Ukubuswa Kwezwe Kuyashintsha

UKUBA ubukwazi ukukhetha, hlobo luni lukahulumeni obungathanda ukuphila ngaphansi kwalo? Cishe abaningi bethu babengakhetha uhulumeni ogxilile onikeza isilinganiso esinengqondo senkululeko yomuntu siqu. Besingathanda uhulumeni okwazi ukuvimbela ubugebengu, ukuthuthukisa ukuthula, ukulondoloza umthetho wezenhlalo, kanye nokwandisa ukuchuma kwezinto ezibonakalayo. Ngokuqinisekile, besingakhetha uhulumeni ongacindezeli noma ongonakele.

Ngokudabukisayo, ohulumeni abaningi abazange babe njalo. Uma sicabangela izwe njengoba linjalo engxenyeni yokugcina yalekhulu lama-20 leminyaka, yini esiyibonayo? Ubumpofu, ukonakala, ukwehluleka, ukucindezela, ubandlululo kwezenhlalo, ubugebengu, nokwesaba kwezizwe zonke. Lokhu kuwumphumela wokugcina wezinkulungwane zeminyaka yokubusa kukahulumeni wabantu.

Yebo, kuyiqiniso, ukuthi abanye ababusi babelungile futhi benekhono. Futhi ezinye izimiso zohulumeni uma ziqhathaniswa ziye zaba ezigxilile futhi eziphumelelayo okwesikhashana. Kodwa ukwehluleka kohulumeni babantu sebebonke ukwenza lokho esinomuzwa wokuthi kufanele bakwenzele isintu kufakazela iqiniso lamazwi eBhayibheli: “Indlela yomuntu ayikuye uqobo; akukuyo indoda ukuba ihambe, iqondise izinyathelo zayo.” (Jeremiya 10:23) Ngamanye amazwi, umuntu wayengenzelwanga ukuba azibuse ngokwakhe ngaphandle kosizo.

Kungalesosizathu kukuhle ukwazi ukuthi ukubuswa kwezwe kuyashintsha. Sisho ukuthini ngalamazwi? Sisho ukuthi ukubuswa kokuphila kwabantu kwansuku zonke ngokushesha kuyoba sezandleni zohlobo lukahulumeni olusha ngokuphelele oluyophumelela ngokuphelele. Lolushintsho olukhulu lukahulumeni lwabikezelwa uNkulunkulu. Ngempela, luyiso kanye, isihloko seBhayibheli.

Ukukhathalela KukaNkulunkulu Uhulumeni

UNkulunkulu ubekukhathalela ngaso sonke isikhathi ukubuswa kwesintu. Uqaphelisisa ngokuseduze ukuthi ohulumeni babantu bawufeza ngezinga elingakanani umthwalo wabo wemfanelo, futhi kwesinye isikhathi ubabizela ukuba balandise. Ngempela, imilando yezinye zezimiso ezivelele zohulumeni zeminyaka yomlando eyizi-2 500 edlule zabikezelwa eBhayibhelini. Encwadini kaDaniyeli, eyabhalwa cishe eminyakeni engaphezu kwama-500 ngaphambi kokuzalwa kukaKristu, kwalotshwa iziprofetho ezazibikezela ukuwa kweBabiloni lasendulo, kuhlanganise nokudlondlobala nokuwa koMbuso wamaMede namaPheresiya, waseGrisi, nowaseRoma. Iziprofetho zabikezela ngisho nokukhula koMbuso Wezwe WamaNgisi NamaMelika wosuku lwethu. Ukucabangela kafushane ezinye zaleziprofetho kuyosisiza ukuba siqonde ukuthi amazwi athi ukubusa kwezwe kuyashintsha asho ukuthini.

Esokuqala saleziprofetho ezimangalisayo sasiyiphupho eliphefumlelwe lapho kulona imibuso yezwe yezombangazwe kusukela osukwini lukaDaniyeli kuze kube sesikhathini sethu yafanekiselwa isithombe esikhulu. Khona-ke, itshe elalingaqheshulwanga ngazandla, lasishaya lasiphihliza lesithombe. Lelitshe lagandaya yonke imibuso yezwe yaba uthuli, “njengamakhoba ezibuya zasehlobo, kwasuswa ngumoya, akutholwanga-ndawo.”—Daniyeli 2:31-43.

