Bekani UNkulunkulu Kuqala Ekuphileni komkhaya Wenu!

UBOB NOJEAN—umbhangqwana oshadile okukhulunywe ngawo esihlokweni esandulelayo—abazange bafune isehlukaniso. Kunalokho, bakhuluma nesikhonzi esingumKristu ngezinkathazo zabo. Ngokushesha sathola ukuthi izinkinga zabo ngokuyisisekelo zazibangelwa izizinda zabo ezingafani.

Ngokwesibonelo, njengoba uBob ayevela emkhayeni wabantu abanamakhono omsebenzi nezisebenzi zesigaba esisebenza kanzima futhi kwayena enza umsebenzi owenziwa ngezandla, wayefuna njalo ukudla kwasekuseni okuningi. UJean, owayevela emkhayeni wezisebenzi zesigaba esingasebenzi kanzima, wayemnikeza ikhofi nesinkwa esithosiwe kuphela. Ngakho kwenzeka kanjalo ukuba ukuxabana ngokudla kwasekuseni kudlondlobale kube yimpi enkulu!

UBob noJean babedinga ukuthuthukisa ukukhulumisana kwabo. Nokho, imbangela yangempela yokucindezeleka kwabo yayijule nangokwengeziwe. “Ingabe nibhekana ngombono weyoku-1 Korinte 13:4?” kubuza lesosikhonzi. Lowombhalo weBhayibheli ufundeka kanje: “Uthando luyabekezela, uthando lumnene, alunamhawu, uthando aluzigabisi, aluzikhukhumezi.” Ivesi elilandelayo lithi uthando “aluziphathi ngokungafanele, aluzifuneli okwalo, alucunuki, alunagqubu.” Bobabili uJean noBob babezimisele ukusebenzisa lamazwi ebuhlotsheni babo.

Izinkinga zalombhangqwana oshadile ngokuyinhloko zazidinga ikhambi elingokomoya. Njengoba uBob noJean babefisa ukulondoloza ubuhlobo obuhle noNkulunkulu, ngaphezu kwakho konke babedinga ukusebenzisa izimiso zeBhayibheli futhi baqaphele ukuthi “uma uJehova engayakhi indlu, basebenzela ize abayakhayo.” (IHubo 127:1) Amavesi 3 kuya ku-5 abhekisela ekwakhiweni komkhaya. Futhi impumelelo enkulu kakhulu yokuthuthukisa injabulo yasekhaya ivela ekubekeni uNkulunkulu kuqala ekuphileni komkhaya.—Efesu 3:14, 15.

Lokho Ukubeka UNkulunkulu Kuqala Okukuhilelayo

Ukubeka uNkulunkulu kuqala ekuphileni komkhaya wakho kufinyelela nangalé kwesisho esithi, “Umkhaya othandaza ndawonye uhlala undawonye.” Ngokwephephabhuku iFamily Relations, abaningi bakholelwa ukuthi “inkolo yenza kube lula ukusebenzelana komkhaya okuhle nokunempilo futhi ithuthukisa ukwaneliseka ekuphileni kwamalungu awo.” Kodwa ukuba nje senkolweni ethile akufani nokubeka uNkulunkulu kuqala. Abaningi bamane banamathele enkolweni ethile ngenxa nje yomkhuba, isiko lomkhaya, noma inzuzo emphakathini. UNkulunkulu akanalo ithonya ekuphileni kwabo kwansuku zonke. Okubaluleke nangaphezulu, akuyona yonke inkolo ‘ewukukhonza okumhlophe okungenabala phambi kukaNkulunkulu.’—Jakobe 1:27.

Ukuze sibeke uNkulunkulu kuqala ekuphileni kwemikhaya yethu, thina nabathandekayo bethu kumelwe sikhulekele uJehova, “oPhezukonke emhlabeni wonke,” ngokwezimfuneko zakhe. (IHubo 83:18) INdodana kaNkulunkulu, uJesu Kristu, yathi: “Isikhathi siyeza, sesikhona namanje, lapho abakhulekayo abaqinisileyo beyakukhuleka kuBaba ngomoya nangeqiniso; ngokuba uBaba ufuna abakhuleka kuye abanjalo. UNkulunkulu unguMoya; abakhuleka kuye bafanele ukukhuleka ngomoya nangeqiniso.” (Johane 4:23, 24) Ukuze sikhulekele uJehova uNkulunkulu “ngomoya,” inkonzo yethu engcwele eya kuye kumelwe ishukunyiswe inhliziyo egcwele uthando nokholo. (Marku 12:28-31; Galathiya 2:16) Ukukhulekela uJehova ‘ngeqiniso’ kudinga ukuba senqabe amanga angokwenkolo futhi sizivumelanise ngokugcwele nentando yakhe njengoba yembulwa eBhayibhelini. Ngaphandle kokuba inkolo yethu ifinyelele izindinganiso zakhe asinakukwazi ukubeka uJehova uNkulunkulu kuqala.a Ziyini ezinye zalezi? Futhi ukuzisebenzisa kungawuzuzisa kanjani umkhaya wakho?

