Ukuqondisisa Izindaba
Ithonya LobuSathane
Ngemva kokuhlola ngethonya lobuSathane emculweni werock nonesigqi esinamandla, umhleli wephephandaba laseToronto uTom Harpur ubhala lokhu kuyiSunday Star: “Kumelwe nginikeze isixwayiso esinamandla ngalokhu okwenzekayo. . . . Angikaze ngiyibone into eyonakele kangaka. Izingoma zigcwele ubuhlanya, ukubuswa amademoni, igazi, izinhlamba, ubudlova bazo zonke izinhlobo, kuhlanganise nokudlwengula, ukuzikhubaza, ukubulala, nokuzibulala. Ukufa nokucekela phansi, izibikezelo zokubi, ukwenqatshwa kwakho konke okuhle nokwamukelwa kwakho konke okubi—lokhu kuyizinto okuculwa ngazo.”
Okuhambisana nokwanda komculo wobuSathane kungukwanda kwezenzo zenkolo zobuSathane eUnited States naseCanada. Ibika ngomhlangano wamaphoyisa wamuva eOntario, iGlobe and Mail, iphephandaba laseCanada, ithi izinkolo zobusathane ‘zihileleké emihlatshelweni yezilwane, ukungahlonishwa kwamathuna nokuxhashazwa kwezingane okuyisiko.’ Umseshi uJames Bradley waseWashington, D.C., wahlobanisa amakhulu amacala okuxhashazwa kwezingane nobugebengu obungokwesiko bobuSathane. Njengoba ecashunwe kuyiGlobe and Mail, umseshi uBradley wenezela ukuthi eminyakeni emihlanu edlule, kuye kwaqhamuka imibiko ngamasiko okuxhashazwa kwezingane ivela “emakhulwini ezingane, emakhulwini ezisebenzi zezenhlalakahle nakothisha.”
Ebhekisela “ezinsukwini zokugcina” zesimiso sezinto esibi esikhona manje, umphostoli uJohane wabhala: “USathane wehlele kini enolaka olukhulu, azi ukuthi unesikhathi esifushane.” (2 Thimothewu 3:1; IsAmbulo 12:12) Ithonya likaSathane, ‘umbusi wamandla omkhathi,’ lingené ngisho nasemculweni wezwe othandwayo. (Efesu 2:2) Yingakho umphostoli uPawulu ayala amaKristu akanye nawo ukuba ‘amelane namaqhinga kaSathane.’—Efesu 6:11.
“Ongalawuleki”
Lapho umsubathi wesifazane oneminyaka engama-28 ubudala eshaywa futhi edlwengulwa eCentral Park yaseDolobheni LaseNew York, izigidi zabantu zazithukile futhi zesaba. Isizathu sasiyini? Lokhu kuhlasela kobulwane nokonya kwakwenziwe iqembu labeve eshumini “elikwenama kwalo okuhlazisayo ngomphumela wesenzo salo nokungabi nandaba kwalo nobuhlungu elibubangele kwakusabisa ngempela,” kubika iNew York Post. Enye intsha eyayihileleke kulobugebengu obusabekayo kwabikwa ukuthi yayincane kangangokuthi yayineminyaka eyi-14 ubudala. Eshaqwe yilokhu kuhlasela, omunye umlobi wePost wavuma ukuthi izwe liye laba “umphakathi ongaqeqeshiwe, ozitikayo, oluthwe izidakamizwa, obuswa ubulili, onemikhaya ewohlokile, nohlanyiswa ubudlova ongalawuleki futhi umbuzo uwukuthi: kungani?”
Eqinisweni, lesisizukulwane sobudlova obungenakuqhathaniswa siyilokho kanye okwabikezelwa umphostoli uPawulu kweyesi-2 Thimothewu 3:1-5. Lapho wachaza ukuthi ‘izinsuku zokugcina’ zaziyophawuleka ngabantu ‘abanobugovu, abahahayo, abaqhoshayo, abazidlayo.’ Okubi nakakhulu, “bayoba abanenhlamba, abangabalaleli abazali, abangabongiyo, nabangayithandi inkolo; bayoba abangenamusa, abanyundeli, abanobudlova, nabanonya; bayozonda okuhle; bayoba abakhohlisayo, abangenandaba, nabakhukhumele; bayothanda injabulo kunokuthanda uNkulunkulu.” (Today’s English Version) Ingabe lelizwe elinobudlova liyohlala ‘lingalawuleki’ ngokuqhubekayo? Cha! UJesu wathi: “Nxa kuqala ukuvela lokho, lulamani, niphakamise amakhanda enu ngokuba kusondele ukukhululwa kwenu.”—Luka 21:28.