Ikusasa Lomhlaba Elikhazimulayo Ngaphansi KoMbuso KaNkulunkulu

IBHAYIBHELI lithi “ukukholwa kungukuqiniseka ngezinto ezithenjwayo.” (Heberu 11:1) Njengoba sibonile esihlokweni esandulelayo, eminyakeni engaphezu kwengama-500 ngaphambi kokuzalwa kukaKristu, uNkulunkulu wabangela ukuba kulotshwe encwadini kaDaniyeli umbono ongokwesiprofetho wokuwa nokudlondlobala kwemibuso yezwe kusukela osukwini lukaDaniyeli kuze kube sosukwini lwethu. Ukunemba kwaleziprofetho kuyasiqinisekisa, kusinikeza isizathu esiqinile sokholo, ukuthi nezinye iziprofetho zikaDaniyeli zizogcwaliseka, futhi ngokushesha uMbuso kaNkulunkulu ngaphansi kukaKristu Jesu uzothatha isikhundla sohulumeni babantu.

Yeka ushintsho okuyoba yilo ngesintu! Ebheka phambili kulesosikhathi, uNkulunkulu ngokwakhe uthi: “Bheka, ngenza konke kube kusha.” (IsAmbulo 21:5) Ukucabangela ezinye zeziprofetho eziphefumlelwe ezisakhela umfanekiso walesosikhathi esijabulisayo kuyosisiza ukuba sibone ukuthi empeleni izinto ziyoba ‘zintsha’ kanjani, ukuthi ziyobe zihluke kanjani ngokuphelele kulokho esikubonayo namuhla ngaphansi kokubusa kwabantu. Ngempela, lokho iBhayibheli elikushoyo ngekusasa lomhlaba wethu nangokuphila kuwo kuyamangalisa. Cabangela lokhu:

Ubugebengu nobudlova kuyophela. “Ngokuba ababi bazakuchithwa . . . omubi angabe esabakho.” Abaphilayo “bayakuhlala, kube yilowo nalowo phansi komvini wakhe naphansi komkhiwane wakhe; akakho oyakubesabisa, ngokuba umlomo kaJehova-Sebawoti ukhulumile.”—IHubo 37:9, 10; Mika 4:4.

Ukwehlukana kobuzwe nobuhlanga, nezimpi okuzibangelayo, kuyobe kunyamalele. “Isizwe asiyikuphakamisela isizwe inkemba, zingabe zisafunda ukulwa.”—Isaya 2:4.

Ukuntuleka kwezindlu, ukungabi namakhaya, nokuswelakala kwemisebenzi kuyoba izinto zesikhathi esidlule. UIsaya wabikezela: “Bayakwakha izindlu, bahlale kuzo; bayakutshala izivini, badle izithelo zazo . . . nomsebenzi wezandla zabakhethiweyo bami uyakugugela kubo.”—Isaya 65:21, 22.

Indlala esabekayo, njengaleyo eye yakhathaza izingxenye zeAfrika muva nje, iyothathelwa isikhundla yinala yokudla kwabo bonke. “Kuyakubakhona inala kakolweni ezweni esiqongweni sezintaba.” “Umhlaba uthelile izithelo zawo; uNkulunkulu, uNkulunkulu wethu, uyasibusisa.”—IHubo 72:16; 67:6, 7.

Ngaphezu kwalokho, kuyoba nempilo nokuphila esiyojabulela ngakho lezozibusiso. Ngisho naphakathi nenkonzo kaJesu yasemhlabeni, kwashiwo ngeqiniso ukuthi “izimpumputhe ziyabona, izinyonga ziyahamba, abanochoko bayahlanjululwa, izithulu ziyezwa.” Nokho, kuyogcwaliseka isithembiso esikhulu kakhulu: “[UNkulunkulu] azesule izinyembezi zonke emehlweni abo; ukufa akusayikubakhona; nokudabuka, nokukhala, nobuhlungu akusayikubakhona; ngokuba okokuqala kudlulile.”—Luka 7:22; IsAmbulo 21:4.

Yeka ushintsho oluhle! Yeka ukukhululeka konke lokhu okuyokulethela isintu esikhathazekile! Sikukhuthaza ukuba uzithobe ngisho namanje eMbusweni kaNkulunkulu, ukuze nawe futhi uthole izinzuzo eziyovela kulolushintsho oluqalisa inkathi entsha yokubuswa kwezwe.

[Isithombe ekhasini 7]

Abantu abaphilayo manje bangabheka phambili ezibusisweni ezimangalisayo—ukuphela kwempi, ubugebengu, ubumpofu, ukugula, ngisho nokufa. Ungalijabulela yini ikusasa elinjalo?