Yesaba UJehova Futhi Ukhazimulise Igama Lakhe Elingcwele
“Ngubani ongayikwesaba, Nkosi, adumise igama lakho, na? Ngokuba wena wedwa ungcwele.”—ISAMBULO 15:4.
1, 2. (a) UJehova uye wawavula kanjani amafasitela asezulwini phakathi no-1991? (b) Ikuphi okuhlangenwe nakho ekuphileni okwashukumisela esinye isithunywa sevangeli esithembekile ukuba sinikeze lesiseluleko: “Yesaba UJehova”? (Bheka futhi iYearbook ka-1991, amakhasi 187-9.)
UJEHOVA ‘uvule amafasitele asezulwini, wathulula isibusiso kunokwaneleyo.’ Lawomazwi angasetshenziswa ngokuphindaphindiwe koFakazi BakaJehova ezikhathini zamuva. (Malaki 3:10) Ngokwesibonelo, phakathi nonyaka wenkonzo ka-1991, intshiseko yoFakazi ababevakashile nezihambeli zomhlangano zendawo yayichichima ebudlelwaneni bobuKristu emihlanganweni ekhethekile eyayikuwo wonke umhlaba—kusukela eMihlanganweni ‘Yolimi Oluhlanzekile’ eBuenos Aires eNingizimu Melika; naseManila, eTaipei, naseBangkok eMpumalanga; kuya eMihlanganweni ‘Yabathandi Benkululeko’ eBudapest, ePrague, naseZagreb (August 16-18, 1991) eMpumalanga Yurophu.
2 Yeka injabulo okwakuyiyo ngezihambeli zomhlangano ezivela phesheya kwezilwandle ukuba zihlangane noFakazi abathembekile abangomakadebona kulezozindawo! Ngokwesibonelo, eBangkok, uFrank Dewar—ngesinye isikhathi owake waba ukuphela kommemezeli woMbuso eThailand—walandisa ngeminyaka yakhe engu-58 yenkonzo yezithunywa zevangeli. Umsebenzi wakhe wawusukela eziqhingini zasePacific kuya eNingizimu-mpumalanga Asia, kuze kufike ngisho naseChina. Wayebhekene nezingozi zokwephukelwa umkhumbi, izilwane zasendle emahlathini, izifo zasezindaweni ezishisayo, kanye nokubusa okunonya kwabaholi bezempi bamaJapane. Lapho ebuzwa ukuthi yisiphi iseluleko ayengasinikeza abeze emhlanganweni, wanikeza impendulo elula: “Yesaba uJehova!”
3. Kungani kufanele sibonise ukwesaba uNkulunkulu?
3 “Yesaba uJehova!” Yeka ukuthi kubaluleke kangakanani ngathi sonke ukuba sihlakulele lokho kwesaba okunempilo! “Ukumesaba uJehova kungukuqala kokuhlakanipha.” (IHubo 111:10) Lokhu kwesaba akukhona ukumesaba okungenangqondo uJehova. Kunalokho, kuyinhlonipho ejulile ngobukhulu bakhe obesabekayo nezimfanelo zakhe zobuNkulunkulu, okusekelwe ekuqondeni esikuthola ngokutadisha iZwi likaNkulunkulu. KusAmbulo 15:3, 4, ingoma kaMose neyeWundlu ithi: “Mikhulu, iyamangalisa imisebenzi yakho, Nkosi Nkulunkulu, Mninimandla onke; zilungile, ziqinisile izindlela zakho wena-Nkosi yezizwe; ngubani ongayikwesaba, Nkosi, adumise igama lakho, na? Ngokuba wena wedwa ungcwele [“uqotho,” NW].” Ebonisa ubuqotho bakhe kubakhulekeli bakhe, uJehova ‘kulotshwe phambi kwakhe incwadi yokukhumbula ababemesaba uJehova, bezindla ngegama lakhe.’ Bavuzwa ngokuphila okuphakade.—Malaki 3:16; IsAmbulo 20:12, 15.
