Ingabe UNkulunkulu Unibizele Ukuthula?
“Uma ongakholwayo ehlukana nomkakhe, makahlukane naye; umzalwane noma umzalwanekazi kaboshiwe kokunjalo. Kepha uNkulunkulu unibizile nibe-nokuthula.’—1 KORINTE 7:15.
1. NgokomBhalo, umshado kufanele ubhekwe kanjani?
AKUKAZE kube inhloso kaJehova ukuba isibopho somshado siholele ekwehlukaneni okudabukisayo noma esehlukanisweni. Umshado kwakufanele ube isibopho sokuba ‘nyamanye,’ esihlala njalo esiphumela enjabulweni, ekuphumuleni, nasekuthuleni. (Genesise 2:24; Ruthe 1:9) Ngokuphindiwe, imiBhalo yeluleka abantu abashadile ukuba bahlale ndawonye, ngisho nalapho omunye umngane womshado engumKristu omunye engongakholwayo. (1 Korinte 7:12-16) Ngaphezu kwalokho, ukusebenzelana ngenkohliso okuphumela ekunqanyulweni kwezibopho zomshado kwenza umuntu abe necala lokuziphatha kuNkulunkulu, ‘ozonda ukwehlukanisa.’—Malaki 2:13-16.
2. AmaKristu akubheka kanjani ukwehlukana nesehlukaniso?
2 Ukungapheleli kobuntu nezinye izici ngezinye izikhathi kuye kwaholela ekuhlukaneni ngokuhlala noma esehlukanisweni ngisho naphakathi kwezinceku zikaNkulunkulu ezibhapathiziwe. Nokho, ngenxa yenhlonipho ephakeme amaKristu anayo ngesibopho somshado, ngokuvamile lezinyathelo zithathwa kuphela ngemva kwemizamo yokuphikelela yokugcina imishado indawonye. Kulendaba, uNkulunkulu ngokwakhe wabeka isibonelo esiphakeme. ‘Njengomyeni’ kaIsrayeli wasendulo, wabekezelela amakhulu amaningi eminyaka enkani, ukuhlubuka, nokuphinga ngokomoya kwabantu bakhe. (Isaya 54:1-5; Jeremiya 3:14-17; Hoseya 1:10, 11; 3:1-5) Kwakungemva kokuba beye badlulela ngale kokubekezela kwakhe kuphela lapho uJehova abalahla khona njengesizwe.—Mathewu 23:37, 38.
3. (a) Kungaziphi izizathu ezivunyelwe ngokomBhalo lapho umKristu angase ahlukane nomngane womshado? (b) Isehlukaniso esingokomBhalo singenzeka ngaphansi kwaziphi izimo?
3 Ngezinye izikhathi, esikholwa nabo baya kubadala befuna usizo ngezinkinga ezingathi sina zomshado. Abadala abanalo igunya lokutshela noma ubani ukuba ashiye noma ahlukanise nomngane wakhe womshado, kodwa bangabhekisela kulokho iZwi likaNkulunkulu elikushoyo ngalezindaba. Njengoba kuboniswe esihlokweni esandulelayo, ukwehlukana ngokuhlala kuvunyelwe ngokweBhayibheli endabeni yokungondli ngamabomu, ukuphathwa kabi ngokomzimba ngokweqile, noma ukufaka ingokomoya engozini ngokuphelele. Kuye kwaphawulwa futhi ukuthi isehlukaniso esingokomBhalo nethuba lokuphinde ushade nomunye umngane esikhathini esizayo singenzeka uma umngane womshado eye wenza “ubufebe” obuhlanganisa izinhlobo eziningana zobuhlobo bobulili bokuziphatha okubi. (Mathewu 19:9) Ngokufanelekile, ukuhlala ngokwehlukana noma isehlukaniso akufanele kubhekwe njengokungenakugwenywa, njengoba kungenzeka ukuba kubuyiselwe ukuthula komshado, futhi ngisho nokuphinga noma ezinye izinhlobo zobufebe kungathethelelwa umngane womshado ongenacala.—Mathewu 5:31, 32; qhathanisa noHoseya 3:1-3.
