Ukuphila NeNkonzo KaJesu
Ukungakholwa KwabaFarisi Kwenkani
ABAZALI besinxibi esake saba impumputhe bayesaba lapho bebizelwa phambi kwabaFarisi. Bayazi ukuthi kuye kwanqunywa ukuba noma ubani obonisa ukholo kuJesu axoshwe esinagogeni. Ukunqanyulwa okunjalo kokuba nobudlelwane nabanye emphakathini kungabangela ubunzima obukhulu, ikakhulukazi emkhayeni ompofu. Ngakho abazali baqaphile.
“Lo uyindodana yenu enithi ngayo yazalwa iyimpumputhe na?” kubuza abaFarisi. “Pho, isibona kanjani manje na?”
“Siyazi ukuthi to uyindodana yethu nokuthi wazalwa eyimpumputhe,” kuqinisekisa abazali. “Kepha ukuthi usebona kanjani kalokhu asazi, nokuthi ngubani ovule amehlo akhe asazi.” Ngokuqinisekile indodana yabo iye yabatshela konke okwenzekile, kodwa ngokuhlakanipha abazali bathi: “Mbuzeni yena, ukhulile, uzozikhulumela yena.”
Ngakho-ke, abaFarisi baphinde babize leyondoda. Manje bazama ukuyesabisa ngokuphawula ukuthi baye baqoqa ubufakazi obubeka uJesu icala. “Mnike uNkulunkulu udumo,” beyala. “Thina siyazi ukuthi lowomuntu uyisoni.”
Indoda eke yaba impumputhe ayikuphikisi ukusola kwabo, iphawula: “Nokuba uyisoni angazi.” Kodwa iyanezela: “Kunye engikwaziyo, ukuthi bengiyimpumputhe, manje sengiyabona.”
Bezama ukuthola iphutha ebufakazini bakhe, abaFarisi bayabuza futhi: “Wenzeni kuwe na? Uwavule kanjani amehlo akho na?”
“Kade nginitshela,” kukhononda leyondoda, “kepha anizwanga; nifunelani ukuzwa futhi na?” Ngokubhuqa iyabuza: “Niyafuna yini nani ukuba ngabafundi bakhe na?”
Lempendulo iyabathukuthelisa abaFarisi. “Nguwe ongumfundi wakhe,” beyisola, “kepha thina singabafundi bakaMose. Siyazi ukuthi uNkulunkulu wakhuluma kuMose, kodwa to asimazi lapha evela khona.”
Sibonisa ukumangala, isinxibi esithobile siyaphendula: “Lokhu kuyisimangaliso ukuthi nina anazi lapho evela khona, ingani uvulé amehlo ami.” Futhi kufanele kusilethe kusiphi isiphetho? Isinxibi sikhomba enkulumweni eyaziwayo: “Siyazi ukuthi uNkulunkulu akazizwa izoni, kodwa uma umuntu emesaba uNkulunkulu, ayenze intando yakhe, uyamuzwa lowo. Selokhu kwathini akuzange kuzwakale ukuthi ukhona owavula amehlo ozelwe eyimpumputhe.” Khona-ke, isiphetho kufanele sibe sobala: “Uma to ebengaveli kuNkulunkulu, ubengenakwenza-lutho.”
AbaFarisi abanayo impendulo yenkulumo enengqondo neqonde kangaka futhi ecacile. Abafuni ukubhekana neqiniso, ngalokho bahlambalaza lendoda: “Wena wazalwa ezonweni ngokwempela, wena usifundisa thina na?” Kulokhu, balahlela leyondoda ngaphandle, ngokusobala beyixosha esinagogeni.
Lapho uJesu ezwa ngalokho abakwenzile, uyayithola leyondoda futhi uthi: “Uyakholwa yiNdodana kaNkulunkulu na?”
“Ingubani, Nkosi,” kuphendula isinxibi esake saba yimpumputhe, “ngize ngikholwe yiyo, na?”
“Okhuluma nawe, yiyona,” kuphendula uJesu.
Ngokushesha, lendoda ikhothama phambi kukaJesu futhi ithi: “Ngiyakholwa, Nkosi.”
Khona-ke uJesu uyachaza: “Mina ngizele ukwahlulela kulelizwe ukuba abangaboniyo babone, nababonayo babe-yizimpumputhe.”
Kulokho, abaFarisi abalalele bayabuza: “Pho, nathi siyizimpumputhe na?” Uma bebengavuma ukuthi babeyizimpumputhe ngokwengqondo, kwakuyoba nebhaxa lokuphikisa kwabo uJesu. Njengoba uJesu ebatshela: “Ukuba beniyizimpumputhe, ngabe aninasono.” Nakuba kunjalo, ngobulukhuni benhliziyo bagomela ngokuthi abazona izimpumputhe futhi abadingi ukukhanyiselwa okungokomoya. Ngakho uJesu uyaphawula: “Kepha manje nithi: Siyabona; isono senu sihlezi.” Johane 9:19-41.
◆ Kungani abazali besinxibi esake saba yimpumputhe besaba lapho bebizelwa phambi kwabaFarisi, futhi baphendula kanjani ngokuqaphile?
◆ AbaFarisi bazama kanjani ukwesabisa indoda eyake yaba impumputhe?
◆ Iyiphi inkulumo enengqondo yaleyondoda ethukuthelisa abaFarisi?
◆ Kungani abaFarisi bengenabhaxa lokuphikisa kwabo uJesu?