Ukuzwakalisa Iqiniso Ezintabeni ZaseAustria
KUNGOKUFANELE ngeAustria ukuba yaziwe ngenxa yezintaba zayo eziluhlaza, iVienna Woods, neDanube enhle ecwebile. Lezi nezinye izinto ezaziwayo zikhanga izivakashi ezivela kuwo wonke umhlaba ziza kulelizwe elincane eliphakathi kweYurophu.
Ngesikhathi esivelele sezivakashi ngoAugust odlule, elinye iqembu lezivakashi ezicishe zibe ikhulu ezivela kwamanye amazwe ayi-17 zeza ukuzobona okuthile okuhluke ngokuphelele. Zeza eVienna ukuzohlanganyela ukunikezelwa kwehhovisi legatsha elisha laseAustria leWatch Tower Society, eliqondisa umsebenzi wokushumayela ngoMbuso woFakazi BakaJehova eAustria.
Kusukela Esiqalweni Esincane
Ihhovisi legatsha lokuqala leNhlangano eAustria lamiswa eVienna ngo-1923. Lokho kwakungaphambi kokuphela kweminyaka eyishumi, ngemva kokuhanjelwa kokuqala kwabane ababenze izikhokhelo zeWatchtower kulelodolobha. Ngalesosikhathi, inani labamemezeli boMbuso lase lenyukele ngasekhulwini. Kwase kufika iMpi Yezwe II nokuba khona kobuNazi, isikhathi sezilingo ezinzima nenhlupheko ngabazalwane abathembekile. Kodwa baphikelela, futhi ngasekupheleni kwempi, amalungu abo ayesedlula ama-700.
Ukuze kunakekelwe umsebenzi owandayo, ngo-1957 kwathengwa isakhiwo eGallgasse 44. Eminyakeni eminingi, kwenziwa ushintsho oluningana esakhiweni ukuze kulungiselelwe ukwanda okuqhubekayo komsebenzi woMbuso ezweni. Ngo-1973 inani labamemezeli boMbuso ladlula izi-10 000. Kanjalo, ngasekuqaleni kwawo-1980, kwenziwa amalungiselelo okwandisa. Ekugcineni, izithiyo ezingokomthetho zapheliswa, nezakhiwo ezibhekene negatsha zatholakala. NgoMarch 1983 inkampane yangaphandle yaqala ukwenza uphahla. Ngemva kwalokho, abazalwane baqhubeka futhi basiqeda isakhiwo.
“Sakha IBethel Yethu”
OFakazi abavela kuzo zonke izingxenye zeAustria bazinikela ngokuzithandela ukwenza umsebenzi. Isiqubulo sasithi “sakha iBethel yethu.” Ngenye impela-sonto beza ngezimoto nangamabhasi, baze bafinyelela e-190. Kwalinganiselwa ukuthi oyedwa kubamemezeli abahlanu kuleyondawo waba nengxenye emsebenzini. Abanye babeyizingcweti—izazi zokwakha, ochwepheshe bezamapayipi, njalonjalo. Abanye banikela ngezinto zokwakha noma banikela ngezindlu zokusebenzela. Abanye bayeka ngisho nemisebenzi yabo base beza ukuzosebenza sonke isikhathi sokwakha.
Omunye umzalwane owachitha ingxenye yesikhathi sakhe sokuphumula esakhiweni wabhala: “Ngithanda ukunibonga futhi ngesonto elimangalisayo lesikhathi sokuphumula. Bekufana nokuba sesiqhingini esithokomele esizungezwe ulwandle oluhlokomayo lwesintu. Bekukuhle ukujabulela ukuqabula okunjalo okungokwenyama nokungokomoya ngaphandle kokukhokha.” Ngisho nabancane baba nengxenye. Oneminyaka eyisishiyagalombili wabhala: “Ngizwile ukuthi nidinga imali yokwakha iBethel. Ngithanda ukunithumela enye yemali engiyigcinile. Ngifaka amashilling angama-200 [cishe u-R32] nalencwadi.” Abanye babebhaka isinkwa noma bekha amaberry bese benza iziphuzo zababezosiza. Abamemezeli emabandleni angama-36 eVienna babenikela ngokudla okuqabulayo ngayo yonke iMigqibelo yesikhathi sokwakha.
Ukulungela Ukwanda Okuqhubekayo
Ngokuvuselelwa kwesakhiwo sokuqala (indawo engaphambili) nokwandiswa kwezakhiwo ezintsha ezizungezile, isakhiwo segatsha manje sikhulu ngokuphindwe kathathu kunakuqala, kanye nendawo ephelele yaphansi endlini engamamitha-skwele ayizi-5 400. Isakhiwo sihlanganisa amakamelo angama-38, ihholo lokudlela labantu abangama-80, ikhishi elisha, nelondolo. IHholo LoMbuso elisha lingemuva kwesakhiwo sakuqala. Amahhovisi ezokuqondisa neminye iminyango ehlukahlukene athatha izakhiwo ezisele.
UAugust 22, 1987, kwakuwusuku lokunikezelwa kwezakhiwo zegatsha ezintsha. Phakathi kwezimenywa ezingama-282 kwakunezivakashi ezingaba yikhulu ezivela emagatsheni ayi-16 aseYurophu nesisodwa saseKorea. Futhi kwakukhona abantu abadala baseAustria abangaba ikhulu ababekhona ngesikhathi sezilingo Zempi Yezwe II. Omdala kunabo bonke uMaria Hack owayeneminyaka eyi-102 ovela eGraz. Abantu abayizi-6 810 kwezinye izindawo eziyisikhombisa nabo basizwa isimiso ngokuxhunywa kwezingcingo.
Izikhulumi eziyinhloko esimisweni sokunikezelwa zazihlanganisa uT. Jaracz noM. G. Henschel beNdikimba Ebusayo yoFakazi BakaJehova eBrooklyn, eNew York. Ekhulumela isihloko esithi “Amagatsha Athela Izithelo Kube Inkazimulo KuJehova,” uMzalwan’ uJaracz wasebenzisa uJohane 15:2, 8 ukuze abonise ukuthi ‘amagatsha’ akhonza inkazimulo kaJehova lapho ethela izithelo eziningi. Izakhiwo zegatsha ezintsha ziyonikela kakhulu ekutheleni izithelo kube inkazimulo kuJehova.
Enkulumweni yokunikezela, uMzalwan’ uHenschel wagcizelela ukuthi uJehova uNkulunkulu wenjongo. Akenzanga nje kuphela ukuba injongo yakhe yaziwe kusengaphambili kodwa futhi uye wabonakalisa ukuthi unekhono lokuyiphumelelisa. Naphezu kokuphikisa kukaSathane, singaqiniseka ukuthi injongo kaNkulunkulu iyogcwaliseka.
Njengoba isimiso sisondela esiphethweni, bonke ababekhona bazizwa bekhuthaziwe ukuba baqhubeke nomsebenzi wokushumayela ngamandla avuselelwe. Ngokukhanyayo, izakhiwo ezinhle nezintsha ziyophelelisa oFakazi baseAustria ukuba bazwakalise izindaba ezinhle zoMbuso ngisho nangezinga eliphakeme kulelizwe elinezintaba, kube inkazimulo nodumo kuMdali oMuhle, uJehova.
[Izithombe ekhasini 23]
Isakhiwo esisha, sibhekwa ngasengadini
IHholo LoMbuso
Umnyango omkhulu wokungena
Isakhiwo esisha, nesimo esilungiswe kabusha esingakwesokudla