Ukwesaba UNkulunkulu Kuyanqoba
4. Yikuphi ukukhululwa kwasendulo okufanele kusikhuthaze ukuba sesabe uJehova?
4 Lapho uIsrayeli ephuma eGibithe likaFaro, uMose wabonisa ngokukhanyayo ukuthi wayesaba uJehova kuphela. Ngokushesha, amaIsrayeli ayesevaleleke phakathi koLwandle Olubomvu nezinqola zempi ezinamandla zaseGibithe. Yini ayengayenza? “UMose wathi kubantu: Ningesabi; qinani, nibone ukusindisa kukaJehova azakunenzela khona namuhla, ngokuba abaseGibithe enibabonile namuhla anisayikubuye nibabone naphakade. UJehova uzakunilwela, nothula nina.” Ngokuyisimangaliso, uJehova wahlukanisa amanzi. AmaIsrayeli ahamba emhlabathini owomileyo. Khona-ke amanzi aphinde abuya. Impi kaFaro yaqothulwa. UJehova wasisindisa lesosizwe esesaba uNkulunkulu, kuyilapho ngesikhathi esifanayo ekhipha isahlulelo eGibithe elingamhloniphi uNkulunkulu. Ngokufanayo namuhla, uzobonisa ubuqotho bakhe ngokukhulula oFakazi bakhe abesaba uNkulunkulu ezweni likaSathane.—Eksodusi 14:13, 14; Roma 15:4.
5, 6. Yiziphi izenzakalo zangesikhathi sikaJoshuwa ezibonisa ukuthi kufanele sesabe uJehova kunomuntu?
5 Ngemva koFuduko eGibithe, uMose wathumela izinhloli ezingu-12 eZweni Lesithembiso. Eziyishumi zesatshiswa ukubona izakhamuzi zakhona eziyimidondoshiya futhi zazama ukuvimba uIsrayeli ekungeneni ezweni. Kodwa ezinye ezimbili, uJoshuwa noKalebi, zabika: “Yizwe elihle kakhulu. Uma uJehova esithanda, uyakusingenisa kulelozwe, asinike lona, izwe elivamé ubisi nezinyosi. Kodwa ningahlubuki kuJehova, futhi ningesabi abantu balelozwe; ngokuba bayisinkwa kithi; umthunzi wabo usukile phezu kwabo, kodwa uJehova unathi; ningabesabi.”—Numeri 14:7-9.
6 Nokho, lawomaIsrayeli avumela ukwesaba abantu. Ngenxa yalokho, awazange afike ezweni lesithembiso. Kodwa uJoshuwa noKalebi, kuhlanganise nesizukulwane esisha samaIsrayeli, baba nelungelo lokungena kulelozwe elihle kakhulu futhi balime izivini zalo nemithi yeminqumo. Enkulumweni yakhe yokuvalelisa kubantu bakwaIsrayeli ababebuthene, uJoshuwa wanikeza leseluleko: “Yesabani uJehova, nimkhonze ngobuqotho nangeqiniso.” Futhi uJoshuwa wanezela: “Mina nendlu yami siyakumkhonza uJehova.” (Joshuwa 24:14, 15) Yeka amazwi akhuthazayo ezinhlokweni zemikhaya nakubo bonke abanye ukuba besabe uJehova njengoba silungiselela ukuwelela ezweni elisha likaNkulunkulu lokulunga!
7. UDavide wakugcizelela kanjani ukubaluleka kokwesaba uNkulunkulu?
7 Umfana ongumalusi uDavide naye wabonisa ukwesaba uJehova okuyisibonelo lapho ebekela uGoliyati inselele egameni likaNkulunkulu. (1 Samuweli 17:45, 47) Okhukhweni lwakhe lokufa, uDavide wayengathi: “UMoya kaJehova wakhuluma ngami; izwi lakhe lalisolimini lwami. UNkulunkulu kaIsrayeli wathi, iDwala likaIsrayeli lakhuluma kimi ukuthi: Obusa abantu ngokulunga, abuse ngokumesaba uNkulunkulu, unjengokukhanya kwasekuseni ekuphumeni kwelanga, isasa elingenamafu.” (2 Samuweli 23:2-4) Lokhu kwesaba uNkulunkulu akukho ngokuphawulekayo kubabusi balelizwe, futhi yeka indlela umphumela wakho odabukisa ngayo! Yeka indlela okuyokwehluka ngayo lapho uJesu, ‘iNdodana kaDavide,’ ebusa umhlaba ngokwesaba uJehova!—Mathewu 21:9.
Ukwenza Ngendlela Yokwesaba UJehova
8. Kungani uJuda achuma ngaphansi kukaJehoshafati, okubonisani namuhla?
8 Cishe eminyakeni eyikhulu ngemva kokufa kukaDavide, uJehoshafati waba inkosi kwaJuda. Naye futhi waba yinkosi eyakhonza ngokumesaba uJehova. Wabuyisela uhlelo olungokwasezulwini kwaJuda, wamisa abahluleli kulo lonke izwe, futhi wabanika leziyalezo: “Anahluleleli umuntu kepha uNkulunkulu, onani ekwahluleleni. Ngalokho ingebhe ngoJehova mayibe-phezu kwenu; qaphelani nikwenze, ngokuba ukungalungi akukho kuJehova uNkulunkulu wethu, nokukhetha ubuso, nokwamukela umvuzo. . . . Niyakwenze njalo ngokumesaba uJehova, ngeqiniso nangenhliziyo epheleleyo.” (2 IziKronike 19:6-9) Ngaleyondlela, uJuda wachuma ekumesabeni uJehova, njengoba nabantu bakaNkulunkulu bezuza ngenkonzo yababonisi abanozwela namuhla.