4. (a) Veza ngamafuphi lokho uPawulu akutshela amaKristu ashadile kweyoku-1 Korinte 7:10-16. (b) Kunini lapho kungashiwo khona ukuthi: “UNkulunkulu unibizile nibe-nokuthula”?
4 Njengoba siphawulile esihlokweni esandulelayo, umphostoli uPawulu wanxusa amaKristu ashadile ukuba angabashiyi abangane bawo bomshado. (1 Korinte 7:10-16) Ngokucabangela amazwi kaPawulu, uma umngane ongakholwayo ekhetha ukuhlala nomngane wakhe womshado ongumKristu, okholwayo kufanele azame ukumsiza ngokomoya. (1 Petru 3:1-4) Ukuguquka kwakhe kuyokwenza okwengeziwe ekwenzeni ikhaya libe indawo yokuphumula nokuthula. Nokho, uma ongakholwayo eluphikisa ngokunamandla ukholo lomngane wakhe okholwayo kangangokuba akhethe ukuba bahlale ngokwahlukana, yini engenziwa umKristu? Uma okholwayo ezama ukumcindezela ukuba ahlale, ongakholwayo angase enze isimo sibe sibi kangangokuba umKristu angaphucwa ukuthula ngokuphelele. Ngakho ngenxa yezithakazelo zokuthula, okholwayo angase amdedele ongakholwayo ukuba ahambe. (Mathewu 5:9) Kungashiwo kuphela lapho umlingane womshado ongakholwayo ehamba ukuthi: “UNkulunkulu unibizile nibe-nokuthula.” Lamazwi awanakusetshenziswa ngokufanele ukuba kuthethelelwe ukuhlala ngokwehlukana kwabangane bomshado abangamaKristu bobabili ngezizathu ezingezona ezingokomBhalo noma ezilula.
5. Yimiphi imibuzo manje okufanele siyicabangele?
5 Noma ikuphi ukwehlukana noma isehlukaniso kunezici zakho ezihlukile, futhi awukho “umthetho omisiwe” ohlanganisa zonke izimo. Kodwa yiziphi izinkinga umKristu ohlukene nomngane wakhe noma ohlukanisile angase abhekane nazo? Yini engenziwa ngazo? Futhi abanye bangaba usizo kanjani?
Izidingo Ezingokomzwelo Noma Ezingokobulili
6. Mayelana nezinkinga, yini engashiwo ngokuhlala ngokwehlukana noma isehlukaniso?
6 Ukuhlala ngokwehlukana noma isehlukaniso okuvumelekile ngokomBhalo kuyoxazulula izinkinga ezithile. Kodwa izinyathelo ezinjalo ngokuyisisekelo ziphumela ekwenaneni uhlobo oluthile lwezinkinga ngezinye. Ngokwesibonelo, omunye umKristu ohlukanisile wathi: “Kumelwe ngimbonge uJehova ngokuthi manje nginokuthula.” Kodwa wavuma: “Akulula ukukhulisa abantwana njengomzali oyedwa. Futhi ngezinye izikhathi umuntu uba nesizungu kakhulu futhi acindezeleke. Ngisho nangokobulili akulula. Umuntu kufanele azifanelanise nokuphila okuhluke ngokuphelele.”a
7. Kungani kufanele umKristu acabangisise ngemiphumela yokuhlala ngokwehlukana noma yesehlukaniso?
7 Ngakho, uma umKristu enokuzikhethela, kufanele acabangisise ngemiphumela engenzeka yokwehlukana noma yesehlukaniso. Ngokwesibonelo, cabangela izidingo ezingokomzwelo, mhlawumbe ukulangazelela kowesifazane ubungane bomuntu wesilisa. (Qhathanisa noGenesise 3:16.) Owesifazane ohlukanisile angase abe namathemba aqinile okuphinde ashade. Abanye bafisela ukukhululeka emshadweni ovivinyayo, kodwa ingabe bakulungele ukwamukela ukuba nokwenzeka kokuthi lingase lingabi khona ithuba lokuphinde bashade?
8. (a) Ngokucabangela eyoku-1 Korinte 7:11, yini okufanele abangane bomshado abangamaKristu abahlala ngokwehlukana bayicabangele ngomthandazo? (b) Yiziphi izidingo okungafanele zibukelwe phansi lapho kucatshangelwa ukuhlala ngokwehlukana noma isehlukaniso?
