Imibono Evusa Amadlingozi Eqinisa Ukholo
Amaphuzu Avelele Avela Encwadini YesAmbulo
INCEKU kaJehova uJohane isesiqhingini esincane sasePhatmose, esiseduze kogu olusentshonalanga lwaseAsia Minor. Lapho, lomphostoli osekhulile ubona izinto ezimangalisayo—ezingokomfanekiso, ngokuvamile ezethusayo, futhi ezibaluleke ngempela! Uba sosukwini lweNkosi, oluqala ekubekweni kukaJesu esihlalweni sobukhosi ngo-1914 kuze kube sekupheleni kokuBusa Kwakhe Kweminyaka Eyinkulungwane. Nakuba uJohane ebona izenzakalo ezizokwenzeka phakathi nesikhathi esinzima kakhulu esintwini, yeka indlela umbono wakhe wangaphambili wokuBusa KukaKristu Kweminyaka Eyinkulungwane omuhle ngayo! Yeka izibusiso isintu esilalelayo esiyozijabulela ngalesosikhathi!
UJohane waloba lemibono encwadini yeBhayibheli yesAmbulo. Nakuba yalotshwa cishe ngo-96 C.E., ingaluqinisa ukholo lwethu kuNkulunkulu wesiprofetho, uJehova, naseNdodaneni yakhe, uJesu Kristu. Ukuze uthole imininingwane, bheka incwadi ethi IsAmbulo—Umvuthwandaba Waso Omkhulu Useduze!, ekhishwe iWatchtower Bible and Tract Society of New York, Inc.
UKristu Unikeza Iseluleko Sothando
Ekuqaleni esambulweni esivela kuNkulunkulu ngoKristu kubonakala izincwadi eziya emabandleni ayisikhombisa ezindlalifa zoMbuso ezikanye noJesu. (1:1–3:22) Ngokuyinhloko, lezincwadi ziyatusa, ziveza izinkinga, zinikeza isiqondiso nesikhuthazo, futhi zikhomba izibusiso eziwumphumela wokulalela ngokwethembeka. Nakuba abase-Efesu babekhuthazelile, babeluyekile uthando ababenalo ekuqaleni. Ibandla laseSmirna elicebile ngokomoya likhuthazwa ukuba lihlale lithembekile phakathi nosizi. Ushushiso aluzange lulinqobe ibandla lasePhergamu, kodwa liye labekezelela amahlelo. Naphezu komsebenzi owandisiwe wamaKristu aseThiyathira, kunethonya likaJezebeli lapho. Ibandla laseSardesi kudingeka liphaphame ngokomoya, elaseFiladelfiya likhuthazwa ukuba libambelele kwelinakho, kanti abasivivi abaseLawodikeya badinga ukwelashwa ngokomoya.
Yeka amazwi amahle okuqeqesha amakhosi asezulwini esikhathi esizayo—eqinisweni, wonke amaKristu! Ngokwesibonelo, ingabe ukhona kithi osesivivi? Khona-ke makathathe isinyathelo! Yiba oqabula njengenkomishi yamanzi abandayo ngosuku olushisayo kodwa futhi qala ukubonisa intshiseko evuthayo ngoJehova nenkonzo yakhe.—Qhathanisa noMathewu 11:28, 29; Johane 2:17.
IWundlu Livula Incwadi
UJehova ngokulandelayo ubonakala ekhazimula esihlalweni sakhe sobukhosi. (4:1–5:14) Uzungezwe amalunga angu-24 nezidalwa eziphilayo ezine. Incwadi enanyatheliswe ngezimpawu eziyisikhombisa isesandleni sakhe. Ubani ongavula lencwadi? Phela, iWundlu, uJesu Kristu, likufanelekele ukwenza kanjalo!