9, 10. UJehoshafati wanqoba kanjani ngokwesaba uJehova?
9 Nokho, uJuda wayenezitha. Lezizitha zazihlose ukusiqothula isizwe sikaNkulunkulu. Amabutho ahlangene akwa-Amoni, akwaMowabi, nawaseNtabeni yaseSeyiri atheleka ezweni lakwaJuda futhi asongela iJerusalema. Kwakuyibutho elinamandla. UJehoshafati waphendukela kuJehova ngomthandazo “wonke uJuda [emi] phambi kukaJehova, nezingane zabo, nawomkabo, namadodana abo.” Khona-ke, ekuphendulweni kwalowomthandazo, umoya kaJehova wafika phezu kukaJahaziyeli ongumLevi, owathi: “Usho kanje kini uJehova, uthi: Ningesabi, ningapheli amandla ngenxa yalesisixuku esikhulu, ngokuba impi ayisiyo eyenu, ngekaNkulunkulu. Yehlelani kubo kusasa; . . . Akusikho okwenu ukulwa kulempi; zihleleni, nime, nibone ukunisindisa kukaJehova, nina-Juda neJerusalema; ningesabi, ningapheli amandla; phumelani kubo kusasa, ngokuba uJehova unani.”—2 IziKronike 20:5-17.
10 Ngakusasa ekuseni, amadoda akwaJuda asheshe avuka. Njengoba ngokulalela ayephuma ukuyohlangabezana nesitha, uJehoshafati wasukuma wathi: “Ngizweni, Juda nani-bakhileyo eJerusalema! Kholwani nguJehova uNkulunkulu wenu, niyakuqiniswa; kholwani ngabaprofethi bakhe, niyakuphumelela.” Behamba ngaphambi kwamadoda ahlomile, abahlabelelela uJehova bahlabelela ihubo: “Bongani uJehova, ngokuba umusa wakhe umi phakade.” UJehova wabonisa lowomusa wothando ngokubangela isiphithiphithi emabuthweni esitha kangangokuba aqedana wodwa. Njengoba amadoda akwaJuda efika enqabeni yokulinda esehlane, okwakusele kwakuyizidumbu zezitha kuphela.—2 IziKronike 20:20-24.
11. Ngokuqondene nokwesaba, izizwe zehluke kanjani kubantu bakaNkulunkulu?
11 Lapho izizwe ezingomakhelwane zizwa ngalokhu kukhululwa okuyisimangaliso, zehlelwa “ingebhe ngoNkulunkulu.” Ngakolunye uhlangothi, isizwe esalalela ngokumesaba uJehova manje saba ‘nokuphumula nxazonke.’ (2 IziKronike 20:29, 30) Ngokufanayo, lapho uJehova ekhipha isahlulelo eArmagedoni, izizwe ziyoba nengebhe ngoNkulunkulu nangeNdodana yakhe enguMahluleli, uJesu Kristu, futhi ngeke zikwazi ukuma ngosuku olukhulu lolaka lwaphezulu.—IsAmbulo 6:15-17.
12. Ukwesaba uJehova kuye kwavuzwa kanjani ezikhathini zangaphambili?
12 Ukwesaba uJehova okunempilo kuletha imivuzo ecebile. UNowa “esaba uNkulunkulu, wakha umkhumbi wokusindisa indlu yakhe.” (Heberu 11:7) Futhi ngokuphathelene namaKristu ekhulu lokuqala leminyaka, kulotshwe ukuthi, ngemva kwenkathi yoshushiso, ibandla ‘laba nokuthula, lakheka, lihamba ekwesabeni iNkosi, landa ngenduduzo kaMoya oNgcwele’—ngendlela efanayo elenza ngayo eMpumalanga Yurophu namuhla.—IzEnzo 9:31.
