Ukukhonza UJehova Ngenjabulo
“Mkhonzeni uJehova ngokujabula, nisondele ebusweni bakhe ngokuhuba kwentokozo.”—IHUBO 100:2.
1, 2. (a) Ubandlululo lohlanga lwavezwa kanjani eBerlin, eJalimane, kodwa yaqhubeka kanjani impi yokholo ‘yoMbuso Weminyaka Eyinkulungwane’? (b) Ngokungafani nango-1936 yini eyaphawulwa eOlympia Stadium ngoJuly 1990, futhi injabulo yaleloqembu lezizwe zonke elalihlangene lapho isekelwephi?
KUSEOLYMPIA Stadium, eBerlin. Eminyakeni engamashumi amahlanu nane ngaphambili, lenkundla enhle yaba isikhungo sempikiswano lapho umashiqela wobuNazi uAdolf Hitler kubikwa ukuthi waphatha ngendelelo umsubathi onsundu waseMelika owayewine izimendlela zegolide ezine. Ngempela, kwakuyigalelo kulokho kuzisholo kukaHitler kobandlululo lohlanga “kobukhulu bama-Aryan”!a Kodwa manje, ngoJuly 26, 1990, abansundu, abamhlophe, nabaphuzi—abantu abanobunye abavela ezizweni ezingu-64, abangu-44 532 sebebonke—bahlangene lapha beze eMhlanganweni Wesigodi WoFakazi BakaJehova “Wolimi Oluhlanzekile.” Yeka injabulo echichimayo eyayikhona ngaloloLwesine ntambama! Ngemva kwenkulumo yobhapathizo, abangu-1 018 ababezobhapathizwa bayamemeza, “Ja!” bayaphinda futhi, “Ja!” beqinisekisa ukuzinikezela kwabo kuJehova uNkulunkulu, ukuze benze intando yakhe.
2 Kubathatha imizuzu engu-19 labofakazi abasha ukuba bahlabe uhele baphume enkundleni baye echibini abazobhapathizelwa kulo. Futhi phakathi nayo yonke leyomizuzu, ihlombe elinjengokuduma lizwakala liphindelela kuyo yonke leyonkundla enkulu. Abanqobe eMidlalweni yeOlympic abakaze bashayelwe ihlombe elinjengaleli manje elamukela lamakhulu, avela ezizweni eziningi, abonakalisa ukholo olunqoba izwe. (1 Johane 5:3, 4) Injabulo yawo isekelwe ngokuqinile ekuqinisekeni ngokuthi ukubusa koMbuso kaNkulunkulu ngoKristu ngempela kuzolethela isintu iminyaka eyinkulungwane yezibusiso ezikhazimulayo.—Heberu 6:17, 18; IsAmbulo 20:6; 21:4, 5.
3. Yiliphi iqiniso eligcizelelwa ukuqiniseka kwababeze emhlanganweni, futhi kanjani?
3 Ayikho inzondo yohlanga noma yobuzwe lapha, ngoba bonke bakhuluma ulimi oluhlanzekile lweZwi likaNkulunkulu, kanjalo begcizelela ubuqiniso bamazwi kaPetru: “Nembala ngiyabona ukuthi uNkulunkulu akabheki ubuso bamuntu, kodwa ezizweni zonke omesabayo nowenza ukulunga uyamukeleka kuye.”—IzEnzo 10:34, 35; Zefaniya 3:9, qhathanisa neNW.
4. Iningi lababeze emhlanganweni laba amakholwa ngaphansi kwaziphi izimo, futhi imithandazo yalo yaphendulwa kanjani?
4 Ingxenye enkulu yalaba ababeze kulomhlangano eBerlin iye yaba amakholwa phakathi neminyaka eminingi yokucindezelwa, ehlanganisa isikhathi sobuNazi (1933-45) kanye nesikhathi sesimiso sokusebenzela uhulumeni esalandela eMpumalanga Jalimane, lapho ukuvinjelwa koFakazi BakaJehova okusanda kususwa khona ngokomthetho ngoMarch 14, 1990. Ngakho, abaningi babo baye ‘bamukela izwi ekukhathazekeni okukhulu ngokuthokoza komoya ongcwele.’ (1 Thesalonika 1:6) Manje banenkululeko eyengeziwe yokukhonza uJehova, futhi injabulo yabo ayinamingcele.—Qhathanisa noIsaya 51:11.
