Ingabe Ubheka Ukubonakala Kwangaphandle Kuphela?
UHEINZ, osemusha owayeqhutshwa inzondo, waceba ukubulala usingayise. Ngokujabulisayo, akabanga nasibindi sokukwenza. Eminyakeni embalwa kamuva wanquma ukuzibulala kodwa akazange akwenze nalokho. Wahileleka ekwebeni nasekushushumbiseni izidakamizwa, agqunywa ejele ngenxa yakho. Khona-ke umshado wakhe wabhidlika.
Namuhla uHeinz akasewona umlutha wezidakamizwa. Uziphilisa ngendlela yokwethembeka. Unomshado ojabulisayo nobuhlobo obuhle nosingayise. Yini eyenza lomehluko? Waqala ukutadisha iBhayibheli noFakazi BakaJehova. Kancane kancane, umbono wakhe ngokuphila waqala ukushintsha.
Akungabazeki ukuthi, abaningi ababazi uHeinz ngaphambili babemthatha njengomuntu ongenakushintsha. Kuyajabulisa ngabantu abaningi abanjengaye ukuthi, uNkulunkulu akazange amdele njengongenakuguquka. Kungani engamdelanga? Isizathu siwukuthi nje: ‘UJehova akabukisi okomuntu; umuntu ubheka okusemehlweni, kepha uJehova ubheka okusenhliziyweni.’—1 Samuweli 16:7.
Lowo umehluko owodwa omkhulu phakathi komuntu noNkulunkulu. Sithambekele ekwahluleleni ngokubonakala kwangaphandle. Siyasho nokusho ukuthi “okubone kuqala yikhona okungalibaleki.” Ngamanye amazwi, sithambekele ekubukeni abantu ngokusekelwe ekusabeleni kwabo kokuqala. Kodwa uNkulunkulu, ngenxa yokuthi ukwazi ukufunda inhliziyo, ulungile futhi akakhethi. Futhi kungalesosizathu athumela iNdodana yakhe, uJesu Kristu, emhlabeni ukuze “abantu bonke basindiswe, bafinyelele ekulazini iqiniso.” (1 Thimothewu 2:4) Maqondana nalokhu, amaKristu azinikezele anelungelo lokuba “yizisebenzi kanye noNkulunkulu” ngokushumayela ngenkuthalo izindaba ezinhle zoMbuso kaNkulunkulu kuso sonke isintu. (1 Korinte 3:9) Nokho, kunezinto amaKristu angenakukwazi ukuzenza—awakwazi ukufunda izinhliziyo zabantu. Ngakho-ke kumelwe angakhethi futhi agweme ukubandlulula ngokubonakala kwangaphandle.
Umfowabo kaJesu ngamzali munye uJakobe wayeyazi lengozi ebandleni lokuqala lobuKristu. Wathi: “Bafowethu, njengoba nikholelwa eNkosini yethu uJesu Kristu, obusa ngenkazimulo, ningalokothi nibonise ubandlululo. Ngokwesibonelo, kungase kungene izivakashi ezimbili endaweni yenu yokukhulekela, esinye sibe indoda egqoke kahle efake izindandatho zegolide, nesinye sibe indoda empofu egqoke amanikiniki. Ake sithi niyinaka ngokukhethekile leyondoda egqoke kahle . . . Aniboni ngani ukuthi niyakhetha futhi nahlulela ngezindinganiso ezingeyizo?” Ngokwalesisekelo, ingabe ngezinye izikhathi sibahlulela ngokungeyikho abantu abeza eHholo LoMbuso ngokokuqala?—Jakobe 2:1-4, The New English Bible.
UJesu Ubeka Isibonelo
UJesu akabhekanga abantu njengabayizoni ezingenakuphenduka, kodwa njengabantu ngokunokwenzeka abaqotho abazimisele ukushintsha uma benikezwa usizo oludingekile nesikhuthazo esifanele. Yingakho ‘azinikela waba-yinhlawulo yabo bonke.’ (1 Thimothewu 2:6) Emsebenzini wakhe wokushumayela, akabhekanga muntu wenhliziyo enhle njengongafanele ukuthintwa, ongafanele ukunakwa. Umbono wakhe ngabantu awuvezanga mizwa yokuqhosha neyokuzishaya olungile.—Luka 5:12, 13.
Yeka ukuthi wayengafani kanjani nabaFarisi, esifunda ngabo ukuthi: “Khona ababhali babaFarisi bembona edla nezoni nabathelisi bathi kubafundi bakhe: Yini ukuba adle nabathelisi nezoni na? UJesu ekuzwa lokho wathi kubo: Abaphilileyo abadingi inyanga, ngabagulayo bodwa; kangizelanga ukubiza abalungileyo kodwa izoni.”—Marku 2:16, 17.
