Ukuxhumana Enkonzweni YobuKristu

“Ngalokho hambani nenze izizwe zonke abafundi.”—MATHEWU 28:19.

1. Ikuphi ukuthunywa okwanikezwa uKristu okubonisa isidingo sokuxhumana nabantu?

UMYALO kaJesu, ocashunwe ngenhla, usibekela inselele yokuxhumana nabantu enkonzweni yethu njengoba sihamba endlini ngendlu, senza izimpindelo, futhi sihlanganyela kuzo zonke ezinye izici zokushumayela ngoMbuso. Okuhlanganiswe kulowomyalo umthwalo wemfanelo wokwazisa abantu iqiniso eliphathelene noJehova uNkulunkulu, uJesu Kristu, noMbuso wobuMesiya lowo uJesu abusa kuwo manje.—Mathewu 25:31-33.

2. Ukuze sixhumane nabantu ngokuphumelelayo, yini esiyidingayo?

² Singaxhumana kanjani nabantu ngokuphumelelayo? Okokuqala, kumelwe sikholelwe ekwazisweni esixhumana ngakho nabo. Ngamanye amazwi, kumelwe sikholelwe ngokuqinile ukuthi uJehova unguNkulunkulu oyedwa weqiniso, ukuthi iBhayibheli ngempela liyiZwi likaNkulunkulu, nokuthi uMbuso kaNkulunkulu uwukuphela kwethemba lesintu. Ngaleyondlela, lokho esikufundisayo kuyosuka enhliziyweni, futhi siyobe silalela iseluleko sikaPawulu kuThimothewu: “Khuthalela ukuba uziveze uthembekile kuNkulunkulu, isisebenzi esingenamahloni, esiqondisa kahle izwi leqiniso.”—2 Thimothewu 2:15.

Ukuxhumana Ngaphandle Kwamazwi

3-5. (a) Singaxhumana kanjani nabantu ngaphandle kwezwi? (b) Yikuphi okuhlangenwe nakho okukufakazelayo lokhu?

³ Ukuxhumana ngokuvamile kuhilela amazwi. Kodwa eqinisweni, siyaxhumana nabantu ngisho nangaphambi kokuba sikhulume nabo. Kanjani? Ngokuziphatha kwethu nangendlela esigqoka futhi sizilungise ngayo. Eminyakeni ethile edlule isithunywa sevangeli esasithweswe iziqu eWatchtower Bible School of Gilead sasihamba ngomkhumbi siya esabelweni saso sakwelinye izwe. Ngemva kwezinsukwana besolwandle, umuntu esingamazi wasibuza ukuthi kungani sasehluke kangaka kubo bonke ababesemkhunjini. Lesithunywa sevangeli sasidlulisela okuthile okuphawulekayo—ukuthi sasinezindinganiso ezihlukile futhi singeneka—ngokubukeka kwaso kuphela nendlela esasiziphethe ngayo. Lokhu kwanikeza lesithunywa sevangeli ithuba elihle lokufakaza.

⁴ Khona-ke futhi, omunye udade owayeme emgwaqweni ehambisela abedlulayo izincwadi zeBhayibheli wamomothekela ngobungane owesifazane owadlula ngakuye. Lona owesifazane waqala ukwehla ngezitebhisi eya esiteshini sesitimela esihamba ngaphansi. Khona-ke washintsha umqondo wakhe, waphindela emuva kudade, futhi wacela isifundo seBhayibheli sasekhaya. Yini eyayimhlabe umxhwele? Nakuba ayengazange ahanjiselwe incwadi yeBhayibheli, wayethole ukumomotheka kobungane kuFakazi owayenza umsebenzi wasemgwaqweni.