Kwembuleka izenzakalo ezimangalisayo njengoba iWundlu livula eziyisithupha zezimpawu. (6:1–7:17) Njengoba kuvulwa uphawu lokuqala, uKristu ubonakala esehhashini elimhlophe, wamukela umqhele (ngo-1914), futhi uphuma engonqobayo. Njengoba kuvulwa ezinye izimpawu ezintathu, abanye abagibeli bamahhashi baletha impi, indlala, nokufa esintwini. Ngokuvulwa kophawu lwesihlanu, labo ababulawa ngenxa kaKristu bakhalela ukuba kuphindiselelwe igazi labo, futhi ngamunye unikwa “ingubo ende emhlophe,” emelela ukuma okulungile okuhlobana nokuvuswa kwabo ukuze babe izidalwa zomoya ezingafi ezinamalungelo obukhosi. (Qhathanisa nesAmbulo 3:5; 4:4.) Lapho kuvulwa uphawu lwesithupha, usuku lolaka lukaNkulunkulu nolweWundlu lumenyezelwa ukuzamazama komhlaba. Kodwa “imimoya emine yomhlaba,” emelela isahlulelo esibhubhisayo, iyabanjwa kuze kube yilapho izinceku zikaNkulunkulu ezingu-144 000 sezibekwe uphawu. Lapho sezigcotshwe ngomoya kaNkulunkulu futhi zamukelwa njengamadodana akhe angokomoya, zithola ukuqinisekiswa kwangaphambili—uphawu, noma isibambiso—sefa lazo lasezulwini. Kuyoba ngemva kokuvivinywa kuphela lapho ukubekwa uphawu kuyoba okwaphakade. (Roma 8:15-17; 2 Korinte 1:21, 22) Yeka indlela uJohane okumelwe amangale ngayo lapho ebona “isixuku esikhulu” esivela kuzo zonke izizwe—esingenakubalwa esinethemba lokuphila okuphakade epharadesi lasemhlabeni! Siphuma “osizini olukhulu,” isikhathi sosizi lwesintu olungenakuqhathaniswa.
Yeka izenzakalo ezesabisayo ezenzekayo njengoba kuvulwa uphawu lwesikhombisa! (8:1–11:14) Ukuthula kwengxenye yehora, okuvumela imithandazo yabangcwele ukuba izwakale, kulandelwa ukuphonswa emhlabeni komlilo ovela ealtare. Khona-ke izingelosi eziyisikhombisa zilungiselela ukushaya amacilongo amemezela izinhlupho zikaNkulunkulu kweLobukholwa. Amacilongo ashaywa ngaso sonke isikhathi sokuphela kuze kube usizi olukhulu. Amacilongo amane amemezela izinhlupho emhlabeni, olwandle, emithonjeni yamanzi, elangeni, enyangeni, nasezinkanyezini. Ukushaywa kwelesihlanu kuletha isikhonyane esifanekisela amaKristu agcotshiwe aphumela ukulwa kusukela ngo-1919 kuye phambili. Ngokukhala kwecilongo lesithupha, abakhwele amahhashi bayahlasela. Ekugcwalisekeni, abagcotshiwe, balekelelwa “isixuku esikhulu,” kusukela ngo-1935, bamemezela izigijimi zesahlulelo ezihluphayo kubaholi benkolo beLobukholwa.
Ngokulandelayo uJohane udla incwadi encane, okubonisa ukuthi abagcotshiwe bamukela isabelo sabo futhi bathola ukudla engxenyeni yeZwi likaNkulunkulu equkethe amazwi ezahlulelo zaphezulu abazimemezela kweLobukholwa. Umphostoli uyalwa ukuba alinganise ithempeli, okubonisa ukugcwaliseka okuthile kwezinjongo zikaJehova eziphathelene nokuhlelwa kwethempeli nezindinganiso zaphezulu labo abahlangene nalo okumelwe bahlangabezane nazo. Khona-ke “ofakazi ababili” abagcotshiwe bakaNkulunkulu abaprofetha bembethe indwangu yamasaka, bayabulawa, kodwa kamuva bayavuswa. Lokhu kubhekisela ku-1918-19, lapho umsebenzi wabo wokushumayela wacishe wabulawa izitha, kodwa izinceku zikaJehova zavuswa ngokuyisimangaliso ukuze zenze inkonzo yazo.
UMbuso Uyazalwa!
Ukukhala kwecilongo lesikhombisa kwazisa ngokuzalwa koMbuso. (11:15–12:17) Ezulwini owesifazane ongokomfanekiso (inhlangano kaJehova uNkulunkulu engokwasezulwini) uzala umntwana wesilisa (uMbuso kaNkulunkulu noKristu njengeNkosi), kodwa udrako (uSathane) uzama ngokungaphumeleli ukumshwabadela. Eletha lempi emvuthwandaba ezulwini ngemva kokuzalwa koMbuso ngo-1914, uMikayeli onqobayo (uJesu Kristu) uphonsa udrako nezingelosi zakhe phansi emhlabeni. Lapho lodrako uyaqhubeka ehlasela insali egcotshiwe yenzalo yowesifazane ongokwasezulwini.