Sona kanye isahluko esifanayo sikaDaniyeli siyachaza ukuthi lokhu kwakushoni. Sibonisa ukuthi ohulumeni babantu abehlulekayo babeyothathelwa isikhundla okuthile okuphakeme ngokungenakuqhathaniswa. Siyasitshela: “Ezinsukwini zalawomakhosi uNkulunkulu wasezulwini uyakumisa umbuso ongasoze wachithwa nobukhosi bawo bungayikushiyelwa kwabanye abantu, kepha uyakuchoboza, uqede yonke lemibuso, wona uqobo ume phakade. . . . Iphupho liqinisile, nencazo yalo iyiqiniso.”—Daniyeli 2:44, 45.

Kodwa lokho kwakungesona isiphetho sendaba. Embonweni wesibili, imibuso yezwe elandelanayo yafanekiselwa izilo ezinkulu ezazinezici zombuso ezaziwufanekisela. UDaniyeli wabe esevunyelwa ukuba abone konke kuze kufike esihlalweni sobukhosi sasezulwini esisabekayo ‘somdala wezinsuku,’ futhi waboniswa okuthile okwakungezukwenzeka osukwini lwakhe kodwa phakathi nokubusa koMbuso Wezwe WamaNgisi NamaMelika wosuku lwethu. Wabona iNkantolo kaJehova yobukhosi yasezulwini yahlulela lemibuso yezwe. (Daniyeli 7:2-12) Njengoba amavesi alandelayo ebonisa, kwakhishwa isinqumo saphezulu soshintsho ekubuseni. Kwakuzonikezwa bani lokhu kubusa?

Othile OnjengeNdodana Yomuntu

UDaniyeli unikeza impendulo evusa amadlingozi:

“Ngabona emibonweni ebusuku; bheka, kwafika namafu ezulu onjengendodana yomuntu; yafika komdala wezinsuku, yasondezwa phambi kwakhe. Yanikwa ukubusa, nobukhosi, nombuso, ukuze bonke abantu, nezizwe, nezilimi, bayikhonze; ukubusa kwayo kungukubusa okuphakade okungayikudlula, nombuso wayo yiwo ongayikuchithwa.”—Daniyeli 7:13, 14.

Kanjalo uDaniyeli wasetshenziswa ukuba abikezele ukuthi “omdala wezinsuku,” uJehova uNkulunkulu ngokwakhe, uzoqeda ukubusa kabi kohulumeni babantu abacindezelayo. Uzomisa esikhundleni sabo uhulumeni omuhle kakhulu ukwedlula noma yimuphi isintu esingawucabanga—uMbuso ongabonakali osebenzisa amandla negunya usezulwini. Kodwa ngubani lona “onjengendodana yomuntu” ozokwamukela uMbuso?

Asishiywa sinokungaqiniseki. UJesu wazichaza ‘njengeNdodana yomuntu.’ Wachaza ukuba khona kwakhe njengesikhathi lapho “iNdodana yomuntu iza ngenkazimulo yayo nezingelosi zonke ezingcwele kanye nayo.” (Mathewu 25:31) Lapho umpristi omkhulu ongumJuda efuna ngenkani ukuba uJesu atshele inkantolo ukuthi unguye yini “uKristu, iNdodana kaNkulunkulu,” uJesu waphendula: “Usho khona. Nokho, ngithi kini: Kusukela manje niyakubona iNdodana yomuntu ihlezi ngakwesokunene saMandla, iza emafwini ezulu.”a—Mathewu 26:63, 64.

