Ukuqondisisa Izindaba
Ongqingili—Baya-lingana Phambi KukaNkulunkulu?
Ezweni laseQueensland eAustralia, izenzo zobungqingili—ngisho nangasese ngabalingane abavumelene—azikho ngokomthetho. Muva nje, iqembu lesonto elikhulu kulelozwe lamelana ngokuqinile nemithetho enjalo futhi lifuna ukuthi ubungqingili bube ngokomthetho.
Ngokwephephandaba iCourier-Mail, leJoint Church Social Justice Group yakhiwe amalungu aseSheshi, eRoma Katolika, eLuthela, eBaptist, amasonto oBunye namaQuakers (Inhlangano Yabangane). Lizisholo ukuthi imithetho ekhona ngokumelene nongqingili isekelwe ekungazini nasobandlululweni, leliqembu laphawula: “Ukusekela kwethu lesimo kusekelwe enkolelweni yokuthi bonke abantu bayalingana phambi kukaNkulunkulu futhi kufanele balingane phambi komthetho. Sikholelwa ukuthi umuntu ongungqingili ungumuntu ofanayo nowobulili obuhlukile.”
Nakuba kuyiqiniso ukuthi bonke abantu bazalwa belingana, uyini umbono kaNkulunkulu ngobungqingili? EBhayibhelini, zonke izenzo zobungqingili ziyalahlwa njengezingesizo ezemvelo nanjengezifanelwe ulaka lukaNkulunkulu, ziholela ekufeni. Lokhu kwakungelona iqiniso kwaIsrayeli wasendulo kuphela kodwa futhi nangezikhathi zamaKristu. (Levitikusi 18:22; Roma 1:26, 27) Ukulahlwa kucacile futhi akudingi kuchazwa: “Nazifebe, . . . nazihlobongi, nabesilisa abalalanayo . . . abayikulidla ifa lombuso kaNkulunkulu.”—1 Korinte 6:9, 10.
Kunokubanga umsindo ngokufuna ukuba ubungqingili bube ngokomthetho, amaKristu eqiniso anxusa labo abagqilazwe yilomkhuba wokwedelela uNkulunkulu ukuba bagqashule kuwo ngokuphendukela eZwini likaNkulunkulu leqiniso.
Izingozi Zegazi Ziyaqhubeka
Ukuhlola kwamuva kwembula ukuthi iRed Cross yaseMelika iye yenza amakhulukhulu amaphutha ekusingatheni igazi elinezifo. Cishe isigamu sezingxenye eziyizigidi ezingu-12 kuya kwezingu-15 zegazi elisetshenziswa eUnited States minyaka yonke linikezwa yiRed Cross yaseMelika. Uma kukhululwa noma yiziphi izingxenye zegazi okutholakala ukuthi zinezifo, kumelwe kwaziswe iFDA (Food and Drug Administration [Ukuphathwa Kokudla Nemilaliso]), eyinxusa likahulumeni wamazwe ngamazwe. Nokho, iNew York Times iphawula ukuthi umhloli kahulumeni wamazwe ngamazwe uphikisa ngokuthi ezikhathini eziningi iRed Cross yehlulekile ukukwenza lokhu. Uthi ukuhlolwa kwemibhalo yabo egciniwe kwembula izehlakalo ezingu-380 lapho ukusingathwa kabi kwegazi elinezifo kungazange kubikwe kuhulumeni. Ngaphezu kwalokho, ezigulini ezingu-228 ezinengculaza okungenzeka ukuthi yabangelwa ukumpontshelwa igazi, umhloli wathola ukuthi iRed Cross yabika ezingu-4 kuphela kuyiFDA.
Nakuba abaningi besalibheka njengelisindisa ukuphila, igazi elimpontshelwe liyimbangela yokufa kwezinkulungwane unyaka ngamunye. Nokho, abakhulekeli beqiniso bakaNkulunkulu, lapho belalela imithetho yakhe ngokuphathelene negazi, ngesikhathi esifanayo bayavikeleka ezingozini zokumpontshelwa igazi. UNkulunkulu wayala: “Akumelwe udle igazi; lithulule emhlabathini njengamanzi . . . ukuze kukuhambele kahle wena nabantwana bakho emva kwakho, ngoba uyobe wenza okulungile.”—Duteronomi 12:23-25, New International Version.
Upapa Enkonzweni Yezempi
Ngonyaka odlule upapa wahlangana namasosha asafunda angaphezu kuka-7 000 esikhungweni sezempi saseRoma esiseCecchignola. Kulesosikhathi abaphathi abane abasebasha abamelele isikhungo sezempi babuza upapa ukuthi inkonzo yezempi iyahambisana yini nonembeza wobuKristu. Ngokuthé ngqo, ngokwephephandaba laseDolobheni leVatican iL’Osservatore Romano, babuza: “Ingabe umuntu angaba umKristu othembekile futhi, ngesikhathi esifanayo, abe isosha elithembekile?” Ephendula upapa wathi: “Abukho ubunzima obuyisisekelo noma ihaba ekuhlanganiseni umsebenzi wobuKristu nalowo wenkonzo yezempi. Uma sibheka kulokhu okushiwo kamuva ngeso elihle, kungabhekwa njengento enhle, efanelekile nekahle.”
Nokho, ingabe umbono onjalo uyahambisana nokungathathi-hlangothi kwamaKristu okuqala? Encwadini yakhe ethi An Historian’s Approach to Religion, uArnold Toynbee ucaphuna indaba kaMaximilianus, umfel’ ukholo wekhulu lesithathu leminyaka, okwathi lapho esongelwa yinkantolo yamaRoma ngokufa ngokwenqaba ukubuthelwa empini, wathi: “Ngeke ngikhonze. Ninganginquma ikhanda, kodwa ngeke ngiyikhonze imibuso yaleliZwe; ngizokhonza uNkulunulu wami.” Kungani, nakuba ayebhekene nokufa okuqinisekile, enqaba ukuhlanganyela enkonzweni yezempi? Ngoba wabheka abalandeli beqiniso bakaJesu ‘njengabangesibo abezwe’ njengoba nje noJesu wayengesiye owezwe. Ngaphezu kwalokho, wabheka impi yobuKristu njengengokomoya, ngokuvumelana namazwi kamphostoli uPawulu: “Kasilwi ngokwenyama, ngokuba izikhali zethu zokulwa kasizo ezenyama.”—Johane 17:16; 2 Korinte 10:3, 4.