Ngokulandelayo uJohane ubona isilo esenzelwa umfanekiso onyanyekayo. (13:1-18) Lesisilo sezombangazwe esinamakhanda ayisikhombisa, nezimpondo eziyishumi sivela “olwandle,” isixuku esiphithizelayo sesintu okuvela kuso ohulumeni babantu. (Qhathanisa noDaniyeli 7:2-8; 8:3-8, 20-25.) Uyini umthombo wegunya lalesidalwa esingokomfanekiso? Phela, awukho omunye ngaphandle kukaSathane, udrako! Futhi cabanga nje! Isilo esinezimpondo ezimbili (uMbuso Wezwe WamaNgisi NamaMelika) ubonakala wenzela lesilwane esikhulu sezombangazwe “umfanekiso,” manje owaziwa ngokuthi iZizwe Ezihlangene. Abaningi baphoqelelwa ukuba bakhulekele isilo futhi bamukele “uphawu” lwaso ngokwenza izinto ngendlela yaso futhi basivumele sibuse ukuphila kwabo. Kodwa oFakazi BakaJehova balwenqaba ngempela uphawu lobudemoni lwalesisilo sasendle.
Izinceku ZikaJehova Zithatha Isinyathelo
Izinceku zikaNkulunkulu ezihlukahlukene zibonakala zisebenza njengoba kuthululwa izitsha eziyisikhombisa zolaka lwakhe. (14:1–16:21) Lalela! ENtabeni yaseSiyoni yasezulwini, uJohane uzwa abayizi-144 000 behlabelela okungathi iculo elisha. Ingelosi endiza emkhathini wezulu inezindaba ezinhle zaphakade ezimemezela kwabakhile emhlabeni. Kubonisani lokhu? Ukuthi oFakazi BakaJehova basizwa yizingelosi lapho bememezela isigijimi soMbuso.
Kumelwe ukuba uJohane uyamangala lapho ebona umvini womhlaba uvunwa futhi kuchotshozwa zonke izizwe njengoba kunyathelwa isikhamo sentukuthelo kaNkulunkulu. (Qhathanisa noIsaya 63:3-6; Joweli 3:12-14.) Ngomyalo kaJehova, ngokulandelayo izingelosi eziyisikhombisa zithulula izitsha eziyisikhombisa zolaka lwaphezulu. Umhlaba, ulwandle, nemithombo yamanzi, kanye nelanga, isihlalo sobukhosi sesilo sasendle, noMfula iEwufrathe, kuyathinteka njengoba kuthululwa izitsha zokuqala eziyisithupha. Cabanga ngenjabulo kaJohane lapho ephawula ukuthi ithuluzi lobudemoni lihlanganisela amakhosi abantu empini kaNkulunkulu yeHarmagedoni. Futhi imiphumela ingebhubhisayo njengoba kuthululwa isitsha sesikhombisa emoyeni.
Abesifazane Ababili Abangokomfanekiso
Ngokuqinisekile, uJohane uyajabula ngokubona ukuphela kweBabiloni Elikhulu, umbuso wezwe wenkolo yamanga, nokubona izenzakalo ezijabulisayo ezilandela ukubhujiswa kwalo. (17:1–19:10) Lidakwe igazi labangcwele, libonakala likhwele isilo sasendle esibomvu esinamakhanda ayisikhombisa nezimpondo eziyishumi (iNhlangano Yezizwe nomlandeli wayo, iZizwe Ezihlangene). Ah, kodwa yeka ukuba yincithakalo kwalo njengoba izimpondo ziliphendukela!
Kuzwakala amazwi asezulwini edumisa uJehova ngokubhujiswa kweBabiloni Elikhulu. Futhi yeka ukudumisa okudumayo okumemezela umshado weWundlu nomlobokazi walo, abagcotshiweyo abavusiwe!
UKristu Uyanqoba Futhi Abuse
Ngokulandelayo uJohane ubona iNkosi yamakhosi njengoba ihola amabutho asezulwini beyobhubhisa isimiso sezinto sikaSathane. (19:11-21) Yebo, uJesu, “uLizwi kaNkulunkulu,” ulwa nezizwe. Umphostoli ubona isilo sasendle (inhlangano kaSathane yezombangazwe) nomprofethi wamanga (uMbuso Wezwe WamaNgisi NamaMelika) kuphonswa “echibini lomlilo,” elifanekisela ukubhujiswa okuphelele, kwaphakade.