Umbuso Wezwe Wokugcina Wabantu

Eminyakeni engaba ngama-600 ngemva kwesikhathi sikaDaniyeli, umphostoli uJohane waloba incwadi yeBhayibheli yesAmbulo ngaphansi kokuphefumlelwa kwaphezulu. Leyoncwadi ibhekisela kulemibuso yezwe ‘njengamakhosi’ anamandla, ithi: “Futhi zingamakhosi ayisikhombisa; ayisihlanu asewile, enye ikhona, enye ayikafiki; nanxa isifikile, kumelwe ukuba ihlale isikhashana.”—IsAmbulo 17:9b, 10.

Ayisihlanu ayesewile kakade. Lapho uJohane eloba lokhu kwakuyiGibithe, iAsiriya, iBabiloni, owamaMede namaPheresiya, neGrisi. UMbuso WamaRoma ‘wawusekhona.’ Ngokusobala, owesikhombisa, uMbuso Wezwe WamaNgisi NamaMelika wesikhathi sethu, wawungakafiki. Ngokusho kwesAmbulo, awukho umbuso wezwe olandela owesikhombisa—lona okhona namuhla. Lona ungowokugcina. Ayisakuyibakhona.

Nokho, lokho akufanele kube umqondo owethusayo—ungovusa amadlingozi! Kusho ukuthi ukubusa kwabantu okungalungile, kwezimpi kusondela esiphelweni sakho. Iziprofetho ziyahlangana ekulandiseni ngoshintsho olukhulu endleleni umhlaba obuswa ngayo—ushintsha kusuka kuhulumeni womuntu wobugovu kuya kuhulumeni wasezulwini wokulunga, uMbuso kaNkulunkulu.

Uhulumeni WoMbuso

Kodwa uyini lowoMbuso? Ungokuthile okuphakeme kakhulu kunethonya lokwenza okuhle ezinhliziyweni zabantu nasekuphileni kwabo. Futhi ungokuthile okuphakeme kakhulu kunokuphila kwalokho okubizwa ngokuthi isonto lobuKristu. UMbuso kaNkulunkulu uwuhulumeni ongokoqobo. Unenkosi, ababusi abakanye nayo, izwe oyolibusa, nezikhonzi. Futhi uyoletha izibusiso ezimangalisayo eziphawulwe ekuqaleni.

UJesu ubizwa ngokuthi iNkosi yoMbuso. Wazifanisa nomuntu wohlanga lobukhosi “owaya ezweni elikude eyozithathela umbuso, abuye.” Ngalesosikhathi esizayo, wathi: “Nxa iNdodana yomuntu iza ngenkazimulo yayo nezingelosi zonke ezingcwele kanye nayo, khona izakuhlala esihlalweni sayo senkazimulo.”—Luka 19:12; Mathewu 25:31.

Yayizofika nini “iNdodana yomuntu”? Akudingekile ukuba siyiqagele impendulo. Amazwi kaJesu lapha ayingxenye yempendulo yakhe embuzweni othi: “Nesibonakaliso sokuza kwakho nesokuphela kwezwe siyakuba yini na?” (Mathewu 24:3, 30) Njengoba kuye kwaboniswa ngokuvamile ezinhlwini zalomagazini, lokho ‘kubakhona’ kwaqala ngokungabonakali emazulwini ekupheleni ‘kwezikhathi zabezizwe’ ngo-1914.b—Luka 21:24.

Njengoba nje isAmbulo isahluko 12 sasho ukuthi kwakuzokwenzeka, uJesu wabe esethatha amandla akhe okubusa futhi waphonsa uSathane endaweni yasemhlabeni esuka ezulwini. Izwi ezulwini lamemeza: “Kalokhu insindiso namandla nobukhosi ngokukaNkulunkulu wethu, nombuso ngokaKristu wakhe, ngokuba uphonswe phansi ummangaleli wabazalwane bethu.” Lokho kuchaza ukuthi kungani izimo zezwe ziqhubeka ziba zimbi kusukela ngalesosikhathi. Ngakho, izwi ezulwini laqhubeka: “Maye kuwe-mhlaba nakuwe-lulwandle, ngokuba uSathane wehlele kini enolaka olukhulu, azi ukuthi unesikhathi esifushane!”—IsAmbulo 12:9-12.