⁵ Isibonelo sesithathu: Iqembu loFakazi abasebasha babedla esitolo okudlelwa kuso, futhi lamangala lapho umuntu elingamazi efika etafuleni futhi ekhokhela ukudla kwalo. Wayekwenzelani lokho? Wayehlabeke umxhwele ngendlela elaliziphethe ngayo. Ngaphandle kokusho utho kulomuntu angamazi, lamaKristu asemasha ayexhumane nabantu ngokuthi wona ayengabantu abesaba uNkulunkulu. Ngokusobala, ngokuziphatha kwethu, ukubukeka, nobungane, sixhumana nabantu ngisho nangaphambi kokuba sikhulume.—Qhathanisa neyoku-1 Petru 3:1, 2.

Ukubonisana Kubalulekile Ekuxhumaneni Nabantu

6. Bonisa indlela ukubonisana okubaluleke ngayo ekuxhumaneni nabanye.

⁶ Ukuze sixhumane nabantu ngamazwi ngezindaba ezinhle, kumelwe sizimisele ukungakhulumi ngobushiqela, kodwa sibonisane nabo. Ngokuphindaphindiwe sifunda ukuthi uPawulu wabonisana nalabo ayezama ukudlulisela kubo izindaba ezinhle. (IzEnzo 17:2, 17; 18:19) Singasilandela kanjani isibonelo sakhe? Nokho, izimo zezwe eziya ziba zimbi kungenzeka ziye zabangela abathile ukuba bakungabaze ukuba khona kukaNkulunkulu onamandla onke nonothando onendaba ngesintu. Nokho, singabonisana nabo ngokuthi uNkulunkulu unesikhathi sazo zonke izinto. (UmShumayeli 3:1-8) Ngaleyondlela, eyabaseGalathiya 4:4 ithi lapho kufika isikhathi sikaNkulunkulu esifanele, wathumela iNdodana yakhe emhlabeni. Lokhu kwakungemva kwezinkulungwane zeminyaka athembisa ngokokuqala ngqá ukwenza kanjalo. Ngokufanayo, lapho isikhathi sakhe esifanele sifika, uyoqeda ububi. Ngaphezu kwalokho, iZwi likaNkulunkulu libonisa ukuthi uNkulunkulu unezizathu eziphoqayo zokuvumela ukuhlupheka nobubi ukuba buqhubeke isikhathi eside kangaka. (Qhathanisa noEksodusi 9:16.) Ukubonisana ngokuvumelana nalamaphuzu, nokusekela lokho kubonisana ngemifanekiso nangobufakazi obunamandla obungokomBhalo, kuyosiza abantu abaqotho ukuba baqaphele ukuthi ukwanda kobubi akunakusetshenziswa njengesaba sokuthi uJehova akekho noma akanandaba.—Roma 9:14-18.

7, 8. Ukubonisana kusisiza kanjani ukuba sixhumane nomJuda Osadla Ngoludala?

⁷ Ake sithi lapho uhamba endlini ngendlu, umnini-khaya uthi kuwe: “NgingumJuda. Anginasithakazelo.” Ungaqhubeka kanjani? Omunye umzalwane ubika ukuthi waphumelela ngokusebenzisa lendlela: ‘Ngiyaqiniseka ukuthi uzovumelana nami ukuthi uMose wayengumprofethi omkhulu kunabo bonke owake wasetshenziswa uNkulunkulu. Futhi ingabe uyazi ukuthi washo amazwi alotshwe kuDuteronomi 31:29: “Ngiyazi ukuthi emva kokufa kwami . . . [niyakuphambuka] endleleni enginiyalé ngayo, ububi bunehlele”? UMose wayengumprofethi weqiniso, ngakho amazwi akhe kwakumelwe agcwaliseke. Ingabe kungenzeka ukuthi agcwaliseka lapho uNkulunkulu ethumela uMesiya kumaJuda futhi yingakho amaJuda engamamukelanga? Kungenzeka ukuthi kwakunjalo. Manje uma lokhu kunjalo futhi enza iphutha, ingabe lokho kuyisizathu sokuba mina nawe senze iphutha elifanayo?’