Izikhathi Zenjabulo
5. UIsrayeli wakugubha kanjani ukukhulula okwenziwa uJehova oLwandle Olubomvu?
5 Ukukhululwa kwabafowethu eMpumalanga Yurophu, futhi muva nje ezingxenyeni zaseAfrika naseAsia, kusikhumbuza ngokukhulula okwakwenziwa uJehova ezikhathini zangaphambili. Sikhumbula isenzo samandla sikaJehova oLwandle Olubomvu, kanye nendlela ingoma kaIsrayeli yokubonga eyafinyelela ngayo ukuphakama ngamazwi athi: “Ngubani onjengawe-Jehova phakathi kwawonkulunkulu; ngubani onjengawe okhazimula ngobungcwele, owesabeka ngezibongo, owenza izimangaliso, na?” (Eksodusi 15:11) Namuhla, ingabe asiqhubeki yini sithokoza ngezinto ezimangalisayo uJehova azenzela abantu bakhe? Ngokuqinisekile kunjalo!
6. Yini esingayifunda ekumemezeni kukaIsrayeli ngenjabulo ngo-537 B.C.E.?
6 Injabulo yaphuphuma ngo-537 B.C.E. lapho uIsrayeli ebuyiselwa ezweni lakhe ngemva kokuthunjwa eBabiloni. Isizwe sikaJehova manje sasingasho, njengoba uIsaya ayeprofethile: “Bheka, uNkulunkulu uyinsindiso yami; nginethemba, angesabi, ngokuba uJehova, uJehova ungamandla ami nehubo lami, waba-yinsindiso yami.” Yeka injabulo! Lesisizwe sasiyoyizwakalisa kanjani leyonjabulo? UIsaya uyaqhubeka: “Niyakusho ngalolosuku ukuthi: Bongani uJehova, nibize igama lakhe, nizazise izenzo zakhe phakathi kwezizwe, nimemezele ukuthi igama lakhe liphakeme. Hlabelelani kuJehova, ngokuba wenzile izinto ezinkulu.” Manje ‘babengamemeza ngenjabulo’ ‘ekwaziseni umhlaba wonke’ ngezenzo zakhe zamandla, njengoba nje kwenza izinceku zikaJehova ezikhululekile namuhla.—Isaya 12:1-6.
Injabulo Emsebenzini KaJehova
7. Yikuphi ukukhulula okwabangela injabulo ngo-1919?
7 Ezikhathini zanamuhla izinceku zikaJehova zaqala ukumemeza ngenjabulo lapho ezikhulula ngokumangalisayo ngo-1919. NgoMarch 26 walowonyaka, amalungu eNdikimba Ebusayo akhululwa ejele laseUnited States, lapho ayegqunywe khona izinyanga eziyisishiyagalolunye emangalelwe ngecala lokuvukela umbuso. Yeka ukuthi kwaba nomkhosi omkhulu kanjani lapho emukelwa futhi eBethel yaseBrooklyn! Ngaphezu kwalokho, bonke abensali egcotshiwe manje babengathokoza ngokukhululwa ngokomoya eBabiloni Elikhulu, isimiso senkolo uSathane aye wadobela kuso izwe lonke.—IsAmbulo 17:3-6; 18:2-5.
8. Yini eyakhululwa ngokungalindelekile eyamenyezelwa eMhlanganweni waseCedar Point ngo-1919, futhi kwenziwa ubizo lokuba kwenziwe siphi isenzo?
8 Izenzakalo ezingokomlando zango-1919 zafinyelela emvuthwandaba ngomhlangano wabantu bakaNkulunkulu owawuseCedar Point, eOhio, eU.S.A. ngoSeptember 1-8. Ngosuku lwesihlanu lwalowomhlangano, “Usuku Lwezisebenzi,” umongameli weWatch Tower Society, uJ. F. Rutherford, wakhuluma nabangu-6 000 enkulumweni eshukumisayo eyayinesihloko esithi “Ukumemezela UMbuso.” Ngemva kokuxoxa ngesAmbulo 15:2 nangoIsaya 52:7, watshela izilaleli zakhe ukuthi umagazini omusha, othi The Golden Age (manje owaziwa ngokuthi iPhaphama!), wawuzokhishwa njalo ngemva kwamasonto amabili, ikakhulukazi ukuze uhanjiswe ensimini. Ekuphetheni wathi: “Labo abazinikele ngokuphelele eNkosini; labo abanesibindi, abanezinhliziyo ezihlanzekile, abathanda uNkulunkulu neNkosi uJesu ngazo zonke izingqondo zabo, amandla, umphefumulo nobuntu, njengoba kunikezwe ithuba, bayojabulela ukuhlanganyela kulomsebenzi. Cela eNkosini ukuze uthole isiqondiso sayo ukuba ikwenze inxusa leqiniso, elithembekile nelifanelekayo. Khona-ke, ngengoma yenjabulo enhliziyweni yakho, qhubeka uyikhonze.”
