Lapho Ukuthula Komshado Kusongelwa
“Umfazi kangahlukani nendoda . . . nendoda ingamlahli umkayo.”—1 KORINTE 7:10, 11.
1. Yayiyini injongo kaJehova ngokuphathelene nomshado?
UJEHOVA UNKULUNKULU wahlanganisa umbhangqwana wokuqala wabantu esibophweni somshado futhi ehlose ukuba lesibopho sokubanyamanye sihlale phakade. Kwakufanele kube ukuhlangana okubusisiwe okwakuyophumela enjabulweni yawo nasekuvezeni inzalo elungile, konke kulethe inkazimulo kuNkulunkulu.—Genesise 1:27, 28; 2:24.
2. Yisiphi isici esisodwa esiholela ekubeni izibopho zomshado zinqanyulwe?
2 Lelolungiselelo lomshado elihle laphazanyiswa ukucabanga kokuzibusa nesono. (Genesise 3:1-19; Roma 5:12) Eqinisweni, umoya wokuzibusa ungesinye sezici eziholela ekubeni izibopho zomshado zigqashuke namuhla. Ngakho, eUnited States ngo-1985, kwakunezehlukaniso eziyi-5—uma kuqhathaniswa nemishado eyi-10, 2—yabantu abayi-1 000. Ngo-1986 umbiko ovela eMoscow wabonisa ukuthi amaphesenti angama-37 kuphela emishado yaseSoviet Union ehlala iminyaka emithathu nokuthi imishado engamaphesenti angama-70 iyaphela phakathi neminyaka eyishumi.
3. (a) Yini engadala ingxabano emshadweni? (b) Ngokuqondene nomshado, ubani ongumbhidlizi wokuthula oyinhloko?
3 Umoya wokuzibusa ungadala ingxabano emshadweni. Futhi uthiya ukukhula okungokomoya, ngoba “isithelo sokulunga sihlwanyelwa ngokuthula.” (Jakobe 3:18) Kodwa ngubani ongumbhidlizi wokuthula oyinhloko? USathane. Futhi yeka ukuthi kudabukisa kanjani lapho noma yiziphi zezinceku zikaNkulunkulu ‘zinika uSathane indawo’ futhi kanjalo zihluleke ukujabulela amakhaya anokuphumula nokuthula!—Efesu 4:26, 27.
4. Lapho abangane bomshado abangamaKristu benezinkinga zomshado ezingathi sina, yini okufanele bayiqaphele futhi yini okufanele bayenze?
4 Lapho abangane bomshado abangamaKristu bebheka ukuhlala ngokwehlukana njengokuwukuphela kwekhambi lezinkinga zabo zomshado, khona-ke basengozini yokunqotshwa amacebo kaSathane, futhi kukhona okungalungile ngokungathi sina ngokomoya. (2 Korinte 2:11) Omunye wabo noma bobabili abazisebenzisi ngokugcwele izimiso zikaNkulunkulu. (IzAga 3:1-6) Ngakho kufanele benze imizamo ehambisana nomthandazo ngokushesha ukuze baxazulule ukungezwani kwabo. Uma kubonakala sengathi abezwani, kungathintwa abadala bebandla. (Mathewu 18:15-17) Nakuba lamadoda engagunyaziwe ukuba atshele akholwa nabo ukuthi kumelwe benzeni ngezinkinga zabo zomshado, angaqondisa ukunakekela kulokho okushiwo imiBhalo.—Galathiya 6:5.
5. Kungasiphi isizathu lapho isehlukaniso nethuba lokuphinde ushade nothile kwemukeleka khona ngokomBhalo?
5 Uma isimo somshado sisibi kangangokuba umbhangqwana ongamaKristu ucabangela ngisho nesehlukaniso, abadala bangaphawula ukuthi isehlukaniso nokushada futhi kwamukeleka ngokomBhalo kuphela uma umlingane wothile enze “ubufebe,” (NW). Leligama lihlanganisa ukuphinga nezinye izinhlobo zokuhlangana kobulili okungcolile nokuphendukezelwa kobulili. (Mathewu 19:9; Roma 7:2, 3; bheka INqabayokulinda, kaSeptember 1, 1983, ikhasi 31.) Nokho, kuthiwani uma kungenziwanga “ubufebe” kodwa ukuthula komshado kusongelwa ngokungathi sina? Ithini imiBhalo ngokuhlala ngokwehlukana okungokomthetho noma okugunyaziwe?