Ukubeka UNkulunkulu Kuqala Njengendoda

Kweyoku-1 Korinte 11:3 iBhayibheli lithi: “Inhloko yawo onke amadoda inguKristu, nenhloko yowesifazane iyindoda, nenhloko kaKristu inguNkulunkulu.” Uma uyindoda, unomthwalo wemfanelo ovela kuNkulunkulu wokuba umenzi wezinqumo oyinhloko emkhayeni wakho. Kodwa lokhu akunikezi noma iyiphi indoda igunya lokuba ecindezelayo noma ibe umashiqela.

IBhayibheli likhuthaza amadoda ukuba acabangele imizwa yomkawo lapho enza izinqumo ezibathintayo. (Qhathanisa noGenesise 21:9-14.) Ngempela, imiBhalo isinxusa sonke ukuba ‘yilowo nalowo wethu angabheki okwakhe yedwa, kodwa yilowo nalowo abheke nokwabanye.’ (Filipi 2:2-4) Lapho kungekho simiso seBhayibheli esihilelekile, indoda engumKristu ngokuvamile iyovumelana nokukhetha komkayo. Njengoba inesithakazelo somuntu siqu kuye, iyoqiniseka futhi ukuthi imithwalo yemfanelo ayimcindezeli. Ngokwesibonelo, ingase imsize ngemisebenzi yasendlini, ikakhulukazi uma enomsebenzi wokuziphilisa.

Umphostoli uPawulu wabhala: “Amadoda afanele ukuthanda omkawo njengemizimba yawo. Othanda umkakhe uzithanda yena. Ngokuba akakho owake wazonda eyakhe inyama, kepha uyayondla, ayiphathe kahle, njengalokhu noKristu enza kulo ibandla.” (Efesu 5:28, 29) UJesu Kristu usebenzelana namalungu ebandla ngendlela enothando.

Okuphawulekayo futhi iseluleko somphostoli uPetru: “Madoda, hlalani nabo [omkenu] ngokokwazi, njengalokhu owesifazane eyisitsha esibuthakathaka, nibanike udumo, lokhu beyizindlalifa zomusa wokuphila kanye nani, ukuze imikhuleko yenu ingathiywa.” (1 Petru 3:7) Ingabe akukhona okunengqondo ukuqaphela ukuthi ukuphatha kwendoda umkayo ngendlela engeyona eyothando kungathiya imikhuleko yayo? Yebo, indoda kumelwe isebenzelane nomkayo ngendlela yothando ukuze uNkulunkulu ezwe futhi aphendule imithandazo yayo.

Ukubeka uNkulunkulu kuqala kuthinta futhi ubuhlobo bukababa nabantwana bakhe. Kufanele ayikhathalele ngokujulile inhlala-kahle yabo engokomoya. Nokho, ekuhloleni okuyinhloko kwaseU.S., ingxenye kuphela yamadoda eyathi “ukuhlanganyela ekutadisheni imiBhalo noma emaqenjini engxoxo” ‘kwakubaluleke kakhulu entuthukweni yemikhaya yawo engokomoya.’ Amanye abala izinto “ezinjengokubukela noma ukulalela ukusakazwa kwezinkonzo ezingokwenkolo” noma ‘ukuzindla ngenjongo yokuphila.’

Nokho, iBhayibheli litshela obaba: “Nani-boyise, ningabathukuthelisi abantwana benu, kodwa nibondle ngokuyala nangokuqondisa kweNkosi.” (Efesu 6:4) Phakathi koFakazi BakaJehova, obaba kulindeleke ukuba bahole ekukhulekeleni komkhaya. Ngokuqhuba izifundo zeBhayibheli zomkhaya njalo, ukuba khona emihlanganweni yobuKristu, nokwenza ngokuvumelana nezinye izimfuneko ezingokomBhalo, amadoda anjalo abeka uNkulunkulu kuqala ekuphileni komkhaya.

Ukubeka UNkulunkulu Kuqala Njengomfazi

Uma ungumfazi, ungabeka uNkulunkulu kuqala ngokusekela umyeni wakho endimeni yakhe njengenhloko yomkhaya. IBhayibheli lithi: “Bafazi, thobelani amadoda enu njengokufanele eNkosini.” (Kolose 3:18) Lokhu kungase kube nzima ngempela uma indoda kungelula ukukhulumisana nayo noma ingenandaba nokuhola ekukhulekeleni komkhaya. Kunoma yikuphi, ukuqokomisa amaphutha ayo ngaso sonke isikhathi, noma okubi nakakhulu, ukuphikisana nayo kuyomane kukhulise ukucindezeleka komkhaya.

