kwangempela emhlabeni kuze kube yilapho, ngaphansi koMbuso kaNkulunkulu, kugcwaliseka isiprofetho sikaIsaya ngezinga lomhlaba wonke: “Ngiyadala izulu elisha nomhlaba omusha; izinto zakuqala aziyikukhunjulwa, zingene enhliziyweni.” (Isaya 65:17) Kungakhathaliseki ukuthi miningi kangakanani imithandazo abaholi benkolo abayenzela lelizwe, amacebo omuntu okulondeka kwezizwe zonke ngeke ayithathele indawo indlela kaNkulunkulu yokuletha ukuthula nokulondeka.

Ukulondeka komhlaba wonke, okuhlala njalo okulethwa uMbuso kaNkulunkulu kuyoba okukhazimulayo. Nansi incazelo eyodwa nje etholakala eBhayibhelini: “Ziyakukhanda izinkemba zazo zibe-ngamakhuba, imikhonto yazo ibe-ngocelemba; isizwe asiyikuphakamisela isizwe inkemba, zingabe zisafunda ukulwa. Bayakuhlala, kube-yilowo nalowo phansi komvini wakhe naphansi komkhiwane wakhe; akakho oyakubesabisa, ngokuba umlomo kaJehova-Sebawoti ukhulumile.”—Mika 4:3, 4.

Ukulondeka okuqinisekiswe uNkulunkulu yikhona kuphela okungaba okuhlala njalo nokunokwethenjelwa. Ngakho, esikhundleni sokuthembela kubantu abavelele, kungani ungathembeli kuye? Khona-ke uyothola ukuthi amazwi omhubi ayiqiniso: “Ubusisiwe yena omsizi wakhe unguNkulunkulu kaJakobe, othemba lakhe likuJehova uNkulunkulu wakhe owenzile izulu nomhlaba, nolwandle nakho konke okuphakathi kwakho, ogcina iqiniso kuze kube-phakade.”—IHubo 146:5, 6.

[Ibhokisi ekhasini 7]

ISonto LamaKatolika Nezombangazwe Zezizwe Zonke

“Nakuba uKristu athi umbuso wakhe ‘awusiwo owalelizwe,’ abefundisi abasezikhundleni eziphakeme nopapa njengenhlangano baye bangena shí ezimpini zezombangazwe zezizwe zonke nezezizwe ezithile kusukela ngesikhathi sikaConstantine.”—The Catholic Church in World Politics, kaProfesa Eric Hanson waseYunivesithi YamaJesuit iSanta Clara.