8 UPawulu wabhala: “Kepha uma eké wahlukana nayo, kahlale engaganile, kumbe abuyisane nendoda yakhe.” (1 Korinte 7:11) Ngomzamo othile, kungase kwenzeke ukuba owesifazane “abuyisane” nomyeni wakhe noma ‘abuyiselwe’ kuye. Uma abangane abangamaKristu beye bahlukana, khona-ke, kufanele bacabangele ukubuyisana ngokungathi sína nangomthandazo. Ngaphezu kwalokho, akufanele bangalinaki iqiniso lokuthi izinkanuko zobulili zingaletha ingozi. Cishe uNkulunkulu uyobabheka kanjani uma ukwehluleka kwabo ukuba babuyisane kungaphumela ekuweleni ekuziphatheni okubi? Okubonisa lengozi okuhlangenwe nakho kowesifazane othile obhapathiziwe. Ngemva kwesehlukaniso, waqala ukuphola nomuntu wezwe, ngokushesha wakhulelwa, futhi wasuswa ekuhlanganyeleni. Nakuba abuyiselwa kamuva, okuhlangenwe nakho kwakhe kugcizelela isidingo sokuqapha nesokuncika ngomthandazo kuJehova ukuze kugwenywe ‘ukona kuNkulunkulu.’ (Genesise 39:7-12) Kusobala futhi ukuthi izidingo ezingokomzwelo nezingokobulili akufanele zibukelwe phansi uma kucatshangelwa ukwehlukana noma isehlukaniso.
Isizungu Singancishiswa
9. Singawasiza kanjani amaKristu ahlala ngokwehlukana noma ahlukanisile ukuba alwe nesizungu?
9 Uma ukwehlukana noma isehlukaniso kungenakugwenywa, kuyodingeka kubhekanwe nezinkinga eziwumphumela. Ngokwesibonelo, isizungu siyinkinga engathi sina kumaKristu athile ahlukene noma ahlukanisile. Yini abanye abangayenza ngalokhu? Nokho, abadala bebandla nabanye bangabonisa isithakazelo esingokomoya kubantu abanjalo, befuna ukubakhuthaza. (Qhathanisa neyoku-1 Thesalonika 5:14.) Phakathi kwezinye izinto, singase ngezikhathi ezithile sibameme labantu nabantwana babo emakhaya ethu ekudleni okulinganiselwe nasengxoxweni eyakhayo nomkhaya wethu. Akudingekile ukuba senze idili, ngoba “isidlo semifino lapho kukhona uthando singcono kunenkabi ekhuluphalisiweyo kanye nenzondo.” (IzAga 15:17) Leyontambama ingase ihlanganise ukulandiswa kokuhlangenwe nakho okujatshulelwe enkonzweni noma isifundo seqembu ekulungiseleleni umhlangano wobuKristu.
10, 11. (a) Kungayiphi enye indlela umKristu ohlala ngokwehlukana nomngane wakhe noma ohlukanisile angasizwa ngayo? (b) Isiphi isizathu esikhona sokuqapha?
10 Ukuba nomzali ohlukanisile noma ohlala ngokwehlukana nowakwakhe ekanye nabantwana bakhe ukuba bahlanganyele nomkhaya wakho enkonzweni yasensimini kungabasiza futhi ukuba babhekane nesizungu. Yebo, abanye abanakuthatha isikhundla somzali ongekho, kodwa omunye wesifazane ongumKristu ohlukanisile wathi: “Ubunzima bokukhulisa abantwana bami ngaphandle kwendoda ekhaya buye bancishiswa kakhulu usizo lwabadala nezinceku ebandleni abaye bazama ukuvala isikhala ngezindlela ezingokoqobo.”