⁸ Futhi khumbula ukuthi amaJuda aye ahlushwa kakhulu eLobukholwa, ikakhulukazi phakathi nalelikhulu leminyaka. Ngakho ungase ufise ukutshela umnini-khaya ukuthi thina asizange sihlanganyele kulokho. Ngokwesibonelo, ungase ufise ukuthi: ‘Ubuwazi yini ukuthi lapho kubusa uHitler, oFakazi BakaJehova bamelana nokwenqaba kwakhe amaJuda? Futhi benqaba ukuthi “Heil Hitler” nokukhonza ebuthweni lakhe.’a

9, 10. Ukubonisana kungasetshenziswa kanjani ukuze kusizwe umuntu okholelwa esihogweni somlilo?

⁹ Lapho uzama ukuxhumana nomuntu okholelwa esihogweni somlilo, ungase ubonisane naye ngokuthi ukuze umuntu ahlushwe phakade esihogweni, kumelwe abe nomphefumulo ongafi. Lowo okholelwa esihogweni somlilo uyovuma kalula. Khona-ke ungaphawula ukulandisa kokudalwa kuka-Adamu noEva bese umbuza ngomusa ukuthi wake wezwa yini kukhulunywa ngomphefumulo onjalo ongafi kulokho kulandisa. Njengoba uqhubeka nokubonisana kwakho, ungase udonsele ukunakekela kwakhe kuGenesise 2:7, lapho iBhayibheli lisitshela khona ngokuthi uAdamu waba umphefumulo. Futhi phawula ukuthi uNkulunkulu wathi wawuyoba yini umphumela wokona kuka-Adamu: “Ngesithukuthuku sobuso bakho uyakudla isinkwa sakho, uze ubuyele emhlabathini, lokhu wathathwa kuwo; ngokuba ungumhlabathi, uyakuphenduka umhlabathi.” (Genesise 3:19) Ngakho, uAdamu ongumphefumulo wabuyela othulini.

¹⁰ Ungadonsela futhi ukunakekela eqinisweni lokuthi akukho-ndawo ekulandiseni kukaGenesise lapho uNkulunkulu ekhuluma khona ngokuhlushwa phakade esihogweni somlilo. Lapho uNkulunkulu exwayisa uAdamu ukuba angadli isithelo esenqatshelwe, wathi: “Mhla udla kuwo uyakufa nokufa.” (Genesise 2:17) Akukhulunywa lutho ngesihogo somlilo! Uma umphumela wangempela wesono sika-Adamu wawungeke ube ukufa, ‘ukubuyela emhlabathini,’ kodwa ukuhlupheka kwaphakade, ingabe ebulungiseni bakhe bonke uNkulunkulu wayengeke akusho lokhu ngokusobala? Ngakho, ukubonisana ngokucophelela nangomusa kungamsiza umuntu oqotho ukuba abone ukungavumelani kwenkolelo yakhe. Kwangathi singelokothe singakunaki ukubaluleka kokushukumisa ukucabanga njengoba sihlanganyela iqiniso leZwi likaNkulunkulu nabanye.—Qhathanisa neyesi-2 Thimothewu 2:24-26; 1 Johane 4:8, 16.

Izimfanelo Ezidingekile Ekuxhumaneni Nabantu Ngokuphumelelayo

11-13. Iziphi izimfanelo zobuKristu ezingasisiza ukuba sixhumane nabantu ngokuphumelelayo?