Yebo, lokhu akusho ukuthi uJesu wayezithethelela izenzo zokungathembeki nezimbi ezazenziwa yilezoni nabathelisi. Kodwa wayazi ukuthi abantu bangabambeka endleleni embi yokuphila, mhlawumbe bengazi ngisho nokwazi noma ngenxa yezimo okunzima ukuzilawula. Ngakho-ke wabonisa ukuqonda, ‘eba-nesihe ngabo, ngokuba babenjengezimvu ezingenamalusi.’ (Marku 6:34) Ngothando wenza umehluko phakathi kwezenzo zabo ezimbi nezinhliziyo zabo okwakungenzeka ukuba zinhle.
Ekusebenzelaneni nabalandeli bakhe, uJesu futhi wayebheka ngalé kokubonakala kwangaphandle. Babeyizoni ngokuvamile ezazenza amaphutha, kodwa uJesu wayengeyena umuntu ongacabangeli ofuna amaphutha amancane, ebathethisela iziphambeko ezincane ngaso sonke isikhathi. Wayazi ukuthi izinhloso zabo zazizinhle noma, njengoba singase sisho namuhla, inhliziyo yabo yayisendaweni efanele. Ababekudinga kwakuwusizo nesikhuthazo; ekunikezeni lokhu, uJesu akazange agodle. Akungabazeki ukuthi, wayebheka abantu ngendlela uNkulunkulu ababheka ngayo. Ingabe siyazama ukulingisa isibonelo sakhe esihle?
Ingabe ‘Wahlulela Ngokwahlulela Okulungileyo’?
Ngesinye isikhathi uJesu wabhekana neqembu labakhonondi ababezishaya abalungile elalicasukile ngenxa yokuthi wayenze isenzo sokuphulukisa ngeSabatha. Walitshela: “Ningahluleli ngokwamehlo, kepha yahlulelani ukwahlulela okulungileyo.” Kungani lingajabulanga ngokubona uJesu njengomenzi wezimangaliso ‘owayephulukise umuntu’ esikhundleni sokuba ‘lithukuthele’ futhi limbheke njengomeqi womthetho weSabatha? Ngokwahlulela ngokubonakala kwangaphandle, labonisa izisusa zalo ezimbi. Lembula ukuthi ukwahlulela kwalo kungokulungile ngokusho kwalo kanti akulungile.—Johane 7:23, 24.
Singalenza kanjani thina mhlawumbe iphutha elifanayo? Ngokungajabuli lapho umuntu ophendukayo ebuyela ebandleni noma lapho umuntu osezweni efunda iqiniso futhi eqala ukuzuza ekwelashweni okungokomoya. Ngezinye izikhathi singase sahlulele abantu ngokugqoka noma ukuzilungisa kwabo okungamukeleki futhi sibabheke njengabangasoze babe oFakazi. Nokho, abaningi ababekade bengamahippie nabanye ababenezindlela zokuphila ezingamukeleki ekugcineni baye baba oFakazi BakaJehova abangamaKristu. Ngesikhathi abanjalo bematasa benza ushintsho, asifuni ukuvumela ‘ukwahlulela ngokubonakala kwangaphandle’ kusenze singasiboni isimo sabo esihle senhliziyo.
Yeka ukuthi kungcono kanjani, futhi ngokuvumelana nesibonelo esihle sikaJesu, ukubathandazela nokubanikeza usizo olungokoqobo ukuze bafinyelele ukuvuthwa kobuKristu! Kungase kubonakale kunzima ukubona kubo into ejabulisayo. Kodwa uma uJehova ebadonsela kuye ngoKristu, singobani thina ukuba sibenqabe ngesisekelo sezindinganiso zethu siqu ezilinganiselwe? (Johane 6:44) Ukwahlulela othile ngokuzishaya abalungile, kanti asiyazi inhliziyo nezimo, kungasibeka endleleni yokwahlulelwa okungekuhle.—Qhathanisa noMathewu 7:1-5.
Kunokuba sibahlulele kabi abanjalo abasha, kufanele sibasize, sibakhuthaze, futhi sibakhuze ngokubabekela isibonelo. Nokho, nakuba sibonisa umusa, ngokuqinisekile akufanele sibathande ngokweqile abasha okungenzeka badumile ezweni. Lokho bekuyoba uhlobo oluthile lokukhetha. Futhi bekuyoba uphawu lokuthi asivuthiwe. Ngokuqondene nalowomuntu ngokwakhe, ingabe ukumdumisa kwethu bekungamsiza ukuba azithobe? Noma kunalokho, bekungamenza abe namahloni?—Levitikusi 19:15.
Ungalindeli Okungaphezu Kokulindelwa UNkulunkulu
Umbono wethu ngabanye ulinganiselwe kakhulu uma uqhathaniswa nokaJehova, ohlola inhliziyo. (1 IziKronike 28:9) Ukukuqonda lokhu kuyosivimbela ekubeni sibe abaFarisi bosuku lwanamuhla, abazishaya abalungile, sizama ukucindezela abantu ukuba bangene esimweni sethu siqu esenziwe abantu sokulunga ukuze bafanelane nalokho esicabanga ukuthi kulungile. Uma sizama ukubheka abantu njengoba bebhekwa uNkulunkulu, ngeke sifune okwengeziwe kubo kunokuba enza. Ngeke ‘seqise kokulotshiweyo.’ (1 Korinte 4:6) Lokhu kubalulekile ikakhulukazi ngabadala abangamaKristu ukuba bakukhumbule.—1 Petru 5:2, 3.