Thanda Okuhle, Zonda Okubi
13. Singasithola ngayiphi indlela kuphela isibusiso sikaJehova?
13 UJehova muhle ngokuphelele. Ngakho, “ukumesaba uJehova kungukuzonda okubi.” (IzAga 8:13) Kulotshiwe ngoJesu: “Uthandile ukulunga, wazonda ububi; ngalokho-ke uNkulunkulu, uNkulunkulu wakho, ukugcobile ngamafutha enjabulo.” (Heberu 1:9) Uma nathi, njengoJesu, sifuna ukuthola isibusiso sikaJehova, kumelwe senyanye ububi, ukuziphatha okubi, ubudlova, nokuhaha kwezwe likaSathane eliqhoshayo. (Qhathanisa nezAga 6:16-19.) Kumelwe sithande lokho uJehova akuthandayo futhi sizonde lokho akuzondayo. Kumelwe sesabe ukwenza noma yini engadumaza uJehova. “Ngokumesaba uJehova kudedwa ebubini.”—IzAga 16:6.
14. UJesu usibekela kanjani isibonelo?
14 UJesu wasishiyela isibonelo sokuba silandele ezinyathelweni zakhe ngokuseduze. “Owathi ethukwa, akaphindisanga athuke; ehlushwa akasongelanga kepha wakunikela kuye owahlulela ngokulunga.” (1 Petru 2:21-23) Ekwesabeni uJehova, nathi singakhuthazelela izihlamba, ukuhlekwa usulu, ukushushiswa, izwe likaSathane elikunqwabelanisa phezu kwethu.
15. Kungani kufanele sesabe uJehova kunalabo abangabulala umzimba?
15 KuMathewu 10:28, uJesu uyasiyala: “Ningabesabi ababulala umzimba bengenamandla okubulala umphefumulo, kepha kakhulu mesabeni onamandla okubhubhisa nomphefumulo nomzimba [eGehena, NW].” Ngisho noma umuntu owesaba uJehova engase abulawe yisitha, iminjunju yokufa imane nje ingeyesikhashana. (Hoseya 13:14) Lapho evuswa, lowomuntu uyokwazi ukuthi: “Kufa, kuphi ukunqoba kwakho na? Kufa, luphi udosi lwakho na?”—1 Korinte 15:55.
16. UJesu wakubonisa kanjani ukwesaba uJehova nokumkhazimulisa?
16 UJesu ngokwakhe unikeza isibonelo esihle kakhulu kubo bonke abathanda ukulunga kukaJehova futhi abazonda okubi. Ukwesaba kwakhe uJehova kubonakala emazwini akhe okugcina kubafundi bakhe, njengoba etholakala kuJohane 16:33: “Lokho ngikukhulumé kini ukuba nibe nokuthula kimi. Ezweni niyakuba lusizi, kepha yimani isibindi, mina ngilinqobile izwe.” Ukulandisa kukaJohane kuyaqhubeka: “UJesu wakhuluma lokho; wayesephakamisela amehlo akhe ezulwini, wathi: Baba, isikhathi sifikile; khazimulisa iNdodana yakho, ukuze iNdodana ikukhazimulise wena . . . Ngibonakalisile igama lakho kubantu ongiphé bona kwabasezweni.”—Johane 17:1-6.
Yesaba UJehova Futhi Umdumise
17. Singasilingisa ngaziphi izindlela isibonelo sikaJesu?
17 Ingabe thina namuhla singasilingisa isibonelo sikaJesu sesibindi? Ngokuqinisekile singasilingisa ngenxa yokwesaba uJehova! UJesu uye wasazisa igama likaJehova elikhulu nezimfanelo. Ngokwesaba uJehova njengeNkosi yethu eBusayo, simphakamisa ngaphezu kwabo bonke abanye onkulunkulu, kuhlanganise noZiqu-zintathu weLobukholwa ongenagama futhi oyindida. UJesu wakhonza uJehova ngokwesaba okunempilo, enqaba ukubanjwa ogibeni lokwesaba abantu abafayo. ‘Wanikela emihleni yenyama yakhe ngemikhuleko, nokunxusa, nokudazuluka okukhulu, nezinyembezi kuyena onamandla okumsindisa ekufeni, wezwiwa ngenxa yokumesaba uNkulunkulu.’ NjengoJesu, kwangathi nathi singamesaba uJehova njengoba siqhubeka sifunda ukulalela ezintweni ezisihluphayo—ngaso sonke isikhathi sinokuphila okuphakade njengomgomo wethu.—Heberu 5:7-9.