Iseluleko SikaPawulu Esiphefumlelwe
6. (a) Uyini umongo weseluleko sikaPawulu kweyoku-1 Korinte 7:10, 11? (b) Abangane bomshado abangamaKristu kufanele bazixazulule kanjani izinkinga zabo zomshado?
6 Emzamweni wokusiza umbhangqwana ongamaKristu ozibopho zawo zomshado zisongelwa, abadala bangaqondisa ukunakekela emazwini omphostoli uPawulu: “Kepha abaganeneyo ngiyabayala, kungemina kodwa yiNkosi, ukuthi umfazi kangahlukane nendoda;—kepha uma eké wahlukana nayo, kahlale engaganile, kumbe abuyisane nendoda yakhe—nendoda ingamlahli umkayo.” (1 Korinte 7:10, 11) Abangane bomshado abangamaKristu kufanele bakwazi ukulungisa izinkinga zabo, becabangela ukungapheleli kwabantu. Ayikho inkinga enkulu kangangokuba ayinakuxazululwa ngomthandazo oqotho, ngokusebenzisa izimiso zeBhayibheli, nangokubonisa uthando oluyisithelo somoya kaNkulunkulu.—Galathiya 5:22; 1 Korinte 13:4-8.
7. (a) Uma abangane bomshado abangamaKristu behlukana ngokuhlala, siyini isimo sabo ngokomBhalo? (b) Ukuhlala ngokwehlukana kwamaKristu amabili ashadile kungase kuwathinte kanjani amalungelo enkonzo?
7 Kodwa kuthiwani uma abangane bomshado abangamaKristu behlala ngokwehlukana? Kumelwe ‘bahlale bengashadile noma babuyisane.’ Ngaphandle kokuba kube isehlukaniso esitholakele ngezizathu ‘zobufebe,’ akekho kubona okhululekile ngokomBhalo ukuphinde ashade. Ngokucabangela lokhu ‘nokwanda kobufebe,’ kuyoba kuhle ngabo ukuba ‘babuyisane’ ngaphandle kokulibala. (1 Korinte 7:1, 2, qhathanisa neNW.) Akuyona indaba yabadala ukuba bafune ngenkani ukuba indoda nowesifazane baphelise ukuhlala kwabo ngokwehlukana, kodwa bangase bangawafanelekeli amalungelo athile enkonzo ngenxa yezinkinga zabo zomshado. Ngokwesibonelo, uma indoda ‘ingakwazi ukuphatha owayo umuzi,’ ngokusobala intula ikhono ‘lokuphatha ibandla likaNkulunkulu’ njengombonisi.—1 Thimothewu 3:1-5, 12.
8. Uyini umongo weseluleko sikaPawulu kweyoku-1 Korinte 7:12-16?
8 Kugcizelelwa ukulondoloza umshado ngisho nalapho kungumngane womshado oyedwa kuphela okholwayo. UPawulu wabhala: “Uma umzalwane enomfazi ongakholwayo, yena-ke evuma ukuhlala naye, angamlahli; nomfazi, uma enendoda engakholwayo, yona-ke ivuma ukuhlala naye, angayishiyi indoda. . . . Kepha uma ongakholwayo ehlukana nomkakhe, makahlukane naye; umzalwane noma umzalwanekazi kaboshiwe kokunjalo. Kepha uNkulunkulu unibizile nibe-nokuthula. Ngokuba wenamfazi, wazi ngani ukuthi ungeyisindise indoda yakho? Nawe-ndoda, wazi ngani ukuthi ungemsindise umkakho na?” (1 Korinte 7:12-16) Uma ongakholwayo ekhetha ukuhamba, umKristu uyomyeka ahambe. Kodwa okholwayo, enethemba lokuthi ongakholwayo angase azuzelwe ebuKristwini, ngeke kube nguye okhuthaza ukwehlukana. Unina kaThimothewu, uEvnike, ngokusobala wahlala nomyeni wakhe ongakholwayo kodwa wadlulisela imfundo engokomoya endodaneni yakhe.—2 Thimothewu 1:5; 3:14, 15.
Izizathu Zokuhlala Ngokwehlukana
9, 10. (a) Ngokucabangela eyoku-1 Thimothewu 5:8, siyini esinye isizathu sokuhlala ngokwehlukana kwabangane bomshado? (b) Yini abadala abamisiwe okufanele bayenze uma indoda engumKristu imangalelwa ngokwenqaba ukondla umkayo nabantwana?