9, 10. UJehova uye wakuchumisa kanjani ukunyatheliswa kweNqabayokulinda nePhaphama!?
9 ‘Leyongoma yenjabulo’ ibilokhu izwakala emhlabeni wonke! Ngokungangabazeki, abaningi babafundi bomagazini bethu baye bahlanganyela ekukhuphuleni inani lokunyatheliswa kukamagazini iPhaphama! laya kwelingamakhophi angu-12 980 000 kamagazini ngamunye ngezilimi ezingu-64. Njengethuluzi elinamandla ekuholeleni abantu abanesithakazelo eqinisweni, iPhaphama! isebenza njengomngane weNqabayokulinda. Ezweni laseMpumalanga, udade oyiphayona, osebenza umzila ovamile kamagazini, wamangala ukuthola ukuthi isikhathi ngasinye lapho eletha umagazini wamuva, umnini-khaya wayenikela ngemali elingana no-R18,20 emsebenzini woFakazi BakaJehova owenziwa emhlabeni wonke—ngokuqinisekile ebonisa ukwazisa okuhle ngomsebenzi woMbuso!
10 Manje njengoba uqalisa unyaka wawo we-112 wokusakazwa, kunyatheliswa amakhophi omagazini beNqabayokulinda angu-15 290 000 ngezilimi ezingu-111, ezingu-59 zalezinhlelo zikhishwa ngesikhathi esisodwa emhlabeni wonke ziqukethe ukwaziswa okufanayo. Njengomphathi othembekile, insali egcotshiwe iyaqhubeka inikeza abafundi abanokwazisa “isabelo sabo sokudla [okungokomoya] ngesikhathi sakho.” (Luka 12:42) Phakathi no-1990, oFakazi BakaJehova babika ukuthi bahambisa izikhokhelo ezintsha zalabomagazini ababili ezingu-2 968 309, ukwanda ngamaphesenti angu-22,7 kunango-1989.
Injabulo Iyanda
11. (a) Yiluphi ubizo olwadluliselwa kubantu bakaNkulunkulu eCedar Point ngo-1922? (b) Ukumemeza ngenjabulo kuye kwenatshiswa kanjani?
11 Injabulo yanda futhi njengoba abantu bakaNkulunkulu, manje ababengu-10 000 ngenani, behlangene emhlanganweni wesibili eCedar Point, ngoSeptember 1922, okwaba nabangu-361 ababhapathizwa. Enkulumweni yakhe ethi “UMbuso Wezulu Usondele,” eyayisekelwe kuMathewu 4:17, uMzalwan’ uRutherford kancane kancane wafinyelela emvuthwandaba oshukumisayo: “Izwe kumelwe lazi ukuthi uJehova unguNkulunkulu nokuthi uJesu Kristu uyiNkosi yamakhosi noMbusi wababusi. Lolu usuku oluzedlula zonke. Bhekani, iNkosi iyabusa! Nina ningamanxusa okwaziwa kwayo. Ngakho-ke, memezelani, memezelani, memezelani, iNkosi nombuso wayo.” Labo abaphubuka ekumemezeni ngenjabulo okwakuya kuzwakala kulowomhlangano baye banda ngenani kwaze kwaba yilapho ngo-1989 abangaphezu kuka-6 600 000 behlangana emihlanganweni engu-1 210 yoFakazi BakaJehova emhlabeni wonke, lapho kwabhapathizwa khona abangu-123 688.
12. (a) Iyiphi injabulo engenakulinganiswa abantu bakaNkulunkulu abahlanganyela kuyo namuhla? (b) Siyilinganisela kanjani inkonzo yethu eya kuJehova nokulalela ‘amandla ombuso’?
