Ingabe Bonke Abantu Abalungile Baya Ezulwini?
“Umngcwabo wawusudlulile kodwa ukushaqeka okuhlasimulisayo kwakusekhona. . . . Kwakubonakala kungakholeki ukuthi emasontweni ambalwa nje ngaphambili umfanyana wami wayecathula, ubuso bakhe obuncane buchachambile ngenjabulo ngenxa yempumelelo. Kodwa manje uAndrew wayesefile! . . .
“Ngangilokhu ngimi efasiteleni, ngibuka phandle ebumnyameni bobusuku, ngifuna amazulu. ‘Uphi umfanyana manje?’ ngizibuza. ‘Ingabe usendaweni ethile laphaya phezulu ezulwini phakathi kwezinkanyezi?’”
UKUFA komntwana ngokunokwenzeka kungokuhlangenwe nakho okubuhlungu ukwedlula konke abazali abangaba nakho. Ùphi umntwana wethu manje?’ bayazibuza. Ùsezulwini noma kwenye indawo ethile?’ Izinkolo eziningi kakhulu zifundisa ukuthi izingane ezifayo ziya ezulwini. EGoli, eNingizimu Afrika, umbhalo oqoshiwe kwelinye itshe lethuna ufundeka kanje: “UNkulunkulu wayefuna imbali esaqhakaza, ingelosi yakhe yathatha enye engeyethu.” Kodwa omunye angase azibuze: ‘Kungani uNkulunkulu efuna “imbali esaqhakaza” lapho, ngokwenkolelo ethandwayo, esenazo kakade eziningi kangaka?’ Futhi abantu abangenakubalwa bayazibuza . . .
‘Izulu Liyindawo Enjani?’
Abantu abaningi banombono nje olufifi ngezulu. Abanye ngokukhululeka bakhuluma “ngenjabulo eba sezulwini lapho ufa.” Kodwa lithini iBhayibheli? Lona kanye ivesi lalo lokuqala lithi: “Ekuqaleni uNkulunkulu wadala izulu nomhlaba.” (Genesise 1:1) Lokhu kubhekisela emazulwini abonakalayo, ukuhleleka okubenyezelayo kwezinkanyezi nemithala. (Duteronomi 4:19) Kodwa kukhona futhi namazulu angabonakali. Ngakho-ke, iBhayibheli likhuluma ‘ngendawo kaJehova yobukhosi neyodumo.’—Isaya 63:15.
Ubani owayengowokuqala ukunyukela ‘kulendawo yobukhosi’ kaBaba wethu wasezulwini? INdodana yakhe ethandekayo, uJesu Kristu. Yathi: “Akakho owenyukele ezulwini, kuphela yena owehla ezulwini, iNdodana yomuntu.” (Johane 3:13) Lokhu kubonisa ngokusobala ukuthi azikho izidalwa ezingabantu ezaziye ezulwini. Kodwa uJesu wathembisa ukuthi abanye abantu babeyoya ezulwini. Ngaphambi nje kokuba anyukele ezulwini, wathi kubafundi bakhe abathembekile: “Ngiya ukunilungisela indawo . . . nginibuyisele kimi ukuba lapho ngikhona nibekhona nani.”—Johane 14:2, 3.
Khona-ke, ngokusobala, abanye abantu abalungile bayaya ezulwini. Kodwa ingabe bonke abantu abalungile baya ezulwini? Kuthiwani ngekhaya lomuntu—umhlaba? Ingabe uzobhujiswa ngempi yenuzi bese uba umlotha ophephetheka emkhathini? Ngokuqinisekile akunjalo. IBhayibheli lithi: “Isizukulwane siyamuka, isizukulwane siyeza, kepha umhlaba umi phakade.” (UmShumayeli 1:4) Futhi uMdali angawubhubhiselani lomhlaba omuhle, ngisho nakuba izingxenye zawo zingcoliswe abantu abanobugovu? IZwi likaNkulunkulu liyathembisa: “Abalungileyo bazakudla ifa lomhlaba, bahlale kuwo njalonjalo.”—IHubo 37:29.
Khona-ke, ngokusobala, umhlaba unekusasa elithakazelisayo. ENtshumayelweni yakhe edumile yaseNtabeni, uJesu wabikezela: “Babusisiwe abamnene, ngokuba bayakudla ifa lomhlaba.” (Mathewu 5:5) Ngaphezu kwalokho, incwadi yokugcina yeBhayibheli, isAmbulo, ibonisa ukuthi umhlaba uyoba ipharadesi. Ngokuqondene nesintu esilalelayo ithi: “Yena uNkulunkulu abenabo, azesule izinyembezi zonke emehlweni abo; ukufa akusayikuba-khona; nokudabuka, nokukhala, nobuhlungu akusayikubakhona.”—IsAmbulo 21:3, 4.
Kulokhu osekushiwo, kungabonwa ukuthi abanye abantu abalungile baya ezulwini, kuyilapho abanye beyojabulela ukuphila emhlabeni. Lokhu kusho ukuthi kuhileleke amaqembu amabili ahlukile. Lokho kungenzeka kanjani? Ngaphezu kwalokho, njengonina ka-Andrew, abaningi bakhathazeka ngalokho okwenzeka ezinganeni zabo ezifa zingabhapathiziwe. AmaRoma Katolika afundiswa ukuthi ziya endaweni ebizwa ngokuthi iLimbo. Ingabe ikhona indawo enjalo? Ingabe izingane ziya lapho? Izimpendulo ezanelisayo neziduduzayo zinikezwa esihlokweni esilandelayo.