Liyini Ithemba Ngabafile?

UMKHAYA osemusha wawuya eholidini ogwini olusempumalanga lwaseNingizimu Afrika. Abazali benkosikazi babekwenye imoto eyayingaphambili. Ngokungazelele, ithayi laqhuma. Lapho besalungiselela ukulishintsha eceleni komgwaqo, omunye umshayeli odakiwe waphonseka kulezimoto zombili. Ikhehla nomkalo bafa. Umyeni osemusha wafa ezinsukwini ezimbalwa kamuva. Umkakhe waphuka izimbambo futhi walimala kwezinye izindawo. Ingane yakhe yaba nokulimala kwengqondo okukhubazayo.

Yeka inhlekelele ngalomkhaya oneshwa! Lapho uCarolann, udadewabo wenkosikazi eseyintsha, ezwa lezozindaba, wazizwa endikindiki. Izinhlekelele ezinjengalena zenzeka kuwo wonke amazwe. Izihlobo nabangane abalusizi ngokuvamile bayazibuza, ‘Ingabe abafile bafé ngempela,’ noma . . .

‘Ingabe Abafile Bayaphila?’

Cishe zonke izinkolo zifundisa ukuthi umphefumulo awufi. Ngenxa yalokho, abalandeli bazo, bakholelwa ukuthi labo abafayo abafile ngempela kodwa basaphila ezulwini, esihlanzweni, noma esihogweni. Njengoba kufundiswa emasontweni amaningi, labo abasesihogweni bahlupheka kabuhlungu phakade. Kodwa ingabe uNkulunkulu wothando ngempela angabangela ukuhlupheka okunjalo ezidalweni zakhe?—1 Johane 4:8.

Bekungabonakala engenakukwenza, kodwa singaqiniseka kanjani? Cabangela ngokunakekela ubufakazi beBhayibheli obulandelayo. “UJehova uNkulunkulu wambumba umuntu ngomhlabathi, waphefumulela emakhaleni akhe umoya wokuphila; umuntu waba-kanjalo umphefumulo ophilayo.” (Genesise 2:7) Ingabe lamazwi aphefumlelwe athi umuntu wokuqala, uAdamu, wanikwa umphefumulo? Cha, waba ngumphefumulo, umuntu ophilayo. Lokhu kuqinisekiswa umphostoli uPawulu, owabhala: “Umuntu wokuqala, uAdamu, njengoba kusho umbhalo, waba ngumphefumulo ophilayo.” UPawulu wayecaphuna kuGenesise.—1 Korinte 15:45, The Jerusalem Bible.

Ingabe umphefumulo womuntu ungafa? Umprofethi uHezekeli wabhala: “Yonke imiphefumulo ingeyami, umphefumulo kayise njengomphefumulo womntwana; ingeyami; umphefumulo owonayo uyakufa.” (Hezekeli 18:4, 20; UmShumayeli 9:5, 10) Ngokusobala, uma umphefumulo ufile, khona-ke umuntu akazi lutho, kanjalo akunakuba ukuthi uyahlupheka. Enkulumweni yakhe yokuqala yeningi ngemva kwePentekoste lika-33 C.E., umphostoli uPetru wathi: “Kuyakuthi wonke umuntu [“umphefumulo,” NW] ongayikumlalela lowomprofethi [uJesu] uyakuchithwa kubantu.” Ngakho umphefumulo uyafa.—IzEnzo 3:23.

Ingabe Abafile Bayophinde Baphile?

Bonke labo abakholelwa ukuthi iBhayibheli liqinisile bayazi ukuthi uJesu wafa futhi wavuswa ngosuku lwesithathu. (IzEnzo 10:39, 40) Lokhu kwakungenzeka kanjani? Ngamandla omoya ongcwele kaNkulunkulu.

Ingabe ukuvuka kukaJesu kwagcina ngaye? Cha. Njengoba uPawulu abhalela ibandla laseKorinte: “UKristu uvusiwe kwabafileyo, engulibo lwabaleleyo. Ngokuba lokhu ukufa kweza ngomuntu, ukuvuka kwabafileyo nakho kweza ngomuntu . . . uKristu.” (1 Korinte 15:20-22) Ngakho-ke, abaningi bayovuswa kwabafileyo. UJesu futhi wathi: “Ningamangali ngalokho, ngokuba isikhathi siyeza, lapho bonke abasemathuneni beyakulizwa izwi layo, abenzé ukulunga baphumele ekuvukeni kokuphila.” (Johane 5:28, 29) Lokhu kunikeza isiqinisekiso sokuvuka kwezigidi.

Uma incazelo engenhla iye yavusa isithakazelo sakho ngovuko, ungase ubuze, ‘Obani abayovuka, futhi nini?’ Ake sicabangele leyomibuzo ebalulekile.