12 OFakazi BakaJehova bayayazisa inkululeko yabo. Ngaphezu kwakho konke, bayakuthokozela ukugcwaliseka kosuku lwanamuhla kwamazwi kaJesu: “Niyakulazi iqiniso, neqiniso liyakunikhulula.” Yeka injabulo okuyiyo ukukhululwa ezimfihlakalweni nasekukholelweni ezeni kwenkolo yamanga! Yeka injabulo engenakulinganiswa okuyiyo ukwazi uJehova neNdodana yakhe nokuba izisebenzi kanye nabo, sinethemba lokuphila okuphakade! (Johane 8:32; 17:3; 1 Korinte 3:9-11) Izinceku zikaNkulunkulu ziyakwazisa futhi lapho ‘amandla ombuso’ alelizwe, eziphila ngaphansi kwawo, ehlonipha inkululeko yazo yokumemezela ithemba elikhazimulayo loMbuso kaJehova ngaphansi kukaKristu. Ngokuzithandela, ‘zinika uKesari okukaKesari,’ kuyilapho ngesikhathi esifanayo zinika ‘uNkulunkulu okukaNkulunkulu.’—Roma 13:1-7; Luka 20:25.
13. OFakazi BakaJehova baye bayibonakalisa kanjani injabulo yabo ngokukhululwa ekucindezelekeni?
13 Nokho, uma imibuso yabantu izama ukuvimbela isibopho abanaso kuNkulunkulu, oFakazi BakaJehova baphendula njengoba abaphostoli baphendula: “Simelwe ukulalela uNkulunkulu [njengombusi, NW] kunabantu.” Kulesosehlakalo, ngemva kokuba ababusi bekhulule labaphostoli, “basuka . . . bethokoza.” Bayibonakalisa kanjani leyontokozo? “Abayekanga ukufundisa nokushumayela ivangeli ngoJesu Kristu imihla yonke ethempelini nasemakhaya.” (IzEnzo 5:27-32, 41, 42) Ngokufanayo, oFakazi BakaJehova bosuku lwanamuhla bayathokoza lapho bethola inkululeko eyengeziwe yokuphishekela inkonzo yabo. Emazweni amaningi lapho uJehova aye wavula khona indlela, babonakalisa injabulo enkulu ngokulifakazela ngokuphelele igama likaJehova noMbuso ozayo ngoKristu Jesu.—Qhathanisa nezEnzo 20:20, 21, 24; 23:11; 28:16, 23 kuyiNW.
Ukukhuthazela Ngenjabulo
14. Lenjabulo eyisithelo somoya iyidlula kanjani leyo echazwe isichazamazwi?
14 Iyiphi lenjabulo enkulu amaKristu aba nayo? Ijule kakhulu futhi ihlala njalo ngokwengeziwe kunenjabulo yesikhashana yonqobe eMidlalweni YeOlympic. Iyisithelo somoya ongcwele kaNkulunkulu, leso uNkulunkulu asinikeza labo “abamlalelayo.” (IzEnzo 5:32) Isichazamazwi sikaWebster sichaza injabulo ‘njengejule kakhulu kunokwethaba, ecace noma ebonakala kakhudlwana kunokwenama.’ KumKristu, injabulo isho okukhulu ngisho nangaphezulu. Njengoba isekelwe okholweni lwethu, iyimfanelo enamandla neqinisayo. “Injabulo kaJehova iyinqaba yenu.” (Nehemiya 8:10) Injabulo kaJehova, ehlakulelwa abantu bakaNkulunkulu, ikudlula kude lé ukujabula kwangaphandle abantu abakuthola ezinjabulweni zenyama nezezwe.—Galathiya 5:19-23.
15. (a) Ngokwalokho amaKristu athembekile aye abhekana nakho, ukukhuthazela kuye kwahambisana kanjani nenjabulo? (b) Yisho eminye imibhalo enikeza isiqinisekiso esiqinisayo ngokuqondene nokulondoloza injabulo.