18. Singayinikela kanjani inkonzo engcwele kuNkulunkulu ngokwesaba?
18 Kamuva kuleyoncwadi eya kumaKristu angamaHeberu, uPawulu unxusa amaKristu agcotshiwe: “Ngakho-ke lokhu samukeliswa umbuso ongenakunyakaziswa, masibonge ngesingamkhonza ngakho uNkulunkulu ngokumthokozisa, nangokumhlonipha, nangokuthuthumela.” Namuhla, “isixuku esikhulu” siyahlanganyela kuleyonkonzo engcwele. Futhi yona ihlanganisani? Ngemva kokukhuluma ngomusa ongasifanele kaJehova ngokulungiselela umhlatshelo weNdodana yaKhe, uJesu Kristu, uPawulu uthi: “Masinikele njalonjalo kuNkulunkulu ngaye umhlatshelo wokubonga, okungukuthi isithelo sezindebe ezivuma igama lakhe.” (Heberu 12:28; 13:12, 15) Ngenxa yokwazisa ngomusa kaJehova ongasifanele, kufanele sifune ukunikela ihora ngalinye esingalinikela enkonzweni yakhe engcwele. Njengabangane abathembekile bamaKristu agcotshiwe asasele, isixuku esikhulu namuhla sifeza ingxenye enkulu kakhulu yaleyonkonzo. Lesixuku sithi insindiso ngekaNkulunkulu noKristu, njengoba simi ngokomfanekiso phambi kwesihlalo sobukhosi sikaNkulunkulu, ‘simkhonza imini nobusuku.’—IsAmbulo 7:9, 10, 15.
Khazimulisa UJehova Kuze Kube Phakade
19, 20. Yiziphi izinhlobo ezimbili zokwesaba eziyobonakala ‘ngosuku lukaJehova’?
19 Usuku olukhazimulayo lokulwelwa kukaJehova lusondela ngokushesha! “Bheka, luyeza usuku, luvutha njengeziko; bonke abaziqhenyayo nabo bonke abenza okubi bayakuba-ngamabibi; luyakubashisa lolosuku oluzayo, usho uJehova-Sebawoti.” Lesosikhathi senhlekelele ‘siwusuku lukaJehova olukhulu nolwesabekayo.’ (Malaki 4:1, 5) Siyobangela “uvalo” ezinhliziyweni zababi, futhi “abasoze baphunyuka.”—Jeremiya 8:15; 1 Thesalonika 5:3.
20 Nokho, abantu bakaJehova bashukunyiswa uhlobo olwehlukile lokwesaba. Ingelosi ephathiswe ‘ivangeli eliphakade’ iye yabamemeza ngezwi elikhulu, ithi: “Mesabeni uNkulunkulu, nimnike inkazimulo, ngokuba ihora lokwahlulela kwakhe selifikile.” (IsAmbulo 14:6, 7) Siyobe simi sithuthumela ngenxa yalesosahlulelo lapho ukushisa okuhangulayo kweHarmagedoni kulothisa izwe likaSathane. Ukumesaba okunempilo uJehova kuyolobeka ngokungacimekiyo ezinhliziyweni zethu. Kwangathi ngalesosikhathi singafumana umusa ngokuzithola siphakathi ‘kwabasindisiwe abaye babiza egameni likaJehova’!—Joweli 2:31, 32; Roma 10:13.
21. Ukwesaba uJehova kuyoholela kuziphi izibusiso?
21 Kuyolandela izibusiso ezimangalisayo, kuhlanganise “neminyaka yokuphila” eyoqhubeka kuze kube phakade! (IzAga 9:11; IHubo 37:9-11, 29) Ngakho-ke, kungakhathaliseki ukuthi ithemba lethu liwukudla ifa loMbuso noma ukukhonza endaweni yawo yasemhlabeni, masiqhubeke manje sinikela inkonzo engcwele kuNkulunkulu ngokumesaba nangokuthuthumela. Masiqhubeke sikhazimulisa igama lakhe elingcwele. Futhi kuyoba namuphi umphumela obusisekile? Ukubonga phakade ngokuthi sasithatha ngokungathi siná iseluleko esihlakaniphile sokwesaba uJehova ngaso sonke isikhathi!
Ubungaphendula Kanjani?
◻ Yini eshiwo “ukumesaba uJehova”?
◻ Ukwesaba uNkulunkulu kwabazuzisa kanjani abantu bakhe basendulo?
◻ Isiphi isibonelo sokwesaba uNkulunkulu uJesu asishiyela sona?
◻ Singabugcina kanjani ubuqotho ngokwesaba uJehova?
[Isithombe ekhasini 18]
Encwadini yesAmbulo, abafowabo bakaJesu babonakala behlabelela “ingoma kaMose,” ingoma edumisa uJehova
[Isithombe ekhasini 20]
Impi kaJehoshafati iyanqoba ngokwesaba uJehova
[Isithombe ekhasini 23]
Iminyaka yokuphila eyoqhubeka kuze kube phakade iyoba umvuzo walabo abesaba uJehova