¹¹ Manje, yiziphi izimfanelo okumelwe sizihlakulele ukuze sixhumane nabantu ngamaqiniso oMbuso ngokuphumelela kakhulu? Nokho, isibonelo sikaJesu sisitshelani? KuMathewu 11:28-30, sifunda amazwi akhe: “Zanini kimi nina nonke enikhatheleyo nenisindwayo, mina ngizakuniphumuza. Bekani ijoka lami phezu kwenu, nifunde kimi, ngokuba ngimnene, ngithobile ngenhliziyo; khona imiphefumulo yenu iyakufumana impumuzo. Ngokuba ijoka lami lihle, nomthwalo wami ulula.” Lapha sibona esinye sezihluthulelo zokuphumelela kukaJesu ekuxhumaneni nabantu. Wayemnene futhi ethobile ngenhliziyo. Abantu abanezinhliziyo ezinhle bamthola enempumuzo. Umphostoli uPawulu naye wabeka isibonelo esihle, ngoba, njengoba atshela abadala base-Efesu, kusukela ngosuku lokuqala afika ngalo kubo, wayekhandlekela iNkosi “ngakho konke ukuthobeka.”—IzEnzo 20:19.

¹² Ngokubonisa kwethu njalo isizotha nokuthobeka, abanye bayothola ukuthi nathi sinempumuzo, futhi kuyoba lula ngathi ukuba sixhumane nabo. Noma isiphi esinye isimo sengqondo cishe siyobeka umgoqo phakathi kwethu nalabo esizama ukuxhumana nabo. Ngempela, “kwabathobekileyo kukhona ukuhlakanipha.”—IzAga 11:2.

¹³ Ukuze sinikeze ukwaziswa ngokuphumelelayo, sidinga futhi ukubekezela nobuhlakani. Umphostoli uPawulu ngokuqinisekile wayenobuhlakani lapho efakaza ezazini zefilosofi ezazibuthene phambi kwakhe eMars’ Hill. Wethula izindaba ezinhle ngendlela ezazingayiqonda. (IzEnzo 17:18, 22-31) Uma sifisa ukuxhumana ngokuphumelelayo nezilaleli zethu, kumelwe silalele iseluleko umphostoli uPawulu asinikeza abaseKolose lapho ethi: “Ingxoxo yenu ngaso sonke isikhathi mayibe nomusa, futhi ingalokothi ibe duma; hlolani ukuthi ningakhuluma kanjani kangcono kakhulu nomuntu ngamunye enihlangana naye.” (Kolose 4:6, The New English Bible) Inkulumo yethu ngaso sonke isikhathi kufanele inambitheke. Inkulumo enjalo iyothambekela ekuvuleni izingqondo zezilaleli zethu, kuyilapho amazwi angenakho ukuhlakanipha eyozibangela ukuba zivale izingqondo zazo.

14. Indlela ekhululekile, yengxoxo ingasisiza kanjani ukuba sixhumane nabanye?

¹⁴ Sifuna ukubonakala sikhululekile ngaso sonke isikhathi. Lokhu kusiza izilaleli zethu ukuba zikhululeke. Ukuba ngokhululekile akusho ukukhathalela ngokweqile ukwengamela inkulumo. Kunalokho, ngesimo sengqondo sokungaphamazeli nangemibuzo enobungane, sinikeza izilaleli zethu ithuba lokuveza imibono yazo. Ikakhulukazi lapho sishumayela ngokwethukela kuwukuhlakanipha ukukhuthaza omunye umuntu ukuba akhulume. Ngokwesibonelo, omunye uFakazi wake wazithola ehlezi eduze komfundisi ongumRoma Katolika endizeni. Esikhathini esingaphezu kwehora, uFakazi wayelokhu ephonsa lomfundisi imibuzo enobuhlakani, futhi umpristi, ekuphenduleni, uyena owayekhuluma kakhulu. Kodwa ngesikhathi behlukana, umfundisi wayesethole izincwadi eziningana zeBhayibheli. Indlela enjalo yokubekezela iyosisiza ukuba sibe nenye imfanelo edingekile, okungukuthi uzwela.

15, 16. Uzwela lungasisiza kanjani ekuxhumaneni nabantu?