15 Cabanga ngabafowethu baseUkraine. Lapho ‘amandla ombuso’ edingisela izinkulungwane zalaba eSiberia ekuqaleni kwawo-1950, babhekana nobunzima obukhulu. Kamuva, lapho umbuso ubaxolela, babonga kodwa akubona bonke abaphindela ezweni ababevela kulo. Ngani? Imisebenzi yabo eMpumalanga yabakhumbuza uJakobe 1:2-4: “Bazalwane bami, nxa nehlelwa yizilingo ngezilingo, anothi kungukuthokoza kodwa, nazi ukuthi ukuvivinywa kokukholwa kwenu kuveza ukukhuthazela.” Babefuna ukuqhubeka bekhuthazela kulokho kuvuna okujabulisayo, futhi yeka ukuthi kuye kwaba injabulo engakanani emihlanganweni yamuva yoFakazi BakaJehova ePoland ukwamukela oFakazi abavela empumalanga ekude kangangasemiphakathini yasogwini lwasePacific. Ukukhuthazela nenjabulo kuye kwahambisana ukuze kukhiqizwe lesithelo. Ngempela, sonke esikhuthazela ngenjabulo enkonzweni kaJehova singathi: “Nokho mina ngiyakuthokoza ngoJehova, ngijabulele uNkulunkulu wokusindiswa kwami. UJehova, iNkosi yami, ungamandla ami.”—Habakuki 3:18, 19; Mathewu 5:11, 12.
16. Izibonelo ezinhle zikaJeremiya noJobe kufanele zisikhuthaze kanjani emsebenzini wethu wasensimini?
16 Nokho, singayilondoloza kanjani injabulo yethu lapho sifakaza phakathi kwabaphikisi abanamakhanda alukhuni? Khumbula ukuthi abaprofethi bakaNkulunkulu bahlala benombono wenjabulo ngaphansi kwezimo ezinjalo. UJeremiya wathi lapho ebhekene nokulingwa: “Amazwi akho afunyanwa, ngawadla; amazwi akho aba-ngukujabula kimi nokuthokoza kwenhliziyo yami, ngokuba ngibizwa ngegama lakho, Jehova Nkulunkulu-Sebawoti.” (Jeremiya 15:16) Yeka ilungelo okuyilo ukubizwa ngegama likaJehova nokufakazela lelogama! Isifundo sethu somuntu siqu senkuthalo nokuhlanganyela ngokugcwele emihlanganweni yobuKristu kuyasakha ukuba siqhubeke sithokoza eqinisweni. Injabulo yethu iyobonakala ekuziphatheni kwethu ensimini nasekumamathekeni kwethu koMbuso. Ngisho nangaphansi kokulingwa okubuhlungu, uJobe wayengathi ngabaphikisi bakhe: “[Ngangimamatheka nabo—babengenakukukholelwa, NW]; ukukhanya kobuso bami kabakufiphazanga.” (Jobe 29:24) NengoJobe othembekile, akudingeki sidangale lapho abaphikisi besihleka usulu. Masiqhubeke simamatheka! Ubuso bethu bungabonakalisa injabulo yethu futhi kanjalo benze abantu balalele.
17. Ukukhuthazela okuhambisana nenjabulo kungaba kanjani nezithelo?
17 Njengoba sihlanganisa insimu ngokuphindaphindiwe, ukukhuthazela kwethu nenjabulo kungase kukhange abantu abathambekele ekulungeni futhi kubakhuthaze ukuba bahlole ithemba elikhazimulayo esinalo. Yeka ukuthi kuyinjabulo kanjani ukuqhuba izifundo zeBhayibheli nabo njalo! Futhi njengoba bengenisa ezinhliziyweni zabo amaqiniso ayigugu eZwi likaNkulunkulu, yeka injabulo esiba nayo njengoba ekugcineni beba abangane bethu enkonzweni kaJehova! Khona-ke siyakwazi ukusho lokhu, njengoba umphostoli uPawulu atshela ababesanda kukholwa osukwini lwakhe: “Ngokuba liyini ithemba lethu, nokuthokoza, nomqhele wokuzibonga phambi kweNkosi yethu uJesu Kristu ekufikeni kwakhe, kungeyinina na? Ngokuba nina niludumo lwethu nokuthokoza kwethu.” (1 Thesalonika 2:19, 20) Yiqiniso, injabulo eyanelisayo itholakala ekuholeleni abasha eqinisweni leZwi likaNkulunkulu nasekubasizeni ukuba babe oFakazi abazinikezele nababhapathiziwe.