IzAga 14:1 zithi: “Owesifazane ohlakaniphileyo uyakha indlu yakhe, kepha oyisiwula uyayidiliza ngezandla zakhe.” Enye indlela owesifazane oshadile ohlakaniphe ngempela angabeka ngayo uNkulunkulu kuqala futhi ‘akhe indlu yakhe’ iwukuthobela umyeni wakhe. (1 Korinte 11:3) Njengoba ‘enomthetho womusa olimini lwakhe,’ ugwema ukugxeka umyeni wakhe ngokungadingekile. (IzAga 31:26) Uyazikhandla futhi ukuze enze izinqumo zakhe ziphumelele.

Enye indlela yokuba owesifazane oshadile abeke uNkulunkulu kuqala iwukuba umfazi okhuthele. Yebo, uma kumelwe asebenze emsebenzini wokuziphilisa, angase angabi naso isikhathi noma amandla adingekile okunakekela ikhaya lakhe njengoba efisa. Usengaphishekela ukuba ‘njengomfazi okhutheleyo’ iBhayibheli elithi ngaye: “Uyaqaphela okwenziwayo endlini yakhe, akadli isinkwa sobuvila.”—IzAga 31:10, 27.

Ngaphezu kwakho konke, umfazi kudingeka agcine ukukhulekela kukaNkulunkulu kuza kuqala ekuphileni kwakhe. Abaningi abavakashela eHholo LoMbuso loFakazi BakaJehova okokuqala bayaphawula ngokubukeka okucocekile kwezingane. Umsebenzi womfazi kulendaba ubaluleke kakhulu. Kodwa kumelwe futhi asebenzele ukulondoloza ingokomoya lakhe ngomkhuleko, ukutadisha, nangenkonzo eya kuNkulunkulu.

Ukubeka UNkulunkulu Kuqala Njengentsha

Isihloko esikuyiAdolescent Counselor siyaphawula: “Abantwana baye bathambekela ekubeni nezimo zengqondo nemiqondo eye yabavumela ukuba balawule abazali babo. . . . Njengoba beye baba semphakathini ogcizelela futhi udumise ukuzijabulisa okusheshayo nokuceba ngokwezinto ezibonakalayo, abasakhula baba nesimo sengqondo sokuthi ‘Ngikufuna manje.’” Uma ungosemusha, ingabe yileso isimo sakho sengqondo?

EyabaseKolose 3:20 ithi: “Bantwana, lalelani abazali benu ezintweni zonke, ngokuba lokho kuyathandeka eNkosini.” Umuntu osemusha obheka ukulalela okunjalo njengemfuneko yaphezulu uyobambisana nabazali bakhe. Ngokwesibonelo, ngeke aphikisane nabo ngasese ngokuzihlanganisa nafunda nabo abangavumelani nabo; futhi ngeke azame ukusizakala ngomunye wabazali ukuze azenzele umathanda. (IzAga 3:32) Kunalokho, noma yimuphi umuntu osemusha obeka uNkulunkulu kuqala ekuphileni uyozithoba ekuqondiseni kothando kwabazali.

Gcina UNkulunkulu Eza Kuqala!

Kungakhathaliseki ukuthi sinayiphi indima emkhayeni, sidinga ukubeka uNkulunkulu kuqala ekuphileni futhi sihlakulele ubuhlobo obuseduze naye. Ingabe wena nomkhaya wakho niyakwenza lokho?

‘Kulezinsuku zokugcina,’ sonke sibhekene ‘nezikhathi ezinzima.’ (2 Thimothewu 3:1-5) Nokho, kusenokwenzeka ukuba sichume ngokomoya futhi sisinde lapho lesimiso sezinto siphela. (Mathewu 24:3-14) Ngokwenza ngokuvumelana nolwazi oluqondile lweBhayibheli, wena nomkhaya wakho ningaba nethemba lokuphila okuphakade emhlabeni oyipharadesi. (Luka 23:43; Johane 17:3; IsAmbulo 21:3, 4) Yebo, lokho kungenzeka uma nibeka uNkulunkulu kuqala ekuphileni komkhaya wenu.

[Umbhalo waphansi]

[Isithombe ekhasini 5]

Umfazi okhutheleyo waziswa ngokujulile

[Isithombe ekhasini 7]

IBhayibheli likhuthaza amadoda ukuba ahole ekukhulekeleni komkhaya