Izwe Elisha—IPharadesi Elizuziwe!
UMBHANGQWANA owawusanda kushada wawunekhaya elihle kakhulu—ipaki elikhulu eligcwele izimbali, izihlahla, izinyoni, nezilwane. LaliyiPharadesi, isipho somusa esasivela kuYise onothando! Ingabe “waphila ngenjabulo ngemva kwalokho”? Cha. Kungakapheli isikhathi eside, walahlekelwa ikhaya lawo. Kodwa kungani?
Lelokhaya eliyiPharadesi lalahleka ngoba lombhangqwana awuzange ukwazise lokho uYise ayewenzele khona. Okubi ngisho nangaphezulu, wawungalaleli. Ukuze ahlole ubuqotho bawo, uYise wayewutshele ukuthi wawungadla izithelo zayo yonke imithi ngaphandle kowodwa, kodwa awulalelanga ngenkani futhi wadla kuwo.—Genesise 2:15-17; 3:6, 7.
Kungani kwakhishwa isijeziso esinjalo ngalokho okungabonakala kuwubugebengu obungasho lutho? Mhlawumbe umfanekiso ungasiza ekuphenduleni lowombuzo. Umninisitolo uqasha umphathi onezitifiketi ezidingekile. Ukuze aqiniseke ukuthi angathembela kulesisebenzi esisha, umninisitolo usinika izihluthulelo kodwa uthi singalokothi sivule idilowa elithile. Uma isisebenzi senza kanjalo, siyoxoshwa. Eyedwa, umphathi unqotshwa yilukuluku lokufuna ukwazi futhi uvula idilowa. Umninisitolo umbamba oqotsheni bese emxosha.
IPharadesi Elilahlekile
Lokhu kuhlobene kanjani nalombhangqwana osanda kushada? Ngenxa yokuthi wadla isithelo esinqatshelwe, uYise wawuxosha ekhaya lawo elihle. Ngaphandle kwePharadesi lase-Edene, lowombhangqwana oshadile uAdamu noEva, wabhekana nameva namakhakhasi. Kunokuba ube ophelele manje wawungasaphelele. Futhi kunokuba uphile phakade, waqala ukufa. Abantwana bawo bazuza ukungapheleli kwawo, ukuba nesono, nokufa.—Roma 5:12.
Ekugcineni, “uJehova wabona ukuthi ububi bomuntu bukhulu.” Ngokufanelekile, ezinsukwini zikaNowa, uNkulunkulu wasebenzisa uZamcolo ukuba ahlanze umhlaba. Ingabe bakhona abantu abasinda? Abayisishiyagalombili kuphela—uNowa namadodana akhe amathathu kanye nomkabo abane. Lapho belungiselela lokho okungabizwa ngokuthi uhambo lwabo lokuya ezweni elihlukile, babeye benza ngokuvumelana neziyalezo zikaNkulunkulu futhi babakhe umkhumbi omkhulu owawukwazi ukuthwala bona, izinhlobo eziningi zezilwane, nokudla okwanele. (Genesise 6:5-7, 13-22) Insimu eyake yajatshulelwa uAdamu noEva yakhukhulwa uZamcolo. Ngakho-ke, iPharadesi lalahleka—kodwa hhayi phakade!
IPharadesi Elizuziwe
Emakhulwini eminyaka kamuva, uNkulunkulu wathumela iNdodana yakhe ezelwe yodwa emhlabeni ukuba ihlenge isintu esonweni nasekufeni. Lokhu kwenza kwaba nokwenzeka ngalabo ababonisa ukholo kuJesu Kristu ukuba bazuze ukuphila okuphakade. (Johane 3:16) UJesu wabikezela futhi ukuthi iPharadesi laliyozuzwa futhi. Ngempela, lapho uJesu efa esigxotsheni sokuhlushwa, watshela iselelesi esasibethelwe eceleni kwakhe: “Uzakuba-nami eParadisi.”—Luka 23:43.