9 Amazwi kaPawulu akweyoku-1 Korinte 7:10-16 akhuthaza abangane bomshado ukuba bahlale ndawonye. Nokho, abanye, ngemva kokuzama kanzima ukulondoloza ubuhlobo babo bomshado, ekugcineni baye banquma ngobuqotho ukuthi, abanakho ukwenza ngokunye ngaphandle kokuhlala ngokwehlukana. Zingaba yini izizathu zesinyathelo esinjalo?
10 Ukungondli ngamabomu kungesinye sezizathu zokuhlala ngokwehlukana. Lapho ingenela isibopho somshado, indoda ithatha umthwalo wemfanelo wokondla umkayo nanoma yibaphi abantwana abangase babe nabo. Indoda engawondli amalungu endlu yayo ‘ikulahlile ukukholwa, yimbi kunongakholwayo.’ (1 Thimothewu 5:8) Ngakho ukuhlala ngokwehlukana kungenzeka uma kunokungondli kwangamabomu. Yebo, abadala abamisiwe kufanele bakucabangele ngokunakekela ukumangalelwa kokuthi umKristu wenqaba ukondla umkakhe nomkhaya. Ukwenqaba komuntu ngenkani ukondla umkhaya wakhe kungaholela ekususweni ekuhlanganyeleni.
11. Siyini esinye isizathu sokuhlala ngokwehlukana, kodwa yini engase yenze lesimo sibekezeleleke?
11 Ukuxhashazwa ngokomzimba okweqile kungesinye sezizathu zokuhlala ngokwehlukana. Ake sithi umngane womshado ongakholwa uyadakwa njalo, abe nolaka, futhi alimaze okholwayo ngokomzimba. (IzAga 23:29-35) Ngomthandazo nangokubonisa izithelo zomoya kaJehova, okholwayo angase akwazi ukuvimbela ukuhlaselwa okunjalo futhi enze isimo sibekezeleleke. Kodwa uma kufinyelela iqophelo lokuba impilo nokuphila komngane womshado oxhashazwayo kube sengozini ngokoqobo, ukuhlala ngokwehlukana kungase kuvumeleke ngokomBhalo. Nalapha futhi, abadala bebandla kufanele bakubhekisise ukumangala kokuxhashazwa ngokomzimba uma kuhileleke amaKristu amabili emshadweni onezinkinga, futhi kungase kudingeke kuthathwe isinyathelo sokususa ekuhlanganyeleni.—Qhathanisa nabaseGalathiya 5:19-21; Thithu 1:7.
12. (a) Ingokomoya lokholwayo lingayithinta kanjani indaba yokuhlala ngokwehlukana? (b) Yini esikiselwayo uma kunesimo esingokomoya esingenampilo ekhaya lamaKristu?
12 Ukufaka ingokomoya engozini ngokuphelele nakho futhi kunikeza isizathu sokuhlala ngokwehlukana. Okholwayo emkhayeni owehlukene ngokwenkolo kufanele enze konke angakwenza ukuba awasebenzise ngokunenzuzo amalungiselelo angokomoya kaNkulunkulu. Kodwa ukuhlala ngokwehlukana kuvunyelwe uma ukuphikisa komngane womshado ongakholwa (mhlawumbe kuhlanganise nokuvimbela ngokoqobo) kwenza kube nzima ngempela ukuphishekela ukukhulekela kweqiniso futhi kufake ingokomoya lokholwayo engozini engokoqobo. Nokho, kuthiwani uma kuba nesimo esingokomoya esingenampilo lapho abangane bomshado bobabili bengabakholwayo? Abadala kufanele banikeze usizo, kodwa ikakhulukazi indoda ebhapathiziwe kufanele isebenze ngenkuthalo ukuze ixazulule lesisimo. Yiqiniso, uma umngane womshado obhapathiziwe enza njengesihlubuki futhi ezama ukuvimbela umngane wakhe ekukhonzeni uJehova, abadala kufanele basingathe izindaba ngokwemiBhalo. Uma ukususa ekuhlanganyeleni kwenzeka endabeni ehilela ukufaka ingokomoya engozini ngokuphelele, ukungondli ngamabomu, noma ukuxhashazwa ngokomzimba okweqile, umKristu othembekile ofuna ukuhlala ngokwehlukana okungokomthetho uyobe engenzi ngokuphambene neseluleko sikaPawulu ngokuqondene nokumangalela okholwayo enkantolo.—1 Korinte 6:1-8.