11 Nokho, kunesizathu sokuqapha. Omunye udade wavuma: “Njengoba indodana yami ingenayise, umzalwane othile waba nesithakazelo somusa kuyo. . . . Ngaqala ukubona indlela ayenomusa nokuphana ngayo endodaneni yami, futhi kwaqala ukukhula izifiso ezimbi ngaphakathi kimi. Kwakufana noDavide owahlakulela isifiso esibi ngokuthile okwakungekhona okwakhe.” (2 Samuweli 11:1-4) Nakuba ukuziphatha okubi kobulili kungazange kwenzeke, lona owesifazane waba namahloni ngemicabango yakhe nezenzo zokukhanga lomzalwane, wafuna intethelelo kaJehova, futhi wanqamula ubuhlobo nalomzalwane. Yeka ukuthi lokhu kusibonisa kanjani isidingo sokwenqaba izifiso ezimbi futhi “sigweme noma yikuphi okufana nobubi”!—1 Thesalonika 5:22, The New American Bible; Galathiya 5:24.
12. Umuntu angakunciphisa ngokuthatha siphi isinyathelo esiqondile ukuba nesizungu?
12 Isizungu singancishiswa ngokwenzela abanye izinto. “Uma umatasa uzikhandla futhi usiza abanye, asibi khona isikhala sokuzizwela nesizungu,” kusho omunye udade ozibopho zakhe zomshado zazinqamukile. Ùkuzikhandla’ okunjalo komuntu ohlukene nowakwakhe noma ohlukanisile kungase kuhlanganise nokumemela umkhaya othile ekhaya lakho ngokuhlwa okuthile ngenjongo yobungane obakhayo ngokomoya. Uma lokhu kungenakwenzeka ngenxa yezizathu ezingokwezimali noma ezinye, ungase uvakashele futhi ukhuthaze abagulayo noma abanye. Ungase ukwazi futhi ukusiza asebegugile ngokuyobathengela noma ngemisebenzana ehlukahlukene. Zinikele ngokwakho ngezindlela ezinjalo, futhi uyoba nobufakazi obandisiwe bokuthi “kubusisekile ukupha kunokwamukela.”—IzEnzo 20:35.
13. Yiluphi olunye usizo lokunqoba isizungu?
13 Olunye usizo lokunqoba isizungu luwukuba njalo uthathe isinyathelo kuqala sokuba uhlanganyele nokholwa nabo emsebenzini wokushumayela ngoMbuso. “Ngezinye izikhathi, ngizizwa nginesizungu sokuba nomyeni,” kuvuma omunye udade, “kodwa ngomsebenzi wami wenkonzo yasensimini owandisiwe nenkululeko entsha yokuhlangana nabazalwane nodade, lezozikhathi ziza ngokwethukela futhi zisheshe zidlule.” Ukufakaza njalo endlini ngendlu kungase kuholele ezimpindelweni nasezifundweni zeBhayibheli zasekhaya nabantu abathakazelayo, abanye babo abangase babe yizinceku ezizinikezele zikaJehova. Yiqiniso, ukunqoba isizungu akusona isizathu sethu sokuhlanganyela enkonzweni, kodwa lokho kungaba omunye wemiphumela yalomsebenzi ojabulisayo nobusisiwe.—IzAga 10:22.
14. Yimiphi imisebenzi efanele ibe nomphumela omuhle kumaKristu ahlala ngokwehlukana noma ahlukanisile?
14 Bonke abantu bakaJehova bangazuza ngokomoya ngokuhlanganyela enkonzweni, ngokuhlanganyela emihlanganweni yobuKristu, ‘nokufuna uMbuso kuqala.’ (Mathewu 6:33) Njengoba lemisebenzi enempilo inemiphumela emihle ezincekwini zikaJehova zizonke, iminako enjalo ingase iwakhe amaKristu ahlala ngokwehlukana noma ahlukanisile. Cha, lemisebenzi ngeke izixazulule zonke izinkinga zawo, kodwa kufanele ithuthukise isimo sawo.
