Ingabe Uyakhumbula?
Ingabe ukujabulele ukufunda omagazini bamuva beNqabayokulinda? Nokho, ake ubone ukuthi ungayiphendula yini imibuzo elandelayo:
◻ Siyini isisekelo somshado ophumelelayo?
Labo ababili kumelwe babonisane uthando, inhlonipho, nokwethembeka, beqaphela izimfanelo zomunye nomunye futhi befunda ukusibekela nokuthethelela ubuthaka bomunye nomunye.—5/15, ikhasi 15.
◻ Imithetho kaNkulunkulu eyayinikezwe uIsrayeli yamsiza kuziphi izici ukuba ahlale engcwele?
Imithetho kaJehova yasiza amaIsrayeli ukuba ahlale ehlanzekile ngokomoya, ngokokuziphatha, ngokwengqondo, ngokomzimba, nangokomthetho, lokhu kokugcina kuhlangane nokukhulekela kwabo.—6/1, ikhasi 11.
◻ Kushiwoni ngamazwi athi “inhlanzeko engokwengqondo”?
“Inhlanzeko engokwengqondo” isho umzamo oqotho ngathi ukuba sihlanzeke engqondweni ngokugxila ezintweni ‘eziyiqiniso, ezilungile, nezihlanzekile’ ‘nangokuqhubeka sizindla ngalezinto.’ (Filipi 4:8, NW)—6/1, ikhasi 16
◻ Kungani uJesu athi ukuba khona kwakhe kwakuyoba ‘njengonyazi’? (Luka 17:24)
Lapha uJesu wayebonisa ukuthi ubufakazi bokuba khona emandleni oMbuso babuyobonakala endaweni ebanzi, kwenze ukuba bonke abafisa ukububona baliqaphele leloqiniso.—6/15, ikhasi 8
◻ Kungani imikhuba emihle yobuKristu ihlobene ngokuqondile nothando lobuKristu?
Imikhuba emihle yobuKristu—indlela esisebenzelana ngayo nabanye, nokuziphatha kwethu okungumkhuba—iyisibonakaliso sokuthi sibakhathalela kangakanani abanye. Imikhuba yethu emihle ibonisa ukujula kothando lwethu ngabo. (Johane 13:35; 1 Korinte 10:24; 13:4-7)—6/15, ikhasi 14.
◻ Wenzeka nini umshado kaJesu ‘nomkakhe’ ongabalandeli abagcotshiwe abathembekile abayizi-144 000? (IsAmbulo 19:7, 8)
Lomshado uyokwenzeka ngemva kwempi yeArmagedoni nokufakwa kukaSathane kwalasha. Ngalesosikhathi uJehova uyobe ebulwele ubukhosi bakhe ngokususa emhlabeni labo ababekela ukubusa kwakhe inselele nangokususa ithonya elibi likaSathane namademoni akhe.—7/1, ikhasi 24.
◻ Ijoka lobufundi lingayiletha kanjani impumuzo, njengoba kuboniswe emazwini kaJesu akuMathewu 11:29, 30?
Njengoba uJesu engocabangelayo, kuyaphumuza ukusebenza kanye naye ngaphansi kwejoka elilodwa. Uyakucabangela ukulinganiselwa kwethu nobuthaka bethu. Futhi yeka ukuthi kuphumuza kanjani ukutshela abanye ukuthi bangaphila phakade ePharadesi!—7/15, ikhasi 20.
◻ Kuyini ‘ukuphindukuzalwa’ uJesu akhuluma ngakho kuMathewu 19:28?
UJesu lapha wabonisa ukuthi kwakuyoba khona ‘ukuphindukuzalwa’ kwezimo emhlabeni ukuze izinto zibe njengoba zazinjalo ensimini yase-Edene.—8/1, ikhasi 9.