Injabulo Esekelayo
18. Yini eyosisiza ukuba sibhekane nezilingo ezihlukahlukene zosuku lwanamuhla?
18 Ekuphileni kwethu kwansuku zonke, izimo eziningi zingase zidinge ukukhuthazela. Ukugula emzimbeni, ukucindezeleka, ubunzima bezomnotho zingezimbalwa zazo. UmKristu angayilondoloza kanjani injabulo yakhe ukuze abhekane nezilingo ezinjalo? Lokhu kungenziwa ngokuya eZwini likaNkulunkulu ukuze athole induduzo nesiqondiso. Ukufunda noma ukulalela amakhasethi okufundwa kwencwadi yamahubo kunganikeza ukuqabuleka okukhulu esikhathini sesilingo. Futhi phawula iseluleko esihlakaniphile sikaDavide: “Phonsa phezu kukaJehova umthwalo wakho, uzakukuphasa; akayikuvuma naphakade ukuba olungileyo azanyazanyiswe.” (IHubo 55:22) Ngempela uJehova ‘ungumuzwi wemikhuleko.’—IHubo 65:2.
19. NjengoDavide noPawulu, yikuphi ukuqiniseka esingaba nakho?
19 Inhlangano kaJehova, ngezincwadi zayo nangabadala bayo bamabandla, ihlala ikulungele ngaso sonke isikhathi ukusisiza, thina bantu ababuthakathaka, ukuba silwisane nezinkinga zethu. Ngothando uDavide weluleka: “Nikela indlela yakho esandleni sikaJehova, umethembe; yena uzakukwenza.” Wayengathi futhi: “Kade ngimusha, manje sengimdala; angizange ngibone olungileyo eshiyiwe nenzalo yakhe iphanza ukudla.” Ngokuhlanganyela nebandla lobuKristu, siyoqaphela ukuthi “ukusindiswa kwabalungileyo kuvela kuJehova; uyinqaba yabo esikhathini sokuhlupheka.” (IHubo 37:5, 25, 39) Ngaso sonke isikhathi masilandele iseluleko sikaPawulu: “Ngakho asidangali, . . . [kuyilapho] singabheki okubonwayo kodwa okungabonwayo; ngokuba okubonwayo kungokwesikhashana, kepha okungabonwayo kungokwaphakade.”—2 Korinte 4:16-18.
20. Yini esiyibonayo ngeso lokholo, futhi lokhu kusishukumisa kanjani?
20 Ngamehlo ethu okholo, singasibona isimiso esisha sikaJehova esesiseduze. Yeka ukuthi kuyoba nenjabulo kanye nezibusiso okungenakuqhathaniswa kangakanani lapho! (IHubo 37:34; 72:1, 7; 145:16) Lapho silungiselela lesosikhathi esikhazimulayo, masilalele amazwi eHubo 100:2: “Mkhonzeni uJehova ngokujabula, nisondele ebusweni bakhe ngokuhuba kwentokozo.”
[Umbhalo waphansi]
a Ngokuqondene “nobukhulu bama-Aryan,” iNew York Times kaFebruary 17, 1940, yacaphuna ilungu lebhodi yabaphathi elingumKatolika laseYunivesithi YaseGeorgetown lithi “lalizwe uAdolf Hitler ethi uMbuso WamaRoma Ongcwele, owawungumbuso wamaJalimane, kumelwe umiswe kabusha.” Kodwa isazi-mlando uWilliam L. Shirer sichaza umphumela: “UHitler waqhosha ngokuthi uMbuso Wesithathu owasungulwa ngoJanuary 30, 1933, wawuyobusa iminyaka eyinkulungwane, futhi enkulumweni yobuNazi wawuvame ukubizwa ngokuthi ‘uMbuso Weminyaka Eyinkulungwane.’ Wathatha iminyaka eyishumi nambili nezinyanga ezine.”
Ekubukezeni:
◻ Yikuphi ukunqotshwa kobandlululo lohlanga okujabulisayo okukhona namuhla?
◻ Yini eyabangela abantu bakaNkulunkulu basendulo ukuba bahlabelele futhi bamemeze ngenjabulo?
◻ Injabulo yeqiniso iye yanda kanjani ezikhathini zanamuhla?
◻ Ukukhuthazela nenjabulo kuhambisana kanjani?
◻ Singayisekela kanjani injabulo yethu?