13. Kungaphansi kwaziphi izimo lapho ukuhlala ngokwehlukana kwabangane bomshado kungase kugunyazwe khona?
13 Uma izimo zingezidlulele, khona-ke ukuhlala ngokwehlukana kungase kugunyazwe. Kodwa ngokusobala akufanele kusetshenziswe izaba ezilula ukuze kutholakale ukuhlala ngokwehlukana. Noma yimaphi amaKristu akhetha ukuhlala ngokwehlukana kumelwe athwale umthwalo wemfanelo womuntu siqu ngalesosenzo futhi aqaphele ukuthi sonke siyolandisa kuJehova.—Heberu 4:13.
Ingabe Kuyisinyathelo Sokuhlakanipha?
14. (a) Ngokunokwenzeka ukuhlala ngokwehlukana kungadala yiphi inkinga? (b) Ukuhlala ngokwehlukana kungase kubathinte kanjani abantwana?
14 Izinkinga ezingadalwa ukuhlala ngokwehlukana kufanele zicatshangelwe ngokomthandazo. Ngokwesibonelo, akuvamile ukuba umkhaya onomzali oyedwa unikeze lokho imikhaya enabo bobabili abazali engakunikeza ekulinganiseleni nasekuyaleni. Futhi ukuhlala ngokwehlukana kungase kube nethonya elifana nelesehlukaniso kubantwana, ngokuphathelene nalokho iphephabhuku i-India Today labika: “USheena, onamehlo amakhulu sengathi angabona wonke umhlaba, uneminyaka eyisithupha. Abazali bakhe bahlukanisa eminyakeni emibili edlule ngemva kwempi embi yasenkantolo. Ngokushesha ngemva kwalokho, uyise washada nomunye wesifazane. Unyaka wonke wahlaselwa isifo sesifuba somoya futhi uncela isithupha njalo. Uhlala nonina eNingizimu Delhi. Unina wathi: ‘Ukudabuka kwami kuye kwadlulela kuSheena. . . . Umkhumbula kakhulu uyise. . . . Uvuthwe kakhulu kunezingane eziningi ezingontanga yakhe. Kodwa kunesikhathi lapho eke aqhumuke akhale angathuliseki, ngokungathi ufuna ukususa okuthile okukuye. Isikole sasiyinkinga. Abantwana bangaba nonya olukhulu. Ngokuvamile, uphendukela ezweni lamaphupho: uqamba indaba ayixoxela abangane bakhe ngokuhamba kwethu sonke siyovakasha.’”
15. Yimuphi umphumela ukuhlala ngokwehlukana okungase kube nawo endodeni noma kumfazi ongumKristu?
15 Ngokuvamile, ukuhlala ngokwehlukana akufezi okuhle ngendoda noma umfazi ongumKristu. Ngokushesha bayaqaphela ukuthi ngaphandle komngane womshado noma abantwana kunobuze obuququdayo. Ukucindezela okuwumphumela wokuhlala ngokwehlukana akukhona okungenakunakwa. Ingabe kungenzeka ukunakekela izindaba ezingokwezimali noma ezinye? Futhi kuthiwani uma ukucindezela kokuhlala ngokwehlukana kuphumela ekuweleni ekuziphatheni okubi? UJesu wathi: “Ukuhlakanipha kuvunyiwe ngabantwana bakho.” (Mathewu 11:19) Ikakhulukazi lapho bobabili abangane bomshado bengamaKristu, lokho okuye kufezwe ukuhlala ngokwehlukana ngezikhathi eziningi kuye kwazibonakalisa kuwubuwula obukhulu.
Sebenzelani Ukuxazulula Izinkinga
16. Yini okufanele yenziwe abangane bomshado abangamaKristu abathola ukuthula kwabo komshado kusongelwa?
16 Abangane bomshado abangamaKristu abathola ukuthula kwabo komshado kusongelwa ngokungathi sina kufanele baxoxe ngokungezwani kwabo ngendlela efanele abantu abakhonza uNkulunkulu. Futhi ngokuqinisekile kufanele bacabangele ukungapheleli. (Filipi 2:1-4) Kodwa yini enye engenziwa?