Ukuzuzwa futhi kwePharadesi kuyolandela lokho ngokuvamile okubizwa ngokuthi ukuphela kwezwe, okwabikezelwa uJesu lapho abafundi bakhe bebuza: “Siyokuba yini isibonakaliso sokuba khona kwakho nesokuphela kwalesimiso sezinto?” Ephendula, uJesu wabhekisela ezimpini, ukuntuleka kokudla, ukuzamazama komhlaba, imiqedazwe yezifo, ukungabi-namthetho okwandayo, nomkhankaso womhlaba wonke wokushumayela ngoMbuso. Lezi nezinye izici zesibonakaliso ziye zabonakala kusukela ngo-1914. (Mathewu 24:3-14, NW) Zibikezela ukuphela kwalesimiso nokubuyiselwa kwePharadesi kulomhlaba.
Esiprofethweni esifanayo, uJesu wathi futhi: “Fundani umfanekiso emkhiwaneni; nxa igatsha lawo selithamba, lihlume amaqabunga, niyazi ukuthi ihlobo seliseduze. Kanjalo nani, nxa nibona konke lokhu, yazini ukuthi iseduze ngasemnyango. Ngiqinisile ngithi kini: Lesisizukulwane asiyikudlula kungakenzeki konke lokhu.” (Mathewu 24:32-35) Ezinye iziprofetho zeBhayibheli zibonisa nokuthi ukuzuzwa futhi noma ukubuyiselwa kwePharadesi kuseduze kakhulu, ukuthi izwe elisha selisemnyango. Kodwa liyoba njani?
Izwe Elisha—Lihluke Ngempela!
Ohulumeni bosuku lwanamuhla bayothathelwa indawo uMbuso kaNkulunkulu. (Daniyeli 2:44) Kuyoba khona ukulunga nokuthula okuhlala njalo ngabo bonke abasezweni elisha ngaphansi kokubusa koMbuso ngoJesu Kristu, “iNkosi yokuthula.” (Isaya 9:6, 7) Njengoba eyobhubhisa ababi nemibuso engenamthetho manje ebusa isintu, “abapheleleyo” abathanda ukuthula kuphela abayosala. (IzAga 2:21, 22; IsAmbulo 19:11-21; 16:14-16) Yebo, abayosinda kuyoba abantu abathobekile, abathanda ukuthula. Yeka ukuthi lokho kuyoba impumuzo kanjani!
Ezweni elisha kuyonyamalala ubandlululo lwezinhlanga nolwezinye izinhlobo. Eqinisweni, isixuku esikhulu sabantu kakade sesiye saphumelela kakhulu ekunqobeni izinto ezinjalo. Singobani? OFakazi BakaJehova. Futhi kungani behluke kangaka? Ngoba batadisha iBhayibheli ngenkuthalo, balisebenzise ekuphileni, futhi banothando phakathi kwabo. (Johane 13:34, 35; IzEnzo 10:34, 35) OFakazi manje bayizigidi emhlabeni wonke, kodwa iBhayibheli libikezela ukuthi izikhonzi zikaJehova zasemhlabeni ekugcineni ziyoba “inani elikhulu, elingenakubalwa, labantu abavela kuzo zonke izizwe, izinhlanga, imindeni nezilimi.”—IsAmbulo 7:9, The Jerusalem Bible.
Impi ayisayikuthatha ukuphila kwabantu. Ngeke kusachithwa izigidi zezigidi ezikhalini zenuzi, kwezinye izikhali, nasemabuthweni ezempi. Ukuvukela, izingxabano zezinhlanga, nazo zonke ezinye izinhlobo zobudlova ngeke zibe khona. (Isaya 2:4) Ukuqeqeshelwa impi nokubuthelwa impi kuyonqamuka, ngoba kuyobe kungasadingeki. Yeka ukuthi kuyoba usuku olujabulisa kanjani lapho uNkulunkulu eqeda izimpi!—IHubo 46:8, 9.
Kuyochuma ukuthula kweqiniso. “Kusengumzuzwana,” kusho umhubi, “omubi engabe esabakho . . . Kepha abathobekileyo bazakudla ifa lomhlaba, bathokoze ngokuthula okukhulu.”—IHubo 37:10, 11.