¹⁵ Uzwela lusho ukuzibeka esimweni sabanye. Umphostoli uPawulu wayesiqonda ngokugcwele isidingo sokuba nozwela, njengoba kungabonakala kulokho akulobela abaseKorinte: “Noma ngikhululekile kubo bonke, ngazenza isigqila sabo bonke, ukuze ngizuze abaningi. KubaJuda ngaba-njengomJuda, ukuze ngizuze abaJuda; kwabaphansi komthetho ngaba-njengophansi komthetho, noma ngingephansi komthetho mina, ukuze ngizuze abaphansi komthetho; kwabangenamthetho ngaba-njengongenamthetho, ngingesiye ongenamthetho kuNkulunkulu kepha ngiphansi komthetho kaKristu, ukuze ngizuze abangenamthetho; kwababuthakathaka ngaba-buthakathaka, ukuze ngizuze ababuthakathaka; sengaba-yikho konke kubo bonke, ukuze ngakho konke ngisindise abanye.”—1 Korinte 9:19-22.

¹⁶ Ukuze silingise umphostoli uPawulu kulezici, sidinga ukuba nobuhlakani, ukuqonda, nokuqapha. Uzwela luyosisiza ukuba sixhumane nezilaleli zethu ngeqiniso ngokuvumelana nendlela yazo yokucabanga nokuzwela. Incwadi ethi Ukubonisana NgemiBhalo inikeza usizo oluningi kulesici. Yiphathe ngaso sonke isikhathi enkonzweni.

Uthando—Usizo Ekuxhumaneni Nabantu

17. Kuzo zonke izimfanelo zobuKristu, iyiphi ebaluleke kunazo zonke ekuxhumaneni nabanye ngeqiniso ngokuphumelelayo, futhi ibonakaliswa kanjani?

¹⁷ Isizotha, ukuthobeka, ukubekezela, nozwela kubalulekile ukuze kube nokuxhumana okuphumelelayo ekudluliseleni ukwaziswa. Nokho, ngaphezu kwakho konke, uthando olungenabugovu luyosisiza ukuba siphumelele ekufinyeleleni izinhliziyo zabanye. UJesu waba nesihe ngabantu ngoba ‘babekhathazekile, babehlakazekile njengezimvu ezingenamalusi.’ Uthando olwashukumisela uJesu ukuba athi: “Zanini kimi nina nonke enikhatheleyo nenisindwayo, mina ngizakuniphumuza.” (Mathewu 9:36; 11:28) Okwenza ukuba sifune ukuphumuza futhi sisize abantu ukuba bangene endleleni eyisa ekuphileni ukuthi nathi siyabathanda. Isigijimi sethu esothando, ngakho masiqhubeke sisikhuluma ngendlela enothando. Loluthando luzibonakalisa ngokumomotheka okunothando, ngomusa nangesineke, ngokwenama nangemfudumalo.

18. Singamlingisa kanjani uPawulu, njengoba alingisa uMphathi wakhe?

¹⁸ Kulesisici umphostoli uPawulu wayengumlingisi omuhle woMphathi wakhe, uJesu Kristu. Kungani ayephumelela kangaka ekuqaliseni amabandla elandelana? Ngenxa yentshiseko yakhe? Yebo. Kodwa futhi ngenxa yothando ayelubonisa. Phawula amazwi akhe othando ngokuphathelene nebandla elisha laseThesalonika: “Saba-mnene phakathi kwenu njengokuba umdlezane ondla abantwana bakhe. Ngokunjalo lokhu besinilangazelele, sasifuna ukuninika kungesilo ivangeli likaNkulunkulu kuphela kepha nokuphila kwethu uqobo, ngokuba nase ningabathandekayo kithina.” Ukulingisa uPawulu kuyosisiza emizamweni yethu yokuxhumana nabantu.—1 Thesalonika 2:7, 8.