17. Ukubonisa ukuhlakanipha ngokuqondene nezinto ezibonakalayo kunganikela kanjani ekuthuleni komshado?
17 Ukubonisa ukuhlakanipha ngokuphathelene nezinto ezibonakalayo kungaba nengxenye ekuthuleni komshado. Ngokwesibonelo: Ngemva kokucabangela isimo somkayo esiphambene, indoda ingase inqume ukuthi noma kunjalo kuwukuhlakanipha ngomkhaya wayo ukuba uthuthele kwenye indawo. Lokhu kungase kubonakale kungokunengqondo ngenxa yezizathu ezingokomnotho, kodwa futhi kungase kwenze umkhaya ukwazi ukuthuthukisa izithakazelo zoMbuso ngokukhonza lapho indingeko inkulu khona. (Mathewu 6:33) Umkayo ongumKristu angase angakuthandi ukuthutha ngenxa yokuthi uyobe eshiya abazali bakhe noma indawo ayijwayele. Kodwa uyoba ohlakaniphile uma ebambisana ngokugcwele nomyeni wakhe, oyinhloko yomkhaya futhi onomthwalo wemfanelo wokunquma lapho umkhaya uyohlala khona. Ngaphezu kwalokho, ukuthobeka kwakhe nokubambisana kwakhe kothando kuyonikela ekuthuleni kwasekhaya.—Efesu 5:21-24.
18. Yimaphi amathuba abangane bomshado abangamaKristu abanawo okwenza izinto ndawonye?
18 Ukuthula komkhaya kuyachuma futhi izinkinga zibonakala zingcono uma abangane bomshado benza izinto ndawonye. Ngokwesibonelo, abangane bomshado abangamaKristu banamathuba amahle okusebenza ndawonye enkonzweni yasensimini. Uma benza lokhu njalo futhi bethatha abantwana babo kanye nabo, wonke umkhaya uyozuza. Kungase futhi kube namanye amathuba ahlukahlukene okuqinisa isibopho somshado ngokuhlanganyela kweminye imisebenzi enempilo ejatshulelwa ngokukhethekile omunye wabangane bomshado.
19. Ubunhloko baluphi uhlobo obuyothuthukisa ukuthula komkhaya?
19 Ubunhloko obusetshenziswa kahle buyoqinisa izibopho zomshado. Yebo, indoda engumKristu ovuthiwe ayinakuba umashiqela. Kunalokho, ‘iyoqhubeka ithanda umkayo futhi ngeke imcasukele.’ UJehova ulindele ukuba isebenzise ubunhloko ngothando. (Kolose 3:18, 19) Ngakolunye uhlangothi, ubunhloko obunjalo buthuthukisa ukuthula komkhaya.
Emikhayeni Ehlukene
20, 21. Ukucabangela kungazibonakalisa kuyinzuzo kanjani lapho ukuthula kusongelwa emkhayeni ohlukene ngokwenkolo?
20 Ukuba ocabangelayo kuyasiza ekuxazululeni izinkinga zomshado phakathi kwabangane bomshado abangamaKristu. (Filipi 4:5) Kodwa ukucabangela nakho kubalulekile uma ukuthula kusongelwa emkhayeni ohlukene ngokwenkolo. Uma indoda engakholwayo izama ukuvimbela umkayo ongumKristu ekukhonzeni uJehova, umkayo angase azame ukubonisana nayo, ngokuhlakanipha ephawula ukuthi uyinikeza inkululeko engokwenkolo futhi naye ngokunengqondo kufanele athole impatho efanayo. (Mathewu 7:12) Nakuba kumelwe azithobe ngokulinganiselwe kumyeni wakhe ongakholwa, kumelwe kwenziwe intando kaNkulunkulu uma kunokungqubuzana. (1 Korinte 11:3; IzEnzo 5:29) Ngokuqinisekile, ukuba khona emihlanganweni yobuKristu kathathu ngesonto akukhona ukweqisa. Kodwa umfazi okholwayo angase akuthole kungokunengqondo ukuba sekhaya ntambama ngezinye izinsuku futhi ahlele isikhathi sakhe esiningi senkonzo yasensimini phakathi namahora lapho umyeni wakhe esemsebenzini nabantwana besesikoleni. Ngokucabangela nangokuhlela okuhle, akudingekile ‘akhathale ekwenzeni okuhle.’—Galathiya 6:9.