Umthandazo Ufeza Indima Ebalulekile
15. Umthandazo ungafeza yiphi indima ekuphileni kwalabo okufanele bazijwayeze ukuhlala bodwa?
15 Omunye udade ongumKristu okwadingeka azijwayeze ukuhlala yedwa futhi, wasizwa ‘ukuzigcina ematasa enkonzweni yasensimini . . . nokuvakashela labo abagulayo, abagugile, nabapholile.’ Kodwa wanezela: “Noma nini lapho ngizizwa nginesizungu, ngiyavakasha futhi ngithandazele amandla, ngazi ukuthi uSathane umatasa kakhulu.” Yebo, umthandazo osuka enhliziyweni ubalulekile ukuze sigcine ubuqotho bethu kuNkulunkulu. Imithandazo yamaKristu ahlukene noma ahlukanisile ingahlanganisa nezicelo zomoya kaJehova nesithelo sawo sokuzithiba ukuze alawule izinkanuko zobulili. (Luka 11:13; Galathiya 5:22, 23; Kolose 3:5, 6) Ngaphezu kwalokho, njengoba ukwenza izinqumo ezazenziwa yindoda kungase kulethe izinkinga kwabesifazane abathile abahlukene noma abahlukanisile, bangase futhi badinge ukuthandazela usizo lukaNkulunkulu ekunqumeni izindaba ngokuhlakanipha nasekubhekaneni nezilingo ezihlukahlukene.—Jakobe 1:2-8.
16. Ngokuqondene nokuhlala ngokwehlukana noma isehlukaniso, yini engashiwo ngemizwa yokuba necala?
16 Imizwa yokuba necala ingase ibe uvivinyo. Omunye umKristu wavuma: “Umuzwa wecala oba nawo ngenkathi yesehlukaniso, ngisho noma kungewena onecala, ungase ube namandla.” Yebo, imizwa yecala iyaqondakala uma ukwehlukana noma isehlukaniso kwenzeke ngenxa yokuba umuntu ngokungafanele enqaba ukugcwalisa izibopho zakhe zomshado. (1 Korinte 7:3-5) Kodwa uma ukwehlukana noma isehlukaniso kwenzeka ngenxa yesizathu esingokomBhalo ngemva kokukucabangela ngomthandazo, kuyoba okufanelekile ukuthandazela usizo lukaJehova lokunqoba imizwa engafanele yokuba necala. Kungase kwenezelwe ukuthi abadala bebandla kufanele baqikelele ukuba banikeze iseluleko esisekelwe eBhayibhelini futhi bangenzi iseluleko sabo sisinde ngendlela yokuthi umKristu enziwe azizwe enecala ngokuthola noma ukuvumela ukwehlukana noma isehlukaniso esivumelekile ngokweBhayibheli.
Ukulondoloza “Ukuthula KukaNkulunkulu”
17. Yini engasiza wonke amaKristu ukuba ajabule futhi azinze kulelizwe elikhathazekile?
17 AmaKristu ahlukene noma ahlukanisile ngokuvamile anezinkinga ezingavamile. Kodwa, ngezinga elithile, “zona lezozinhlupheko zehlela abazalwane [bethu] abasezweni.” (1 Petru 5:6-11) Ngokwesibonelo, ukushushiswa kuthinta bonke abakhonza uJehova, futhi amaKristu amaningi abhekana nezinkinga zezimali noma zempilo, ukudumazeka, izilingo, njalonjalo. Ngakho-ke, njengabanye oFakazi BakaJehova, umKristu ohlukene nomngane wakhe noma ohlukanisile udinga ukuhlangabezana njalo nezidingo ezingokomoya ngesifundo seBhayibheli, ukuba khona njalo emihlanganweni, ukukhuthala enkonzweni yasensimini, ukuphila okugcwele kwenkonzo engcwele, nokuthandaza njalo ukuze ahlale eseduze noJehova. (Mathewu 5:3) Ukwehluleka ukwenza kanjalo kuyofaka ingokomoya lanoma yimuphi umKristu engozini, kanti ‘ukufuna kuqala uMbuso’ kunikeza ufakazi kaJehova ngamunye othembekile isilinganiso esiphawulekayo senjabulo nesokuzinza kulelizwe elikhathazekile.
18. Yimiphi imibuzo nezinyathelo okudinga ukucatshangelwa ngokungathi sina abalingane abangamaKristu abahlala ngokwehlukana?