19. Kungani kungamelwe sivumele insimu engasabeli ukuba isidumaze?

¹⁹ Uma siye senza konke okusemandleni ethu ukuba sixhumane nabantu futhi sehluleka ukuthola imiphumela esiyifunayo, ingabe kufanele sidumazeke? Lutho neze. AbaFundi BeBhayibheli (njengoba oFakazi BakaJehova babebizwa kanjalo ngaphambili) babevame ukuthi, ukuze abantu bamukele iqiniso kudingeka babe nezimfanelo ezintathu. Kudingeka bathembeke, bathobeke, futhi balambe. Asinakulindela abantu abangeqotho, labo abangathembekile, ukuba basabele kahle eqinisweni; futhi ngeke silindele ukuba abantu abazazisayo noma abaqhoshayo bazilalele izindaba ezinhle. Ngaphezu kwalokho, ngisho noma umuntu enesilinganiso esithile sokwethembeka nokuthobeka, cishe ngeke alamukele iqiniso uma engalambile ngokomoya.

20. Kungani kungashiwo ngaso sonke isikhathi ukuthi imizamo yethu ibingelona ize?

²⁰ Ngokungangabazeki abaningi obathola ensimini yakini bayobe bentula eyodwa noma ngaphezulu kulezimfanelo ezintathu. Umprofethi uJeremiya waba nokuhlangenwe nakho okufanayo. (Jeremiya 1:17-19; qhathanisa noMathewu 5:3.) Nakuba kunjalo, imizamo yethu ayilona ize. Ngani? Ngoba simemezela igama likaJehova noMbuso. Ngokushumayela kwethu nangakho kanye ukuba khona kwethu, sixwayisa ababi. (Hezekeli 33:33) Futhi ungalokothi ukhohlwe ukuthi ngemizamo yethu yokuxhumana nabanye ngeqiniso, sizizuzisa thina ngokwethu. (1 Thimothewu 4:16) Sigcina ukholo lwethu luqinile nethemba lethu loMbuso ligqamile. Ngaphezu kwalokho, sigcina ubuqotho bethu futhi kanjalo sihlanganyele ekungcweliseni igama likaJehova uNkulunkulu, sijabulisa inhliziyo yakhe.—IzAga 27:11.

21. Yini engashiwo ekufushaniseni?

²¹ Ngamafuphi: Ukuxhumana kuwukudluliselwa okuphumelelayo kokwaziswa. Ubuciko bokuxhumana bubalulekile, futhi kuba nokulimala okukhulu lapho ukuxhumana kuwohloka. Siye sabona ukuthi uJehova uNkulunkulu noJesu Kristu bangabavelele ekuxhumaneni nabantu nokuthi uJesu Kristu wayaleza ukuba kube nomzila wokuxhumana wosuku lwethu. Siye saphawula futhi ukuthi ngokuzilungisa kwethu nokuziphatha, sixhumana nabantu, sithumela izigijimi kwabanye. Siye safunda ukuthi ukubonisana kufeza ingxenye ebalulekile ekuzameni kwethu ukuxhumana nabantu nokuthi ukuze sixhumane nabanye ngokuphumelelayo, kudingeka ukuba sibe nesizotha futhi sithobeke, sibonise uzwela, sibekezele, futhi ngaphezu kwakho konke, sishukunyiswe inhliziyo egcwele uthando. Uma sihlakulela lezimfanelo futhi silandela izibonelo zeBhayibheli, siyoba amaKristu aphumelelayo ekuxhumaneni nabanye.—Roma 12:8-11.

[Umbhalo waphansi]

Ungaphendula Kanjani?

◻ Kungayiphi indlela ukuxhumana kuqalisa ngaphambi kokuba kushiwo izwi?

◻ Iziphi ezinye izibonelo zokuxhumana ngokubonisana okuphumelelayo?

◻ Iziphi izimfanelo ezenza uJesu Kristu noPawulu baxhumana nabantu ngokuphumelelayo?

◻ Kungani kungamelwe sidumazeke uma imiphumela yephuza ukuvela?