Ukuqondisisa Izindaba
Indlu Ehlukene
UJesu wathi “nendlu, uma yahlukene yodwa,” ayinakukwazi ukuma. (Marku 3:25) Lesi isimo iUnited Church of Canada, okuyisonto lobuProthestani elikhulu kunawo wonke kulelozwe, elizithola likuso mayelana nempikiswano yobungqingili nokugcotshwa kongqingili besilisa nabesifazane njengabefundisi.
Isiphakamiso esamukelwa iSigungu Esingokomthetho sama-32 seUnited Church of Canada siyabavumela abantu abaqhuba ubungqingili ukuba basebenze njengabefundisi. NgokweThe Globe and Mail, iphephandaba laseCanada, isiphakamiso siphawula ukuthi kungakhathaliseki ukuthi yikuphi ukuthambekela abanakho ngokobulili, bonke “abazisholo ukuthi banokholo kuJesu Kristu futhi bayamlalela bamukelekile ukuba babe amalungu agcwele eSonto,” futhi “wonke amalungu eSonto ayafaneleka ukuba acatshangelelwe isikhundla sobufundisi.” Umbiko weUnited Church wamakhasi ayi-125 uthi: “Kunokuthambekela kobulili okunhlobonhlobo: ubungqingili, ubulili nabantu babo bonke ubulili, ubulili nomuntu wobulili obehlukile. Lokhu kufanele kubhekwe njengokungokwemvelo nanjengesipho esivela kuNkulunkulu.”
Ikhulumela isinqumo sesonto sokwamukela ongqingili njengabefundisi, iGlobe ichaza ukuthi “impikiswano enamandla yayiwukuvikela ukuwa kwesonto.” Imibiko yembula ukuthi, kusukela ngo-1972, isonto belilokhu lilahlekelwa amalungu kancane kancane futhi lisenkingeni ngokwezimali. Siyini isizathu? Umfundisi uJohn Tweedie ukhomba “ukufuduka okuqhubekayo kwabantu esontweni njengoba belibona lihlehla emisukeni yalo yobuKristu.” “Ngakho,” kubika iThe Post yaseCanada, “ukwamukela kwabo izinto ezinjengobungqingiii, ubulili bangaphandle kwesibopho somshado, ukukhipha isisu lapho kufuneka, nemishado echithekayo kuwukuheha isizukulwane esisakhula.”
Nokho, ingabe ukulalela uKristu kuyakuvumela ukuhlehla ezimisweni zeBhayibheli? Ngokuphambene, iZwi likaNkulunkulu Iicacile: “Ningazikhohlisi; abantu abaziphatha kabi . . . abazinikele ebungqingilini . . . akekho kulaba oyozuza uMbuso kaNkulunkulu.”—1 Korinte 6:9, 10, Today’s English Version.
Ukusebenzisa Induku
“Yeka Induku, Kodwa Phawula Imiphumela” kwakuyisihloko sendaba eyavela kuyiThe Natal Mercury, iphephandaba laseNingizimu Afrika, libalisa ngomkhuba wanamuhla wokuyeka isijeziso sokushaya abantwana ekhaya nasesikoleni. Ubani onecala ngalesimo sengqondo esishintshile mayelana nokushaya? Uprofesa Smythe, isazi sezifo zabantwana eYunivesithi YaseNatali, eNingizimu Afrika, usola ngokuqondile izazi zokusebenza kwengqondo yabantwana. “Ngokuvamile lapho umuntu ecubungula imisuka yenkinga engokomzwelo,” kuchaza uSmythe, “uthola ukuthi ushintsho esimweni sengqondo lusukela emfundisweni ephathelene nezazi zengqondo. Okokuqala zimelene ngokunamandla nanoma yiluphi uhlobo lokujezisa ngokushaya, bese zishaqiswa imiphumela yokuyekelela okuwumphumela wenkolelo yokungakhungathekisi nokungavimbeli.”
USmythe usekela ukulinganisela. “Ukweqisa ekuyekeleleni kubi njengokweqisa ekujeziseni,” uyaphawula, “kodwa iqiniso lokuthi kulula ukuqondisa umntwana ojeziswa ngokweqile kunomntwana ongajeziswa litusa ukuthambekela ohlangothini lokujezisa lapho ungabaza.” Uprofesa ugcizelela ukuthi isisusa sokujezisa ngokushaya kufanele sibe ukukhathalela kothando ngenhlala-kahle yomntwana yamanje neyesikhathi esizayo.
Iseluleko esinjalo asisisha kodwa siwukuphindela esiqondisweni seBhayibheli esingenaphutha: “Oyeka uswazi uyazonda indodana yakhe, kepha oyithandayo uyayilaya ngesineke.”—IzAga 13:24; bheka futhi izAga 23:13, 14.
Ingabe Ukugembula Akusona Isono?
Isifunda samaRoma Katolika muva nje sibe indawo yokuqala yenkolo eWisconsin, eU.S.A., ukuba sicele imvume yokudayisa amathikithi okungenela imidlalo yokugembula (lottery), kubika iThe Sheboygan Press. Nakuba lokhu kuthengisa kuchazwa njengomzamo ‘wokwandisa’ izinkongozelo zamasonto onke, iPress iphawula ukuthi isizathu esisemqoka sokuthengiswa okuhlongozwayo kwamathikithi okugembula (lottery) “siwukwandisa inani lababakhona emidlalweni yalo yebingo.” Kubikwa ukuthi isonto kakade seliqhuba imidlalo yebingo ngenzuzo “esukela emaRandini ayizi-2 000 kuya ezi-2 500” ubusuku ngabunye.
Lapho ebuzwa ukuthi ingabe ngempela ukugembula kuyisono, umpristi wesifunda uRobert Fleishman waphendula: “Angazi.” Nakuba evuma ukuthi ukukhuthaza kwesonto umdlalo webingo noma ukuthengiswa kwamathikithi elottery “kungenzeka kuphambukile kancane emongweni wobizo lwethu oluvamile olungokomoya,” wanezela ngokuthi “uma bengezi lapha, bazokuya kwenye indawo” bayisebenzise khona imali yabo.
Ingabe umholi wenkolo othi ungumlandeli kaKristu kufanele akhuthaze ukugembula? Lutho neze! Ukugembula kwanoma yiluphi uhlobo kuvusa enye yezimfanelo ezimbi kakhulu kubantu—ukuhaha. Labo abakukhuthazayo bakhuthaza abantu ukuba bakholelwe ukuthi kulungile ukuzuza ngokulahlekelwa kwabanye. Nokho, iZwi likaNkulunkulu eliphefumlelwe liphawula ngokuqondile ukuthi abantu abahahayo abayikulidla ifa IoMbuso kaNkulunkulu.—1 Korinte 6:9, 10; Efesu 4:19; 5:3.