Lesosikhathi esifushane sizophela ngokushesha. Ezahlukweni ezimbalwa kamuva, uJesu okhazinyulisiwe ubonwa egibele ihhashi elimhlophe. Ubizwa ngokuthi “uLizwi kaNkulunkulu,” futhi ‘uyoshaya izizwe’ futhi ‘azibuse ngentonga yensimbi’-njengoba nje uDaniyeli abonisa ukuthi izizwe zaziyochotshozwa uMbuso kaNkulunkulu onjengetshe owawuzokhula ukuze ugcwalise umhlaba wonke.—IsAmbulo 19:11-16; Daniyeli 2:34, 35, 44, 45.

Imibuso yabantu yezombangazwe enjengesilo ngeke iphinde icindezele isintu!

Ababusi Abakanye Naye

Kodwa kunokwengeziwe. UDaniyeli waphefumlelwa ukuba asho ukuthi uMbuso wawungeke unikezwe kuphela “onjengendodana yomuntu” kodwa futhi “isizwe sabangcwele boPhezukonke.”—Daniyeli 7:27.

Bangobani laba? Ngokuphathelene neWundlu, uKristu Jesu isAmbulo sithi: “Wabathengela uNkulunkulu ngegazi lakho abavela kuyo yonke imindeni, nezilimi, nabantu, nezizwe, wabenza babe ngumbuso nabapristi kuNkulunkulu wethu, babuse emhlabeni.” Siqhubeka futhi sithi bayakuba “ngabapristi bakaNkulunkulu nabakaKristu, babuse kanye naye iminyaka eyinkulungwane.” Inani labo linikezwa njengeliyizi-144 000.—IsAmbulo 5:9, 10; 14:1; 20:6.

Laba yibo uNkulunkulu oPhakeme abakhethayo ukuze bahlanganyele kuhulumeni wezwe neNdodana yakhe, uJesu Kristu. Ingabe ikusasa lethu lingaba elilondekile ezandleni zabanye kunezalaba uNkulunkulu abakhethayo? Cha, loMbuso uyoba uhulumeni ongcono kakhulu kuneyake yaba khona—odlula kude noma yini umuntu ake ayibona. Ngaphansi kokubusa kwawo, wonke umhlaba uyoguqulwa ube yiPharadesi uNkulunkulu ayelihlosile kwasekuqaleni.

Funda isihloko esilandelayo futhi ubone ukuthi ingabe lolu uhlobo lukahulumeni owawungakhetha ukuphila ngaphansi kwalo yini.

[Imibhalo yaphansi]

[Ibhokisi ekhasini 4]

“Isihloko Esikhulu Sokufundisa KukaJesu”

“Isihloko sombuso kaNkulunkulu sibalulekile ekushumayeleni kukaJesu.”—New Catholic Encyclopedia.

“[UMbuso kaNkulunkulu] ngokuvamile ucatshangelwa njengesihloko esikhulu sokufundisa kukaJesu.”—Encyclopædia Britannica.

Kodwa wagcina nini ukuzwa kuxoxwa ‘ngalesosihloko esikhulu sokufundisa kukaJesu’ esontweni?

[Ibhokisi ekhasini 5]

Ukudideka NgoMbuso KaNkulunkulu

Abanye abantu baye bacabanga ukuthi “isonto elisemhlabeni” liwuMbuso kaNkulunkulu, kuyilapho abanye beye bakholelwa ukuthi izwe lamanje “liyothuthuka ngaphansi kwethonya lobuKristu lize libe uMbuso” Abanye futhi bathi uMbuso kaNkulunkulu “uwukubusa kukaNkulunkulu enhliziyweni nasekuphileni komuntu ngamunye.”

Kodwa ingabe yilokho kuphela okungashiwo ngoMbuso kaNkulunkulu—isimiso senkolo, ushintsho lwezombangazwe olwenzeka kancane kancane, noma isimo esithile esingokomoya ezinhliziyweni zabantu?