Kulandelani? Phela uJohane ubona ukufakwa kwalasha kukaSathane. Kulandela umbono wokuBusa KukaKristu Kweminyaka Eyinkulungwane, okuthi phakathi nakho, uJesu nababusi abavusiwe bahlulele isintu, balethe abalalelayo ekupheleleni kobuntu! (20:1-10) Manje isikhathi sovivinyo lokugcina. Ekhululwe kwalasha, uSathane uyozimisela ukudukisa isintu esiphelele, kodwa imbubhiso iyophelisa imisebenzi emelene noNkulunkulu yezihlubuki ezingamademoni nezingabantu.
Ehlehlela emuva ngesikhathi, yeka ukuthi kumelwe ukuba uJohane ujabula kanjani ngokubona labo abafile, abaseHayidese (ithuna elivamile lesintu), nasolwandle bevuswa futhi bahlulelwa phambi kukaNkulunkulu, ohlezi esihlalweni sobukhosi esikhulu esimhlophe! (20:11-15) Futhi yeka ukukhululeka abaqotho abayokujabulela lapho ukufa neHayidese sekuphonswe echibini lomlilo, kungasenakuphinde kufune izisulu!
Njengoba umbono kaJohane ufinyelela ekupheleni, ubona iJerusalema Elisha. (21:1–22:21) Lelodolobha eliwuhulumeni lehla livela ezulwini futhi liletha ukukhanya ezizweni. Okugeleza eJerusalema Elisha “umfula wamanzi okuphila,” ofanekisela iqiniso elingokomBhalo namanye amalungiselelo anikwa uNkulunkulu asekelwe emhlatshelweni kaJesu wokusindisa abantu abalalelayo esonweni nokufa futhi ubanikeze ukuphila okuphakade. (Johane 1:29; 17:3; 1 Johane 2:1, 2) Osebeni ngalunye lwalomfula, uJohane ubona imithi enamaqabunga aphilisayo, efanekisela ingxenye yelungiselelo likaJehova lokunikeza ukuphila okuphakade esintwini esilalelayo. Izigijimi zokuphetha ezivela kuNkulunkulu noKristu zilandelwa isimemo. Yeka indlela okumangalisa ngayo ukuzwa umoya nomlobokazi bemema wonke umuntu owomileyo ukuba ‘eze, athabathe amanzi okuphila ngesihle’! Futhi njengoba sifunda amazwi okuphetha esAmbulo ngokungangabazeki sihlanganyela ugqozi lokumemeza kukaJohane: “Amen. Woza, Nkosi Jesu!”
[Ibhokisi/Isithombe ekhasini 21]
Hlala Uphapheme: Phakathi kwamazwi esiprofetho akhuluma ngempi kaNkulunkulu yeHarmagedoni (iArmagedoni), kuthiwa: “Bheka, [mina Jesu Kristu] ngiyeza njengesela; ubusisiwe olindayo, alonde izingubo zakhe ukuba angabi-ngohamba-ze, baze balibone ihlazo lakhe.” (IsAmbulo 16:15) Lokhu kungase kufaniswe nemisebenzi yombonisi, noma isikhulu, sethempeli laseJerusalema. Phakathi nezikhathi zokulinda, wayezungeza ithempeli ukuze abone ukuthi abalindi bakwaLevi babephapheme noma belele ezindaweni abalinde kuzo. Noma yimuphi umlindi owayetholakala elele wayeshaywa ngenduku, futhi izingubo zakhe zazingase zishiswe njengesijeziso esiyihlazo. Njengoba iArmagedoni isisondele kangaka manje, insali egcotshiwe ‘yobupristi bobukhosi,’ noma ‘indlu engokomoya,’ izimisele ukuhlala iphapheme ngokomoya. Ngakho-ke kufanele babe njalo nabangane bayo, “isixuku esikhulu,” esinamathemba asemhlabeni, ngoba naso sinikela inkonzo engcwele kuNkulunkulu ethempelini. (1 Petru 2:5, 9; IsAmbulo 7:9-17) Ikakhulukazi ababonisi abangamaKristu kufanele bahlale beqaphele ukuvela kwezimo ezimbi ebandleni. Ngoba bahlala bephapheme, bonke abakhulekeli abathembekile ethempelini elingokomoya bahlala bembethe “izingubo” zabo, ezibonisa inkonzo yabo ephakeme njengoFakazi BakaJehova.