18 Ukuqina kwethu okungokomoya kuxhomeke ekusebenziseni komuntu siqu iZwi likaNkulunkulu. Ngakho-ke, uma ungumKristu ohlala ngokwehlukana nomngane womshado naye ozinikezele kuNkulunkulu, ingabe uye wasemukela iseluleko sikaPawulu kweyoku-1 Korinte 7:10-16? Ikakhulukazi uma ukwehlukana kuye kwaqhubeka isikhathi esithile, uyobe wenza kahle uma wenza ukubuyisana kube yindaba yomthandazo oqotho. Ungase futhi uzibuze: Yini uJehova ayilindele kimi njengomuntu oshadile? Akufanele yini abangane bomshado abangamaKristu bavumelanise ukuphila kwabo nezimfuneko zaphezulu zalabo abaye bangenela isibopho somshado? Kungenzeka yini ukuthi asisitholi isibusiso sikaJehova ngenxa yokuba siye sahluleka ukuhlonipha izifungo zethu zomshado? Cabanga nje ngokuhle okungafezwa uma ningaxoxa ngalezindaba ngokuthobeka, nithandaza ngobuqotho, futhi nisebenze ngenkuthalo ukuze nisebenzise iZwi likaNkulunkulu ekuphileni. Yeka ukuthi kungaba kuhle kanjani uma nobabili ningaxazulula izinkinga zenu zomshado futhi nijabulele ukuphila ndawonye ekhaya lokuphumula nokuthula!
19. NgokwabaseFilipi 4:6, 7, iyiphi into eyigugu engajatshulelwa yizo zonke izinceku zikaJehova?
19 Zonke izinceku zikaJehova ezithembekile ziyakudinga futhi zingakujabulela okuthile okuyigugu—“ukuthula kukaNkulunulu okudlula ukuqonda konke.” NjengamaKristu, singaba nalokuthula okuyigugu uma silalela amazwi kaPawulu: “Ningakhathazeki ngalutho, kepha kukho konke izicelo zenu mazaziwe nguNkulunkulu ngokukhuleka nokunxusa kanye nokubonga. Ukuthula kukaNkulunkulu okudlula ukuqonda konke kuyakulondoloza izinhliziyo zenu nemicabango yenu kuKristu Jesu.”—Filipi 4:6, 7.
20. (a) Kuyini “ukuthula kukaNkulunkulu”? (b) Kungakhathaliseki ukuthi siyini isimo sethu mayelana nomshado, yini okumelwe siyenze?
20 Lokho kuthula kuwukuthula okujulile okunikezwa uNkulunkulu nokungakhathazeki, ngisho naphakathi kwezimo ezinzima kakhulu. Kuvela ebuhlotsheni obuseduze noJehova nasolwazini lokuthi senza okuthokozisayo emehlweni akhe. Labo ‘abanalokuthula kukaNkulunkulu’ bavumela umoya wakhe ubashukumise, futhi abanqotshwa ukukhathazeka. Ngani? Ngoba bayazi ukuthi akukho lutho oluvunyelwa ukuba lwenzeke kubo olungavunyelwa phezulu. (Efesu 4:30; qhathanisa nezEnzo 11:26.) Ngakho kungakhathaliseki ukuthi asishadile noma sishadile, sihlukene noma sihlukanisile, masikwazise “ukuthula kukaNkulunkulu.” Futhi sengathi singaba nokuqiniseka okufana nalokho uDavide ayenakho, owathi: “Ngizakucambalala ngokuthula, ngilale ubuthongo, ngokuba wena Jehova wedwa ungihlalisa ngokulondeka.”—IHubo 4:8.
[Umbhalo waphansi]
a Ukuze uthole ingxoxo ngemikhaya enomzali oyedwa, siza ubheke INqabayokulinda kaMarch 15, 1981 amakhasi 19-32.
Ubungaphendula Kanjani?
◻ Kungaphansi kwaziphi izimo lapho kungashiwo khona ukuthi: “UNkulunkulu unibizile nibe-nokuthula”?
◻ Isizungu singancishiswa kanjani?
◻ Iyiphi indima okufanele ifezwe umthandazo ekuphileni komKristu ohlala ngokwehlukana nomngane wakhe noma ohlukanisile?
◻ Ungakuchaza kanjani “ukuthula kukaNkulunkulu” okulondoloza izinhliziyo zezinceku zikaJehova ezingashadile, ezishadile, ezihlala ngokwehlukana, noma ezihlukanisile?
[Isithombe ekhasini 29]
Umthandazo ungalethela wonke amaKristu athembekile “ukuthula kukaNkulunkulu” okuyolondoloza izinhliziyo zawo nemicabango