Esikhundleni sokuntuleka kokudla kuyoba nenala. Ezindaweni eziningi, abalimi abampofu manje bashikilisana nameva namakhakhasi, inhlabathi engavundile, ugwadule olugadla nomaphi, isomiso, nokuhlasela kwesikhonyane esibhubhisayo. Konke lokhu kuyoqedwa. (Isaya 35:1, 6, 7) Ube yini umphumela? Ukwanda okukhulu komkhiqizo! (IHubo 72:16) Eqeda ukuntuleka kokudla neziphuzo, uJehova uyolungiselela “idili”!—Isaya 25:6.
Bonke bayojabulela umsebenzi ozuzisayo. Yeka ukuthi kuyokwanelisa kanjani ukwakha izindlu, ukutshala imithi yezithelo, nokunakekela amasimu! Futhi yeka ukuthi kujabulisa kanjani ukuhlala emthunzini womkhiwane wakho siqu nokudla izithelo zawo eziconsisa amathe!—Mika 4:4.
Bonke bayolungiselelwa izindlu zezinga eliphakeme. Namuhla, izigidi zihlala emafukwini noma emagogogweni. Yeka ukuphila okungajabulisi! Ngokwesibonelo, eAfrika izigidi zabantu abansundu zishiya izindawo zasemaphandleni, kodwa ngokuvamile zihlala emakhaya akhiwe ngodaka noma ngobumba afulelwe ngothayela, anezimo ezingezinhle ngokwempilo, futhi angenandawo esitheke kahle. Nokho, ezweni elisha abantu bayokwakha izindlu ezinhle futhi bahlale kuzo.—Isaya 65:21, 22.
Kuyochuma impilo ephelele esikhundleni sokugula nezifo ezinjengengculaza ebhubhisayo. Umprofethi ophefumlelwe wabikezela ukuthi akekho oyothi: “Ngiyagula.” Ngaphezu kwalokho, ezweni elisha eliseduze, “amehlo ezimpumputhe ayakuvulwa, zivuleke nezindlebe zezithulu. Khona unyonga luyakutshekula njengendluzele, nolimi lwesimungulu luyakuhuba.”—Isaya 33:24; 35:5, 6.
Ukufa, izinyembezi, nezindawo ezithengisa izinto zokungcwaba kuyonyamalala. (IsAmbulo 21:4) Kodwa kuthiwani ngezigidi esezifile kakade? Njengomuntu emhlabeni, uJesu wavusa abantu abaningana. Ngokwesibonelo, wake wahlangana nomngcwabo wensizwa eyayisanda kufa emzini waseNayini. Ngemva kokusho amazwi enduduzo kunina olusizi, ongumfelokazi, uJesu wathi: “Nsizwa ngithi kuwe: Vuka!” Futhi yavuka! (Luka 7:11-17) Ngesinye isikhathi, uJesu wanikeza lesiqinisekiso: ‘Isikhathi siyeza, lapho bonke abasemathuneni . . . beyakuphuma.’ (Johane 5:28, 29) Njengoba uNkulunkulu adala izigidigidi zezigidi zezinkanyezi nokunye okusezulwini futhi ekubiza ‘ngamagama,’ ngokuqinisekile ukuvuswa kwezinkulungwane zezigidi zabantu abafile ngeke kube inkinga.—Isaya 40:26.
Ingabe Nawe Ungakujabulela Lokhu?
Ekuqaleni uJehova wayehlose ukuba isintu singafi kodwa sizijabulele phakade izinto ezinhle azilungiselela ngothando. Ngakho ake ucabange ngezibusiso zokuphila ezweni elisha elinemikhaya ejabulayo! Cabanga ngabantwana lapho sebekwazi ukudlala ngokulondeka nezilwane eziyingozi kangaka manje. (Isaya 11:6-9) Cabanga ngezibusiso zokuthula, izindlu ezinhle, umsebenzi ovuzayo, ukudla okuyinala. Yebo, bese ucabanga ngokuphila phakade epharadesi lasemhlabeni.
Kungenzeka yini ukuba ube lapho? Yebo, uma ungenisa futhi wenze ngokuvumelana nolwazi oluqondile lweZwi likaNkulunkulu. OFakazi BakaJehova bahlala belungele ukukusiza ukuba wakhe ukholo ezinjongweni ezingahluleki zikaNkulunkulu. Ungaqiniseka ngokuthi iPharadesi liyozuzwa maduzane nje, ngoba izwe elisha liseduze kakhulu!