Singafanekisa lokhu endabeni yokugqoka. Imfuneko yeBhayibheli—imfuneko kaNkulunkulu—iwukuthi ukugqoka komKristu kumelwe kube okucocekile nokuhlanzekile, okulungiswe kahle futhi okungabonisi ukuntuleka ‘kwesizotha nokuqonda.’ (1 Thimothewu 2:9; 3:2) Khona-ke, ngokusobala abadala kwelinye ibandla ‘beqisa kokulotshiweyo’ eminyakeni embalwa edlule ngokufuna ukuthi zonke izikhulumi zasobala ebandleni lakubo zigqoke amayembe amhlophe, ngisho nakuba imibala ethi ayibe-mhlophe yayamukelwa ngokuvamile kulelozwe. Izikhulumi eziyizivakashi ezazifika zigqoke iyembe elinemibala zazicelwa ukuba zikhumule zigqoke elinye lamayembe ambalwa amhlophe ayegcinwa eHholo LoMbuso egcinelwa izimo ezinjalo eziphuthumayo. Yeka ukuthi kumelwe siqaphe kanjani ukuze singaphoqeleli izinto esizithandayo kwabanye! Futhi yeka ukuthi iseluleko sikaPawulu sifaneleka kanjani: “Ukucabangela kwenu makwaziwe yibo bonke abantu”!—Filipi 4:5, NW.
Imiphumela Emihle Yokubheka Ngalé Kokubonakala Kwangaphandle
Ukuqonda ukuthi asinakukwazi ukuhlola izinhliziyo zabantu kuyosisiza ukuba silondoloze ubuhlobo obungcono nabantu abasizungezile, kokubili ngaphakathi nangaphandle kwebandla lobuKristu. Kuyosisiza ukuba sicabange ngendlela eqondile ngabanye, singazingabazi izisusa zabo, “ngokuba nathi kade sasiyiziwula, abangalaleliyo, abadukiswayo, sikhonza izinkanuko nokutamasa okuyizinhlobonhlobo.” (Thithu 3:3) Sikuqaphela lokhu, siyozimisela ukushumayela kubo bonke abantu, ngisho nakulabo, ngokubonakala kwangaphandle, abangase babonakale bengafaneleki. Kakade, isinqumo sokwamukela noma sokwenqaba iqiniso singesabo. Umthwalo wemfanelo wokulishumayela kubo bonke abantu ngowethu.
OFakazi BakaJehova abaningi, njengoHeinz, bayajabula ngokuthi bamukelwa ebandleni lobuKristu abazalwane nodade ababheka ngalé kokubonakala kwangaphandle futhi bangahlulela ngabakubone kuqala.
Cabanga ngoFrank, oweza ngolunye usuku lwangeSonto eHholo LoMbuso loFakazi BakaJehova eningizimu Jalimane. Ababekhona babonani? Insizwa eyidlabha enentshebe nezinwele ezifika emahlombe, igqoke izingubo ezingcolile, eyayidume ngokuthi ihlala ezindaweni zotshwala zendawo nangokuthi iyixhwele likagwayi—umuntu owayeshiye intombi yakhe nabantwana babo abangamawele. Nakuba kunjalo, wamukelwa ngokufudumele kulowomhlangano. Wahlabeka umxhwele kakhulu kangangokuthi wabuya ngesonto elilandelayo. Base bebonani? Insizwa ezilungise kahle egqoke izingubo ezihlanzekile. Esontweni lesithathu babona insizwa eyayingasabhemi, kulokhu ihamba nentombi yayo nabantwana babo ababili. Ngosuku lwangeSonto lesine, babona insizwa nowesifazane osemusha ababesanda kuthola incwadi yomshado ukuze benze ubuhlobo babo bube semthethweni. Ngosuku lweSonto lesihlanu, babona insizwa eyayisigqashule zonke izibopho nenkolo yamanga. Namuhla, eminyakeni emine kamuva, babona, njengoba kubika omunye woFakazi BakaJehova, “umkhaya onikeza umbono omuhle kangangokuthi ungacabanga ukuthi ubulokhu ungabafowethu iminyaka eminingi.”
Ubunjalo bencwadi abubonakali esembozweni sayo noma obendlu kuyingaphambili layo. Ngokufanayo, ubunjalo bangempela bomuntu abubonakali ekubonakaleni kwangaphandle. AmaKristu azama ukubheka abantu njengoba kwenza uNkulunkulu ngeke ahlulele ngakubone kuqala. UNkulunkulu ubheka “umuntu osithekileyo wenhliziyo,” futhi singabonga ngalokho.—1 Petru 3:3, 4.