21 Ukucabangela kudlulela futhi nakwezinye izindaba. Ngokwesibonelo, umuntu unelungelo lokuqhuba inkolo ethile. Kodwa kungaba ukucabangela nokuhlakanipha ngomfazi ongumKristu ukuba angabeki amaBhayibheli akhe nezincwadi ezisiza ekutadisheni iBhayibheli lapho indoda ephikisa kakhulu ingase ingathandi khona. Ukungqubuzana kungase kugwenywe uma izincwadi ezinjalo zigcinwa phakathi kwezinye zezinto zakhe zomuntu siqu futhi ezitadisha ngasese. Yebo, akumelwe ahlehle ezimisweni zokulunga.—Mathewu 10:16.
22. Yini engenziwa uma ukuphazanyiswa kokuthula kwasekhaya kugxila ekufundisweni kwabantwana ngenkolo?
22 Uma ukuphazamiseka kokuthula kwasekhaya kugxila ekufundisweni kwabantwana ngezenkolo, umfazi okholwayo angahlela ngokuhlakanipha ukuba aye nabo emihlanganweni nasenkonzweni yasensimini. Kodwa uma umyeni wakhe ongakholwa onguyise wabantwana ekuvimbela lokhu, angabafundisa abantwana izimiso zeBhayibheli ukuze lapho sebekhulile futhi beshiya ikhaya, bakwazi ukuphishekela ukukhulekela kweqiniso. Uma okholwayo kuyindoda, njengenhloko yomkhaya, inesibopho esingokomBhalo sokukhulisa abantwana bayo njengamaKristu. Ngakho kufanele atadishe iBhayibheli nabo, aye nabo emihlanganweni, futhi abafundise enkonzweni yasensimini. (Efesu 6:4) Ngokufanelekile, kufanele ibe nomusa, nothando, nokucabangela lapho isebenzelana nomkayo ongakholwayo.
Londolozani Ukuthula Njengomkhaya Onobunye
23. Uma ukuthula komshado kusongelwa, yini engaba usizo?
23 Njengoba abangane bomshado ‘benyamanye,’ kufanele bahlale ndawonye ngokuthula ngokuvumelana nelungiselelo likaNkulunkulu labantu abashadile, ikakhulukazi uma bobabili abangane bomshado bengamaKristu. (Mathewu 19:5; 1 Korinte 7:3-5) Kodwa uma ukuthula komshado kusongelwa endabeni yenu, bukezani ngokomthandazo lamaphuzu angokomBhalo akhulunyelwe. Kungase kube usizo futhi ukukhumbula emuva ngesikhathi sokuqomisana kwenu. Yeka ukuthi nobabili nanizama kanzima kanjani ukuba nenze okulungileyo futhi nibeke isisekelo sokuhlangana okujabulisayo! Ingabe manje ningenza imizamo efanayo yokugcina umshado wenu undawonye?
24. Yisiphi isimo okufanele amaKristu abe naso ngesibopho somshado?
24 AmaKristu ahlanganiswe esibophweni somshado anesipho esimangalisayo esivela kuNkulunkulu—umshado wawo! Uma niphila ngokuvumelana nezifungo zenu zomshado futhi nilondoloza ubuqotho kuJehova, ngaphambi kwenu kunezwe elisha lokulunga lapho ukwehlukana nedivosi okudabukisayo kungeke kusakhathaza isintu. Ngakho bonisani ukubonga ngesibopho somshado ‘njengentambo’ engokomfanekiso “emicu-mithathu,” enoJehova njengengxenye yayo ebalulekile. (UmShumayeli 4:12) Futhi sengathi wonke amalungu omkhaya wenu ohlangene angajabulela isibusiso senjabulo yomkhaya ekhaya lokuthula nokuphumula.
Ziyini lzimpendulo Zakho?
◻ Ubungasifingqa kanjani iseluleko sikaPawulu kweyoku-1 Korinte 7:10-16?
◻ Yiziphi izizathu eziqatha zokuhlala ngokwehlukana kwabangane bomshado?
◻ AmaKristu angazixazulula kanjani izinkinga lapho ukuthula komshado kusongelwa?
◻ Emikhayeni ehlukene ngokwenkolo, ukucabangela kunganikela kanjani ekuthuleni?
[Isithombe ekhasini 23]
Abangane bomshado abangamaKristu abakuthula kwabo komshado kusongelwa kufanele baxoxe ngezinkinga zabo ngendlela efanele labo abakhonza uJehova